Jetōb
M̧ōttan eo an rimour eo ej pād m̧okta jān ļotak ilo kanniōk, im ej jokwe ilo ānbwinnin kanniōk ilo iien mour ilo laļ in, im ej pād ālikin mej āinwōt juon ānbwin eo emake iaan m̧ae Jerkakpeje eo. Aolep men ko remour—armej otemjej, mennin mour ko, im mennin eddek ko—rekar jetōb m̧okta jān jekjekin mour ekar wōr ioon laļ (Jen. 2:4–5; Moses 3:4–7). Ānbwinnin jetōb eo āinwōt ānbwinnin kanniōk eo (1 Ni. 11:11; Ether 3:15–16; K&B 77:2; 129). Jetōb ej matter, a eļapļo̧k an ekkwedik ak erreoļo̧k jān irinekkatak ak matter (K&B 131:7).
Armej otemjej ej lukkuun m̧aan ak kōrā eo nejin Anij, kōnke ekar ļotak āinwōt juon jetōb n̄an Jemān im Jinen ilan̄ m̧okta jān an ļotak n̄an jemān im jinen ilo kanniōk ioon laļ (Hib. 12:9). Kajjojo armej ioon laļ ewōr ānbwinnin jetōb eban wabanban ippān kobaļo̧k ānbwinnin kanniōk im di eo ippān. Āinwōt kōmmeļeļeiki jet iien ilo jeje ko, jetōb eo im ānbwinnin kanniōk ippān doon rej ejaake armej emour (Jen. 2:7; K&B 88:15; Moses 3:7, 9, 19; Ebr. 5:7). Juon jetōb emaron̄ mour makeļo̧k iaan jān ānbwinnin kanniōk, a ānbwinnin kanniōk eban mour makeļo̧k iaan jān jetōb eo (Jemes 2:26). Mej ilo kanniōk ej jepelļo̧k an jetōb jān ānbwinnin kanniōk. Ilo Jerkakpeje eo, jetōb ej bar kobatok ippān ejja ānbwinnin kanniōk im di eo ekar pād ie āinwōt juon armej emour, ippān ruo oktak ko reļļap: reban bar jepelļo̧k, im ānbwinnin kanniōk eo ej jamin bar mej im enaaj weeppān (Alma 11:45; K&B 138:16–17).