“Usa ka Espesyal nga Komperensiya,” Higala, Nobiyembre 2024, 8–9.
Usa ka Espesyal nga Komperensiya
Tingali ang pagtabang makapalipay niya,sama sa gisulti ni Presidente Nelson.
Kini nga istorya nahitabo sa Indonesia.
“Aminah, akoa kana!” Misinggit si Indira. Iyang gilabni ang munyeka gikan sa iyang manghod nga babaye.
“Mga anak, molakaw na ko,” mitawag si Mama. “Palihog pagbinuotan kang Papa.”
Mihangad si Indira. “Asa man ka padulong?”
“Ngadto sa merkado. Magpalit ko og pagkaon aron makaluto og espesyal nga pagkaon ugma.” Si Mama miwara-wara sa pagpanamilit.
Usa ka espesyal nga pagkaon? Apan ngano man? Milakaw si Indira aron pangitaon si Papa. “Nganong espesyal man ugma?” nangutana siya.
Mipahiyom si Papa. “Ugma motan-aw kita sa kinatibuk-ang komperensiya! Espesyal kini tungod kay makapaminaw kita sa propeta ug sa uban pa nga mga lider sa Simbahan nga mamulong. Sultihan kita nila kon unsay gusto sa Langitnong Amahan nga atong madungog.”
Sa dihang nauli na si Mama, gihipos niya ang pagkaon. Gisilhigan ni Papa ang salog.
“Indira, mahimo ba nga tabangan nimo si Aminah nga mag-andam sa iyang sinina alang ugma?” Mihangyo si Mama.
Nagmug-ot si Indira. “Nganong kinahanglan pa man nako siya nga tabangan?”
“Palihog buhata lang kon unsay akong gihangyo,” miingon si Mama.
Mireklamo si Indira. Hinay siya nga milakaw ug miadto aron tabangan si Aminah.
Pagkasunod buntag, si Indira nahigmata sa lami nga baho. Siya daling mibangon gikan sa higdaanan ug midagan ngadto sa kusina. Si Mama naghimo og beef rendang ug satay aron kaonon sa paniudto unya! Mahimong lamian gayod kini kaayo.
Sa wala madugay, nagsugod na ang kinatibuk-ang komperensiya. Si Indira milingkod kauban sa iyang pamilya aron motan-aw sa TV. Naminaw siya sa choir nga mikanta. Nakadungog siya sa mga tawo nga naghisgot mahitungod sa mga templo ug mga kasulatan ug ni Jesukristo.
Ang kataposang mamumulong mao ang propeta, si Presidente Russell M. Nelson. Siya namulong mahitungod kon giunsa sa Simbahan pagtabang ang mga tawo sa tibuok kalibotan.
“Ang atong kinadak-ang kalipay moabot kon motabang kita sa atong mga kaigsoonan,”siya miingon.
Naghunahuna si Indira mahitungod niana. Ang pagtabang ba nakapalipay niya? Siya padayon nga naminaw. Si Presidente Nelson miingon nga ang pagpuyo sa ikaduhang labing importante nga sugo makatabang kanato nga mahimong sama ni Jesukristo.
Sa dihang nahuman na kini, gikaon nila ang paniudto nga gihimo ni Mama. Si Indira padayon nga naghunahuna mahitungod sa pakigpulong sa propeta.
“Unsa ang ikaduhang labing importante nga sugo?” nangutana siya.
“Higugmaa ang imong silingan sama sa imong kaugalingon,” miingon si Papa.
Naghunahuna si Indira mahitungod sa mga tawo nga gitabangan sa Simbahan sa tibuok kalibotan. “Unsaon man nako sa pagtabang kon ang akong mga silingan nagpuyo sa layo kaayo?”
“Ang imong mga silingan mao ang tanan nga nagpalibot nimo,” miingon si Mama. “Sama sa imong mga kapamilya.”
Miduko si Indira. Dili kaayo siya buotan sa iyang pamilya usahay.
Apan tingali ang pagtabang kanila makalipay niya, sama sa giingon ni Presidente Nelson. Usa kini ka paagi nga siya makasunod ni Jesus. Gusto siya nga mosulay!
Sa nahabilin sa semana, si Indira misulay nga mahimong mas buotan sa iyang pamilya. Siya nakigdula ni Amirah. Mipakigbahin siya sa iyang dulaan. Iyang gibuhat ang unsay gihangyo ni Mama ug Papa nga walay pagreklamo. Kon si Indira motabang sa iyang pamilya, sila malipayon. Ug kadto nakapalipay usab kaniya.
Sakto ang propeta. Ang pagtabang sa uban nakahatag niya og hingpit nga kalipay!
Mga paghulagway pinaagi ni Judi Abbot