12godoy

Li nawom natawman sa’ li saajilal

Xtikib’ankil

Elder Carlos A. Godoy: Usilanb’ilin chi wank arin eerik’in anajwan. B’antiox eere naq yookex chi tz’aqonk toj sa’ xkaaxukuutil li ruchich’och’. Nawulak chiqu wank rik’ineb’ li saaj. Nim xwankil eek’anjel sa’ li Iglees, ut aajel ru li kutan wankex wi’ sa’ lee yu’am. Li b’e teesik’ ru anajwan jwal tixtoch’ lee yu’am chalel. Sa’ li ewu a’in naqaj xwotzb’al li na’leb’ taatenq’anq eere, jo’ eb’ li k’iila chaab’il na’leb’ ak xek’ul sa’ jalaneb’ chik li ch’utam.

Sa inch’ool naq ninkine’rochb’eeni li Hermano Chad Webb ut li xKristi, li rixaqil, jo’ ajwi’ li Elder Clark Gilbert ut li xChristine, li rixaqil a’an. B’antiox eere naq wankex qik’in anajwan.

Nasaho’ inch’ool naq wan li xMônica wik’in sa’ li ch’utam a’in. Took’utuq sa’ komonil, ut nawoyb’eni naq taawulaq cheru.

Jo’ xcha’al li qaatin, taqak’ut jun ch’ina video kixb’aanu li Iglees chiqix laa’o sa’ qasaajilal. Sa’ li kutan a’an, xMônica ut laa’in juntaaq’eet tana qachihab’ rik’in lee re.

Sa’ li video, naqoyb’eni xk’utb’al cheru wiib’ oxib’ li na’leb’ naru nekeroksi sa’ lee yu’am anajwan. Li video nab’ay oob’ k’asal ut naxk’uteb’ xhoonalil li qayu’am. Ab’inqex chi us ut yalomaq xk’eeb’al reetaleb’ li na’leb’ naru neke’k’anjelak eerik’in. Too’aatinaq chirixeb’ a’an moqon. Ma us?

[video]

Laa’in moko ninsik’ ta chaq li evangelio chi moko junaq iglees. Wan chaq 16 chihab’ we, ut jun ramiiw li was kiwulak sa’ wochoch re xb’oqb’aleb’ li qiitz’in sa’ jun k’anjel aran sa’ li iglees xb’aan naq xk’oxla naq li was ut laa’in maawa’o kristiaan li te’xik raj sa’ iglees. Ut naq kook’ulun, yookeb’ chi b’atz’unk, ut jwal neke’saho’ xch’ool ut neke’se’ek—jo’kan naq kinpatz’, “K’a’ut b’i’ naq jwal saheb’ xch’ool?”

Chi jo’kan, wiib’ kutan chik chirix a’an, wankin sa’ li kapiiy, yookin chi tzole’k aran xb’aan naq lin junkab’al maak’a’ neke’raj rik’in a’an. Kisaho’ inch’ool rik’in li evangelio. Ninnaw naq yaal a’an, ut kiwaj naq taakub’eeq inha’ us ta ink’a’ te’kub’eeq xha’ inna’ inyuwa’. Ch’a’aj b’ayaq xtawb’al inna’aj.

Maak’a’eb’ li wamiiw, jo’kan naq ninkana rajlal chi ixej sa’ li kapiiy—chi ilok, chi ab’ink, toja’ ut naq ninsutq’i sa’ wochoch. Naru nakab’aanu a’in chiru jarub’aq kutan, a’b’an wi maaka’eb’ laa wamiiw, us ta nakanaw naq yaal a’an, jwal ch’a’aj, mas wi’chik wi wankeb’ laa wamiiw li nakate’xb’oq chi elk.

Kinwulak sa’ li iglees sa’ jun domingo, maare yal jun sut chik naq tinwulaq chankin, ut yookeb’ chixtz’iib’ankileb’ rib’. “K’a’ pe ru a’in?,” chankin.

“A’an jun ch’utub’aj-ib’ reheb’ li saaj. Us raj naq tatxik.”

“Us, nawaj xik,” chankin. Ut wanko aran, chixjunileb’ li saaj yookeb’ chi b’atz’unk, b’ichank, ut xajok, toja’ naq kiyaab’asiman chi jun xaqaamil, “Us chootijoq.”

Chixjunileb’ li neke’choqin, sa’ junpaat ch’anch’ookeb’. Ut laa’in kinpatz’ wib’, “K’a’ru yoo chi k’ulmank arin?” Chan ru naq eb’ li saaj a’in li jwal neke’choqin naru chi jun xaqaamil neke’kana chi ch’anch’o re tijok? Jwal jalaneb’ a’an. Laa’in nawaj wank jo’eb’ a’an. Choq’ we, a’an li Qaawa’ li yoo chixyeeb’al we: “At Carlos, milaj aach’ool. Wan aana’aj arin.”

Jun kutan yookin chi b’eek ut nawil jun li saaj ixq li yoo chi wajb’ak xjunes rib’. Ut naq kiwil li saaj ixq a’an, kinye, “Wow”—kama’an, ki’ok chi eek’ank lin ch’ool. Ut kink’oxla, “Nawaj aatinak rik’in a’an.” Ut jwal sa na’aatinak ut chaab’il xch’ool. Nikinwaatina jo’ naq moko jalanin ta. Ut ki’ok choq’ wamiiw, li junaj li wamiiw. Ut rik’in a’an, kintaw xkomon chik li wamiiw.

Chirix li ch’utub’aj-ib’ reheb’ li saaj a’an, kink’e sa’ inch’ool naq toj tinwulaq. Sa’ injunkab’al kooq’axon toj sa’ jalan chik na’ajej sa’ li tenamit. Kinwulak sa’ li kapiiy ut ma nekenaw ani kintaw aran—li xMônica! A’an lix teep a’an. Sa’ xraqik li ch’utam, jun komon ixq kolxpatz’ we, “Ma komonat laa’at sa’ li Iglees?”

Rajlal nawab’i a’an. “Hehe’, nink’oxla naq kama’an; yaal naq laa’in jun komon,” chankin re.

“Ah us, tento tatwulaq sa’ seminario.”

Ut kink’oxla, naq a’ yaal li ninnaw laa’in, li seminario a’an li ok choq’ jun tij, jun padre.

Jo’kan naq kinye, “Ink’a’, ink’a’, laa’in nawaj sumlaak ut xk’iiresinkileb’ li kok’al.”

Ut a’an kixye, “Ah, li seminario a’an choq’ reheb’ li saaj, re tzolok chirix li evangelio. Moko wankeb’ ta naab’aleb’ li saaj sa’ li qateep. Oxib’eb’ ajwi’; laj Adriano River, laj Carlos Mancini, ut li xMônica Brando.

Ut kink’oxla, “Wow. Us b’i’, ink’a’ ninnaw k’a’ru a’an chi yaal, a’b’an nawaj wank aran.”

Chi jo’kan naq rajlal eq’la yookin chixk’ulb’al lix chaab’il aatin li Dios. Ut a’an kinixtenq’a chixnawb’al anihin laa’in, kinixkawob’resi re tinxik chi uub’ej ut toj tinkanab’ chi jale’k inch’ool.

Chirix a’an kinb’oqe’ jo’ aj tzolol ochochnal wochb’een li awa’b’ej reheb’ li Saaj Winq. Ut us ta ch’ina b’ab’ay innawom chirix li evangelio, a’an junelik naxk’e intaqlankil re k’utuk. Kiwan royb’enihom chiwix, maare mas wi’chik chiru li woyb’enihom injunes wib’.

Ut wan jun chik li na’leb’: a’an ajwi’ lix yuwa’ li xMônica. Ut re teenaw, li anjel xMônica a’an li xinye naq wan aran re intenq’ankil—a’an ki’ok moqon jo’ wixaqil. Chirix naq kook’anjelak sa’ mision, koosumla sa’ li santil ochoch; ut anajwan a’an lix na’ lix kok’al kaahib’eb’, xna’ch’in li rimam wuqub’eb’, ut toj a’an jun anjel sa’ inyu’am.

Wi tat-iloq sa’ laa sutam, ninnaw naq taataweb’ li ani neke’raj ru xtenq’eb’ li anjel. Li Qaawa’ naraj aawu. Jo’kan ut, naq taawil aawib’ sa’ li lem, misach sa’ aach’ool: chi sa’ laa junxaqalil wan jun ch’ina-usil musiq’ej, jun ralal malaj xrab’in li qaChoxahil Yuwa’ ut chixjunileb’ lix chaab’ilal a’an neke’tawman sa’ laa junxaqalil.

[xraqik li video]

Moko aajunes ta wankat!

Hermana Mônica Godoy: Anajwan ut xoowulak sa’ jun chaab’il hoonal re aatinak chirix li xqil. Laj Carlos, li saaj, junes nareek’a rib’ ut ra xch’ool.

Maare nakaweek’a naq junes wankat ut maa’ani nakatxk’oxla, jo’ kik’ulman arin. Ch’a’aj ut reek’ankil naq moko ilb’ilo ta ut naq maak’a’ qaloq’al. Wi a’an li nakaweek’a laa’at, misach aawoyb’enihom. Moko aajunes ta wankat. Maare ink’a’ nakate’raatina malaj nakate’xk’ulub’a jo’ nakawaj. Raasa a’an. A’ut jultik aawe naq moko aajunes ta wankat xb’aan naq li Kolonel junelik wan aran choq’ aawe. A’an naxnaw aawu, naxnaw k’a’ru nakak’ul sa’ laa yu’am, nakatxra, ut naru nakataw a’an yaloq jo’q’e nakawaj ru. Maakanab’ xsik’b’al k’ulub’aak. A’an tixtaqlaheb’ li anjel re aatenq’ankil.

Elder Godoy: Anajwan, jun aatin choq’ reheb’ li neke’xnaweb’ ru li ani li neke’reek’a naq junes wankeb’. Laa’aqo raj li anjel a’an. Chat-iloq sa’ aasutam ut ink’a’ ka’ajwi’ sa’ xyanqeb’ laa wamiiw. Aran wankeb’, aran wanjenaqeb’, ut maare ink’a’ xak’eheb’ reetal. Laatz’ laa yu’am, wankeb’ laa chaab’il amiiw ut ochb’een, jo’kan naq ink’a’ xak’e reetaleb’ li neke’raj ru rahe’k ut k’ulub’aak. A’b’an aran wankeb’, neke’sik’ok amiiw ut neke’royb’eni k’ulub’aak. Maare wankeb’ chi ixej sa’ li kapiiy malaj sa’ xmaril li tzoleb’aal. Maare ink’a’ tiqtookeb’ sa’ saqi kamiis ut korbaat malaj jun chaq’al ru vestiiy choq’ re domingo. A’b’an neke’xyal xq’e chi k’ulub’aak. K’e xhoonaleb’. Neke’raj ru laa se’, laa wuq’, ut laa amiiwul. Li Awa’b’ej Spencer W. Kimball kixye:

“Li Dios naxk’e qeetal, ut nokoxk’aak’ale. A’ut chi kok’ aj xsa’ a’an naroksi junaq chik kristiaan re qatenq’ankil.”

Taaqenk rik’in rahok

Hermana Godoy: Us, a’an a’in jun chik na’leb’ naru naqatz’il rix. Li hoonal naq xanaw naq nikinaara.

Elder Godoy: Xinnaw naq taasik’ ru li na’leb’ a’an.

Hermana Godoy: Jwal ch’ina-us li hoonal a’an, ut wan jun na’leb’ re xwotzb’al. Wankeb’ li neke’reek’a li rahok ut neke’xnaw sa’ junpaat ani neke’xra. Sa’ junpaat neke’ok chixraab’al.

Elder Godoy: A’an li xink’ul laa’in. Il li wu.

Hermana Godoy: Choq’ we laa’in, jalan li xink’ul. Li xtawb’al jun junelikil ochb’een, jalan jalanq choq’ re li junjunq. Wankeb’ li neke’xtaw chi saqen ru. Wankeb’ chik li neke’raj ru hoonal, yalok-q’e, ut kuyum. Rik’in hoonal taataw wi taayal aaq’e rik’in a’an. Milaj aach’ool sa’ junpaat wi ink’a’ xaweek’a li rahok sa’ xtiklajik. Naqak’e reetal naq wankeb’ li chaab’il sumlaak li neke’tikla chi timil timil.

Elder Godoy: Tz’aqal yaal li xye li xMônica. A’an li xqanumsi laa’o. Kitoch’e’ inch’ool xb’een sut naq kiwil a’an. Choq’ we, chanchan naq “Kiwil jun xaqal li saqen.” A’b’an li xMônica maak’a’ kireek’a sa’ xtiklajik. Kinyal inq’e chiru jarub’aq po toj reetal naq a’an kixnaw naq maare chaab’ilin raj. Xb’een we koowan jo’ amiiw, ut chirix elk chi b’eek k’iila sut, a’an kixk’e reetal naq yoo chi nimank xrahom choq’ re li saaj winq a’an.

Li numsihom a’in naxk’ut jun chik li na’leb’ chiqu: chan ru naqak’ul li k’utb’esinb’il na’leb’. Li xtawb’al li qasum aatin a’an chanchan xk’ulb’al li k’utb’esinb’il na’leb’.

Nawulak chiwu li kixk’ut li Elder Bednar chirix li k’ub’tesinb’il na’leb’. A’an kiroksi wiib’ li na’leb’ li naqanumsi chiqajunilo rik’in li saqen.

A’an naxye resil li hoonal “naq noko’ok sa’ jun kab’l q’ojyin xsa’ ut naqaloch li xam. … Sa’ jun k’utaamil li kab’l nanuja rik’in li saqen ut na’oso’ li q’ojyin. … Li xam li nalochman sa’ li kab’l q’ojyin xsa’ a’an chanchan xk’ulb’al li na’leb’ rik’in li Dios sa’ junpaat ut chi jun waakaj.” A’an li xink’ul laa’in rik’in li xMônica.

Li numsihom jun chik a’an naq “naqak’e reetal naq chirix li q’ojyin yoo chi saqewk li kutan. … Li xam sa’ li kab’l q’ojyin xsa’ nalemtz’un sa’ junpaat, a’b’an lix saqenkil li saqewk ink’a’ nalemtz’un chi jun waakaj. Chi timil timil nak’utun xlemtz’unkil, ut … chirix xnumik li hoonal, li saq’e nak’utun chiru xb’een li ruchich’och’.

“Lix k’utunik lix lemtz’unkil li saqewk chi timil timil a’an chanchan xk’ulb’al jun na’leb’ rik’in li Dios “chi junjunqil li raqal, chi junjunqil li naʼlebʼ” (2 Nefi 28:30).” A’an li kixk’ul li xMônica naq yoo chixk’eeb’al reetal naq naraj sumlaak wik’in. Kiraj chik hoonal.

Li Elder Bednar kixraq li raatin chixyeeb’al: “K’iila sut, li k’utb’esinb’il na’leb’ nachal chi junjunqil li raqal ut chi timil timil, ut nak’utb’esiman a’ yaal li qajom, li qak’ulub’il, ut li qakawresinkil.”

Hermana Godoy: Naru ajwi’ nayeeman a’in chirix xk’ulb’al li musiq’ejil na’leb’ chirix li qajunelikil ochb’een. K’iila sut, taak’utb’esimanq chi junjunqil li raqal naq naqanaw ru jun kristiaan ut naqanumsi li hoonal sa’ komonil.

Li musiq’ejil metz’ew

Elder Godoy: Chinaakanab’ chixch’olob’ankil a’an. Jo’ xeril sa’ li video, li xik sa’ seminario kixjal inyu’am chi tz’aqal. Us ta sa’ xtiklajik kiwaj wulak re rilb’al jun ch’ina-usil saaj ixq ut ink’a’ re xtzolb’al li evangelio, a’an kixkawob’resi lin paab’aal ut kinixtiikisi sa’ lin musiq’ejil b’eenik.

B’antiox re lix tzolb’al li evangelio wulaj wulaj, kinru chixkawob’resinkil lix nawom inch’ool ut chixtz’eqtaanankil li aaleek sa’ inyu’am. Kinixtenq’a chixtawb’al ru naq laa’in jun ralal li Dios ut naq a’an kixk’uub’ jun na’leb’ choq’ we sa’ li yu’am a’in.

Hermana Godoy: Ut yaal ajwi’ li na’leb’ a’in choq’ re li instituto. Koowulak ajwi’ aran naq yooko chixnawb’al qib’ chiqib’il qib’. Nawoyb’eni naq yookex chiroksinkil li chaab’il k’anjeleb’aal a’an. Aran ink’a’ ka’ajwi’ teetaw lix yaalalil li evangelio, teetaw ajwi’ tz’aqal amiiw. Ab’ihomaq li kixye li Awa’b’ej Nelson chirix li instituto:

Video: “Ex was wiitz’in, nekexinra. Rajlal nekexink’oxla ut nintijok cherix. Wankex sa’ jun kutankil jo’ maajun wa wanjenaq. Ak ninqex chik ut yookex chixsik’b’al ru lee b’e—jun b’e aajel ru li tixtoch’ lee yu’am arin ut chi junelik. Wan naq chanchan naq jwal ch’a’aj malaj xiwxiw xsik’b’al ru lee b’e. A’b’an chaab’il ajwi’ xb’aan naq nim ru li kutan wanko wi’.

“Ma naru nekexinb’oq chixb’aanunkil k’a’ruhaq li taak’anjelaq eere jo’ ink’a’ chik tixb’aanu jalan k’a’aq re ru? Ayu sa’ instituto! Wilomeb’ lin kok’al, li wi, ut naab’aleb’ lin xikin wi chi wulak. Li wulak sa’ instituto xjal lix yu’ameb’.

“Li instituto xtenq’aheb’, ut tatxtenq’a laa’at, chixnimob’resinkil laa paab’aal chirix li Jesukristo. Li wulak sa’ instituto tatxtenq’a chireek’ankil xkomon chik lix rahom li qaChoxahil Yuwa’ choq’ aawe. Sa’ li instituto wankeb’ li musiq’anb’il aj k’utunel, li chaab’il amiiw, ut li k’ulub’aak. Tatxtenq’a chixk’eeb’al reetal k’a’ut naq xyu’aminkil li evangelio nak’amok sa’ li sahil ch’oolejil li ink’a’ na’oso’. Li wulak sa’ instituto tatxtenq’a chixyu’aminkil li evangelio ut chi saho’k sa’ aach’ool—anajwan.

Wi nakawaj xnawb’al anihat chi yaal, ayu sa’ instituto.
Wi nakawaj xnawb’al k’a’ru rajb’al li yu’am, ayu sa’ instituto.
Wi nakawaj kanaak sa’ xb’ehil li sumwank, ayu sa’ instituto.
Wi nakawaj xtzolb’al chan ru xk’eeb’al chi numtaak li Dios sa’ laa yu’am, ayu sa’ instituto.
Wi nakawaj xk’ojob’ankil li tuqtuukilal, ayu’ sa’ instituto.

“Ninyeechi’i eere li osob’tesiik a’in, ut ninwotz inrahom choq’ eere sa’ lix loq’laj k’ab’a’ li Jesukristo, amen.”

Elder Godoy: Naq toj yooko chi aatinak chirix li musiq’ejil metz’ew, chineekanab’ chixwotzb’al li xink’ul jo’ aj tzolol ochochnal.

Jo’ xeril sa’ li video, kinb’oqe’ chi k’anjelak us ta ka’ch’in ajwi’ li naru ninwotz. Li k’anjelak kinixk’e chireek’ankil naq k’ulub’anb’ilin. Kinixkawresi chixtenq’ankileb’ li was wiitz’in, ut chi jo’kan, kixkawob’resi lix nawom inch’ool. Re xnimob’resinkil chi us lix nawom xch’ool junaq laa was aawiitz’in, jwal us naq taawotz laa we. Nawoyb’eni naq yookat chixyalb’al aaq’e chi k’anjelak chiruheb’ laa was aawiitz’in. Maare a’an li ilok komon, li resilal li junkab’al, li k’anjelak sa’ li santil ochoch, malaj yalalq k’a’ chik chi b’oqok sa’ li Iglees b’ar wi’ ink’a’ nakak’oxla aawib’, nakatenq’aheb’ b’an aawas aawiitz’in. A’an tatrosob’tesi, tatxkawob’resi, ut tatxkol.

Nawulak chiwu li raqal sa’ li Tzol’leb’ ut Sumwank li naxjultika li na’leb’ a’in:

“Ninye chi yaal, ebʼ li winq tento naq kʼeebʼilaqebʼ ribʼ chi anchalebʼ xchʼool saʼ jun chaabʼil kʼanjel, ut teʼxbʼaanu kʼiila kʼaʼaq re ru chi yal ajbʼil xbʼaanebʼ, ut teʼxkʼe chi uxliik naabʼal li tiikilal.”

Ut, relik chi yaal, jo’ xinye sa’ li video, jwal xwulak chiwu li wochb’een aj tzolol ochochnal jo’kan naq kinsumla rik’in lix rab’in. A’an ki’ok jo’ xyuwa’ li wixaqil. A’an xyuwa’ li xMônica. Kinyal inq’e sa’ lin k’anjel jo’ aj tzolol ochochnal.

Hermana Godoy: Jun usilal wan qe anajwan li moko kiwan ta junxil a’an naq jwal nach’eb’ li santil ochoch. Naq saajo chaq, li junaj chi santil ochoch sa’ Brasil wan aran Sao Paulo, li jwal najt qik’in. Sa’ li kutan a’an, eb’ li saaj ke’xik sa’ li santil ochoch naq okeb’ re chi k’anjelak sa’ mision malaj chi sumlaak. Anajwan, li Awa’b’ej Nelson naxjultika naq aajel ru xk’ulb’al li loq’laj tiqib’aak, maak’a’ naxye ma yooko chi xik sa’ mision malaj chi sumlaak, malaj ink’a’. Li na’ajman ru a’an xkawresinkil qib’. Nawoyb’eni naq taak’oxla chi us li na’leb’ a’an.

Noko’osob’tesiik ajwi’ naq yooko chi wulak sa’ li rochoch li Qaawa’. Sa’ li santil ochoch, naqak’ul li na’leb’ li nokoxtenq’a chi numtaak sa’ xb’een li ruchich’och’. Nawulak chiwu li kixye li Awa’b’ej Nelson sa’ li jolomil ch’utub’aj-ib’ toje’ xnume’:

Video: “Maak’a’ chik k’a’ru li jwal tatxtenq’a chixchapb’al li b’arb’ookil ch’iich’ jo’ li loq’onink sa’ li santil ochoch jo’ rajlal naru chawu. Maak’a’ chik k’a’ru li jwal tixkol aawix naq nakataw aawib’ sa’ xqʼojyinal choql li ruchich’och’. Maak’a’ chik k’a’ru li jwal tixkawob’resi lix nawom aach’ool chirix li Qaawa’ Jesukristo ut lix tojb’al rix li maak xb’aan a’an, malaj li jwal tatxtenq’a chixtawb’al chik ru lix nimal ru k’uub’anb’il na’leb’ li Dios. Maak’a’ chik k’a’ru li jwal tixtuqub’ aamusiq’ sa’ xq’ehil li rahilal. Maak’a’ chik k’a’ru li jwal tixk’e chi tehe’k li choxa. Maak’a’ chik!”

Xik sa’ jun mision

Hermana Godoy: Us, choo’aatinaq chirix li mision. Waqib’ po chirix li relik chaq laj Carlos sa’ xmision, laa’in xkohin ajwi’ sa’ mision.

Elder Godoy: Ma yal chi jo’kan xnume’?

Hermana Godoy: Ink’a’ yal chi jo’kan xnume’. Sa’ xkab’ichal kiqaj k’anjelak chiru li Qaawa’, ut sa’ xkab’ichal kiqaj sumlaak sa’ junaq kutan. Sa’ qach’ool naq li k’anjelak sa’ mision tixk’e xsahil xch’ool li Kolonel, ut a’an tooxkawresi ajwi’ choq’ re li sumlaak. Ch’olch’o ajwi’ naq a’an tixk’ameb’ ajwi’ li osob’tesiik jwal taqaj ru jo’ saajil sum aatin.

Elder Godoy: Ch’olcho’ naq koo’osob’tesiik xb’aan li qak’anjel sa’ mision. Xb’aan naq kook’anjelak sa’ mision, kikawob’resiik lix nawom qach’ool chirix li Kolonel, kiniman li qanawom chirix li evangelio, ut li seeb’al chi aatinak ut chi jolomink li xqatzol aran kooxtenq’a chi usaak sa’eb’ li qatrab’aaj. A’b’an sa’ xb’een chixjunil, kisaho’ qach’ool naq xqatz’aqob’resi ru li mision kixkawresi li Qaawa’ choq’ qe.

Hermana Godoy: Ut eb’ li ani ink’a’ neke’ru chi xik malaj ink’a’ neke’xchoy chi tz’aqal lix mision? Ma toj wan royb’enihomeb’ chirixeb’ li kutan chalel?

Elder Godoy: Wan ut! Li qaChoxahil Yuwa’ a’an aj rahonel ut junelik wan aran choq’ reheb’. Miqaraq aatin chirixeb’ li jalan neke’xk’ul sa’ mision, malaj li ink’a’ neke’xik sa’ mision. Us ta li k’anjelak sa’ mision naru tixk’e qana’leb’ sa’ li qayu’am, ut teneb’anb’il li k’anjel a’an sa’ xb’eeneb’ li saaj winq sa’ li tijonelil, maawa’ a’an jun k’ojob’anb’il k’anjel re li evangelio, jo’kan naq maa’ani tixk’ul xtojb’a-maak xb’aan sa’ li yu’am a’in, chi moko taasachq li osob’tesiik chiru sa’ li junelik q’e kutan.

Hermana Godoy: Nasaho’ inch’ool naq kinru chi k’anjelak, ut ninye re chixjunileb’ naq te’xik ajwi’. A’ut jo’ naqanaw, k’ulb’ileb’ ut aajeleb’ ru li saaj ixq, a’b’an li k’anjelak sa’ mision moko teneb’anb’il ta.

Elder Godoy: Laa’in ajwi’ nasaho’ inch’ool chirix lin mision. Ninnaw naq kinsutq’i chirix wiib’ chihab’ chi kawresinb’ilin wi’chik choq’ re li yu’am.

Hermana Godoy: Yooko chi aatinak chirix li sutq’iik sa’ mision, maare too’aatinaq ajwi’ chirix li sumlaak?

Elder Godoy: Us. Choo’aatinaq chirix a’an

Xk’iiresinkil jun junkab’al

Hermana Godoy: Arin wankeb’ wiib’ li misioner ak xe’sutq’i, naab’al xrahomeb’, naab’al xna’leb’eb’, ut maak’a’ xtumineb’.

Elder Godoy: Yaal a’an!

Hermana Godoy: Naq nawil chi ixb’ej, nink’e reetal naq jwal chaab’il lix tiklajik li qayu’am jo’ sum aatin; koo’el chi uub’ej sa’eb’ li qajom chirix li tzolok, li trab’ajik, ut li qaruchich’och’il yu’am. Wotz kiqab’aanu, ut li qanumsihom ut li qach’a’ajkilal koohe’xjunaji.

Elder Godoy: Yaal li nakaye. Jwal ch’ina-useb’ li chihab’ a’an naq yooko chixkab’lankil li qayu’am ut chi elk chi uub’ej. A’ut ink’a’ yooko chixyeeb’al naq moko us ta xtikib’ankil li sumlaak rik’in naab’al li tumin. Yal naqaj xwotzb’al li seraq’ a’in rik’ineb’ li yookeb’ chi oyb’enink chi xik chi uub’ej sa’ li sumwanjik toj reetal naq akaq wanq chixjunil li taak’anjelaq reheb’. Moko naab’al ta li na’ajman, ka’ajwi’ naq wan laa sum aatin, ut li Qaawa’ chak’atq—chixjunil chik naru teeb’aanu sa’ komonil, li tixkawob’resi lee sumwanijk.

Hermana Godoy: Nawaj xyeeb’al jun chik li na’leb’—a’ut a’an ajwi’ chirix li wank chi sumsu: naq laa’at, jun saaj maji’ sumsu, nokohaawil laa’o, li ak k’ojk’ooko sa’ li qajunkab’al, maare nakak’oxla naq junelik wanjenaqo chi jo’kan, naq junelik us chixjunil, ut naq maajun wa xch’a’ajko’ li qayu’am. Maare yaal a’an choq’ re junjunq, a’b’an choq’ re lix k’ihaleb’, ink’a’.

Elder Godoy: Choq’ qe laa’o, ink’a’.

Hermana Godoy: Li wank chi sumsu a’an jun numsihom li naqoyb’eni naq junelik yooq chi usaak rik’in xnumik li hoonal. Wan qarahom chalen chaq xtiklajik, a’b’an toj yooko chixtzolb’al chan ru wank sa’ junajil chi timil timil. Tento taqataw qib’ chiqib’il qib’, wan naq nokose’ek, wan naq nokoyaab’ak; eb’ li kok’al neke’xk’am li sahil ch’oolejil jo’ ajwi’ li ch’a’ajkilal, li yajel nokoxtoch’ chi jo’q’ehaq, ut wan naq maak’a’ li tumin. Kama’an li yu’am.

Elder Godoy: A’b’an wan jun na’leb’ ch’olch’o ru. Wi naqoksi lix evangelio li Jesukristo sa’ chixjunil a’in, li wank chi sumsu jwal seeb’aq ut sahaq wi’chik.

Hermana Godoy: Wan jun inpatz’om choq’ aawe. Eb’ li ink’a’ te’ruuq chi sumlaak sa’ li yu’am a’in, ma wan aawaatin choq’ reheb’?

Elder Godoy: Nawulak chiwu li kixye li Awa’b’ej Hinckley reheb’ li ixq. Ut yaal ajwi’ choq’ reheb’ li winq. Aʼan kixye:

Video: “Wankeb’ sa’ eeyanq li ink’a’ te’sumlaaq sa’ li yu’am a’in. Wan naq nak’ulman a’an. Wi nak’ulman, maasach aayu’am chi raho’k aach’ool chirix. Li ruchich’och’ toj naraj ru laa seeb’al. Naraj ru laa maatan. Li Iglees naraj ru laa paab’aal. Naraj ru laa kawil uq’ aj tenq’anel. Li yu’am maajun wa sachenaq toj reetal naq sachenaq naqaye re. K’iheb’ li ani neke’raj ru laa wuq’ aj tenq’anel, laa se’ aj rahonel, ut laa k’a’uxl aj toq’ob’anel. Nink’e reetal naq wankeb’ naab’aleb’ li chaab’il ixq li ak numenaq xhoonaleb’ chi sumlaak. Ink’a’ nintaw ru k’a’ut, a’b’an ninnaw naq sa’ li na’leb’ kixk’uub’ li Nimajwal, li junelikil na’leb’ li naqak’ab’a’i lix k’uub’anb’il na’leb’ li Dios re sahil ch’oolejil, taawanq xhoonal ut xq’ajkamunkil chixjunil li nasik’ok re.”

Elder Godoy: Jun raqal reheb’ li loq’laj hu li naxyeechi’i ajwi’ a’in natawman sa’ Mosiah 2:41.

“Ut joʼkan wiʼchik, nawaj raj naq chekʼoxla li osobʼtesiik ut li sahoʼk chʼoolej wankebʼ wiʼ li nekeʼpaabʼank rehebʼ lix taqlahom li Dios. Xbʼaan naq kʼehomaq reetal, osobʼtesinbʼilebʼ saʼ chixjunil li kʼaʼaq re ru, re li yuʼam aʼin joʼ ajwiʼ re li musiqʼej; ut wi nekeʼkuyuk chi tiikebʼ chi paabʼank toj saʼ rosoʼjik, nekeʼkʼuleʼ chaq saʼ choxa, re naq chi joʼkan teʼruuq chi wank rikʼin li Dios saʼ sahil chʼoolejil li maajoʼqʼe naʼosoʼ. Aay, chijultikoʼq, chijultikoʼq eere naq yaal li kʼaʼaq re ru aʼin; xbʼaan naq li Qaawaʼ Dios xyehok re.”

Re xk’osb’al ru li na’leb’, rik’in li aatin kiroksi li Elder Bednar, yaal tento naq chaab’ilat, naq taapaab’eb’ li taqlahom, ut li Qaawa’ tixtuqub’ ru chixjunil. Sa’ xraqik, chixjunileb’ li osob’tesihom te’k’eemanq reheb’ li tiikeb’ chi paab’ank.

Môni, wan chik nakawaj xyeeb’al?

Hermana Godoy: Nawaj xwotzb’al lix nawom inch’ool.

Ninnaw naq laa’o ralal xk’ajol jun chaab’il Yuwa’b’ej aj rahonel. Ninnaw naq li Jesus a’an li Kristo, ut naq yo’yo a’an. Ninnaw naq wan li yu’am a’in re xkawresinkil qib’ chixk’ulb’al li Dios. Ninnaw naq a’an nokoxb’eresi ut naxkawresi li b’e. Moko qajunes ta wanko arin. Ninnaw naq li santil ochoch a’an li rochoch li Qaawa’ sa’ li ruchich’och’. Aran naru naqak’ul qanawom ut qamusiq’ahom sa’ li qayu’am.

Sa’ xk’ab’a’ li Jesukristo, amen.

Elder Godoy: B’antiox, b’antiox. Jwal sa inch’ool xtzolb’aleb’ a’an aawik’in. Ut nakatinra.

Ut eb’ laj Gilbert? Ma wan eena’leb’ chirix junaq na’leb’ xqak’ut anajwan? Junaq na’leb’ choq’ reheb’ li ch’ina-usil kristiaan a’in?