Emān Mennin Leļo̧k ko: Me Jisōs Kraist Ej Lewaj n̄an Kom̧
Ro jeiū im jatū rejitōn bōro, ta ejjab juon iien eaiboojoj an iiō in! Jej iakwe ainikien al eo an “Oh, Come, All Ye Faithful”1 im m̧ōņōņō in itok n̄an kautieje E: Jisōs RiKraist eo—nin̄nin̄ eo jān Bethlehem—”Jeova eo Eļap an Kallim̧ur M̧okta [im] Messaia eo an Kallim̧ur Ekāāl.”2
Joteenin jen ļōmņak ippān doon kōn kōjeraam̧m̧an ko me rej itok n̄an kōj ilo ad mijōk wōt mour eo, mijen eo, katak, im Pinmuur eo an Irooj Jisōs Kraist. Ij karuwaineneik kom̧, āinwōt Kiin̄ Benjamin ekar kōm̧m̧ane n̄an Armej ro Rekwojarjar ilo raan ko an, “ļōmņak kōn jekjek eo ejeraam̧m̧an im ekōm̧ōņōņō an ro raar kōjparok kien ko an Anij.” Kōjeraam̧m̧an i ej n̄an kōj ijin im kiiō, ak kakkobaba to n̄ane ej kallim̧ur eo eļapļo̧k an “m̧ōņōņō eo ejjeļo̧k jem̧ļo̧kin.”3 Āinwōt kar ba, rikaļoor ro rem̧ool an Jisōs Kraist ewōr aer jeraam̧m̧an in n̄an en̄jake lan̄lōn̄ eo ejuwaan indeeo im indeeo.
Kar keememej eō kōn menin raan eo juon ke ikar ioon juon enjeļ etan Lydia. Enjeļ in ekar jab nuknuk mouj, im ekar kapidodoik n̄an kōm n̄an am loļo̧k ilo an itok n̄an opiij eo aō. Lydia ekar 12 iiō rūttoin. Kar jiron̄ tok eō bwe ej en̄taan kōn juon kain kāānjer in kōmālij ejeja, ekōmetak.4 Turin mejān elukkuun aiboojoj im aenōm̧m̧an ļapļo̧k jān jon̄an iiō eo an. Ke kōmij kōnono kōn mour eo an im ta eo ej pād im̧aan, ekar jokne im pād ilo aenōm̧m̧an. Ke ikar kajjitōk ippān eļan̄n̄e elōn̄ an kajjitōk, ekar m̧ōkaj an uwaak, “Lan̄ ej āinwōt ta? Menin ekar ejaake juon ekōnono am̧ro make kōn jibadbad an mour in im kōjeraam̧m̧an ko me Jemedwōj Ilan̄ im Nejin Jitōn Bōro rekar letok n̄an ro rej kautiej im ļoor Er.
Ilukkuun em̧m̧akūt kōn tōmak eo an Lydia im baam̧le eo an! Jelm̧ae juon apan̄ eo elukkuun pen āinwōt mour ilo laļ in ej juon inepata, Lydia ekar obrak kōn tōmak. Ewōr ippān juon jibadbad an indeeo. Ejeļā bwe Irooj ej iakwe e im enaaj kea kōn e. Wūjlepļo̧k eo an baam̧le eo an ej obrak kōn ejja aenōm̧m̧an im ineem̧m̧an eo me tōmak wōt ilo Irooj emaron̄ letok.
Kōņaan eo an Lydia ekar kōņaan ioon Būreejtōn eo an Kabun̄ eo an Irooj, ak kōņaan ko rej m̧wilaļļo̧k jān jabdewōt en̄jake ko juon wōt kōttāer ijin ilo mour in. Kōņaan eo an em̧wilaļļo̧k ej bwe pād ippān baam̧le eo an n̄an indeeo ilo jikin eo ilo celestial. Ekoba kōņaan eo an aolep iien n̄an pād ippān Jemedwōj Ilan̄ im Jisōs barāinwōt.
Ilo m̧ool, kōņaan ko ad rej kareel kōj kajjojo ilo elōn̄ wāween ko, ejjab baj ijin im kiiō ak eļapļo̧k. Ļōmņak kōn aiboojoj in ennaan in an Alma: “[Irooj eo] ekar ltok n̄an armej ekkar n̄an aer kōņaan5
Kōņaan ej aorōk ilo tōre in iien in an leļo̧k menin leļo̧k, n̄e jej eļaptata kōļmenļo̧kjeņ kōn kōņaan ko an ro jej iakwe er. Ilo tōre in iien in, ij karuwaineneik kom̧ n̄an ami ļōmņak kōn kōņaan eo ami make. Ta kōņaan ko ami rem̧wilaļ? Ta eo me kwoj lukkuun kōņaan en̄jake im kōttōbare ilo mour in? Kwoj ke lukkuun in aikuj in erom̧ eļapļo̧k im eļapļo̧k āinwōt Jisōs Kraist? Kwoj ke lukkuun kōņaan in mour ippān Jemedwōj Ilan̄ im ippān baam̧le eo am n̄an indeeo āinwōt Ej mour?
N̄e kwoj, kwonej aikuj in errā kōn elōn̄ mennin leļo̧k ko litok jān Irooj n̄an jipan̄ eok im n̄an ilo iien in ad ilo m̧aanjabpopo ilo mour in kanniōk. Jen ļōmņak wōt kōn emān mennin leļo̧k ko Jisōs Kraist ekar leļo̧k n̄an aolep ro rej m̧ōņōņō in būki.6
Juon, Ekar letok n̄an kwe im n̄a juon jon̄ak eo ejjeļo̧k jon̄an n̄an iakwe. Ekoba jon̄an eo n̄an iakwe ro ejjeļo̧k iakwe ippāer im ro rejjab kōņaan iakwe eok ak kakkure eok im kōņaan kōjerbal eok.7
Kōn jipan̄ eo an Rilo̧mo̧o̧r eo, jemaron̄ ekkatak n̄an iakwe āinwōt Ekar iakwe. Emaron̄ aikuji juon oktak in bōro—eļaptata juon wāween kapidodoik buruōd—ilo ad ekkatak jān Rilo̧mo̧o̧r eo wāween eo n̄an lukkuun kōjparok doon. Ro jeiū im jatū rejitōn bōro, jemaron̄ lukkuun rikarejar ro rem̧ool ilo wāween ko an Irooj n̄e jej bōk mennin letok eo An iakwe.
Kajjitōk kōn jipan̄ eo an Irooj n̄an iakwe ro Ej aikuji am̧ iakwe er, ekoba ro im rej jab aolep iien pidodo en̄jake aer iakwe. Komaron̄ bōlen kajjitōk ippān Anij bwe enjeļ ro An ren etetal ippam̧ im kōm̧m̧ani men ko kwojjab kōņaan kōm̧m̧ani.8
Kein karuo mennin leļo̧k eo Rilo̧mo̧o̧r eo ej lewaj ej maron̄ eo n̄an jeorļo̧k bōd. Jān Pinmuur eo Eļap, komaron̄ jeorļo̧k an ro rekar kōmetak eok bōd im ro me reban bōk eddo kōn nana eo aer n̄an eok.
Elukkuun pidodo n̄an jeorļo̧k an juon bōd eo ej m̧ool im ettā pukot jeorļo̧k bōd eo am̧. Ak Rilo̧mo̧o̧r eo enaaj lewaj n̄an eok maron̄ eo n̄an jeorļo̧k an juon bōd eo ekar jab em̧m̧an an kōm̧m̧an n̄an eok ilo jabdewōt wāween. Innām m̧akūtkūt ko aer rekōmetak rejjab maron̄ kakkure jetōb eo am̧.
Kein kajilu mennin letok eo jān Rilo̧mo̧o̧r ej eo an ukweļo̧k. Mennin letok in jejjab aolep iien meļeļe. Āinwōt ami jeļā, Kallim̧ur Ekāāl ekar jinoin tata jeje ilo kajin Greek. Ilo eoon ko me Rilo̧mo̧o̧r eo ej kūr ioon armej ro n̄an ukweļo̧k, naan eo ekar ukook āinwōt “ukweļo̧k” ej juon naan in Greek metanoeo.9 En̄in ej juon naan ej verb ilo kajin Greek im elukkuun kajoor. Leta ko im̧aan naan eo rej meta meļeļein “oktak.” Jej barāinwōt kōjerbal leta kein im̧aan ilo kajin English. N̄an waanjon̄ak, naan eo metamorphosis meļeļein “oktak ilo nememein ak jekjekin.” Leta ko āliktata noeoej iookļo̧k naan in Greek eo im meļeļein “ļōmņak.”10 Ej barāinwōt iookļo̧k naan in Greek ko jet rej meļeļein “jeļāļo̧kjeņ,”11 “jetōb,”12 im “kitwōn menono.”13
Jemaron̄ ke jino loe aitokan eo im m̧wilaļ in ta eo Irooj ej letok n̄an kōj ke Ekar letok n̄an kōj mennin leļo̧k eo n̄an ukweļo̧k? Ej karuwaineneik kōj n̄an ukōt ļōmņak ko ad, jeļāļo̧kjeņ ko ad, jetōb eo ad, aaet ad kitwōn menono. N̄an waanjon̄ak, n̄e jej ukweļo̧k, jej menono kōn kam̧m̧oolol n̄an Anij, eo ej letok kitwōn menono jān raan n̄an raan.14 Im jej kōņaan kōjerbal kitwōn menono in ilo jerbal n̄an E im ajri ro Nejin. Ukweļo̧k Ej juon Mennin Letok Eaiboojoj. Ej juon jerbal ej jāmin mijak. Ej juon mennin letok n̄an kōj n̄an bōk kōn lan̄lōn̄ im n̄an kōjerbale—aaet m̧ōņōņō—raan n̄an raan ilo ad pukot n̄an erom̧ eļapļo̧k āinwōt Rilo̧mo̧o̧r eo ad.
Jemen kiin̄ Lamonai ekar jino meļeļe kōn ta eo kar likūt im̧aan n̄an ro rekar tōmak ilo Kraist im ļoor E. Ekar bwe enaaj joļo̧k aolepan jerawiwi kōn an m̧ōņōņō in jeļā kōn Irooj.15 Ukweļo̧k eo em̧ool ejjab juon m̧akūtkūt. Ej jāmin juon iien em̧m̧an enej jem̧ļo̧k. Ej pedped in katak n̄an eddōkļo̧k im bōk aenōm̧m̧an ilo kōļmenļo̧kjeņ, kaenōm̧m̧an, im lan̄lōn̄.
Kein kemān mennin letok jān ad Rilo̧mo̧o̧r ej juon kallim̧ur—juon kallim̧ur an mour ejjeļo̧k jem̧ļo̧kin. Menin ejjab baj meļeļe in baj mour ium̧win juon tōre elukkuun, elukkuun aitok. Aolep renaaj mour n̄an indeeo ālkin mej, mekarta laļ ta ak aiboojoj ta eo me rej ekkar n̄an e. aolep renaaj jerkakpeje im en̄jake jab wabanban. Ak mour indeeo eļapļo̧k jān juon mejān kajjin in iien. Mour indeeo ej kain mour rot im karbab eo me Jemedwōj Ilan̄ im Nejin Jitōb Bōro rej mour. Ke Jemen ekar letok n̄an kōj mour ejjeļo̧k jem̧ļo̧kin, Ej baj ba, “Eļan̄n̄e kwoj kālet n̄an ļoor Nejū m̧aan—eļan̄n̄e kōņaan am̧ ej lukkuun erom̧ āinwōt E—innām ilo tōre in komaron̄ mour āinwōt am mour im tōl ioon laļ ko im aelōn̄ in kiin̄ ko āinwōt kōm̧.”
Mennin letok kein emān rejenolo̧k renaaj bōktok n̄an kōj eļapļo̧k im eļapļo̧k lan̄lōn̄ ilo ad būki. Rekar kōmaron̄e kōnke Jeova ekar em̧m̧akūt jān tūroon eo ilan̄ im itok n̄an laļ āinwōt nin̄nin̄ Jisōs. Ekar ļotak jān Jemān ejjab wabanban im juon jinen ewabanban. Ekar ļotak ilo Bethlehem ium̧win jekjek ko rettā tata. An ekar kanaan kōn ļotak eo an ekwojarjar jān rikanaan ro jān raan ko an Adam. Jisōs Kraist ej mennin letok eo ejejuwaan—mennin letok eo an Jemān n̄an aolep ajri ro Nejin.16 Ļotak in jej m̧ōņōņō in kememe kajjojo tōre in iien an Kūrijm̧ōj.
Kōn ļōmņak ko im en̄jake ko ad relukkuun pedped wōt ioon Rilo̧mo̧o̧r eo an laļ, ta, innām, jenej aikuj in kōm̧m̧ane n̄an bōk mennin letok kein litok n̄an kō ilo m̧ōņōņō jān Jisōs Kraist? Ta wāween eo n̄an iakwe āinwōt an iakwe, jeorļo̧k bōd āinwōt An kar jeorļo̧k bōd, ukweļo̧k n̄an erom̧ āinwōt E, im ļaptata mour Ippān im Jemedwōj Ilan̄?
Wāween eo ej n̄an kōm̧m̧an im kōjparok bujen ko rekwojarjar. Jaar kāālet n̄an mour ilo iaļ in bujen eo an Irooj im pād wōt ie. Ejjab juon wāween eo ekaipokpok. Ej wāween eo n̄an lan̄lōn̄ eo em̧ool ilo mour in im eļapļo̧k ilo mour indeeo.
Ro jeiū im jatū, kōņaan ko aō rem̧wilaļtata rej bwe aolep ajri ro nejin Jemedwōj Ilan̄ ren bōk iien in em̧m̧an n̄an ron̄jake gospel eo an Jisōs Kraist im eo̧ron̄ katak ko An im n̄an an Israel maron̄ aiintok doon āinwōt kar kallim̧ur kake ilo raan kein āliktata. Im ikōņaan bwe jenaaj tōmak im bōk iakwe eo an Rilo̧mo̧o̧r eo n̄an kōj. Iakwe eo An eļap im weppān ekar kōm̧akūt E bwe en pinmuur kōn kwe im n̄a. Mennin letok in—Pinmuur eo An—ej kōtļo̧k an aolep mennin letok ko jet An erom̧ ad.
Ilo juon raan ej itok—ilo Millenium ņe eo me jej kiiō m̧aanjabpopo n̄ane—”bukwe otemjej naaj bukwelōlō, im aolep lo naaj kwaļo̧k bōro im̧aan”17 bwe Jisōs ej RiKraist eo. Im eban baj em̧m̧an in wōt an Tabernacle Choir al ilo Temple Square rej al “Alelluia.”18 Aolep armej ro rekar kālet n̄an ļoor Jisōs Kraist renaaj al im lamōj: “Alleuia: n̄an Irooj Anij Irooj in Irooj ro.”19 “Aelōn̄ in kiin̄ ko an laļ in rej erom̧ aelōn̄ in kiin̄ an ad Irooj, im nejin Jisōs, im enaaj irooj n̄an indeeo im indeeo,”20 “Kiin̄ in Kiin̄ ro, im Irooj in Irooj ro.”21
Ij kam̧ool bwe Anij emour! Jisōs ej RiKraist eo—Messaia eo En̄in ej Kabun̄ eo An, eo Ej tōl jān rikanaan ro An. Ilo ettā, kōmij lewaj kōjeraam̧m̧an ko An ioomi kajjojo, ekoba kōņaan im maron̄ bōk aolep mennin letok ko an Rilo̧mo̧o̧r eo ej lewaj n̄an kom̧, ilo etan Jisōs Kraist, amen.