Veivuke ni Vuli
iVola i Momani


iVola i Momani

E dua vei ira na va na ivola ni ivolanikalou ka ciqomi ena Lotu i Jisu Karisito ni Yalododonu Edaidai. Oqo na kena umani vata mai vua e dua na parofita makawa ka yacana ko Momani na kedra itukutuku na a tawani Amerika tu ena gauna makawa. Sa volai me vakadinadinataka ni o Jisu na Karisito. Ena vuku ni itukutuku oqo, e kaya kina na Parofita ko Josefa Simici, o koya a vakadewataka ena isolisoli kei na kaukauwa ni Kalou, ā€œAu a tukuna vei ira na veitacini ni iVola i Momani e ivola dodonu duadua e vuravura, ka vatu ivakadei ni noda lotu, ka na toro voleka cake vua na Kalou e dua na tamata ena nona muria na kena ivakavuvuli mai na dua tale na ivolaā€ (raica na ivakamacala taumada ena veidraunipepa e liu ni iVola i Momani).

Na iVola i Momani e dua na itukutuku vakalotu me baleta e tolu na umatamata ka ra a biu vanua mai na Vuravura Makawa ki na vanua ko Amerika. Era a liutaki na veilawalawa oqo mai vei ira na parofita ka ra a vola na kedra itukutuku vakalotu kei na veika ni bula vakayago ena veipeleti kaukamea. E tukuni ena iVola i Momani na veisiko nei Jisu Karisito vei ira na tamata mai Amerika ni oti na Nona Tucake tale mai na mate. A tarava mai na nona veisiko oqori na Karisito e rua na drau na yabaki ni bula sautu.

A qai dregata ka vunitaka ko Moronai na iotioti ni nodra parofita ka dauvola itukutuku makawa na Nifaiti, na itukutuku umani vata ni umatamata oqo ena i ka 421 ni S.K. Ena 1823 a sikovi Josefa Simici kina o Moronai ni sa tucake oti tale mai na mate ka qai mai solia vua e muri na itukutuku makawa ka tabu oqo me vakadewataki ka vakaraitaki yani ki vuravura me dua tale na ivakadinadina kei Jisu Karisito.