“Nag-ampo alang ni Alejandro,” Higala, Nobiyembre 2024, 32–33.
Nag-ampo alang ni Alejandro
“Kahibalo ba si Jesus unsay bation kon naay cancer?” Nangutana si Gerardo.
Kini nga istorya nahitabo sa El Salvador.
Nag roller-skate si Gerardo paingon sa atubangan nga hagdanan sa ilang balay. Ang sakyanan ni mamá naa sa garahe. Nagpasabot kini nga siya ug iyang magulang nga lalaki, si Alejandro, nakauli na gikan sa doktor. Gihubo ni Gerardo ang iyang skates og dali-dali nga misulod.
“Gerardo?” Nanawag si Mamá. “Naa mi dinhi!”
Milakaw si Gerardo padulong sa sala. Si Alejandro naghigda sa sofa. Si mamá milingkod tupad niya. Guol kaayo siyang tan-awon.
Si Gerardo naguol pud. Sa miaging semana, nahibaloan nila nga si Alejandro adunay cancer. Siya grabe nga nasakit.
Apan mibangon si Alejandro ug mipahiyom sa dihang misulod si Gerardo. “Kumusta! Maayo ba imong adlaw?”
“Oo, pero kumusta inyong pagbisita sa doktor?” Nangutana si Gerardo.
“Miingon siya nga kinahanglan ko nga operahan,” misulti si Alejandro.
Mitando si Mamá. “Apan ang labing maayo nga mga doktor nga makatabang niya anaa sa ospital sa mga bata. Tungod kay 14 na si Alejandro, tigulang na kaayo siya aron maatiman didto. Kinahanglan tang mangita og lain pa nga ospital.”
Nadismaya si Gerardo. Kong dili sila makakuha og tabang para ni Alejandro, unsay mahitabo? Mas mograbe ba ang cancer ni Alejandro?
Miadto si Gerardo sa iyang kwarto. Kinahanglan siya nga maghuna-huna.
Sa Primary, nahibaloan ni Gerardo nga ang Langitnong Amahan kanunay nga motubag sa iyang mga pag-ampo. Kahibalo si Gerardo nga makapangayo siya og tabang gikan Kaniya.
Maong miluhod siya tupad sa iyang higdaanan ug gikyugpos ang mga kamot. “Pinalanggang Langitnong Amahan, palihog tabangi si Alejandro,” siya nag-ampo. “Palihog tabangi mi nga makakita og doktor nga makahimo sa pag-opera.”
Wala madugay, nanawag si Mamá niya para manihapon. Mihimo siya og pupusas, ang paborito ni Gerardo. Miingkit siya og dako sa baga, gisugba nga tortilla nga puno sa keso ug beans. Apan naguol gihapon siya para sa iyang igsoong lalaki.
Gamay ra ang gikaon ni Alejandro sa iyang pupusa. Nagmug-ot siya ug hinay kaayo og lihok.
Seguradong nakamatikod usab si Mamá. “Unsa kaha og manan-aw ta og bidyo sa Simbahan?” nangutana si Mamá. Ganahan silang motan-aw og mga bidyo kabahin ni Jesukristo kon magmasulob-on sila.
“OK.” Gipanguha ni Gerardo ang mga plato nga kinan-an sa lamesa samtang gi-andam ni Mamá ang bidyo. Dayon milingkod silang tanan aron motan-aw.
Sa bidyo, nag-ampo si Jesukristo sa harden sa may kahoy. Nakahibalo na si Gerardo niini nga istorya. Panahon kini nga si Jesus nag-antos sa wala pa Siya namatay sa krus.
Sa dihang nahuman na ang bidyo, mibati si Gerardo og kahilom ug kalinaw. Apan naa siyay pangutana. “Nganong si Jesus kinahanglan man nga masakitan pag-ayo?” siya nangutana.
Gigakos ni Mamá si Alejandro ug si Gerardo. “Gipili ni Jesus nga bati-on ang kasakit tungod kay gihigugma Niya kita. Iyang nabati ang tanang sakit nga atong naagian.”
Mitan-aw si Gerardo ni Alejandro. “Kahibalo ba si Jesus unsay bation kon naay cancer?”
“Oo, kahibalo Siya,” miingon si Mamá. “Kahibalo Siya unsa kini ka lisod. Ug tungod kay kahibalo Siya unsay bati-on, kahibalo Siya unsaon pagtabang nato.”
Mibati og kainit si Gerardo, nga murag giputos siya og dako nga habol. Ang Langitnong Amahan ug si Jesukristo nakaila ug nahigugma sa iyang pamilya. Sila nasayod unsaon pagtabang ni Alejandro.
Sa dihang nakauli si Gerardo sa balay gikan sa eskwelahan pagkasunod adlaw, iyang naabtan iyang Mamá nga nag-impake og bag.
“Maayong balita!” miingon siya. “Akong giistorya ang doktor sa ospital sa mga bata. Ilang tabangan si Alejandro. Operahan siya ugma.”
Gigakos pag-ayo ni Gerardo si Mamá. “Ang Langitnong Amahan nagtabang nato! Mahimo ba kitang mag-ampo ug magpasalamat Kaniya?”
“Nindot kaayo nga ideya,” miingon si Mamá. “Tawagon nato si Alejandro.”
Samtang nag-ampo sila, gibati ni Gerardo ang kalinaw. Ang Langitnong Amahan nakadungog sa iyang pag-ampo! Karon si Alejandro maoperahan na gayod sama sa iyang gikinahanglan. Kahibalo si Gerardo nga si Jesukristo nakasabot sa unsay ilang giagian. Ug permi Niya silang tabangan nga makasugakod sa ilang mga pagsulay.
Mga paghulagway pinaagi ni Ricardo Guerrero