Weeppān Dedeļo̧k, dipiio, im lukkuun poļōmān; lukkuun jim̧we. Weeppān emaron̄ barāinwōt meļeļein ejjeļo̧k jero̧wiwi ak nana. Kraist wōt ekar lukkuun weeppān. Ro rem̧ool rikaļooran Kraist remaron̄ weeppān kōn jouj im Pinmuur eo An. Būruōmi ren weeppān ippān Irooj, 1 Kiin̄ 8:61. Kōn menin kom̧in weeppān, em̧ool āinwōt Jemāmi ilo lan̄, Matu 5:48 (3 Ni. 12:48). Eļan̄n̄e jabdewōt armej ej jab kōļōkatip ilo naan, ejja in wōt ej juon armej eweeppān, Jemes 3:2. Tōmak ej jab n̄an bōk juon jeļāļo̧kjeņ eweeppān kōn men ko, Alma 32:21, 26. Pinmuur eo ekar kōm̧m̧an bwe Anij en maron̄ juon Anij eweeppān, Alma 42:15. Moronai ekar juon armej in meļeļe eweeppān, Alma 48:11–13, 17–18. Jetōb eo an Kraist em̧ōj leļo̧k n̄an aolep armej n̄an ekajet im jeļā kōn juon jeļāļo̧kjeņ eweeppān eļan̄n̄e ak jaab juon men ej jān Anij ak jān devil, Moro. 7:15–17. Itok n̄an Kraist, im weeppān ilo E, Moro. 10:32. Wōnm̧aanļo̧k ilo kijenmej m̧ae ami weeppān, K&B 67:13. Rein rej er ro rej armej jim̧we kōweeppān er kōn Jisōs, K&B 76:69. Kūr ko ilo Kabun̄ in rej n̄an kōweeppānļo̧k eo an Ro Rekwōjarjar, K&B 124:143 (Epe. 4:11–13). Ro remour rej jab weeppān ijello̧kun ro remej aer, K&B 128:15, 18. Noa ekar juon armej wōt, im weeppān ilo epepen eo an, Moses 8:27.