“Magpili,” Para sa Kusog sang mga Lamharon, Hunyo 2022.
Bulanan nga Mensahe sang Para sa Kusog sang mga Lamharon, Hunyo 2022
Magpili
Ginpaisog ni Josue ang iya katawhan nga pilion ang husto—nga sundon ang Ginuo.
magpili
Ang aton ikasarang sa pagpili kag paggiho para sa aton kaugalingon ginatawag nga pagbuot. Importante ini nga bahin sang plano ka Amay nga Langitnon. Isa sa katuyuan sining kabuhi amo nga ipakita naton nga pilion naton nga tumanon ang mga kasuguan sang Dios para mangin mas pareho kita sa Iya. Pagahukman kita suno sa aton mga pagpili. (Tan-awa sa 2 Nefi 2:27; Doktrina kag mga Kasugtanan 101:78; Abraham 3:25.)
sini nga adlaw
Ginpaisog ni Josue ang iya katawhan nga magpili “sini nga adlaw,” ukon subong mismo. Sarang kita maghimo sang importante nga mga pagpili kag dayon magpabilin nga dedikado sa mga ini. (Tan-awa sa Salmo 37:5.)
alagaran
Sa sini nga bersikulo, ang pag-alagad nagakahulugan sang pagsimba, pagbulig, pagtuman, kag pagdedikar sang imo kaugalingon sa isa ka tawo. Dapat naton alagaran ang Ginuo (tan-awa sa Moises 1:15).
mga dios
Ang Israel ginsugo nga mag-alagad lamang sa matuod kag buhi nga Dios, si Jesucristo (tan-awa sa Exodo 20:2–5). Naghatag si Josue sang mga halimbawa sang iban pa nga mga dios nga indi dapat simbahon sang iya katawhan. Ang iban pa nga mga dios sa aton kabuhi mahimo nga maglakip sa mga pagkabutang, mga opinyon sang iban, iban pa nga mga hilig—bisan ano nga nagapalayo sa aton sa Ginuo.
sa akon kag sa akon panimalay
Naghambal si Josue para sa iya kaugalingon kag sa iya panimalay. Siling niya nga magaalagad sila sa Ginuo. Gusto niya nga pamunoan ang iya pamilya sing matarong kag tudloan sila nga sundon ang Ginuo (tan-awa sa Doktrina kag mga Kasugtanan 93:40).
© 2022 iya sang Intellectual Reserve, Inc. All rights reserved. Gin-imprinta sa Pilipinas. Petsa sang pagtugot sa Ingles: 6/19. Petsa sang pagtugot sa paglubad: 6/19. Paglubad sang Monthly For the Strength of Youth Message, June 2022. Hiligaynon. 18315 861