Bok in Mormon

Juon ian bok ko reļļap emān in jeje ko rekwōjarjar im Kabun̄ eo an Jisōs Kraist im Armej ro Rekwōjarjar ilo Raan ko Āliktata ekar bōke bwe en m̧weiien. Ej juon kakkobaba jān juon rikanaan etto etan Mormon kōn ļo̧o̧k ko jān ro rekar jokwe ilo Amedka kein etto. E kar jeje n̄an kam̧ool bwe Jisōs ej RiKraist eo. Kake ļo̧o̧k in, Rikanaan Josep Smith, eo ar ukōte jān mennin leļo̧k eo im kajoor eo an Anij, eaar ba, “Iaar ba n̄an ritōl ro bwe Bok in Mormon ej eo ejim̧wetata ian jabdewōt bok ioon laļ, im dekā in jabōn em̧ n̄an tōmak in ad, im juon armej enaaj epaakeļo̧k Anij jān ļoore katak ko ie, jān bar jabdewōt bok (lale kadkadin im̧aantata in Bok in Mormon).”

Bok in Mormon eo watōke bwe ej juon ļo̧o̧k an tōmak kōn jilu jarin armej ro rekar em̧m̧akūt jān Laļ eo Em̧or n̄an aelōn̄ in Amedka. Jar kein kar tōl er jān rikanaan ro rekar ļo̧o̧ke bwebwenatoin kabun̄ im mour ko aer ioon pileij māāl ko. Bok in Mormon ej ļo̧o̧ke loļo̧k eo an Jisōs Kraist n̄an armej ro ilo aelōn̄ in Amedka kaņ ālikin Jerkakpeje eo An. Juon tōrean aenōm̧m̧an rūbukwi iiō aetokan eaar itok ālikin loļo̧k in an Kraist.

Moronai, juon ian rikanaan im rijeje bwebwenato ro āliktata an riNipai, eaar sili ļo̧o̧k ko kar kōkaduiki an armej rein im ņooji ilo enan̄in Ā.K. 421 eo. Ilo 1823 eo, Moronai in em̧ōj an jerkakpeje ar loļo̧k Josep Smith im tokālik leļo̧k n̄an e ļo̧o̧k in etto kein rekwōjarjar bwe ren ukok im būktok n̄an laļ in āinwōt bar juon Kallim̧ur kōn Jisōs Kraist.