1 Innām Irooj eaar ba: Jen wanlaļļo̧k. Im rekar wanlaļļo̧k ilo ^ajinoin, im er, meļeļein men in ej Anij ro, kar ^bkarōke im ļami lan̄ ko im laļ.

2 Im laļ, ālikin kar eje, ekar ejjeļo̧k kobban im ajjimakeke, kōnke rekar jan̄in eje jabdewōt ak laļ; im marok jilōn̄lōn̄ eaar irooj ioon mejān m̧wilaļ eo, im Jetōb an Anij ro rekar ^ajokadikdik ioon mejān dān ko.

3 Im er (Anij ro) rekar ba: En wōr meram; im eaar wōr meram.

4 Im er (Anij ro) rekar meļeļe meram eo, bwe ekar kanooj romaak; im rekar kōjenolo̧k meram eo, ak kōm̧m̧an bwe en jenolo̧k, jān marok eo.

5 Im Anij ro rekar ņa etan meram eo Raan, im marok eo rekar ņa etan Bon̄. Im ālikin men kein jān jo̧teen eo m̧ae jibbon̄ raar ņa etan bon̄; im jān jibbon̄ m̧ae jo̧teen eo rekar ņa etan raan, im en̄in kar eo m̧oktata, ak jinoin, in men eo me rekar ņa etan raan im bon̄.

6 Im Anij ro rekar barāinwōt ba: En wōr ^amejatoto ilubwiljin dān ko, im en ajeji dān ko jān dān ko.

7 Im Anij ro rekar jiron̄e mejatoto eo, bwe en ajeji dān ko me rekar pād ium̧win mejatoto eo jān dān ko me ilōn̄in mejatoto eo; im ekar āindein, em̧ool āinwōt rekar jiron̄e.

8 Im Anij ro rekar ņa etan mejatoto eo, ^aLan̄. Im ālikin men kein ekar jān jota m̧ae jibbon̄ im rekar ņa etan bon̄; im ālikin men kein ekar jān jibbon̄ m̧ae jota im rekar ņa etan raan, im en̄in ekar ^biien eo kein karuo im rekar ņa etan bon̄ im raan.

9 Im Anij ro rekar jiron̄e, im ba: ^aDān ko ium̧win lan̄ ren kuktok ippān doon n̄an ^bjuon jikin, im laļ en wanlōn̄tak ilo an m̧ōrā; im ekar āindein āinwōt rekar jiron̄e;

10 Im Anij ro rekar likūt āne em̧ōrā eo, Laļ; im ae eo ippān doon an dān ko, rekar likūt etan, ^aDān ko Reļļap; im Anij ro rekar lo bwe rekar pokake.

11 Im Anij ro rekar ba: Jen kōpooj laļ n̄an kōjebartok ^aujooj; im mar ej kwaļo̧k ine; im wōjke in kalle ko rej kwaļo̧k leen, ilo̧kan jekjek eo an, eo ineen ilo e make ej kalleik jekjek eo an make ioon laļ; im ekar āindein, em̧ool āinwōt rekar jiron̄.

12 Im Anij ro rekar karōke laļ n̄an kalle ujooj jān ineen make, im mar eo n̄an kalle mar jān ineen make, im kwaļo̧k ine ilo̧kan jekjek eo an; im laļ n̄an kalle wōjke eo jān ineen make, im kalle leen, eo ineen emaron̄ kwaļo̧k wōt ejja eo an, ilo̧kan jekjekin; im Anij ro raar lo bwe rekar pokake er.

13 Im ālikin men kein rekar leļo̧k oran raan ko; jān jo̧teen eo m̧ae jibbon̄ōn eo rekar ņa etan bon̄; im ālikin men kein, jān jibbon̄ōn eo n̄an jo̧teen eo rekar ņa etan raan; im ekar iien eo kein kajilu.

14 Im Anij ro raar karōke ^ameram ko ilo mejatoto eo edepakpak in lan̄ eo, im kōm̧m̧an bwe ren ajeje raan eo jān bon̄ eo; im karōk er bwe ren kakōļļeen tōre ko, im n̄an raan ko im n̄an iiō ko;

15 Im kar karōk er bwe ren meram ko ilo mejatoto depakpak in lan̄ eo n̄an leļo̧k meram ioon laļ, im ekar āindein.

16 Im Anij ro raar karōke ruo meram ko reļļap, ^ameram eo eļapļo̧k n̄an irooj ioon raan eo, im meram eo edikļo̧k n̄an irooj ioon bon̄ eo; ippān meram eo edikļo̧k rekar likūti iju ko barāinwōt;

17 Im Anij ro rekar likūt er ilo mejatoto depakpak in lan̄ ko, n̄an leļo̧k meram ioon laļ, im n̄an irooj ioon raan eo im ioon bon̄ eo, im n̄an kōm̧m̧an n̄an ajeje meram eo jān marok eo.

18 Im Anij ro rekar lali men ko me rekar jiron̄ er m̧ae aer kar pokake.

19 Im ālikin men kein ekar jān jota m̧ae jibbon̄ ekar bon̄; im ālikin men kein ekar jān jibbon̄ m̧ae jota ekar raan; im ekar iien eo kein kāāmen.

20 Im Anij ro rekar ba: Jen kōpooji dān ko n̄an bōktok eļap mennin mour rej m̧akūtkūt im ewōr aer mour; im bao in mejatoto, bwe ren maron̄ ekkāke ilōn̄in laļ ilo peļļo̧k in mejatoto depakpak in lan̄.

21 Im Anij ro rekar kōpooji dān ko bwe ren maron̄ bōktok ^araj ko reļļap, im mennin mour otemjeļo̧k ej m̧akūtkūt, ko dān ko rekar bōkitok ilo kanooj ļap ilowaan jekjek ko aer, im bao in mejatoto elōn̄ pein otemjeļo̧k ilo̧kan jekjek ko aer. Im Anij ro rekar lo bwe renaaj kar pokake, im bwe karōk eo aer ar em̧m̧an.

22 Im Anij ro rekar ba: Jenaaj kōjeraam̧m̧an er, im kōm̧m̧an bwe ren timoon im wōrļo̧k, im kobrak dān ko ilo lo̧jet ko ak ^adān ko reļļap; im kōm̧m̧an bwe bao in mejatoto ren wōrļo̧k ilo laļ.

23 Im ālikin men kein ekar jān jota m̧ae jibbon̄ im rekar ņa etan bon̄; im ālikin men kein ekar jān jibbon̄ m̧ae jota im rekar ņa etan raan; im ekar iien eo kein kaļalem.

24 Im ^aAnij ro rekar kōpooje laļ n̄an bōktok mennin mour ilo̧kan jekjek eo an, kattle im mennin tōbalbal ko, im mennin mour ko in laļ ilo̧kan jekjek ko aer; im ekar āindein, āinwōt rekar ba.

25 Im Anij ro rekar karōke laļ n̄an bōktok mennin mour ko ilo̧kan jekjek ko aer, im kattle ilo̧kan jekjek ko aer, im mennin tōbalbal otemjej ioon laļ ilo̧kan jekjek eo an; im Anij ro rekar lo bwe rekar pokake.

26 Im Anij ro rekar bōk an doon ^apepe ilubwiljier im ba: Jen wanlaļļo̧k im eje ^barmej ilo ^cnememeed, ilo̧kan jekjekid; im jenaaj leļo̧k n̄an er maron̄ ioon ek ko in lo̧jet, im ioon bao ko in mejatoto, im ioon kattle eo, im ioon aolepān laļ, im ioon mennin tōbalbal otemjeļo̧k ej tōbalbal ioon laļ.

27 Āindein ^aAnij ro rekar wanlaļļo̧k n̄an karōke armej ilo nemāmeer make, ilo nemāmeen Anij ro rekar eje e, m̧aan im kōrā rekar eje er.

28 Im Anij ro rekar ba: Jenaaj kōjeraam̧m̧an er. Im Anij ro rekar ba: Jenaaj kōm̧m̧an bwe ren timoon im wōrļo̧k, im kobrake laļ, im irooj ioon, im n̄an peek ioon ek ko in lo̧jet, im ioon bao ko in mejatoto, im ioon mennin mour otemjeļo̧k ej m̧akūtkūt ioon laļ.

29 Im Anij ro rekar ba: Lo, Jenaaj leļo̧k n̄an er mar in kaine otemjeļo̧k enaaj itok ioon mejān aolepān laļ, im wōjke otemjeļo̧k enaaj wōr leen ioon; aaet, leen wōjke eo ej kwaļo̧k ine n̄an er Jenaaj leļo̧k e; enaaj n̄an ^akijeer.

30 Im n̄an mennin mour otemjeļo̧k in laļ, im n̄an bao in mejatoto otemjeļo̧k, im n̄an mennin tōbalbal otemjeļo̧k ej tōbalbal ioon laļ, lo, Jenaaj leļo̧k n̄an er mour, im Jenaaj barāinwōt leļo̧k n̄an er mar maroro otemjeļo̧k n̄an kijeer, im aolep men kein naaj karōki āinwōt.

31 Im Anij ro rekar ba: Jenaaj kōm̧m̧ani men ko otemjeļo̧k Jekar ba, im karōki; im lo, renaaj kanooj pokake. Im ālikin men kein ekar jān jota m̧ae jibbon̄ rekar ņa etan bon̄, im ālikin men kein ekar jān jibbon̄ m̧ae jota im rekar ņa etan raan; im rekar bwine iien eo ^akein kajiljino.