Ko ha Ngāue Fakalaumālie
ʻELETĀ ANDERSEN
Siʻoku kāinga ʻofeina, ko e taha e ngaahi tāpuaki maʻongoʻonga ʻo ʻeku moʻuí ko ʻeku feohi mo kimoutolu ʻi he meimei uike kotoa ʻi homou siteikí. ʻOku maʻu ʻe kimautolu Kau Taki Māʻolungá ʻi he fonua mo e anga fakafonua kotoa pē, ʻa e faingamālie ke ongoʻi hoʻomou leleí mo hoʻomou tui ki he ʻEiki ko Sīsū Kalaisí. ʻOku mau ʻilo ʻEne ʻofa kiate kimoutolú, pea ʻoku mau fiefia ʻi hoʻomou fie muimui kiate Ia mo tauhi ʻEne ngaahi fekaú. ʻOku mau fakamālō atu kiate kimoutolu ngaahi fakataha alēlea fakasiteiki mo fakauōtí ʻi hoʻomou tokangaʻi e puleʻanga ʻo e ʻOtuá mo hoʻomou hoko ko e meʻangāue ʻi Hono toʻukupú ʻi he tokoni ki Hono ngaahi fohá mo e ngaahi ʻofefiné.
ʻI heʻetau ngāue ʻi heʻetau fakataha alēleá mo e kau palesitenisií, ʻoku fakamanatu maʻu ai pē kiate kitautolu kotoa ko hotau fatongiá ko e ngāue fakalaumālie. Neongo ʻoku tau tangutu fakataha ʻi he ngaahi fakataha alēleá, ka ʻoku kamata ʻetau ngāué ʻi heʻetau tūʻulutui ʻo kolea e tataki ʻa e ʻEikí. Pea neongo ʻoku tau vakai he taimi ʻe niʻihi ki ha tohimāhina, ko e taimi ʻoku tau mavahe ai mei he ngaahi fakatahá, ʻo fakahoko e fekau ʻa e ʻEikí, ko e taimi ia ʻoku tau faʻa fakahoko ai ʻEne ngaahi taumuʻa mahuʻingá. ʻOku tau ngāue fakataha ʻi he tui mo e uouangataha–ʻo tui ʻe tataki hotau halá mo ʻetau uouangataha mo e niʻihi kehé, pea mo e kau faifekaú ʻe he ʻEikí, ʻo paotoloaki maʻu pē ʻe heʻetau ʻofa kiate Iá, ʻetau feʻofaʻakí, mo ʻetau ʻofa kiate kinautolu ʻoku tau tokoniʻí.
Kuo hoko maʻu pē e ngaahi tefitoʻi moʻoni fakalaumālie ko ʻení ko ha konga ʻo e ngāue ʻa e ʻEikí. ʻOku ou tui pau ʻoku hā mahino ia ʻi hoʻomou fakataha alēlea fakauōtí ʻi hoʻomou ngāue fakatahá.
Tuku ke u vahevahe atu ha talanoa moʻoni ʻe tolu mei ha ngāue naʻá ku fai he ngaahi uike siʻi kuo hilí ʻi Temipā, Folōlita. ʻI hoʻomou mamatá, fakakaukau ki he ngaahi meʻa lelei ʻoku hoko ʻi hoʻomou fakataha alēlea fakauōtí.
ʻOku kamata ʻetau ʻuluaki talanoá he fakataha alēlea fakauooti ʻa e Uooti Pulukivila, Folōlitá.
PĪSOPE CICCARELLO
ʻI heʻemau vakai ki heʻetau tohi taliuí, ne mau fakatokangaʻi naʻe ʻi ai ha hingoa ai naʻe ʻikai ke mau ʻilo. Ko Sisitā Keini. ʻOku tau vahe ha ngāue pau ʻi heʻetau ngaahi fakataha alēlea fakauōtí ke ʻaʻahi ki ha ngaahi fāmili kehekehe, mo e kāingalotú—kuó u mamata ʻi ha liliu ʻa ia ne nau vēkeveke moʻoni ai ke tokoni— “Pīsope, te u ʻalu au.”
ʻELETĀ ANDERSEN
Ko e ʻelito ʻeni ʻo ʻetau ngāue toputapú—ke tau maʻu ha ongoʻi fakalaumālie pea fiemālie ke muimui ki ai. ʻI he Uooti Pulukivilá, ko Sisitā Sēmisi ia naʻe tuʻu maí.
SISITĀ KANE
Naʻe ʻaʻahi ange ʻa Sisitā Sēmisi mo ha kau faifekau. Peá ne fakaafeʻi au ki ha ngaahi ʻekitivitī mo ha ngaahi meʻa ne u ongoʻi ai ʻoku ʻi ai moʻoni haku kaungāmeʻa ʻi he Siasí. Pea, ke ʻiloʻi, ne hoko ai ha liliu, hangē naʻá ne ʻai ke u ongoʻi ʻoku talitali lelei au.
ʻELETĀ ANDERSEN
Ko e taimi ʻoku tau ō ai ʻi he faʻalotu ki heʻetau fakataha alēlea fakauōtí, ʻoku hoko mai leva e fakahaá. Ne fie tokoni ʻa Sisitā Sēmisi, ʻoange mo ha ngāue, pea muiaki mai e ngaahi maná. Naʻe ʻikai fuoloa, kuo kamata ke ongoʻi ʻe he husepāniti ʻo Sisitā Keiní, ʻa ia naʻe ʻikai ko ha mēmipa ʻo e Siasí, ʻa e ivi takiekina ʻo e ʻEikí.
SISTER KANE
Fakafokifā pē kuo ʻā hake ia ʻi ha Sāpate ʻe taha—ne lau uike ʻa e teʻeki ke ne ʻalu ki he lotú mo kimautolú— ʻo ne pehē mai, “ʻOku ou fakakaukau ke u ʻalu mo kimoutolu ki he lotú he ʻahó ni.”
BISHOP CICCARELLO
Naʻe maʻulotu ʻa Misa Keini pea taimi nounou pē ʻosi ʻa e houa sākalamēnití kuo ʻalu ia. Naʻá ku fetaulaki mo Sisitā Keini peá u ʻeke ange pe ʻoku ʻi fē hono husepānití. Naʻá ne talamai, “ʻOku ʻi he feituʻu tauʻanga meʻalelé. Kuo mateuteu ia ke ʻalu.” Peá u ʻeke ange pe ʻe sai pē ke u fakafeʻiloaki ange au ki ai. Naʻá ku fai leva ia.
ʻELETĀ ANDERSEN
ʻOku lava nai ke mou fakatokangaʻi e uouangataha ʻoku nau ʻi aí, fakataha alēlea fakauōtí, kau faifekaú, Sisitā Sēmisi, mo e pīsopé? Naʻe ueʻi leva ʻa e pīsopé ke ne fakaafeʻi ʻa Misa mo Mīsisi Keini ke nau talanoa mo e palesiteni fakasiteikí.
MISA KANE
Naʻá ne pehē, “ʻOku ou fie maʻu ke ke haʻu ʻo kau ki he Siasí. Ko e hā haʻo fakakaukau ki ai?” Peá u fakakaukau, “Masiʻi, ko e meʻa lelei ia, ke falala mai ha taha kiate au, mo fie maʻu moʻoni au.” Ke ʻilo, ʻoku sai ke fiemaʻua kita?
ʻELETĀ ANDERSEN
Ko e meʻa ne ongoʻi ʻe Misa Keini mo e palesiteni fakasiteikí ko e meʻa tatau pē ia naʻá ne faʻa ongoʻí. Naʻá ne ongoʻi e ʻofa ange ʻa e ʻEikí ki aí ʻi he hoko mai ʻa e ʻofa ko iá mei he ngāue fakataha ʻa e kau takí, kāingalotú, mo e kau faifekaú.
PĪSOPE CICCARELLO
Talu mei ai mo ʻemau kamata fakaafeʻi ia ki he houalotu sākalamēnití. Ko e meʻa naʻe kamata liliu aí ko e talitali lelei naʻá ne maʻu mei he uōtí mo e Laumālie naʻá ne ongoʻi ʻi heʻemau ʻofá.
ELDER ANDERSEN
ʻI heʻeku ʻaʻahi ki he fakataha alēlea ʻi Pulukivilá, naʻe lea ʻaki ʻe Pīsope Sikalelo ki he fakataha alēleá ʻa e meʻa naʻe ʻi he loto ʻo e taha kotoa.
PĪSOPE CICCARELLO
Kuo ʻi ai ha liliu lahi ʻi he founga ʻo ʻemau ʻofa he kakaí ni. ʻOku mau kau kotoa ai pea ko ha kau taki kimautolu ʻoku ʻikai ke mau haoahoa. Ka ko e faikehekehe lahi tahá ko ʻemau ʻiloʻi ko ʻEne ngāué ʻeni; he ʻikai ke Ne tuku ke mau taʻemalava kapau ʻe fai homau lelei taha ʻe lavá.
ʻELETĀ ANDERSEN
ʻOku fuʻu mahuʻinga ʻeni: ʻi heʻetau fai hotau lelei tahá, he ʻikai te Ne tuku ke tau taʻe-malava. ʻOku tau ongoʻi taʻefeʻunga kotoa. Kae hangē ko e meʻa kuo lea ʻaki ʻe Palesiteni Monisoní, “ʻI he taimi ʻoku tau fai ai e ngāue ʻa e ʻEikí, ʻoku tau maʻu ai e totonu ki he tokoni ʻa e ʻEikí.” ʻOku tau tatali ki he ʻEikí mo e ʻilo ʻe muiaki mai e ngaahi maná ʻi heʻetau tuí.
Ne pehē ʻe Nīfai naʻe “tataki … ‘e he Laumālié, ʻo ʻikai [ke ne] tomuʻa ʻilo ʻa e meʻa [ke ne] faí” (1 Nīfai 4:6). Ko e founga ʻeni ʻa ha ākonga. ʻOku ʻikai ke tau ʻilo maʻu pē e meʻa ʻoku toka mei muʻá, ka ʻoku ʻafioʻi ia ʻe he ʻEikí, pea ʻi heʻetau falala kiate Iá, ʻokú Ne taki hotau nimá, pea muiaki mai ʻEne ngaahi maná. ʻOku ou saiʻia ʻi he folofola ʻa e ʻEikí, “Ko e ʻOtua au ʻo e ngaahi mana; … pea ʻoku ʻikai te u ngāue ʻi he fānau ʻa e tangatá kae fakatatau pē ki heʻenau tuí” (2 Nīfai 27:23).
ʻOku hoko e tefitoʻi moʻoni ko ʻení ʻi he fonua, anga fakafonua, mo e lea fakafonua kotoa. Naʻá ku fakaʻaongaʻi ʻi he māhina pē taha kuo hilí ʻi Hongo Kongo, ha kiʻi meʻafaitā vitiō naʻá ku ʻomi ke faitaaʻi ʻaki e ngaahi fakakaukau mo e ngaahi ongo ʻa ha kau taki fakalotofonua ʻe niʻihi ʻo e Siasí.
ʻELETĀ ANDERSEN
Pīsope Seki, kuó ke ʻilo nai ha fāmili ʻe tolu pe fā ʻe lava e kau faifekaú ʻo tokoni atu ʻi he feinga ke fakafoki mai ke nau mālohí?
PĪSOPE CHEK
ʻIo, ʻoku ʻi ai haʻamau fakamatala lelei ki ai. Naʻe māmālohi e fāmili Uongó ʻi ha taʻu ʻe 5–6. Naʻe ʻaʻahi e kau faifekaú ki he fāmilí. Pea mau ʻaukai mo lotua ʻa e fāmilí. Pea ʻi heʻenau mateuteú, ne mau fakafoki mai kinautolu.
SISITĀ MOK
ʻOku ʻi ai maʻu pē ha tokoni he taimi ʻoku tau tui aí.
ʻELETĀ ANDERSEN
ʻOku tau faʻa ʻilo maʻu pē he taimi ʻoku tau ngāue ai ʻi he tuí ʻoku kehe ʻa e ngaahi tāpuaki mei he ʻEikí mei he meʻa ʻoku tau ʻamanaki ki aí, ka ʻoku lelei ange ʻi he meʻa ʻoku tau fakakaukau ki aí. ʻOku fakatātaaʻi heʻetau talanoa hono hokó ʻa e tefitoʻi moʻoni ko ʻení. ʻOku kamata ia ʻia Palesiteni Vikitā Petuliki ʻo e Siteiki Temipā Folōlitá. Naʻá ne fekumi mo hono fāmilí ki he fakahinohino ʻa e ʻEIkí, pea naʻe ueʻi kinautolu ke nau fakaafeʻi honau kaungāmeʻá mo e kaungāʻapí ki hono teu papitaiso ʻena taʻahiné.
PALESITENI PATRICK
Naʻe haʻu ha kakai tokolahi, naʻe ʻikai hanau taha te ne fakahaaʻi haʻane mahuʻingaʻia he Siasí. Pea naʻá ku fakamatalaʻi ia ʻi ha fakataha fakasitieki, “Ko e palani ʻeni ʻa Petulikí, ko e meʻa ʻeni naʻa mau faí, pea naʻe lelei. Naʻe tokolahi ha kakai ʻi he papitaisó, ka naʻe ʻikai hoko ha meʻa.” Naʻe ʻi he fakatahá ʻa Sisitā Palemā.
MELISSA PALMER
Naʻá ku fanongo he taʻu kuo ʻosí ki hano fai ʻe Palesiteni Petuliki ha lea peá ne pehē pē heʻene leá naʻe fai ʻe hono uaifí ha fakaafe ʻi he fakaafe ʻaho fāʻeleʻi takitaha ʻo ʻene fānau fefiné, ʻo fakaafeʻi kinautolu ki he papitaisó. Ko ia, naʻá ku toe faʻo ai mo ha kiʻi tohi ne hiki nima pē ʻo fakaafeʻi kinautolu kotoa ki he papitaisó. Kae meʻapango …
FAKATOLOUA
Naʻe ʻikai haʻu ha taha ia. [Kata]
BRAD PALMER
Pea naʻe ʻikai haʻama lavelaveʻiloa he taimi ko iá ne ʻi ai ha taha homa kaungāʻapí ne ʻosi mateuteu.
ʻELETĀ ANDERSEN
Naʻe ʻosi ueʻi ʻe he ʻEikí ʻa Palesiteni Petuliki mo Sisitā Palemā, ka ki ha mana naʻe ʻikai ke na ʻamanekina. He ʻikai ke tau lava maʻu pē ʻo ʻilo ʻa e ikuʻangá mei he kamataʻangá. ʻOku tau falala ki he ʻEikí pea tatali kiate Ia, ʻo ʻiloʻi, te Ne fakahoko ʻEne ngaahi maná ʻi Heʻe Taimi mo e founga pē ʻAʻana. Lolotonga hono ueʻi ʻe he ʻEikí ʻa Palesiteni Petulikine mo Sisitā Palemaá, naʻá Ne toe teuteuʻi foki mo Sisitā Valēlia ʻĀtama, ko ha mēmipa māmālohi naʻe ʻikai toe haʻu ki he lotú ʻi ha taʻu ʻe hongofulu tupu. Naʻe ʻosi kaungāmeʻa pē ʻa e tamasiʻi ia ʻa Sisitā ʻĀtama ko Palaitení mo Lēti Palemā mei he akó.
ʻELETĀ ANDERSEN
Kiʻi fakamatala mai e founga ne kamata ai ʻeni ʻi ho fāmilí.
SISITĀ ADAMS
ʻUluakí, kuó maʻu e ngaahi fakaʻānaua ko ʻeni fekauʻaki mo e Siasí. Naʻe ʻikai ke nau makehe. Hili ha uike ʻe ua mei ai, naʻe tukituki mai ha taha he matapaá pea ko ha kiʻi tamasiʻi talavou naʻe haʻu ki he matapaá mo ha kiʻi tohi fakaafe ki ha faiʻaho ʻo ne mono mai kiate au. Pea naʻe ʻi he loto tohi fakaafe ko iá ha fakaafe ʻe taha. Pea naʻá ku haʻu mo e tohi fakaafe ko iá.
ʻELETĀ ANDERSEN
Siʻi, ʻoku ou fie sio ai.
SISITĀ ADAMS
ʻIo, naʻá ku tauhi ia he ʻoku fuʻu mahuʻinga.
SISITĀ ADAMS
Pea ʻi heʻeku lau iá, naʻá ku siosio takai, “Tamani.”
ʻELETĀ ANDERSEN
Koeʻuhí naʻe ʻi ai ha taha naʻá ne tokangaʻi koe.
SISITĀ ADAMS
Ko ia, ko ha fakaʻilonga ʻeni. Ko ia ne u ʻalu ki he paati faiʻahó pea, naʻá ku hū atu peá u pehē ange, “Mālō e lelei, ko Valēlia au pea naʻe ʻosi papitaiso au ʻi he Siasí.”
ʻELETĀ ANDERSEN
Naʻe ʻōʻōfaki he taimi pē ko iá ʻa Valēlia mo hono fāmilí ʻi he ʻofa mo e anga fakakaumeʻa ʻa ha kāingalotu mo ha kau faifekau lelei. Naʻe hoko e ongo faifekaú ko e ongo faiako. Tuaiekemo, ne foki ʻa Valēlia ki he Siasí. Ko Teleki, ko hono husepānití, naʻe papitaiso, pea naʻá ne papitaiso ʻa Peleitení.
ʻOku lava ʻapē ke mou fakatokangaʻi e founga hono fakahoko ʻe he ʻEikí ʻEne ngāué? ʻOku ʻafioʻi ʻe he Tamai Hēvaní ʻEne fānaú. ʻOkú Ne fanongo ki heʻenau ngaahi lotú. ʻOkú Ne ʻafioʻi ia ʻoku fekumi kiate Iá, pea te Ne taki kitautolu ki ai. Hangē ko e lea ʻa ʻĀmoni ʻi he Tohi ʻa Molomoná: “ʻOku nau ʻi he toʻukupu…ʻo e ʻEiki ʻo e ututaʻú, pea ʻoku ʻaʻana ʻa kinautolu” (ʻAlamā 26:7).
ʻOku ʻi ai ha tefitoʻi moʻoni mahuʻinga ʻo e tuí kuó ne tataki e moʻui hotau palōifta ko Palesiteni Tōmasi S. Monisoní. Naʻá ne pehē, “He ʻikai hoko ia ʻi haʻate fakaʻamu pē. ʻOku fie maʻu ʻe he ʻEikí … ke tau ngāue.” ʻOku fakamamafaʻi lelei ʻaupito heʻetau talanoa hono tolú ʻa e akonaki ko ʻení. ʻOku kamata ia ʻia Pīsope Lotinī Keli naʻá ne ongoʻi ha fie maʻu ke tokoniʻi hono uōtí ke nau ngāue.
PĪSOPE KELLY
Ne mau faingataʻaʻia, ke ʻi ai ha papitaiso ʻi homau uōtí. Pea, ne mau fakatokangaʻi he ʻikai tāpuakiʻi kimautolu ʻe he ʻEikí ʻaki ha kau ului foʻou kae ʻoua kuo mau tokangaʻi ʻa e kakai ʻi homau uōtí kuo mau ʻosi maʻú.
ʻELETĀ ANDERSEN
Naʻe fakatokangaʻi ʻe he pīsopé mo e fakataha alēleá naʻe ʻikai feʻunga ʻa e talanoa pē kau ki he kakaí. Naʻe fie maʻu ke nau ngāue.
PĪSOPE KELLY
Ko ia, ne mau ʻuluaki kamata leva kimautolu kau pīsopelikí, te mau ō atu pea, ʻave ha ngaahi hingoa naʻe teʻeki ke ʻiloʻi, pea kumi kinautolu. Naʻa mau fakaafeʻi ʻa e FKMP ke nau kau mai, pea kimui angé, ne mau toe fakatokolahi ki he kōlomu kakato e kaumātuʻá mo e kulupu ʻo e kau taulaʻeiki lahí. Pea, ne mau kole ke nau tukupā ki ha pō Tūsite pe pō Tuʻapulelulu ʻe taha he māhina.
ʻELETĀ ANDERSEN
Ko e taimi ne kamata ala atu ai ʻe kau taki fakauōtí mo e kau faifekaú mo tāpuakiʻi e niʻihi kehé, ne hoko ha fuʻu liliu lahi ʻi he uōtí.Naʻe maʻuiʻui e Laumālie ʻo e ʻEikí. Naʻe fakatokangaʻi ʻe he kau faifekau taimi kakató ha faikehekehe.
ʻELETĀ LYONS
Ne ʻi ai e taki faifekau fakauōtí naʻe telefoni mai he meimei ʻaho kotoa pē, ka ne ʻikai ngata ai, naʻe telefoni taʻetuku mai ʻa e pīsopé pea mo e kāingalotú—ʻa e kāingalotu kotoa ne mau ngāué, ne nau telefoni pe text mai ʻi he meimei ʻaho kotoa ke nau kau ʻi ha faʻahinga founga te nau lava aí.
ʻELETĀ ANDERSEN
Naʻe vahevahe ʻe he kau taki mo e kau faifekau mei he Uooti Temipā Faá ʻenau ngaahi aʻusiá mo au ʻi he taimi naʻá ku ʻaʻahi atu ai ki he fakataha alēlea honau uōtí.
MISA BARNHILL
ʻOku ou ʻilo ko e fuofua taimi naʻá ku haʻu aí, mo kamata fakamatala fekauʻaki mo hono fakahoko e ngaahi ʻaʻahi fakauike ko ʻení, naʻá ku fakakaukau, “Ko ha taimi lahi ia.” Ka ne u fakatokangaʻi ko e taimi naʻá ku ʻalu ai ʻo ʻaʻahi ki he kakaí mo muimui he fakahinohino ʻa e pīsopé mo e tataki naʻá ne faí, naʻe fakaofo.
PALESITENI FINEʻOFÁ
Kuó u vakai ki ha liliu ʻi he kau fafiné ʻi he meʻá ni, ʻoku nau loto lelei ange ke ngāue lahi ange mo fai e meʻa ʻoku fie maʻu ke ongoʻi ʻe he taha kotoa ʻoku ʻofaʻi mo talitali lelei ia.
PĪSOPE KELLY
Ko e taimi ne hoko ai e ngaahi momeniti fakalaumālie ko ʻení, ko e feituʻu tonu ia ke te ʻi aí. Naʻe fie maʻu ʻe he kakai ʻoku mālohi ʻi he uōtí ke nau maʻu e ngaahi momeniti fakalaumālie ko iá.
SISITĀ BOWE
Ko e fuofua pō naʻá ku haʻu aí, ne nau fai ha vilo hoa. Pea naʻe ongo moʻoni ia kiate au ke ʻiloʻi ʻoku ou ʻi hení ke akoʻi e kakaí pea ke fakafoki kinautolu ki he tākangá mo tokoni ki he uōtí.
ʻELETĀ ANDERSEN
ʻI heʻeku folau ki ʻĒsia ʻi he uike ʻe fā kuo hilí, naʻá ku ʻaʻahi ai ki ʻInitia. Naʻe mahino ki he kau taki ʻi aí ʻa e ngaahi moʻoni fakalaumālie tatau ko ʻení. Naʻa nau vahevahe ʻenau fakakaukaú ʻi he kiʻi meʻafaitā naʻá ku ʻalu mo iá.
PALESITENI BENGANPA
ʻOku tau ō ki honau ʻapí. ʻIo, ʻoku tau ō ki honau ʻapí. Pea ʻoku tau feinga ke vahevahe ʻetau fakamoʻoní mo ʻofa ʻiate kinautolu mo feinga ke fakafoki mai kinautolu.
SISITĀ MASSEY
Ko e taimi ʻoku fai ai ʻetau fakamoʻoní, ʻoku tau fakaafeʻi moʻoni e Laumālié ki he lokí, pea ʻoku lava ʻa e taha fiefanongó pe kau mēmipa māmālohí ke ongoʻi ʻa e Laumālié. Pea ʻoku nau pehē ke nau foki mai koeʻuhí he ʻoku nau ʻilo ko ha meʻa mahuʻinga ʻeni ʻoku mole ʻaupito mei heʻenau moʻuí.
ʻELETĀ ANDERSEN
ʻOku ʻi ai ha konga foʻou he LDS.org ʻoku ui ko e “Fakavaveʻi e Ngāue ʻo e Fakamoʻuí” ke tokoni kiate kitautolu kotoa. Te ke maʻu ai ha maʻuʻanga tokoni ʻaonga, kau ai mo ha toe ngaahi talanoa mo ha sīpinga mei he kau takí, kāingalotú, mo e kau faifekau he funga ʻo e māmaní, ʻoku nau tatau mo kimoutolu, ʻo ngāue fakataha ʻi he tui mo e ʻofa ke fakavaveʻi e ngāue ʻa e ʻEikí.
ʻE ʻiate kitautolu ʻa e ʻEikí ʻi heʻetau fai ʻetau lelei taupotu tahá. ʻOku pehē ʻe he folofolá, “[Pea ʻi he] ʻalu ʻa e kau tamaioʻeikí ʻo nau ngāue ʻaki honau tūkuingatá pea naʻe ngāue foki ʻa e ʻEikí… mo kinautolu (Sēkope 5:72).
ʻI heʻeku tangutu ʻi muʻa he Konifelenisi ʻa e Siteiki Temipā Folōlitá he ngaahi uike siʻi kuo ʻosí, naʻá ku ʻohovale ke mamata ki ha kau tangata ʻe toko 32 naʻe fokotuʻu ke nau maʻu e Lakanga Taulaʻeiki Faka-Melekisētekí. Ne nau omi mei ha ngaahi uooti mo ha ngaahi kolo ʻoku tatau tofu pē mo e ngaahi kolo pe uooti ʻoku mou nofo mo ngāue aí.
ʻI he tuʻu ʻa e kau tangata takitaha ki ʻolungá, naʻá ku fakakaukau ki he mana kuo hoko ʻi heʻene moʻuí pea mo e moʻui ʻa e houʻeiki fafine mo e fānau ʻoku nau feohí. Naʻá ku fakakaukau ki he kau taki, kāingalotu, mo e kau faifekau ne ngāue uouangatahá, pea mo ʻenau ʻofa faka-Kalaisí mo e ngāué. Naʻá ku fakakaukau ki he fakahinohino fakalangi ʻa e ʻEikí ʻi heʻenau ngāue ʻi he tuí. Naʻá ku fakakaukau ki he ngaahi lea ʻa Molonaí: “Kuo ngata koā ʻa e ngaahi maná? … Pe kuo tuku koā ʻe he kau ʻāngeló ʻenau hā mai ki he fānau ʻa e tangatá? Pe kuó ne taʻofi koā ʻa e mālohi ʻo e Laumālie Māʻoniʻoní meiate kinautolu?” (Molonai 7:27, 36).
“Vakai, ʻoku ou pehē kiate kimoutolu, ʻIkai; he ʻoku tupu ʻi he tuí hono fai ʻo e ngaahi maná” (Molonai 7:37).
ʻOku ou vahevahe mo kimoutolu ʻeku fakamoʻoní ko Sīsū ʻa e Kalaisí, ko Ia hotau Fakamoʻui mo e Huhuʻí. Ko ʻEne ngāue toputapú ʻeni. ʻOku ou palōmesi atu te Ne tataki pea te Ne ʻiate kimoutolu ʻi hoʻomou fekumi ʻi he loto fakatōkilalo ki Heʻene tokoní ʻi he tuí. ʻI he huafa ʻo Sīsū Kalaisí¸ʻĒmeni.