¶ 1 AE fānau, mou talagofua ki hoo mou mātua i he Eiki: he oku totonu eni.

2 Fakaabaaba ki hoo tamai mo hoo fa‘e; koe uluaki fekau ia oku i ai ae talaofa;

3 Koeuhi ke lelei kiate koe, bea koeuhi ke ke moui fuoloa ai i he fonua.

4 Bea ko kimoutolu, ae gaahi tamai, oua naa mou fakatubu lili ki hoo mou fānau: kae tauhi akinautolu i he akonaki moe fakaboto ki he Eiki.

5 Ae kau tamaioeiki, mou talagofua ki ho mou gaahi eiki fakamama, i he manavahe moe tetetete, i he fakamoomooni o ho mou loto, o hage  koe fai kia Kalaisi;

6 Ikai i he gaue fakamamata be, o hage koe kau fakamalie ki he tagata; kae tāu moe kau tamaioeiki a Kalaisi, o fai ae finagalo oe Otua mei he loto;

7 O fai loto lelei be ae gaue, ki he Eiki, kae ikai ki he tagata:

8 Bea ilo koe gaue lelei koia e taki taha fai e he tagata, koia ia te ne ma‘u mei he Eiki, be ko ha bobula  ia be koe tauataina.

9 Bea ko kimoutolu, ae gaahi eiki, ke mou fai ae gaahi mea behe kiate kinautolu, o tuku ae  faa tautea: he oku mou ilo oku ai ho mou Eiki i he lagi; bea oku ikai iate ia ha filifilimanako.

10 Gata, e hoku kaiga, mou malohi i he Eiki, bea i he lahi o ene mafimafi.

11 Ai kiate kimoutolu ae mahafu tau kotoa oe Otua, koeuhi ke mou faa tuu hake ki he gaahi tuutuuni kākā ae tevolo.

12 He oku ikai koe tau fagatua moe kakano moe toto, ka ki he gaahi bule, moe gaahi malohi, moe kau bule oe fakabouli oe mamani, moe kau laumalie kovi i he gaahi botu i oluga.

13 Koia ke too ae mahafu tau kotoa oe Otua, koeuhi ke mou faa tuu ai i he aho oe kovi, bea hili hono iku‘i kotoabe, kae tuu be.

14 Koia ke mou tuu kuo nonoo aki ae mooni ae koga loto, bea ai ki he fatafata ae jifa koe maonioni;

15 Bea mou tobuva‘e aki ae teuteu oe ogoogolelei oe melino;

16 Ai kitua i he mea kotoabe ae ba oe tui, aia te mou faa tamate aki ae gaahi gahau vela kotoabe oe toko taha kovi.

17 Bea ai moe tatā oe fakamoui, moe heleta oe Laumalie, aia koe folofola ae Otua:

18 O lotu mau ai be i he gaahi lotu kotoabe moe lotu tāumau i he Laumalie, bea leo ki ai i he faa fakakukafi, moe hufia ae kaiga maonioni kotoabe;

19 Bea koeuhi ko au, ke foaki ae lea kiate au, koeuhi keu mafaa malohi be hoku gutu, keu fakailo atu ae mea fakalilolilo oe ogoogolelei,

20 Aia kuo ha‘ijia ai au ko hono faifekau: koeuhi keu lea malohi ai au, o tāu moe lea oku totonu.

21 Ka koeuhi ke mou ilo ae mea oku kau kiate au, mo ia oku ou fai, ko Tikiko, koe kaiga ofeina moe faifekau agatonu i he Eiki, e fakailo eia ae mea kotoabe kiate kimoutolu:

22 Aia kuou fekau atu ai ia kiate kimoutolu i he mea ni, koeuhi ke mou ilo e mau nofo ni, bea koeuhi ke ne fakafiemalie ki ho mou loto.

23 Ke i he gaahi kaiga ae melino, moe ofa, moe tui, mei he Otua koe Tamai bea moe Eiki ko Jisu Kalaisi.

24 Ke iate kinautolu kotoabe oku ofa mooni ki ho tau Eiki ko Jisu Kalaisi ae aloofa. Emeni.