Pāpa’ira’a mo’a
Te Ha’api’ira’a Tumu ’e te mau Fafaura’a 6


Tufa’a 6

E heheura’a tei hōro’ahia mai ia Iosepha Semita, te peropheta, ’e ’ia Oliver Cowdery, i Harmony, i Pennsylvania, i te ’āva’e ’Ēperēra 1829. ’Ua ha’amata Oliver Cowdery i tāna ’ohipa pāpa’i parau, nō te ’īritira’a i te Buka a Moromona, i te 7 nō ’Ēperēra 1829. ’Ua fāri’i a’ena ho’i ’oia i te hō’ē fa’a’itera’a mo’a nō ’ō mai i te Atua ra nō te parau mau o te ’itera’a pāpū o te peropheta nō ni’a i te mau ’api tei ni’a i te reira tē ’ō’otira’ahia te pāpa’a parau nō te Buka a Moromona. ’Ua ani atu Iosepha i te Fatu nā roto i te Urima ’e te Tumima, ’e ’ua fāri’i ihora ’oia i teie nei pāhonora’a.

1–6, E fāri’i te feiā rave ’ohipa i roto i te ’āua a te Fatu i te fa’aorara’a ; 7–13, ’Aita atu e hōro’a rahi roa atu i te hōro’a nō te fa’aorara’a ; 14–27, E fāri’ihia te ’itera’a pāpū nō ni’a i te parau mau nā roto mai i te Vārua ; 28–37, Hi’o atu i te Mesia, ’e ’a rave tāmau noa i te parau mau.

1 Tē fātata mai nei te tau e tupu mai ai te hō’ē ’ohipa rahi ’e te mea māere ho’i i rotopū i te mau tamari’i a te ta’ata nei.

2 Inaha, ’o vau te Atua ; ’a ha’apa’o na i tā’u nei parau, e mea ora ’e te pūai ho’i, ’e te ’oi a’e i te ’o’e mata piti, i te fa’ata’a-’ē-ra’a i te mau pona ivi ’e te puo ho’i ; nō reira, ’a ha’apa’o na i tā’u nei mau parau.

3 Inaha, ’ua teatea te ’āua ’e ’ua ineine roa nō te tau ’auhune ; nō reira, ’o ’oia ’o tē hina’aro ’ia ’ō’oti ra, e māo’a ïa ’oia i tāna mauha’a ’ō’oti ma tōna pūai, ’e ’a ’ō’oti ai ’oi vai a’e te ao, ’ia ti’a iāna ’ia ha’aputu mai i te fa’aorara’a mure ’ore nō tōna vārua i roto i te bāsileia o te Atua.

4 ’Oia ïa, ’o ’oia ’o tē māo’a i tāna mauha’a ’ō’oti ’e ’a ’ō’oti ai ’ua mā’itihia ïa ’oia e te Atua.

5 Nō reira, mai te mea e ani mai ’ōrua iā’u nei, e fāri’i ïa ’ōrua ; ’e mai te mea e pātōtō mai ’ōrua, e ’īritihia ïa ia ’ōrua.

6 I teienei, nō te mea ’ua ani mai ’ōrua, inaha, tē parau atu nei au ia ’ōrua, ’a ha’apa’o i tā’u mau fa’auera’a, ’e ’a ’imi i te mau rāve’a ’ia fa’aho’i mai ’e ’ia fa’atupu ho’i i te ’ohipa nō Ziona ;

7 ’Eiaha e tītau i te tao’a rahi, i te pa’ari rā ; ’e inaha, e ’īritihia mai te mau parau ’aro a te Atua i mua ia ’ōrua, ’e i reira ’ōrua e faufa’ahia ai. Inaha, ’o tei noa’a iāna te ora mure ’ore ra, ’ua faufa’ahia ïa.

8 ’Oia mau, ’oia mau, tē parau atu nei au ia ’ōrua na, mai te au i tā ’ōrua e hina’aro iā’u nei, e nā-reira-hia ïa ia ’ōrua ; ’e mai te mea ē ’ua hina’aro ’ōrua, e riro mau ’ōrua ’ei mauha’a nō te rave i te ’ohipa maita’i roa i rotopū i teie nei u’i.

9 ’Eiaha tā ’ōrua e parau ’ē atu i tō teie nei u’i, maori rā te parau nō te tātarahapa ; ’a ha’apa’o maita’i i tā’u mau fa’auera’a, ’e ’a tauturu i te fa’aho’ira’a mai i tā’u ’ohipa, mai te au i tā’u mau fa’auera’a, ’e e ha’amaita’ihia ïa ’ōrua.

10 Inaha, e hōro’a tā ’oe, ’e e ao tō ’oe nō tā ’oe hōro’a. ’A ha’amana’o ē e mea mo’a te reira ’e nō ni’a mai ho’i—

11 ’E mai te mea e ani mai ’oe ra, e ’ite ïa ’oe i te mau parau ’aro, ’e e mau mea rarahi ïa ’e te māerehia ho’i ; nō reira, ’a fa’a’ohipa i tā ’oe hōro’a, ’ia ’ite ’oe i te mau parau ’aro, ’ia arata’i ’oe i te ta’ata e rave rahi i te ’itera’a i te parau mau, ’oia ïa, ’ia ha’apāpū i tō rātou mana’o i te hape o tō rātou ra mau haere’a.

12 ’Eiaha e fa’a’ite haere i tā ’oe hōro’a i te ta’ata, maori rā i te feiā nō tā ’oe iho fa’aro’o. ’Eiaha e fa’ariro i te mau mea mo’a ’ei mea faufa’a ’ore.

13 Mai te mea e rave ’oe i te ’ohipa maita’i, ’oia ïa, ’e e ha’apa’o maita’i noa ē tae noa atu i te hope’a, e fa’aorahia ïa ’oe i roto i te bāsileia o te Atua, ’o te hōro’a hau roa ïa i te mau hōro’a ato’a a te Atua ; nō te mea, ’aita atu e hōro’a hau a’e i te hōro’a nō te fa’aorara’a.

14 ’Oia mau, ’oia mau, tē parau atu nei au ia ’oe na, e ao tō ’oe nō te ’ohipa tā ’oe i rave ; nō te mea ’ua ani mai ho’i ’oe iā’u nei, ’e inaha, i tā ’oe mau anira’a ato’a i fāri’i na ho’i ’oe i te ha’api’ira’a a tō’u nei Vārua. ’Āhiri ’aita rā, ’aore ïa ’oe i tae mai na i te vāhi i taehia mai e ’oe i teienei.

15 Inaha, ’ua ’ite ’oe ē ’ua ani mai ’oe iā’u nei ’e ’ua ha’amāramarama vau i tō ’oe ferurira’a ; ’e i teienei tē fa’a’ite atu nei au i teie nei mau mea ’ia ’ite ho’i ’oe ē, ’ua ha’amāramaramahia ’oe e te Vārua nō te parau mau ;

16 ’Oia mau, tē fa’a’ite atu nei au ia ’oe na, ’ia ’ite ’oe ē ’o te Atua ana’e ’e ’aita atu ’o tei ’ite i tō ’oe mau mana’o ’e te mau ’ōpuara’a o tō ’oe na ’ā’au.

17 Tē fa’a’ite atu nei au i teie nei mau mea ia ’oe na, ’ia riro ho’i te reira ’ei fa’a’ite pāpū ia ’oe ē—e parau mau te mau parau ’e ’aore rā te ’ohipa tā ’oe i pāpa’i iho nei.

18 Nō reira, ’a fa’aitoito noa ; ’a turu noa i tō’u tāvini ia Iosepha, ma te tu’utu’u ’ore, i roto i te mau fifi tāna e fāri’i nō taua parau nei.

19 ’A a’o atu iāna i tāna mau hapehape ri’i, ’e ’a fāri’i ato’a ho’i i tāna mau a’ora’a. ’A fa’a’oroma’i ; ’a ha’apa’o maita’i ; ’a fa’atupu i te hitahita ’ore ; ’a fa’atupu i te fa’a’oroma’i, te fa’aro’o, te ti’aturi ’e te aroha mau.

20 Inaha, ’o Oliver ’oe, ’e nō tō ’oe mau hina’aro i parau atu ai au ia ’oe ; nō reira, ’a ha’aputu māite i teie nei parau ’ei mea faufa’a rahi i roto i tō ’oe na ’ā’au. ’A ha’apa’o maita’i ’e ’a fa’aitoito ho’i i te ha’apa’ora’a i te mau fa’auera’a a te Atua, ’e e fa’a’ati au ia ’oe i nā rima o tō’u nei here.

21 Inaha, ’o Iesu Mesia vau, te tamaiti a te Atua. ’O vau ā teie ’o tei haere mai i tō’u ihora mau ta’ata, ’e ’aita tō’u iho mau ta’ata i fāri’i mai iā’u nei. ’O vau nei te māramarama ’o tē ’ana’ana nei i roto i te pōiri, ’e ’aita ho’i te pōiri i māramarama i te reira.

22 ’Oia mau, ’oia mau, tē parau atu nei au ia ’oe na, mai te mea ’ua hina’aro ’oe i te tahi atu ā ’ite, ’a feruri ïa tō ’oe mana’o i te pō tā ’oe i ti’aoro mai iā’u i roto i tō ’oe na ’ā’au, ’ia noa’a ia ’oe te ’ite i te parau mau o teie nei mau mea.

23 ’Aita ānei au i parau i te parau hau i tō ’oe na ’ā’au nō ni’a i teie nei ’ohipa ? E aha atu ā te ’ite hau a’e i tō ’ō mai i te Atua ra ?

24 ’E i teienei, inaha, ’ua fāri’i ’oe i te ’ite ; ’e ’ia fa’a’ite atu vau ia ’oe te mau mea ’aore i ’itea e te ta’ata nei, e ’ere ānei ïa ’ua fāri’i ’oe i te ’ite i reira ?

25 ’E, inaha, tē hōro’a atu nei au i te hō’ē hōro’a nā ’oe, mai te mea tē hina’aro na ’oe i te reira iā’u nei, ’ia ’īriti i te parau, mai ia Iosepha, tō’u tāvini.

26 ’Oia mau, ’oia mau, tē parau atu nei au ia ’oe na, tē vai atu ra te mau pāpa’a parau tei roto i te reira te hō’ē tufa’a rahi nō tā’u nei ’evanelia, ’o tei tāpe’a-’ē-hia atu nō te parauti’a ’ore o te ta’ata nei ;

27 ’E i teienei tē fa’aue atu nei au ia ’oe, mai te mea e hina’aro maita’i tō ’oe—e hina’aro ’ia ha’apu’e i te tao’a nā ’oe i te ao ra—’ei reira ’oe e tauturu ai i te ’āfa’ira’a mai i te māramarama, nā roto i tā ’oe hōro’a, i te mau tufa’a o tā’u mau pāpa’ira’a mo’a ’o tei huna-’ē-hia na nō te ’ohipa ’ī’ino.

28 ’E i teienei, inaha, tē hōro’a atu nei au ia ’oe, ’e i tō’u tāvini ato’a ia Iosepha, te mau tāviri nō teie nei hōro’a, ’o tē ’āfa’i mai i teie nei ’ohipa mo’a i roto i te māramarama ; ’e nā roto i te vaha o nā ’ite to’opiti ’e ’aore rā to’otoru e ha’apāpūhia ai te mau parau ato’a ra.

29 ’Oia mau, ’oia mau, tē parau atu nei au ia ’ōrua na, mai te mea e pāto’i rātou i tā’u mau parau, ’e i teie nei tufa’a nō tā’u ’evanelia e tā’u ’ohipa mo’a ho’i, e ao ïa tō ’ōrua, nō te mea e’ita e hau tā rātou e rave i ni’a ia ’ōrua i tā rātou i rave i ni’a iā’u nei.

30 ’E mai te mea noa atu e rave rātou i ni’a ia ’ōrua mai tā rātou i rave i ni’a iā’u nei, e ao ïa tō ’ōrua i reira, nō te mea e pārahi ’ōrua i pīha’i iho iā’u nei i roto i te hanahana.

31 Mai te mea rā, e’ita rātou e pāto’i mai i tā’u mau parau, ’o tē ha’apāpūhia nā roto i te ’itera’a pāpū ’o tē hōro’ahia atu, e ao ïa tō rātou, ’e ’ei reira ’ōrua e ’oa’oa ai i te hotu nō tā ’ōrua mau ’ohipa.

32 ’Oia mau, ’oia mau, tē parau atu nei au ia ’ōrua na, mai tā’u i parau atu i tā’u mau pipi, i te vāhi e ’āmui ai e to’opiti ’e ’aore rā e to’otoru i tō’u nei i’oa, ma te hina’aro hō’ē ra, inaha, ’ei reira ïa vau i rotopū ia rātou—mai te reira ato’a, tei rotopū vau ia ’ōrua na.

33 ’Eiaha e mata’u i te rave i te ’ohipa maita’i, e tā’u nā tamaiti, nō te mea ’o tā ’ōrua e ueue ra, ’o tā ’ōrua ato’a ïa e ’ō’oti ; nō reira, mai te mea e ueue ’ōrua i te maita’i, e ’ō’oti ato’a ho’i ’ōrua i te maita’i, ’ei utu’a maita’i nō tā ’ōrua ’ohipa.

34 Nō reira, ’eiaha e mata’u, ’e te nana iti ; ’a rave i te ’ohipa maita’i ; e noa atu e ’āmui tō te ao nei ’e tō hade ho’i i te pāto’ira’a ia ’outou, e ’ore roa rātou e manuia, mai te mea ’ua patuhia ’outou i ni’a i tā’u nei papa.

35 Inaha, ’aore au e fa’ahapa ia ’ōrua ; ’a haere i tō ’ōrua haere’a ’e ’eiaha e hara fa’ahou ; ’a rave ma te ha’apa’o maita’i i te ’ohipa ’o tā’u e fa’aue atu ia ’ōrua na.

36 ’A hi’o mai iā’u nei i tō mau mana’o ato’a na ; ’eiaha e fē’a’a, ’eiaha e mata’u.

37 ’A hi’o mai na i te mau puta i ha’aputahia i tō’u nei ’ao’ao ’e i te mau tāpa’o nō te mau naero i ni’a i tō’u nā rima ’e nā ’āvae ho’i ; ’a fa’aitoito noa, ’a ha’apa’o i tā’u mau fa’auera’a, ’e e noa’a ia ’ōrua te bāsileia o te ao ra. ’Āmene.