Vahe 55
1 Oku hanu a Tevita i he ene lotu i he ene tuutamaki lahi. 9 Oku lotu ia koeuhi koe kovi moe kākā a hono gaahi fili. 16 Oku ne fakafiemalie‘i ia i he Otua i he ene fakamoui ia, mo veuveuki hono gaahi fili.
Ki he Takimua i he Nekina, koe Same akonaki a Tevita.
¶ 1 FAKAFANOGO ki he eku lotu, E Otua; bea oua naa ke fufu koe mei he eku lotu tāumau.
2 Afio mai kiate au, mo ke ogo‘i au: oku au lāuga i he eku mamahi, bea tagi kalaga;
3 Koeuhi koe le‘o oe fili, koeuhi koe taomia e he kau agakovi: he kuo nau tuku ae hia kiate au, bea i he ita oku nau fehia kiate au.
4 Oku mamahi lahi hoku loto iate au: bea kuo to kiate au ae gaahi fakailifia oe mate.
5 Kuo hoko kiate au ae manavahe moe tetetete, bea kuo lomaki‘i au e he lilika.
6 Bea naaku behe, Taumaiā keu ma‘u ae kabakau o hage koe lube! koeuhi keu buna atu, bea fiemalie ai.
7 Vakai, teu alu o he ki he mamao, beau nofo i he toafa. Sila.
8 Teu alu fakatootoo o hao mei he matagi lahi moe afā.
9 Fakaauha, E Jihova, bea vahevahe ho nau elelo: he naaku mamata ki he fakamalohi moe fekeikei i he kolo.
10 Oku nau alu fano ai i he gaahi a oia i he aho moe bo: oku i loto i ai ae bauu moe mamahi.
11 Oku i ai ae kovi: oku ikai mahui mei hono gaahi hala ae fakamalohi moe kākā.
12 He nae ikai ko ha fili aia naa ne lauikovi‘i au; ka ne behe, teu faa kataki ia: bea nae ikai ko ia oku ne fehia kiate au aia kuo hiki hake ia kiate au; ka ne behe, teu faa fufu au meiate ia:
13 Ka ko koe ia, koe tagata oku ta tatau, ko hoku fakahinohino, mo hoku kaumea.
14 Naa ta alea lelei mo au, bea alu fakataha ki he fale oe Otua.
15 Ke buke akinautolu e he mate, bea tuku ke alu vave hifo akinautolu ki hetesi: he oku i ho nau gaahi nofoaga, bea iate kinautolu ae kovi.
16 Ka ko au teu ui ki he Otua; bea e fakamoui au e Jihova.
17 I he efiafi, moe bogibogi, moe hoata, teu lotu, mo tagi le‘o lahi: bea te ne ogo‘i hoku le‘o.
18 Kuo ne fakamoui hoku laumalie i he melino mei he tau nae tuu hake kiate au: he nae iate au ae toko lahi.
19 E ogo‘i e he Otua, aia oku afio talu mei mua, bea te ne tautea akinautolu. Sila. Koeuhi oku ikai te nau feliliuaki, koia oku ikai te nau manavahe ai ki he Otua.
20 Naa ne mafao atu hono nima kiate kinautolu aia nae nonofo i he melino mo ia: kuo maumau‘i eia ene fuakava.
21 Koe gaahi lea a hono gutu nae molemole lahi hake i he bota, ka nae i hono loto ae tau: nae molu lahi ene gaahi lea i he lolo, ka koe mooni koe gaahi heleta ia kuo unuhi.
22 Ke ke tuku hoo kavega kia Jihova, bea te ne boubou koe: e ikai aubito te ne tuku ke gau‘e ae kakai maonioni.
23 Ka ko koe, E Otua, te ke o hifo akinautolu ki he luo oe fakaauha: koe kau tagata bani toto mo kākā e ikai te nau aujia hono vaeuaaga o ho nau gaahi aho; ka teu falala kiate koe.