Poupouʻi ʻa e Kakai ʻoku Akoʻi ʻe he Kau Faifekaú

Kau ki he Ngaahi Lēsoní

ʻE malava ke kole atu ʻe he kau taki fakauōtí pe kau faifekau fakalotofonuá ke mou ō ʻo ʻaʻahi ki ha taha ʻoku lolotonga ako ki he ongoongoleleí. Te ke lava ʻo hoko ko ha poupou lelei mo ha fakalotolahi ki siʻi ngaahi kaungāmeʻa foʻoú ni ʻi hoʻo tānaki atu hoʻo ngaahi fakakaukaú mo e fakamoʻoní.

Kapau ne teʻeki ke ke kau ki ha tā lēsoni ʻa e kau faifekaú kimuʻa, ʻoua te ke tokanga ki ai! Te ke lava ʻo tomuʻa palani mo e kau faifekaú ʻa e founga te ke kau aí, hangē ko hono lau ʻo ha folofola pe tānaki atu hoʻo fakakaukaú ki he kaveinga ʻoku akoʻí. Ko e meʻa mahuʻinga tahá ke ke fakahoko pē ho anga totonú.

Ko hono Fakahoko ha Tokoni Makehe mei he Ngaahi Lēsoní

Ko e niʻihi ʻo e ngaahi founga mahuʻinga taha te ke lava ʻo poupouʻi ai haʻo kaungāmeʻa ʻoku feʻiloaki mo e kau faifekau taimi kakató ʻe faʻa maʻu ia ʻi ha taimi mavahe mei he ngaahi lēsoni kuo fakataimi-tēpileʻí. Manatuʻi, ʻoku fiemaʻu ʻe he tokotaha kotoa ha kaungāmeʻa. Ko ha ngaahi founga ʻeni te ke lava ai ʻo hoko ko e kaungāmeʻa ko iá:

• Manatuʻi ʻoku foʻou kotoa ʻeni kiate kinautolu, pea ʻoku fakanatula pē ke nau ongoʻi veiveiua pe momou ʻi ha ngaahi taimi. Hoko ko ha tokotaha fanongo lelei te nau lava ʻo falala ki ai ʻa ia te nau ongoʻi ʻoku tali fakamatoato mo tokangaekina—kae ʻikai tukunoaʻi—ai e ngaahi meʻa ʻoku nau hohaʻa ki aí ʻi he ʻofa.
• Fakaafeʻi ke ʻave ia ki he lotú pe ko e ngaahi ʻekitivitī ʻa e siasí. Neongo ʻoku ʻi ai haʻane meʻalele, ka te ne ongoʻi fiemālie ange ke ʻalu mo ha taha ʻoku nau maheni.
• Muimuiʻi ʻi he hili e ngaahi lēsoní. Hangē ko ʻení, kapau ʻe fakaafeʻi kinautolu ʻe he kau faifekaú ke lau ha ngaahi potufolofola pau, lotu pe fakahoko ha meʻa kehe, te ke lava ʻo fehuʻi ange pe ʻoku lelei pē meʻa kotoa. ʻE faʻa lava ke ongoʻi fiemālie ange ho ngaahi kaungāmeʻá ke vahevahe atu ʻenau ngaahi fakakaukaú mo e hohaʻá ʻi ha taimi mavahe mei he lēsoní.
• Fakafeʻiloaki ho kaungāmeʻá ki ha niʻihi kehe ʻi homou haʻofangá. Te ke lava ʻo fakahoko ia ʻi he lotú, pe ʻi he ngaahi ʻekitivitī fakasōsiale ʻi ho ʻapí.

Lau: Hoko ko ha Kaungāmeʻa mo ha Kaungāʻapi Lelei

Ngaahi Fakakaukau Fekauʻakí