Atamai i Aoaoga Faavae ma le Aoaoina Loloto
O Se Afiafi ma Elder Gerrit W. Gong
Saunoaga i Faiaoga Faalelotu a le OAE • 17 Fepuari, 2017 • Tapeneko i Sate Leki
Ou uso e ma tuafafine pele, ua ou olioli lava i lenei avanoa e faatasi ai ma outou i lenei afiafi. Ae ou te lei faalauiloaina atua ia Elder Gong, ou te fia faasoa atua se manatu lea ou te faamoemoe o le a fesoasoani ia te outou ma a outou tamaiti aoga.
Ou te fia faailoa atu muamua lava lo’u alofa mo outou ma lo’u agaga faafetai mo mea o loo outou faia. O loo outou faia se galuega tele i le malo o le Atua ma i olaga o a outou tamaiti aoga. Ou te alofa ia te outou ma tatalo mo faamanuiaga silisili a le Alii o le a ia te outou ma o outou aiga.
Ou te fia talanoa atu i le po nei e uiga i le Atamai i Aoaoga faavae. O mea ou te talanoa atu ai o le a faatatau faapitoa lava ia i latou o loo aoaoina le seminare, ae e faatatau moni foi ia i tatou uma.
O le Atamai i Aoaoga Faavae o se polokalama i le seminare e tolu ona faamoemoega: muamua, ia fesoasoani i a tatou tamaiti aoga e aoao i le auala e maua ai le malamalama faaleagaga; lona lua, ia fesoasoani i tamaiti aoga ia iloa ma malamalama i le aoaoga faavae a Keriso—o lona uiga ia iloa uma le aoaoga faavae moni i o latou mafaufau ma ia malamalama i le aoaoga faavae moni i o latou loto, ma e tatou te mananao ina ia mauaa i o latou loto; ma le lona tolu, ia fesoasoani i tamaiti aoga ia aoao le auala e faatatau ai le aoaoga faavae i o latou olaga, ia ola uma ai i latou lava ma ia faaaoga e tali ai fesili a a latou uo pe aoao atu foi ma fesoasoani i isi ia iloa le upumoni.
O le Atamai i Aoaoga Faavae sa faalauiloaina i le lalolagi atoa i le tautoulu talu ai. Ou te manao ia outou iloa ma lagona i o outou loto ua oo mai lenei mea e ala i faaaliga mai le Alii; o se vavega lava. Ua tele na ou mafaufau i le auala na oo mai ai ma le taimi na oo mai ai ma le mafuaaga na oo mai ai. Ua oo ina ou vaaia le Atamai i Aoaoga Faavae i se anotusi tele atu o aoaoga a le Ekalesia ma le galuega tele a le Alii i le lalolagi.
Ou te talitonu ua fesoasoani le Atamai i Aoaoga Faavae ia tatou tamaiti aoga ia tuputupu ae i le iloa ma le malamalama i aoaoga faavae ma fesoasoani ia i latou ia aoao le auala e faaaoga ai lena iloa ma le malamalama i o latou olaga. Ae e sili atu nai lo lena. Ua aoaoina ai foi a tatou tamaiti aoga i le ala a le Alii ia aoao loloto i soo se ituaiga o iloa ma i soo se taimi i o latou olaga.
E loloto le aoaoina pe a faateleina lo tatou mana e faia ai ni mea se tolu: (1) ia iloa ma ia malamalama; (2) ia faia se faatinoga mataalia ma amiotonu; ma le (3) ia avea atili e faapei o lo tatou Tama Faalelagi ma Lona Alo, o Iesu Keriso.1
O le aoaoina loloto e tatau ona faia i le ala a le Alii, e ala i le mana o le Agaga Paia ma e ala i suesuega mataalia ma filiga, ma le aoaoina e le tasi o le isi, ma faatasi ai ma le alofatunoa o Iesu Keriso. E moni lenei mea mo soo se ituaiga o iloa ma mo soo se taimi o le olaga.
O le mea tonu lava lea o loo tatou aoaoina atu i a tatou tamaiti aoga i le Atamai i Aoaoga Faavae (ma, ou te faamoemoe, i mea uma o loo tatou aoao atua). O le mea lea, o le Atamai i Aoaoga Faavae, o se faitotoa lea i le aoaoina loloto i le olaga atoa.
Ou te fia faamaea atu la’u tautalaga i ni valaaulia se lua. O le valaaulia muamua e avatu ia i latou o loo faiaoga i le seminare. Ou uso e ma tuafafine pele, i le Lalolagi atoa, ou te faamoemoe ia vaai tou tamaiti aoga o loo outou aoaoina i latou i le auala e aoao atu ai i le ala a le Alii. Aoao i latou, latou te manaomiaina ona aoao loloto i le iloa uma faaleagaga ma faalepotosalalau i o latou olaga atoa. Fesoasoani ia latou iloa o le faauu mai le seminare e le o le mutaaga lea. Tatou te mananao ia latou faauu mai le inisitituti, ma e tatou te mananao ia i latou ia saili le a’otauina pe a uma le aoga maualuga. O loo outou fesoasoani ia i latou ia faia mea uma na e lua ma ia faataatia se faavae mo le aoaoina loloto i le olaga atoa e ala i le aoaoina o i latou i le auala e aoao ai i le ala a le Alii.
O le valaaulia lona lua e avatu ia i latou o loo faiaoga i le inisitituti. Ou uso e ma tuafafine pele, faamolemole ia fesoasoani i a outou tamaiti aoga ia aoao i le ala a le Alii. Faamolemole fesoasoani ia latou iloa le taua ma le mana i o latou olaga o le faauu mai le inisitituti. O le faauuga ma le inisitituti ua fai ma faatusa o le faamaeaina o se suesuega lautele ua faatulagaina o le talalelei. O le faauuga mai le inisitituti o le a faamausali ai lo latou malamalama i le talalelei, faalolotoina ai la latou molimau ma lo latou tautinoga i le Alii, ma fesoasoani ia i latou ia iloa ma alolofa ia Iesu Keriso.
Ou te iloa afai e te faatinoina nei valaaulia, o le a faamanuiaina e le Alii ma le Faaola outou ma a outou tamaiti aoga. Ou te molimau atu o loo soifua lo tatou Tama Faalelagi ma e alofa ia i tatou. O Lona Alo, o Iesu Keriso, o lo tatou Faaola ma le Togiola. Ou te iloa o loo soifua o Ia. Ou te iloa o Ia ma e ala atu ia te Ia e mafai ai ona tatou aoao loloto uma i o tatou olaga, aua o Ia o le Ala, le Upumoni, ma le Ola. I le suafa paia o Iesu Keriso, amene.
© 2017 Puletaofia e le lntelectual Reserve, Inc. Ua taofia aia tatau uma. Faamaonia le faa-Peretania: 12/16. Faamaonia le Faaliliuga: 12/16. Faaliliuga o le “Doctrinal Mastery and Deep Learning.” Samoan. PD60003279 890