Ang pagdapit og usa ka higala ngadto sa simbahan sa unang higayon dili kinahanglan nga maglakip sa tibuok duha ka oras nga tulumanon. Sulayi kining dugang nga mga oportunidad sa pagpakigbahin og importante nga mga kasinatian diha sa simbahan.
Ang gagmay nga mga bata adunay matam-is, yanong hugot nga pagtuo nga makapalig-on natong tanan. Ang tinuig nga pasundayag sa Primary usa ka espesyal nga oportunidad sa pagtabang sa inyong mga higala ug mga silingan nga mobati sa Espiritu. Makadapit usab kamo og mga tawo nga motan-aw sa mga bata nga mokanta sa mga holiday sama sa Adlaw sa mga Inahan o sa Pasko.
Ang bunyag usa ka importante nga panghitabo sa panaw sa usa ka tawo sa hugot nga pagtuo, ug makapalig-on sa hugot nga pagtuo sa tanan nga nanambong. Ang mga tulumanon sa kasagaran giplano uban sa kahibalo nga ang mga higala ug pamilya nga dili miyembro sa Simbahan manambong, himoon kini nga usa ka nindot nga lugar sa pagdala og higala nga tingali mahimong interesado nga makat-on pa mahitungod sa ebanghelyo.
Kon kamo naghinamhinam mahitungod sa umaabot nga mamumulong sa fireside, ayaw kalimot sa pagpakigbahin niana nga kahinam sa usa ka higala. Ang mga fireside ug mga debosyonal mahimong mga oportunidad sa pagpalig-on sa pagbati sa komunidad, maghatag og espirituhanon nga kasinatian sa daw dili kaayo pormal nga kahimtang kay sa panagtigom alang sa Sakramento.
“Dali ug pagkat-on uban kanako” mahimong usa ka gamhanan nga imbitasyon. Nganong dili sulayan ang pagdapit og usa ka higala sa pagtuon sa piho nga libro sa kasulatan uban ninyo diha sa Sunday School, Seminary, o Institute? Ang kahimtang sa lawak klasehan makapasayon sa pagtubag sa mga pangutana sa inyong higala, uban sa dugang nga mga pagpasabot gikan sa uban sa klase. Ang laing opsiyon mao ang pagdapit og mga higala sa pagtuon uban ninyo sa panimalay gamit ang Dali Sunod Kanako nga manwal.