“Ang Gahom nga Atong Gitawag og Grasya,” Alang sa Kalig-on sa mga Kabatan-onan, Hulyo 2022.
Tabang sa Kinabuhi
Ang Gahom nga Atong Gitawag og Grasya
Ang grasya sa Dios makatabang kanato, bisan unsa pa nga mga hagit ang atong atubangon.
Litrato gikan sa Getty Images
Mitambong ko sa lubong sa usa ka kanhi miyembro sa ward kinsa namatay tungod sa paghikog human sa dugay nga panglimbasog sa depresyon. Nagmasulub-on ko samtang nagbangotan ko sa iyang pagkawala uban sa iyang mga higala ug pamilya.
Ang depresyon ug ubang mga hagit sa kahimsog sa pangisip mahimong komplikado ug lisod alang sa mga tawo nga nagsagubang niini ug alang sa tanang naghigugma kanila. Ang maayong balita sa ebanghelyo mao nga si Kristo nagtanyag og paglaom ug tabang pinaagi sa Iyang gasa sa grasya.
Usa ka pagtuon nga naglambigit sa 600 ka young adult sa Brigham Young University nagpakita nga kadtong kinsa nakasabot sa grasya ni Jesukristo adunay mas ubos nga mga lebel sa depresyon, kabalaka, pagkamahingpiton [perfectionism], ug kaulaw.1 Unsay nasabtan niini nga mga batan-on mahitungod sa grasya nga mihimo og mahinungdanon kaayo nga kalainan sa ilang mga kinabuhi?
Ang Dios Walay Kataposang Naghigugma Kanato
Diha sa pagtuon, nagtuo ang pipila ka tawo nga ang Dios ug si Jesukristo mohigugma ug motabang lamang kanila kon sila hingpit na. Kadto nga mga tawo mas nanglimbasog gayod kay sa uban kinsa nakasabot nga ang Dios ug si Jesukristo walay kataposang naghigugma kanila ug anaa diha kanunay alang kanila.
Sa Iningles, ang pulong nga grasya adunay daghan nga kahulogan. Mahimong magpasabot kini og pagkaambongan, pagkamabination, o pagkamatinahoron. Sa Hebreo, ang pulong nagpasabot og panabang o panagdait nga gihatag uban ang kaluoy. Tingali kini ang nagpasabot kon nganong ang mga Kristiyano latas sa mga siglo migamit sa pulong nga grasya aron sa paghulagway sa panabang, panagdait, ug gugma sa Dios.
Ang Dios Nagtinguha sa Pagtabang Kanato
Ang mga Santos sa Ulahing mga Adlaw nakasabot nga ang grasya nagpasabot og labaw pa sa usa ka kinaiya lamang sa Dios. Ang grasya naghulagway usab kon sa unsang paagi Siya motabang kanato samtang maningkamot kita nga mahimong sama Kaniya (tan-awa sa Moroni 10:32). Si Presidente Dieter F. Uchtdorf, kanhi Ikaduhang Magtatambag sa Unang Kapangulohan, mipasabot nga ang grasya mao “ang balaang panabang ug gasa sa kalig-on pinaagi diin kita nagtubo gikan sa masalaypon ug may kinut[o]bang mga tawo nga kita karon mao ngadto sa gihimaya nga mga tawo.”2
Sa pagtuon nga bag-ohay lang nga gihisgotan, ang mga batan-on nga naglantaw sa Dios ug ni Jesukristo isip andam, matinguhaon, ug makahimo sa pagtabang kanila adunay mas menos nga mga hagit sa kahimsog sa pangisip kay sa niadtong mibati nga sila nag-inusara lang.
Ang Dios Motagbo Kanato Kon Hain Kita
Daghan ra kaayong mga tawo ang mibati nga layo ra kaayo kanila ang tabang sa Dios tungod kay ingon og wala pa nila kini makab-ot. Ang kamatuoran mao nga, ang grasya usa ka gasa. Dili na ninyo kinahanglan kab-oton ang usa ka gasa. Kamo kinahanglan lamang nga mopili sa pagdawat niini.
Diha sa pagtuon, dihay mas menos nga mga panglimbasog sa kahimsog sa pangisip taliwala niadtong kinsa nakasabot nga ang Dios motabang kanato bisan asa man kita ug bisan unsa ang atong nabuhat. Si Elder D. Todd Christofferson sa Korum sa Napulog Duha ka Apostoles mitudlo “Wala kinahanglana nga mokab-[o]t kita og lebel sa kapasidad o kamaayo sa dili pa motabang ang Dios—ang balaang tabang atong masinati bisan kanus-a, bisan asa pa kita diha sa dalan sa pagkamasulundon.”3
Sa lubong sa akong higala, mapasalamaton ako alang sa lig-on nga pagpamatuod nga gipakigbahin mahitungod sa paglaom ug pagkaayo nga anaa alang sa tanan pinaagi sa Pag-ula ni Jesukristo. Sa pagkatinuod, si Kristo mao ang solusyon sa matag problema ug ang tinubdan sa tinuod nga kalipay.