Plaub lub Txiaj Ntsim uas Yexus Khetos Pub rau Nej
Kuv cov kwv tij thiab cov muam, lub caij no yeej zoo kawg! Peb nyiam zaj nkauj “Nej cov Ntseeg Tswv Yexus Los”1 thiab zoo siab los pe hawm Nws: Yexus uas yog tus Khetos—tus me nyuam mos liab ntawm Npelehees—“tus Yehauvas ntawm Phau Qub [thiab] tus Mexiyas ntawm Phau Tshiab.”2
Hmo no cia peb xav txog cov koob hmoov uas los rau peb thaum peb tsom ntsoov rau tus Tswv Yexus Khetos lub luag hauj lwm, cov lus qhuab qhia thiab txoj Kev Theej Txhoj. Kuv caw nej, ib yam li Vaj Ntxwv Npeyamis caws Haiv Neeg Ntseeg hauv nws lub caij nyoog, kom nej “xav txog qhov tau koob hmoov thiab zoo siab ntawm cov uas ua raws li Vajtswv tej lus txib.” Tam sim no peb tau qhov koob hmoov ntawd, tiam sis peb kuj tau txais kev cog lus tias peb yuav muaj “kev zoo siab uas tsis muaj qhov kawg li.”3 Cov uas coj raws li Yexus Khetos muaj cib fim txais tau kev xyiv fab loj kawg nkaus uas nyob mus ib txhis.
Kuv nco txog qhov no thaum kuv ntsib ib tug tim tswv hu ua Lydia. Tus tim tswv no tsis hnav dawb, thiab nws ua yooj yim rau wb sib tham vim nws los hauv kuv hoob kas. Lydia muaj 12 xyoos. Kuv kawm tias nws raug mob cancer hauv hlwb uas neeg tsawg muaj.4 Nws lub ntsej muag zoo li ib tug tim tswv thiab nws coj yam ntxwv zoo li nws laus dua. Thaum wb sib tham txog nws lub neej thiab yuav muaj xwm txheej li cas tom ntej, nws nyob kaj siab lug. Thaum kuv nug seb nws puas muaj lus nug, nws teb hais tias, “Lub ntuj ceeb tsheej zoo li cas?” Wb txawm sib tham txog lub ntsiab ntawm lub neej no thiab cov koob hmoov uas peb Leej Txiv Saum Ntuj Ceeb Tsheej thiab Nws Leej Tub tau pub rau cov uas hwm thiab coj raws li Nkawd.
Lydia thiab nws tsev neeg txoj kev ntseeg ua rau kuv txais kev tshoov siab! Txawm lawv muaj ib qho teeb meem loj heev hauv lub neej no, Lydia muaj kev ntseeg heev. Nws txawj xam pom mus ib txhis li. Nws paub tias tus Tswv hlub nws thiab yuav saib xyuas nws. Nws tsev neeg yeej muaj kev kaj siab lug thiab nyob tus tus uas los ntawm kev ntseeg tus Tswv.
Lydia cia siab tias nws yuav ntsib tus Thawj Tswj Hwm ntawm tus Tswv lub Koom Txoos, tiam sis nws yeej xav xav tau tej yam uas tsis tshwm sim ib zaug hauv lub neej no xwb. Nws yeej xav xav nrog nws tsev neeg nyob tas mus li hauv lub ntuj xilethi-aus. Nws kuj xav nrog nraim Leej Txiv Saum Ntuj Ceeb Tsheej thiab Yexus nyob thiab.
Muaj tseeb tiag, peb tej kev xav ua rau peb hloov ntau heev, tsis yog tam sim no xwb tiam sis nyob mus ib txhis. Cia li xav txog tej lus tseem ceeb uas Amas hais tias: “[Tus Tswv] yeej muab pub rau tib neeg raws li lawv lub siab xav.”5
Kev xav yeej tseem ceeb hauv lub caij uas peb pub khoom plig rau lwm tus, thaum peb xav txog cov uas peb hlub tej kev xav tau. Hauv lub caij no, kuv caw nej kom xav txog tej yam uas nej xav tau. Nej xav tau dab tsi tiag tiag? Nej xav ua li cas hauv lub neej no tiag tiag? Nej puas xav hloov los ua neeg zoo li Yexus Khetos ntxiv? Nej puas xav nrog Leej Txiv Saum Ntuj Ceeb Tsheej nyob thiab nrog nej tsev neeg nyob tas mus li thiab ua li Nws ua?
Yog nej xav ua li no, nej yuav xav txais ntau lub txiaj ntsim uas tus Tswv pub rau peb kom pab peb hauv lub neej no. Cia peb tsom ntsoov rau plaub lub txiaj ntsim uas Yexus Khetos pub rau peb cov uas txaus siab txais.6
Thib ib, Nws tau muab ib txoj kev txawj hlub tsis tu tsis tseg rau peb. Qhov no kuj hais txog kev txawj hlub cov uas tsis tsim nyog hlub thiab cov uas tsis hlub nej thiab tam sim no tsim txom thiab ua phem rau nej.7
Yog muaj tus Cawm Seej txoj kev pab, peb yuav kawm hlub ib yam li Nws hlub peb. Tej zaum peb yuav tsum hloov siab—peb yeej yuav tsum muaj lub siab mos siab muag—thaum tus Cawm Seej qhia peb kom peb ib leeg paub saib xyuas ib leeg tiag tiag. Kuv cov kwv tij thiab cov muam, peb yuav txhawb pab lwm tus raws li tus Tswv txoj kev thaum peb txais Nws lub txiaj ntsim uas yog kev hlub.
Cia li thov tus Tswv pab nej hlub cov uas Nws xav kom nej hlub, tsis hais cov uas tsis yooj yim rau nej hlub. Tej zaum nej yuav xav thov Vajtswv kom Nws cov tim tswv nrog nej mus rau tej qhov chaw uas nej ntshai taug mus.8
Lub txiaj ntsim thib ob uas tus Cawm Seej muab rau nej yog kev txawj zam txim. Los ntawm Nws txoj Kev Theej Txhoj uas nyob mus ib txhis, nej yuav zam txim rau cov uas ua rau nej raug mob thiab cov uas yeej yuav tsis lav ris qhov uas lawv tau ua phem rau nej.
Feem ntau yog ib qho yooj yim kom zam txim rau tus uas txo hwj chim thov kom nej zam txim rau nws. Tiam sis tus Cawm Seej yuav ua rau nej txawj zam txim rau leej twg uas tau ua li cas rau nej los. Ces tej yam phem uas lawv ua rau nej yuav tsis tab kaum nej sab ntsuj plig ntxiv.
Ib lub txiaj ntsim thib peb los ntawm tus Cawm Seej yog kev hloov siab lees txim. Tsis yog neeg coob to taub lub txiaj ntsim no. Zoo li nej paub lawm, tib neeg tau sau lus Kilis ua Phau Tshiab. Nyob hauv tej nqe uas tus Cawm Seej hais kom tib neeg hloov siab lees txim, lo lus uas txhais tias “hloov siab lees txim” yog lo lus Kilis metanoeo.9 Nov yog ib lo lus Kilis uas muaj hwj huam heev. Lo lus ua ntej meta txhais tias “hloov.” Peb kuj siv lo lus ntawd hauv cov lus Akiv. Piv txwv hais tias, lo lus metamorphosis txhais tias “kev pauv hloov lub cev.” Lo lus tom qab noeo yog ib lo lus Kilis uas txhais tias “lub siab.”10 Lo lus no kuj zoo li lwm lo lus Kilis uas txhais tias “kev txawj ntse,”11 “ntsuj plig,”12 thiab “ua pa.”13
Peb puas txawj pom tias tus Tswv pub ib lub txiaj ntsim zoo npaum li cas rau peb thaum Nws muab lub txiaj ntsim ntawm kev hloov siab lees txim rau peb? Nws caw peb hloov peb lub siab, peb txoj kev txawj ntse, peb tus ntsuj plig, thiab peb txoj kev ua pa. Ua piv txwv hais tias, thaum peb hloov siab lees txim, peb ua pa vim peb ris Vajtswv txiaj, uas muab pa rau peb ib hnub dhau ib hnub.14 Thiab peb xav siv txoj kev ua pa ntawd kom ua hauj lwm rau Nws thiab Nws cov me nyuam. Kev hloov siab lees txim yog ib lub txiaj ntsim ci ntsa iab. Yog ib tug txheej txheem uas tsis tas ntshai. Yog ib lub txiaj ntsim uas peb txais tau nrog kev xyiv fab thiab siv—siv kawg siab kawg ntsws—ib hnub dhau ib hnub thaum peb xav hloov los ua neeg zoo li tus Cawm Seej ntxiv.
Tus Vaj Ntxwv Lamaunais txiv twb pom me ntsis tias yuav muaj li cas thaum yav tom ntej rau cov uas ntseeg Khetos thiab coj raws li Nws. Nws hais tias Nws yuav muab tag nrho nws tej kev txhaum tso tseg yog tias muaj cib faim paub tus Tswv.15 Kev hloov siab lees txim tiag tiag tsis yog ua ib zaug xwb. Yog ib lub cib fim uas tsis paub tag. Yeej yuav tsum hloov siab lees txim kom vam meej thiab muaj kev kaj siab lug thiab kev xyiv fab.
Ib lub txiaj ntsim thib plaub los ntawm peb tus Cawm Seej yog ib txoj kev cog lus—kev cog lus tias yuav muaj txoj sia kav ib txhis. Qhov no tsis txhais hais tias yus nyob ntev tsis ntev xwb. Txhua tus yuav muaj txoj sia nyob tas mus li tom qab lawv tuag, tsis hais lawv tsim nyog nyob hauv lub nceeg vaj twg los yog. Txhua tus yuav sawv rov los thiab yuav tsis txawj tuag. Tiam sis txoj sia nyob mus ib txhis tsis yog ib lub sij hawm uas tau teem tseg rau peb xwb. Txoj sia nyob mus ib txhis yog txoj sia uas Leej Txiv Saum Ntuj Ceeb Tsheej thiab nws Leej Tub muaj. Yog li ntawd thaum Leej Txiv xav muab txoj sia kav ib txhis rau peb, ces zoo li Nws hais tias, “Yog nej xaiv coj raws li kuv Leej Tub—yog nej xav hloov los ua neeg zoo li Nws tiag tiag—ces dhau sij hawm mus nej yuav muaj txoj sia ib yam li wb thiab tswj hwm tej lub ntiaj teb thiab tej lub nceeg vaj ib yam li wb.”
Plaub lub txiaj ntsim zoo no yuav ua rau peb txais tau kev xyiv fab ntxiv thaum peb lees txais. Muaj tej lub txiaj ntsim no vim Yehauvas txaus siab nqis los rau hauv lub ntiaj teb ua tus me nyuam mos liab Yexus. Nws yug los ntawm ib Leej Txiv uas tsis txawj tuag thiab leej niam uas txawj tuag. Nws txo hwj chim heev yug los hauv Npelehees. Cov yaj saub txij thaum Adas lub caij nyoog los twb tau pom Nws txoj kev yug los. Yexus Khetos yog Vajtswv lub txiaj ntsim—lub txiaj ntsim uas Leej Txiv pub rau tag nrho Nws cov me nyuam.16 Txoj kev yug los uas peb zoo siab ua koob tsheej txog txhua lub caij Christmas.
Vim peb xav ntsoov txog tus Cawm Seej ntawm lub ntiaj teb, ces peb thiaj li yuav tsum ua li cas kom txais tau tej lub txiaj ntsim no uas Yexus Khetos txaus siab muab rau peb? Qhov tseem ceeb kom peb hlub ib yam li Nws hlub, zam txim ib yam li Nws zam txim, hloov siab lees txim kom hloov los ua neeg zoo li Nws, thiab thaum kawg nrog Nws thiab peb Leej Txiv Saum Ntuj Ceeb Tsheej nyob yog dab tsi?
Qhov tseem ceeb yog kom peb ua raws li peb tej kev khi lus dawb ceev. Peb xaiv kom ua neej raws li tus Tswv txoj kev khi lus thiab tsis txhob tso tseg. Tsis nyuaj to taub. Yog tib txoj kev kom muaj kev xyiv fab hauv lub neej no thiab hauv lub neej nyob mus ib txhis.
Kuv cov kwv tij thiab cov muam, qhov uas kuv xav tau heev yog kom tag nrho Leej Txiv Saum Ntuj Ceeb Tsheej cov me nyuam muaj cib fim hnov tau Yexus Khetos txoj moo zoo thiab ua raws li Nws tej lus qhia thiab kom Ixayees sib sau ua ke raws li tau cog lus yuav ua hauv hnub nyoog kawg no. Thiab kuv xav kom peb ntseeg thiab txais tus Cawm Seej txoj kev hlub peb txhua tus. Nws txoj kev hlub uas nyob mus ib txhis ua rau Nws theej peb lub txhoj. Lub txiaj ntsim ntawd—Nws txoj Kev Theej Txhoj—ua rau peb txais tau tag nrho Nws cov txiaj ntsim.
Yuav muaj ib hnub—thaum txob lub Milenias uas peb npaj rau tam sim no—“txhua lub hauv caug yuav txhos thiab txhua tus nplaig yuav lees”17 hais tias Yexus yog tus Khetos. Thiab tsis yog lub Tsev Kheej Pawg Huv Nkauj Nyob ntawm Tshav Tuam Tsev xwb uas yuav hu nkauj “Hauleluyas.”18 Txhua tus neeg uas tau xaiv coj raws li Yexus Khetos yuav hu nkauj thiab qw: “Auleluyas: vim tus Tswv Vajtswv uas muaj hwj chim tag nrho tswj kav.”19 “Tus uas muaj hwj chim kav lub ntiaj teb no, nws yog peb tus Tswv thiab yog tus Mexiyas, nws yuav kav mus ib txhis li,”20 “Cov vaj ntxwv tus vaj ntxwv, thiab cov tswv tus Tswv.”21
Kuv ua tim khawv tias Vajtswv muaj txoj sia nyob! Yexus yog tus Khetos—tus Mexiyas. Nov yog Nws lub Koom Txoos, uas Nws coj dhau los ntawm Nws cov yaj saub. Peb txo hwj chim foom Nws cov koob hmoov rau nej txhua tus, tsis hais kev xav thiab kev muaj peev xwm txais tau tag nrho tej txiaj ntsim uas tus Cawm Seej pub rau nej, los ntawm Yexus Khetos lub npe, amees.