Ang Gasa sa Pag-ampo

Ni Presidente Susan H. Porter

Kinatibuk-ang Presidente sa Primary

Gikuha gikan sa “Pag-ampo Lang,” Liahona, Mayo 2024, 77–79.

Ang Langitnong Amahan mihatag kaninyo og espesyal kaayo nga gasa. Kini mao ang gasa sa pag-ampo. Ang pag-ampo makatabang kanato bisan kanus-a, bisag asa.

Gusto kong mopakigbahin og tulo ka gasa nga mahimo ninyong iampo.

1. Pag-ampo aron makahibalo.

Kon dili kita makakita sa Langitnong Amahan kon mag-ampo kita, unsaon man nato pagkahibalo nga Siya naminaw?

Si Presidente Nelson midapit kaninyo nga “ibubo ang inyong kasingkasing ngadto sa inyong Langitnong Amahan. … Ug dayon maminaw!”* Mahibalo kamo nga ang Langitnong Amahan naminaw sa inyong mga pag-ampo kon maminaw kamo sa unsay inyong gibati diha sa inyong kasingkasing ug sa mga hunahuna nga mosantop sa inyong isipan.

2. Pag-ampo aron molambo.

Sa unsang paagi man kamo gusto nga molambo? Gusto ba kamong magkat-on og bag-o nga kahanas o makabaton og bag-o nga mga higala? Mahimo kamong mag-ampo nga molambo aron mahimong mas susama ni Jesukristo!

Ang akong bag-o nga higala nga si Jonah misulti kanako kon sa unsang paagi siya kanunay mibati nga nabalaka sa eskwelahan. Apan sa dihang nagsugod siya sa pag-ampo sa dili pa moeskwela, mibati siya og kalinaw. Nag-ampo si Jonah nga molambo matag adlaw, ug kamo makahimo usab!

3. Pag-ampo aron mapakita.

Isip usa ka gamay nga batang babaye nag-ampo ko alang sa akong pamilya. Gusto kong masayod kon unsaon nako sila pagtabang. Ang Langitnong Amahan mitabang kanako nga masayod nga pwede kong mahimo nga usa ka ehemplo sa ebanghelyo ni Jesukristo. Mao kana ang akong mahimo!

Kon nag-ampo kamo alang sa inyong pamilya o sa uban nga nahigugma kaninyo, ayaw og undang! Ang Langitnong Amahan mopakita kaninyo kon unsay inyong mahimo. Kon kamo kinasingkasing nga mangayo sa Iyang tabang, ang Iyang Espiritu mogiya kaninyo.

Akong mga Pag-ampo

Hunahunaa kini nga mga pangutana sa matag higayon nga kamo mag-ampo. Dayon pagkolor og usa ka bulak. Tan-awa kon makoloran ba ninyo ang tibuok pahina!

Unsay gusto nakong mahibaloan?
Sa unsang paagi ako gusto nga molambo?
Unsaon nako sa pagpakita sa gugma sa Langitnong Amahan ngadto sa uban?