Ko e Tohi ʻa ʻĒpalahamé

1 ʻI he fonua ʻo e kau ^aKalitiá, ʻi he nofoʻanga ʻo ʻeku ngaahi tamaí, ko au, ^bʻĒpalahame, naʻá ku vakai ʻoku ʻaonga kiate au ke u kumi ha toe potu kehe ke ^cnofo ai;

2 Pea, ʻi heʻeku ʻiloʻi ʻoku ʻi ai ʻa e ^afiefia mo e melino mo e ^bmālōlō lahi ange kiate aú, ko ia naʻá ku kumi ai ki he ngaahi tāpuaki ʻo e ngaahi tamaí, pea mo e totonu ʻa ia ʻe fakanofo au ki ai ke foaki atu ia; koeʻuhí he kuó u hoko foki ko e tokotaha muimui ki he ^cmāʻoniʻoní, peá u holi foki ke hoko ko e tokotaha ʻoku maʻu ʻa e ^dʻilo lahi, pea ke hoko ko ha tokotaha ʻoku muimui lahi ange ki he māʻoniʻoní, pea ke maʻu ha ʻilo lahi ange, pea ke hoko ko ha tamai ki he ngaahi puleʻanga lahi, ko ha pilinisi ʻo e melinó, peá u holi ke maʻu ʻa e ngaahi fakahinohino, pea ke tauhi ʻa e ngaahi fekau ʻa e ʻOtuá, ko ia naʻá ku hoko ai ko ha ʻea-hoko totonu, ko ha ^eTaulaʻeiki Lahi, ʻoku maʻu ʻa e ^ftotonu ko ia ʻoku maʻu ʻe he ngaahi tamaí.

3 Naʻe ^afoaki mai ia kiate au mei he ngaahi tamaí; naʻe tukufakaholo mai ia mei he ngaahi tamaí, mei he kamataʻanga ʻo taimí, ʻio, talu mei he kamataʻangá, pe ki muʻa ʻi he ʻai ʻo e tuʻunga ʻo e māmaní, ʻo fai mai ki he lolotongá ni, ʻio ʻa e totonu ʻo e ^bʻuluaki fānaú, pe ko e ʻuluaki tangatá, ʻa ia ko ^cʻĀtama, pe ko e ʻuluaki tamaí, ʻo tukufakaholo mai ʻi he ngaahi tamaí kiate au.

4 Naʻá ku kumi ki hoku ^afakanofo ki he Lakanga Fakataulaʻeikí, ʻo fakatatau ki he tuʻutuʻuni ʻa e ʻOtuá ki he ngaahi tamaí ʻo kau ki he hakó.

5 Ko e meʻa ʻi he tafoki ʻa ʻeku ngaahi ^atamaí mei heʻenau fai māʻoniʻoní, pea mei he ngaahi fekau toputapu ʻa ia kuo foaki kiate kinautolu ʻe he ʻEikí ko honau ʻOtuá, ki he ^bhū ki he ngaahi ʻotua ʻo e kau hītení, ʻo nau fakafisi ʻaupito ke tokanga ki hoku leʻó;

6 He kuo fakapapau honau lotó ke faikovi, pea nau tafoki ʻaupito ki he ^aʻotua ʻo ʻElikená, pea mo e ʻotua ʻo Līpiná, pea mo e ʻotua ʻo Mamakelá, pea mo e ʻotua ʻo Kōlasí, pea mo e ʻotua ʻo Felo, ko e tuʻi ʻo ʻIsipité;

7 Ko ia naʻa nau fakatafoki honau lotó ki he feilaulau ʻa e kau hītení ʻi he feilaulau ʻaki ʻenau fānaú ki he ngaahi tamapua taʻelea ko ʻení, pea ʻikai te nau tokanga ki hoku leʻó, ka nau feinga ke toʻo ʻa ʻeku moʻuí ʻi he nima ʻo e taulaʻeiki ʻa ʻElikená. Ko e taulaʻeiki ʻa ʻElikená ko e taulaʻeiki foki ia ʻa Feló.

8 Ko ʻeni, ʻi he taimi ko ʻení ko e anga ʻo e taulaʻeiki ʻa Felo, ko e tuʻi ʻo ʻIsipité, ke ʻohake ʻi he feilaulau ʻa e kau tangata mo e kau fefine pea mo e fānau ʻi he ʻesi-feilaulau ʻa ia naʻe fokotuʻu ʻi he fonua ko Kalitiá ke fai ai ʻa e feilaulau ki he ngaahi ʻotua ngali kehe ko ʻení.

9 Pea naʻe hoko ʻo pehē naʻe fai ʻe he taulaʻeikí ha feilaulau ki he ʻotua ʻo Feló pea ki he ʻotua foki ʻo Sakalilí, ʻio ʻo fakatatau ki he anga ʻo e kau ʻIsipité. Ko ʻeni ko e ʻotua ʻo Sakalilí ʻa e laʻaá.

10 Naʻa mo e feilaulau fakafetaʻi ʻo ha tamasiʻi naʻe fai ʻe he taulaʻeiki ʻa Feló ʻi he funga ʻesi-feilaulaú ʻa ia naʻe tuʻu ʻi he funga moʻunga naʻe ui ko e Moʻunga ʻo Pōtifaá, ʻi he ʻulu ʻo e potu tokalelei ʻo ʻOlisemí.

11 Ko ʻeni, naʻe feilaulau ʻaki ʻe he taulaʻeiki ko ʻení ʻi he ʻesi-feilaulau ko ʻení ʻa e kau tāupoʻou ʻe toko tolu ʻi he taimi pē ʻe taha, ʻa ia ko e ngaahi ʻofefine ʻo ʻOnaita, ʻa ia ko e toko taha ʻo e haʻa tuʻí kuo tupu tonu mei he manava ʻo ^aHamí. Naʻe feilaulau ʻaki ʻa e kau tāupoʻoú ni koeʻuhí ko ʻenau angamaʻá; naʻe ʻikai te nau fie ^bpunou hifo ʻo hū ki he ngaahi ʻotua ʻo e ʻakau pe maka, ko ia naʻe tāmateʻi ai ʻa kinautolu ʻi he funga ʻesi-feilaulaú ni, pea naʻe fai ia ʻo fakatatau ki he anga ʻo e kau ʻIsipité.

12 Pea naʻe hoko ʻo pehē, naʻe puke fakamālohiʻi au ʻe he kau taulaʻeikí, koeʻuhí ke nau fakapoongi mo au foki, ʻo hangē ko ʻenau fai ki he kau tāupoʻou ko ia ʻi he ʻesi-feilaulau ko ʻení; pea koeʻuhí ke mou lava ke maʻu ai ha ʻilo ʻo kau ki he ʻesi-feilaulau ko ʻení, ko ia te u pehē ke mou vakai ki he fakatātā ʻi he kamataʻanga ʻo e lekooti ko ʻení.

13 Naʻe ngaohi ia ʻi he tatau ʻo ha mohenga, ʻo hangē ko ia naʻe maʻu ʻe he kau Kalitiá, pea naʻe tuʻu ia ʻi he ʻao ʻo e ngaahi ʻotua ʻo ʻElikená, Līpiná, Mamakelá, Kolasí, pea mo ha ʻotua ʻe taha naʻe tatau mo e ʻotua ʻo Felo, ko e tuʻi ʻo ʻIsipité.

14 Koeʻuhí ke mou maʻu ha ʻilo ki he ngaahi ʻotua ko ʻení, ko ia kuó u fakahā ai kiate kimoutolu ʻa honau angá ʻi he ngaahi fakatātā ʻi he kamataʻangá, ʻa ia ko e anga ʻo e ngaahi tā fakatātā ʻoku ui ʻe he kau Kalitiá ko e Lalinosi, ʻa ia ko hono ʻuhingá ko e ngaahi mataʻitohi fakatātā.

15 Pea ʻi heʻenau hiki hake honau nimá kiate au, koeʻuhí ke nau feilaulau ʻaki au mo toʻo ʻeku moʻuí, vakai, naʻá ku hiki hake hoku leʻó ki he ʻEiki ko hoku ʻOtuá, pea naʻe ^atokanga mai ʻa e ʻEikí ʻo ne ʻafioʻi, pea naʻá ne fakafonu au ʻaki ʻa e meʻa-hā-mai ʻa e Māfimafí, pea naʻe tuʻu ha ʻāngelo mei hono ʻaó ʻi hoku tafaʻakí, peá ne ^bvete ange leva ʻa hoku ngaahi haʻí;

16 Pea naʻe ongo mai ʻa hono leʻó kiate au: ʻE ʻĒpalahame, ʻĒpalahame, vakai, ko hoku ^ahingoá ko Sihova, pea kuó u fanongo kiate koe, pea kuó u ʻalu hifo ke fakahaofi koe, pea ʻave koe mei he fale ʻo hoʻo tamaí, pea mei ho kāingá kotoa pē, ki ha ^bfonua foʻou ʻa ia ʻoku ʻikai te ke ʻilo ki ai;

17 Pea ʻe fai ʻeni koeʻuhi kuo nau fakatafoki honau lotó meiate au ke hū ki he ʻotua ʻo ʻElikená, pea mo e ʻotua ʻo Līpiná, pea mo e ʻotua ʻo Mamakelá, pea mo e ʻotua ʻo Kōlasí, pea mo e ʻotua ʻo Felo, ko e tuʻi ʻo ʻIsipité; ko ia kuó u ʻalu hifo ai ke ʻaʻahi kiate kinautolu, pea ke fakaʻauha ia ʻa ia kuó ne hiki hake hono nimá ke taaʻi koe, ʻe ʻĒpalahame, ko hoku foha, ke toʻo atu ai ʻa hoʻo moʻuí.

18 Vakai, te u tataki koe ʻaki hoku nimá pea te u ʻave koe, ke ʻai kiate koe ʻa hoku hingoá, ʻio ʻa e ^aLakanga Fakataulaʻeiki ʻo hoʻo tamaí, pea ʻe ʻaofi koe ʻe hoku mālohí.

19 Hangē ko e meʻa naʻe hoko kia Noá ʻe pehē pē ʻa e meʻa ʻe hoko kiate koé; ka ʻe makatuʻunga ʻi hoʻo ngāué ʻa e ʻiloa ʻa hoku ^ahingoá ʻi he māmaní ʻo taʻengata, he ko ho ʻOtuá au.

20 Vakai, naʻe ʻi he fonua ʻo ^aʻUa, ʻo Kalitiá ʻa e Moʻunga ʻo Pōtifaá. Pea naʻe holoki hifo ʻe he ʻEikí ʻa e ʻesi-feilaulau ʻa ʻElikená, mo e ngaahi ʻotua ʻo e fonuá, ʻo ne fakaʻauha ʻaupito ia, mo ne teʻia ʻa e taulaʻeikí ʻo ne mate; pea naʻe ʻi ai ʻa e tangilāulau lahi ʻi Kalitia, pea ʻi he lotoʻā foki ʻo Feló; ʻa ia ko hono ʻuhinga ʻo e Feló ko e tuʻi ʻi he hako fakatuʻi.

21 Ko ʻeni ko e tuʻi ko ʻeni ʻo ʻIsipité ko ha hako ia mei he manava ʻo ^aHamí, pea naʻe maʻu ʻe ia ʻa e toto ʻo e kau ^bKēnaní ʻi hono fāʻeleʻí.

22 Naʻe tupu mei he hako ko ʻení ʻa e kau ʻIsipité kotoa pē, pea naʻe pehē hono fakatoe ʻa e toto ʻo e kau Kēnaní ʻi he fonuá.

23 Naʻe fuofua ʻilo ʻa e fonua ʻo ^aʻIsipité ʻe ha fefine, ʻa ia ko e ʻofefine ʻo Hami, pea ko e taʻahine ʻa ʻIsipitasi, ʻa ia ko hono ʻuhinga ʻi he lea faka-Kalitiá ko ʻIsipite, ʻa ia ko hono ʻuhingá ko e meʻa kuo tapui;

24 ʻI he taimi naʻe ʻiloʻi ai ʻa e fonuá ʻe he fefine ní naʻe ʻufiʻufi ia ʻe he vai, pea naʻá ne tuku ki mui ke nofo ʻi ai ʻa ʻene fānau tangatá; pea ko ia, naʻe tupu meia Hami, ʻa e faʻahinga ko ia naʻe fakatolonga ai ʻa e malaʻiá ʻi he fonuá.

25 Ko ʻeni naʻe fokotuʻu ʻa e ʻuluaki puleʻanga ʻo ʻIsipité ʻe Felo, ko e tama lahi ʻa ʻIsipitasi, ko e ʻofefine ʻo Hamí, pea naʻe tatau ia mo e anga ʻo e puleʻanga ʻo Hamí, ʻa ia naʻe ʻi he hokohoko fakapēteliaké.

26 Pea ko Feló, koeʻuhí ko ha tangata māʻoniʻoni ia, naʻá ne fokotuʻu ʻa hono puleʻangá peá ne fakamāuʻi ʻa hono kakaí ʻi he anga-fakapotopoto mo e angatonu ʻi hono ngaahi ʻahó kotoa pē, ʻo ne feinga fakamātoato ke faʻifaʻitaki ki he lakanga naʻe fokotuʻu ʻe he ngaahi tamaí ʻi he ngaahi ʻuluaki toʻu tangatá, ʻi he ngaahi ʻaho ʻo e ʻuluaki pule fakapēteliaké, ʻio ʻi he pule ʻa ʻĀtamá kae ʻumaʻā foki ʻa Noa, ko ʻene tamaí, ʻa ia naʻá ne tāpuakiʻi ia ʻaki ʻa e ngaahi ^atāpuaki ʻo e māmaní, pea mo e ngaahi tāpuaki ʻo e potó, kae fakamalaʻiaʻi ia ʻo kau ki he Lakanga Fakataulaʻeikí.

27 Ko ʻeni, ko e meʻa ʻi he kau ʻa Felo ki he hako ko ia ʻa ia naʻe ʻikai te ne lava ai ke maʻu ʻa e totonu ki he ^aLakanga Fakataulaʻeikí, neongo naʻe fie ʻekeʻi ia ʻe he kau Feló meia Noa, ʻo fou mai ʻia Hami, ko ia naʻe takihalaʻi ai ʻa ʻeku tamaí ʻe heʻenau tauhi tamapuá;

28 Ka te u feinga, ʻo fai atu ai mei heni, ke fakamatala ki he hokohokó ʻo fai atu pē meiate au ʻo aʻu ki he kamataʻanga ʻo e fakatupú, he kuo tō ki hoku nimá ʻa e ngaahi ^alekōtí, ʻa ia ʻoku ou kei maʻu ʻo aʻu mai ki he lolotongá ni.

29 Ko ʻeni, hili hono teʻia ʻo e taulaʻeiki ʻa ʻElikená ʻo ne maté, naʻe hoko leva hono fakamoʻoniʻi ʻo e ngaahi meʻa ʻa ia naʻe folofola ʻaki kiate au ʻo kau ki he fonua ko Kalitiá, ʻo pehē ʻe ʻi ai ha honge ʻi he fonuá.

30 Ko ia naʻe tō ʻa e honge ʻi hono kotoa ʻo e fonua ko Kalitiá, pea naʻe faingataʻaʻia lahi ʻaupito ʻa ʻeku tamaí ko e tupu mei he hongé, pea naʻá ne fakatomala mei he kovi ʻa ia naʻá ne fakakaukau ke fai kiate aú, ke toʻo ʻa ʻeku ^amoʻuí.

31 Ka ko e ngaahi lekooti ʻo e ngaahi tamaí, ʻio ʻa e kau pēteliaké ʻo kau ki he totonu ʻo e Lakanga Fakataulaʻeikí, naʻe maluʻi ia ʻe he ʻEiki ko hoku ʻOtuá ʻi hoku nima ʻoʻokú; ko ia kuo ʻi ai ha ʻilo ki he kamataʻanga ʻo e fakatupú, kae ʻumaʻā foki ʻa e ngaahi ^apalanité, pea mo e ngaahi fetuʻú, ʻo hangē ko ia naʻe fakahā ki he ngaahi tamaí, kuó u tauhi ʻo aʻu mai ki he ʻahó ni, pea te u feinga ke tohi ʻa e niʻihi ʻo e ngaahi meʻá ni ʻi he lekooti ko ʻení, koeʻuhí ke ʻaonga ki hoku hakó ʻa ia ʻe tupu ki mui ʻiate aú.