Bulanan nga Mensahe sa Para sa Kusog sang mga Lamharon, Pebrero 2022

Genesis 11–50

Ang Mga Patriarka

Sin-o Sila kag Ngaa Importante Ini

Siguro nabatian na ninyo ang parte kay Abraham, Isaac, kag Jacob. Masami naton sila nga mabasahan sa Libro ni Mormon kag sigurado nga madamo pa kamo sang mabatian parte sa ila samtang inyo ginatun-an ang Daan nga Katipan sini nga tuig. Sa kadako sang tiyempo nga ginhatag para sa ila, sigurado importante gid sila, indi bala? Pero mahimo nga mamangkot ka sa imo kaugalingon, “Ngaa mapuslanon sa sining panahon ining tatlo ka tawo nga nagkabuhi linibo na katuig ang nagligad?” Ang yabi sa sabat sina nahamtang sa wala katapusan nga mga kasugtanan kag ginpromisa nga mga bugay nga ginhatag sang Dios sa ila.

Abraham

Abraham

Mga ilustrasyon ni Jarom Vogel

Si Abraham isa ka dalayawon nga propeta. Matarong sia kag masinulundon sa mga kasuguan sang Dios.

Ginbunyagan sia, nakabaton sang priesthood, kag naselyohan sa iya asawa nga si Sara sa wala katapusan.

Naghimo ang Dios sang kasugtanan kay Abraham nga ang iya kaliwat mangin dako kag makabaton man sang pareho nga mga bugay nga iya nabaton.

Ila pagadalhon ang kabug-osan sang ebanghelyo ni Jesucristo sa mga nasyon sa duta.

Isaac

Isaac

Si Isaac amo ang anak nanday Abraham kag Sara.

Ginhambalan sang Dios si Abraham nga ihalad si Isaac. Palangga ni Abraham si Isaac pero ginpili niya nga tumanon ang Dios. Sang ihalad na kuntani ni Abraham si Isaac, ginpunggan sia sang isa ka anghel. Ang kahanda ni Abraham kag Isaac nga tumanon ang Dios isa ka simbolo sang Pagbayad-Sala sang Bugtong nga Anak sang Dios.

Ginpromisahan si Isaac sang pareho man nga mga bugay kay Abraham.

Jacob

Jacob

Pareho sa iya tatay kag lolo, si Jacob nating matinuohon sa Dios.

Tungod sa iya pagkamatinuohon, gin-islan sang Ginuo ang ngalan ni Jacob nga Israel, nga buot silingon “ang tawo nga nagpangibabaw upod sa Dios” ukon “tugoti ang Dios nga magpangibabaw” (tan-awa sa Bible Dictionary, “Israel”).

May 12 ka kabataan nga lalaki si Jacob. Ining mga kabataan kag ang ila mga pamilya ginkilala bilang ang mga tribo sang Israel.

Ang kasugtanan nga ginhimo sang Dios kay Abraham ginpabakod kay Jacob kag sa iya mga kabataan.

Ang Mga Patriarka kag Ikaw

Bilang miyembro sang Simbahan, parte kamo sang kaliwatan ni Abraham, Isaac, kag Jacob. Ang kasugtanan nga ila ginhimo upod sa Dios madapat man sa inyo!

May bugay kamo kag responsibilidad nga ipaambit ang inyo testimonya parte sa Manluluwas kag ipaambit ang ebanghelyo.

Gintawag man kamo nga agdahon ang tanan nga maghimo kag magtuman sang mga kasugtanan kag magbaton sang mga ordinansa sang priesthood. Si Pangulong Russell M. Nelson nagsiling nga ini tanan kabahin sang pagtipon sang Israel, nga “amo ang pinakaimportante nga butang nga nagakatabo sa duta karon” (“Hope of Israel,” [pangkabilogan nga debosyonal sang mga lamharon, Hunyo 3, 2018], 8, ChurchofJesusChrist.org).

© 2022 iya sang Intellectual Reserve, Inc. All rights reserved. Gin-imprinta sa Pilipinas. Petsa sang pagtugot sa Ingles: 6/19. Petsa sang pagtugot sa paglubad: 6/19. Paglubad sang Monthly For the Strength of Youth Message, February 2022. Hiligaynon. 18344 861