1 Im N̄a, Irooj Anij, Iaar kōnono n̄an Moses, im ba: ^aSetan en, eo kwaar jiron̄ ilo etan Nejū Iaar Make Keotake, ej ejja eo wōt me ekar jān ^bjinoin, im eaar itok Im̧aō, im ba—Lo, N̄a e, kwōn jilkinļo̧k eō, inaaj eo nejūm̧ m̧aan, im inaaj lo̧mo̧o̧ren aolep armej, bwe en ejjeļo̧k juon enaaj jako, im em̧ool ^cinaaj kōm̧m̧ane; kōn menin letok n̄an eō utiej eo Am.

2 A, lo, ^aNejū Jitōnbōro, eo ej Aō Jitōnbōro im ^bRikāālet jān jinoin, Eaar ba n̄an Eō—^cJema, ^dAnkilam en kōm̧m̧an, im ^eaiboojoj eo en Am̧ indeeo.

3 Kōn menin, kōnke men in Setan eaar ^ajum̧ae Eō, im kappukot n̄an ko̧kkure ^banemkwōj in kāālet eo an armej, eo N̄a, Irooj Anij, Iaar leļo̧k n̄an e, im barāinwōt, bwe In leļo̧k n̄an e kajoor eo Aō make; jān kajoor eo an Nejū Iaar Make Keotake, Iaar kōm̧m̧ane bwe ren ^cjolaļļo̧k e;

4 Im eaar erom Setan, aaet, em̧ool devil eo, eo jemān aolep ^ariab otemjeļo̧k, n̄an m̧oņ im n̄an kapiloik armej raņ, im n̄an tōlļo̧k er n̄an rikōm̧akoko ilo ankilaan, em̧ool jon̄an wōt eo enaaj jamin eo̧ron̄ Ainikiō.

5 Im kiiō jedpānit eo eaar ļapļo̧k an ^aittino jān jabdewōt mennin mour ilo meļaaj eo me N̄a, Irooj Anij, Iaar kōm̧m̧ane.

6 Im Setan eaar likūti ilo būruōn jedpānit eo, (bwe eaar bōkļo̧k elōn̄ ilo̧kanļo̧k,) im eaar kappukot barāinwōt n̄an kapo ^aIv, bwe ekar jab jeļā ļōmņak eo an Anij, kōn menin eaar kappukot n̄an ko̧kkure laļ.

7 Im eaar ba n̄an kōrā eo: Ta, em̧ōj an Anij kar ba—Kwōn jab m̧ōn̄ā jān aolep wōjke in ^ajikin kallib eo ke? (Im eaar ekkōnono jān lo̧n̄iin jedpānit eo.)

8 Im kōrā eo eaar ba n̄an jedpānit eo: Kōm maron̄ m̧ōn̄ā jān leen wōjke ko ilo jikin kallib in;

9 A jān leen wōjke eo me kwōj loe ilo ioļapļap in jikin kallib in, Anij eaar ba—Kom̧in jab m̧ōn̄ā jān e, im jab naaj un̄ūri, n̄e kom̧ ab mej.

10 Im jedpānit eo eaar ba n̄an kōrā eo: Kom̧ ban lukkuun mej;

11 Bwe Anij Ejeļā bwe ilo raan eo kom̧ ij m̧ōn̄ā jān e, innām ^amājāmi renaaj peļļo̧k, im kom̧ naaj āinwōt anij raņ, ilo ^bjeļā em̧m̧an im nana.

12 Im ke kōrā eo eaar lo bwe wōjke eo eaar em̧m̧an n̄an m̧ōn̄ā, im bwe eaar kāitoktok-limo n̄an mejān, im juon wōjke eo ^aikdeelel kake n̄an kōm̧m̧an bwe lio en mālōtlōt, kōrā eo eaar bōk jān leen eo, im eaar ^bm̧ōn̄ā, im barāinwōt lio eaar leļo̧k n̄an ļeo pāleen ippān ijo, im eaar m̧ōn̄ā.

13 Im mejāerro jim̧or rekar peļļo̧k, im rekar jeļā bwe rekar ^akeelwaan. Im rekar kiij ippān doon bilkōn wōjke fig im rekar kōm̧m̧an apron ko n̄an er.

14 Im rekar ron̄ ainikien Irooj Anij, ke rekar ^aetetal ilo jikin kallib eo, ilo aemedļo̧k in raan eo; im Adam im lio pāleen rekar ilo̧k n̄an tilekek jān im̧aan mejān Irooj Anij ilubwiljin wōjke ko ilo jikin kallib eo.

15 Im N̄a, Irooj Anij, Iaar kūr n̄an Adam, im ba n̄an e: Ia kwōj ^aetal n̄an e?

16 Im e ba: Iaar ron̄ Ainikiōm ilo jikin kallib eo, im Iaar mijak, kōnke iaar lo bwe iaar keelwaan, im iaar tilekek.

17 Im N̄a, Irooj Anij, Iaar ba n̄an Adam: Wōn ar ba n̄an eok ke kwo keelwaan? Kwaar ke m̧ōn̄ā jān wōjke eo Iaar jiron̄ eok bwe kwōn jab m̧ōn̄ā ie, eļan̄n̄e āindein kwo naaj lukkuun ^amej?

18 Im ļeo eaar ba: Kōrā eo Kwaar letok n̄an eō, im jiron̄e bwe en pād ippa, liin eaar letok n̄an eō jān leen wōjke eo im iaar m̧ōn̄ā.

19 Im N̄a, Irooj Anij, Iaar ba n̄an kōrā eo: Ta men in kwaar kōm̧m̧ane? Im kōrā eo eaar ba: Jedpānit eo eaar ^akapo eō, im iaar m̧ōn̄ā.

20 Im N̄a, Irooj Anij, Iaar ba n̄an jedpānit eo: Kōnke kwaar kōm̧m̧ane men in kwo naaj ^alia ilōn̄in aolep kattle, im ilōn̄in aolep mennin mour in meļaaj; ioon lo̧jiōm̧ kwo naaj em̧m̧akūtļo̧k, im bwidej kwo naaj m̧ōn̄ā aolepān raan ko in am mour;

21 Im Inaaj likūt kōjdat ikōtaam̧ im kōrā eo, ikōtaan ineem im ineen lio; im ļeo ineen enaaj kakinejnej bōram, im kwo naaj kakinejnej jim̧win neen.

22 N̄an kōrā eo, N̄a, Irooj Anij, Iaar ba: I naaj kanooj koorļo̧k am būrom̧ōj ilo am etta. Ilo ^abūrom̧ōj kwo naaj keotak ajri ro, im am kōņaan enaaj n̄an ļeo pāleem̧, im ļeo enaaj irooj ioom.

23 Im n̄an Adam, N̄a, Irooj Anij, Iaar ba: Kōnke kwaar eo̧ron̄e ainikien lio pāleem̧, im kar m̧ōn̄ā jān leen wōjke eo Iaar jiron̄ eok, im ba—Kwōn jab m̧ōn̄ā jān e, enaaj lia bwidej kōn kwe; im ilo būrom̧ōj kwo naaj m̧ōn̄ā jān e ilo aolepān raan ko in am mour.

24 Kālōklōk ko barāinwōt, im mar kuuj ko enaaj le jān i n̄an eok, im kwo naaj m̧ōn̄ā mar ko in meļaaj.

25 Jān ^amenokadu in turin mejam̧ kwōnaaj m̧ōn̄ā pilawā, m̧ae am naaj bar ro̧o̧l n̄an bwidej—bwe kwe kwo naaj lukkuun mej—bwe jān e kar bōke eok: bwe kwe kwaar ^bbūn̄al, im n̄an būn̄al kwo naaj bar ro̧o̧l.

26 Im Adam ar ņa etan lio pāleen Iv, kōnke lio eaar jinen aolep ro remour; bwe āindein N̄a, Irooj Anij, Iaar ņa etan m̧aanje in aolep kōrā ro, ro rekanooj ^alōn̄.

27 N̄an Adam, im barāinwōt n̄an lio pāleen, N̄a, Irooj Anij, Iaar kōm̧m̧an liboror ko jān kilin mennin mour, im ^akanuknuk er.

28 Im N̄a, Irooj Anij, Iaar ba n̄an Nejū Iaar Make Keotake: Lo, ^aļein ej erom āinwōt juon iaad n̄an ^bjeļā em̧m̧an im nana; im kiiō n̄e eab leļo̧k pein im ^cbōk barāinwōt jān ^dwōjke in mour, im m̧ōn̄ā im mour n̄an indeeo,

29 Kōn menin, N̄a, Irooj Anij, Inaaj jilkinļo̧k e jān Jikin Kallib in ^aIden, n̄an katōke bwidej eo jān ijo kar bōkļo̧k e;

30 Bwe āinwōt N̄a, Irooj Anij, Ij mour, em̧ool āindein ^anaan ko Aō rej jamin ro̧o̧l ejjeļo̧k tokjāer, bwe āinwōt aer diwōjļo̧k jān lo̧n̄iiū rej aikuj kūrm̧ool.

31 Kōn menin Iaar kadiwōjļo̧k ļeo, im Iaar likūt iturear in Jikin Kallib in Iden, ^akerub ko im juon jāje eurur, ko ekar erro̧o̧lo̧l ijeņ im ijeņ n̄an kōjparok iaļ eo n̄an wōjke in mour.

32 (Im erkein naan ko me Iaar kōnono n̄an karejera Moses, im er rem̧ool em̧ool āinwōt Ankilaō; im em̧ōj Aō kōnono kaki n̄an eok. Lale bwe kwōn kwaļo̧ki n̄an ejjeļo̧k armej, m̧ae Aō jiron̄ eok, ijello̧kun wōt er ro rej tōmak. Amen.)