“Vahehongofulú pe ʻAisi Kilimí?” Kaumeʻa ʻEpeleli 2023, 10–11.
Vahehongofulú pe ʻAisi Kilimí?
ʻE lava ʻe Keiti ʻo totongi fakafoki ia ʻamui ange, ʻikai ko ia?
Naʻe hoko ʻa e talanoa ko ʻení ʻi he ʻIunaiteti Siteiti ʻo ʻAmeliká.
Naʻe tau ʻe Keiti mo hono tuongaʻane ko Kalisitiané ʻena pasikalá ʻi he musié.
“Te ke fiemaʻu ha ʻaisi kilimi ʻi he falekoloá?” Ko e fehuʻi ange ia ʻa Kalisitiané.
“ʻIo!” Ko Keiti ange ia. Naʻe vela ʻaupito ʻa tuʻa, pea ko ha ngāue lahi ʻa e heka pasikalá. Naʻe ongo lelei ʻaupito ʻa e ʻaisi kilimí!
Naʻe lele ʻa Keiti ki loto. Naʻá ne maʻu e kiʻi kato naʻá ne tauhi ai ʻene paʻangá. ʻI heʻene fakaava haké, naʻá ne fakafulofula. Naʻe ʻikai ke ne maʻu ha paʻanga feʻunga ki he ʻaisi kilimí.
Naʻá ne hila atu leva ki he hina paʻangá ʻi heʻene funga laupapá. Naʻá ne tauhi ai ʻene paʻanga vahehongofulú ke ʻave ki he pīsopé. Naʻe ʻi ai ha paʻanga feʻunga ai ki he ʻaisi kilimí!
Naʻe toʻo ʻe Keiti ha paʻanga mei heʻene foʻi hina vahehongofulú. Naʻá ne fakavave atu leva mo Kalisitiane ki he falekoloá ʻo fili ʻa e ngaahi feleiva naʻa na fie maʻú. Naʻe kiʻi ongoʻi halaia ʻa Keiti ʻi heʻene kai ʻene foʻi ʻaisi kilimi sokoletí. Ka naʻe ʻikai ke fuʻu lahi ʻa e paʻanga naʻá ne toʻó. Te ne lava ʻo totongi fakafoki ʻamui ange.
Hili ha ngaahi uike siʻi mei ai, naʻe toe ʻalu ʻa Keiti ke ʻomai haʻane ‘aisi kilimi. Naʻe teʻeki pē ke ne maʻu ha paʻanga feʻunga, ko ia naʻá ne toʻo ha kiʻi paʻanga lahi ange mei heʻene hina vahehongofulú. Naʻá ne pehē loto pē, Te u totongi fakafoki pē mo ʻeni.
Naʻe toutou toʻo maʻu pē ʻe Keiti ha paʻanga mei heʻene foʻi hina vahehongofulú. Naʻá ne palōmesi maʻu pē te ne totongi fakafoki ia. Ka naʻe faingataʻa ke ne manatuʻi ʻa e lahi ʻo e paʻanga naʻá ne toʻó. Pea naʻe ʻikai ke ne maʻu ha paʻanga feʻunga ke fetongi ʻaki ia.
Ne ʻikai fuoloa kuo hokosia e taimi ke ʻinitaviu vahehongofulu ai hono fāmilí. Te nau fakataha mo Pīsope Leaviti. Te ne ʻeke kiate kinautolu takitaha pe naʻa nau totongi vahehongofulu kakato ʻi he paʻanga kotoa pē ne nau maʻu he taʻu ko iá.
ʻI he Sāpate ko iá, naʻe faʻo ai ʻe Keiti ʻa e toenga ʻo ʻene paʻanga vahehongofulú ʻi ha sila pea ʻoange ia ki he pīsopé. Ka naʻá ne ʻiloʻi naʻe ʻikai feʻunga ia. Naʻá ne ongoʻi puke.
Naʻe tangutu fakataha kimui ange ʻa e fāmili ʻo Keití ʻi he ʻōfisi ʻo Pīsope Leavití.
“Ko ha tokotaha totongi vahehongofulu kakato koe?” Ko e fehuʻi ange ia ʻa Pīsope Leaviti kia Kalisitiané.
“ʻIo!” Ko Kalisitiane ange ia.
Naʻe hiki ʻa Keiti mo hono seá. ʻE sai pē nai ke talaange ki ai ʻokú ne totongi vahehongofulu kakato foki mo ia? Kuo teʻekiai ke ne totongi kakato ʻene vahehongofulú, ka kuo pau ke ne fai ia!
“Ko ha tokotaha totongi vahehongofulu kakato koe?” Ko e fehuʻi ange ia ʻa Pīsope Leaviti kia Keití.
Naʻe sio pē ʻa Keiti ki lalo. ʻE hala ia ke loi.
Naʻá ne pehē leʻosiʻi ange, “ʻIkai. Naʻá ku fakaʻaongaʻi ha niʻihi ʻo ʻeku paʻanga vahehongofulú ke fakatau ʻaki ha ʻaisi kilimi.”
“ʻOku ou ʻilo ʻoku houngaʻia ʻa e Tamai Hēvaní ʻi he vahehongofulu naʻá ke totongí. Pea ʻi he taimi ʻoku tau fai ai ha fili ʻoku halá, te tau lava ʻo fakatomala mo feinga ke toe lelei ange.” Naʻe malimali ʻa Pīsope Leaviti kia Keiti. “ʻOku ou ʻilo te ke feinga ke totongi kakato hoʻo vahehongofulú ʻi he kahaʻú.”
Naʻe kamo pē ʻa Keiti. Naʻá ne fiemaʻu ke ne hoko ko ha tokotaha totongi vahehongofulu kakato!
ʻI heʻene toe maʻu ha paʻangá, naʻe faʻo ʻe Keiti ha peseti ʻe 10 ʻi heʻene hina vahehongofulú. Hili iá, naʻá ne toe tānaki ha kiʻi sēniti lahi ange. Naʻa ne fifiliʻoku feʻunga nai ʻeni ke fetongi ʻaki e meʻa naʻá ku toʻó? Naʻá ne toe tānaki atu ha meʻa lahi ange, telia naʻa ʻikai ke feuʻnga.
Ka na‘á ne kei ongoʻi halaia pē. Mahalo pē te ne lava ʻo totongi ha vahehongofulu lahi ange kae ʻoua kuó ne ongoʻi kuó ne fetongi kotoa ia. Naʻá ne ala hake leva ʻo puke hono ʻulú.
Naʻe hū mai ʻene faʻeé ki he lokí. “Ko e hā e meʻa ʻoku hokó?”
Naʻe māpuhoi ʻa Keiti. “ʻOku ʻikai ke u ʻilo pe ko e hā e lahi ʻo e vahehongofulu ʻoku fiemaʻu ke u totongi ki he meʻa naʻá ku fakaʻaongaʻí.”
Naʻe fāʻofua ʻene faʻeé kia Keiti. Naʻá ne pehe ange, “ʻOku ou fiefia ʻokú ke fie fakaleleiʻi hoʻo fehalaākí. Ka ko e taimi ʻe niʻihi ʻoku tau fiemaʻu pē ke kamata ʻi he tuʻunga ʻoku tau ʻi aí pea tau toe feinga pē. ʻE fakamolemoleʻi kitautolu ʻe he Tamai Hēvaní ʻi he taimi ʻoku tau fai ai hotau lelei tahá ke fakatomalá.”
Naʻe moʻoni nai ia? Naʻa mo ʻene fehalaaki ʻi he vahehongofulú?
ʻI he mavahe ʻene faʻeé, naʻe lotu ʻa Keiti. “Tamai Hēvani, ʻoku ou kole fakamolemole atu ʻi he ʻikai ke u totongi kotoa ʻeku vahehongofulú. ʻOku ou fie totongi fakafoki ia, ka ʻoku ʻikai ke u ʻiloʻi pe ko e hā e lahi hoku moʻuá. Te ke fakamolemoleʻi nai au pea tuku ke u toe kamata foʻou mo toe feinga pē?”
Naʻe ongoʻi nonga ʻa Keiti. Naʻe ongo fakafiefia ke kole fakamolemole. Naʻá ne ʻiloʻi ʻe tokoniʻi ia ʻe he Tamai Hēvaní ke toe lelei ange!
Tā fakatātaaʻi ʻe Matt Smith