“Nagapadayon nga Rebelasyon,” Para sa Kusog sang mga Lamharon, Mar. 2021, 16.
Bulanan nga Mensahe sang Para sa Kusog sang mga Lamharon, Marso 2021
Nagapadayon nga Rebelasyon
Gikan sa Abril 2020 nga pamulongpulong sa pangkabilogan nga komperensya.
Ilustrasyon ni Ben Simonsen
Ang Propeta nga si Joseph Smith nagbaton sang rebelasyon dugang sa rebelasyon. Madamo nga rebelasyon nga nabaton sang Propeta nga si Joseph ang gintipigan para sa aton sa Doktrina kag mga Kasugtanan.
Dugang pa, ginbugayan kita sang nagapadayon nga rebelasyon paagi sa buhi nga mga propeta nga “awtorisado nga mga tiglawas sang Ginuo, awtorisado nga maghambal para sa Iya.”1
Ang personal nga rebelasyon mabaton man sang tanan nga nagahandum sing mapainubuson sang giya halin sa Ginuo. Pareho ini kaimportante sa rebelasyon sa propeta.
Ang personal nga rebelasyon nabase sa espirituhanon nga mga kamatuoran nga nabaton halin sa Balaan nga Espiritu. Ang Balaan nga Espiritu amo ang tagpahayag kag tagpamatuod sang tanan nga kamatuoran, labi na ang parte sa Manluluwas. Kon wala ang Balaan nga Espiritu, indi gid naton mahibal-an nga si Jesus amo ang Cristo. Ang Iya nagaimpluwensya nga papel amo ang magsaksi parte sa Amay kag sa Anak kag sa Ila mga ngalan kag sa Ila himaya.
Ginapasalig ko kamo nga ang giya paagi sa rebelasyon sarang mabaton sang kada isa sa aton samtang mapainubuson kita nga nagapangabudlay sa ulubasan sang Ginuo.
Ang mapainubuson ko nga pangabay amo nga ang kada isa sa aton magapangita sang nagapadayon nga rebelasyon para magiyahan ang aton mga kabuhi kag sundon ang Espiritu samtang aton ginasimba ang Dios nga Amay kag ang aton Maluluwas, nga si Jesucristo.
© 2021 iya sang Intellectual Reserve, Inc. All rights reserved. Gin-imprinta sa Pilipinas. Petsa sang pagtugot sa Ingles: 6/19. Petsa sang pagtugot sa paglubad: 6/19. Paglubad sang Monthly For the Strength of Youth Message, March 2021. Hiligaynon. 17466 861