“Tataron te Mwaeiei,” Rao, Maati 2022, 4–5.
Tataron te Mwaeiei
Ngke e uti Violet, a bane n ruru bwai ni kabane!
E riki te karaki aei i Peru.
E bon matu Violet ngke e uti n tangin te rurungaa. N te moan tai, e iango bwa tao rebwen te baa.
Ma te rurungaa e tabe ni korakora ma ni korakora. E ioioi wintoon ana ruu.
E kawaekoaa n tekateka Violet. Aio bon te mwaeiei!
Ngaia ao ana utu a tia ni mwaing nako Peru n aki maan nako. E ataia bwa e katoatai te mwaeiei n te tabo aei. Ao ngaia ao ana utu a tia ni katauraoi ibukina ao a kakataneiai bwa tera ae a na karaoia. Ma aio e bon rangi ni kakamaaku nakon riki are e tia ni iangoia. E kona n namakina rabwatana n ruru!
E biri Violet nakon te umwa ni kuuka ao ni kawakawa nako aan te taibora. Tabeua te teekan imwiina, mwanena ao tarina a roko irarikina. Ao ai uana naba ma Mom ao Dad.
“E rangi n tamaroa uringakin are ti a tia ni kataneiai iai,” e taku Dad. “Kam bane n RAOIROI?”
A katoutouii atuuia mwanen ao tarin Violet.
Ma e rangi ni maaku Violet. E kamatuui matana. E rang kangaanga aki iangoan te mwaeiei irarikina.
Ngkanne e uringnga Violet bwa e na tataro. E botii baina ao ni kabaraka atuuna. “Tamara are i Karawa,” e wirikiriki, “taiaoka kamanoia au utu.”
E reitinako n tataro Violet. E namakinna ae kanga iai ae e rabwatia. Ngke e a tia n tataro, e tararake. Mom ao Dad a botii baia. A karaoia naba mwanena ao tarina. A bane n tataro! E teimatoa n ruru aontano. Ma Violet e namakina te rau inanona ao n ana iango.
N tokina, e a toki te ruru. A tiku Violet ao ana utu teutana riki te tai iaan te taibora, ni kakoauaa bwa a bon mano.
“Tera aron am namakin?” E titiraki Mom nakon Violet.
“I NAKORAOI,” e taku Violet. “I rangi ni maaku n te moan tai. Ma te tataro e buokai n namakina te rau.” E rabwata Mom. E kukurei bwa Tamana are i Karawa e a tia ni buokia bwa e na namakina te rau.
Kamataata n te tamnei iroun Toby Newsome