“Fakafehokotakí,” Ki Hono Fakamālohia ʻo e Toʻu Tupú, ʻEpeleli 2021, takafi muʻa ki lotó.
Fakafehokotakí
Ladylyn V.
17, Filipaini
ʻOku ʻi ai ha ngaahi moʻunga afi naʻe ʻikai moʻui ofi ki he feituʻu ʻoku ou nofo aí, ka ne toki mapuna hake ha taha kimuí ni mai. Naʻa mau fuʻu ʻohovale kotoa ʻi he taimi naʻe hoko aí. Naʻe ʻalotāmaki mo fakapoʻuli ʻa e langí, pea naʻe lahi ʻa e efuefu naʻe ngangana mei he langí. Naʻá ku manavasiʻi, koeʻuhí he ʻoku mau nofo ʻi ha feituʻu malu pea ʻoku ʻikai faʻa ʻi ai ha ngaahi fakatamaki fakanatula. Ko e konga fakailifia tahá ko e fanga kiʻi mofuike iiki naʻe hoko hili ko ia ʻa e mapuna hake ʻa e moʻunga afí.
ʻI he taimi naʻe mapuna hake ai ʻa e moʻunga afí, na‘e ʻalu hoku fāmilí ʻo nofo ʻi he ʻapisiasí. Naʻe tokolahi ha kakai ne nofo ai, ʻa ia ne tokoni ia ke ʻoua naʻá ku ilifia. Naʻá ku fiefia ke sio ki ha kakai tokolahi koeʻuhí he naʻá ku ʻiloʻi ai naʻa nau hao.
Lolotonga ʻemau nofo ʻi he ʻapisiasí, naʻe lelei ʻaupito ke ngāue mo tokoni ki he kakai kehe ne omi ke nofo mo hao mei he fakatuʻutāmakí. Naʻá ku saiʻia ʻi he lava ke u ngāue tokoní ʻo ʻikai ha toe ʻamanaki ki ha meʻa mei ai. Naʻá ne fakamanatu mai ʻoku fie maʻu ke tau fai ha ngaahi fili ʻoku leleí ʻi he ʻaho kotoa pē pea foaki lahi ki he taha kotoa, ʻo ʻikai ʻi he taimi pē ʻo e ngaahi faingataʻá ka ʻi he ʻaho kotoa pē.