1 Lo, Ij ba n̄an kwe, bwe āinwōt rikarejera ^aMartin Harris eaar kōņaan juon kam̧ool jān Peiū, bwe kwe, rikarejera Josep Smith, Jun., kwaar bōki ^bpileij ko kwaar kam̧ool im kōm̧m̧an ļo̧o̧k kaki ke kwaar bōki jān Eō;

2 Im kiiō, lo, men in kwo naaj ba n̄an e—E eo ar kōnono n̄an kwe, Eaar ba n̄an kwe: N̄a, Irooj, ij Anij, im kar liwōj men kein n̄an kwe, rikarejera Josep Smith, Jun., im kar jiron̄ eok bwe kwōn jutak āinwōt juon ^arikam̧ool kōn men kein;

3 Im Iaar kōm̧m̧an bwe kwōn deļo̧n̄e juon bujen Ippa, bwe kwōn jab kwaļo̧ki ijello̧kun wōt n̄an ^aro im Iaar jiron̄ eok; im ejjeļo̧k am ^bkajoor ioer eļan̄n̄e Ij jab lewōje n̄an eok.

4 Im ewōr am mennin letok n̄an ukōti pileij ko; im en̄in mennin letok eo m̧oktata Iaar likūt ioom; im Iaar jiron̄ eok bwe kwōn jab kine bar juon mennin letok m̧ae iien jibadbad eo Aō ej kūrm̧ool ilo men in; bwe Ij jamin lewōj n̄an kwe bar juon mennin letok m̧ae an dedeļo̧k.

5 Em̧ool, Ij ba n̄an eok, bwe wo enaaj itok n̄an ro rej pād ilaļ eļan̄n̄e ^areban eo̧ron̄ naan ko Aō;

6 Bwe tok ālikin kwo naaj ^aekkapit im wōnm̧aanļo̧k im kwaļo̧k ^bnaan ko Aō n̄an ro nejin armej.

7 Lo, eļan̄n̄e rej jamin ^atōmak naan ko Aō, rej jamin kar tōmak eok, rikarejera Josep, eļan̄n̄e en kar maron̄ bwe kwōn kwaļo̧k n̄an er aolep men kein ko Iaar liwōj n̄an eok.

8 O, epepen ^ajab tōmak im ^bkijn̄en̄e kōnwaan in—Aō illu eurur ņae er.

9 Lo, em̧ool Ij ba n̄an eok, Iaar ^ako̧koņi wōt men ko Iaar lōke eok kaki, rikarejera Josep, n̄an juon un emālōtlōt ilo N̄a, im enaaj waļo̧k n̄an epepen ko ilju im jekļaj;

10 Ak epepen in enaaj bōk naan eo Aō kōn kwe;

11 Im kobaļo̧k ippān naan in kam̧ool eo am, ^anaan in kam̧ool eo an jilu ian ro rikarejera, ro Inaaj kūr im kapit er, ro n̄an er Inaaj kwaļo̧k men kein, im renaaj wōnm̧aanļo̧k ippān naan ko Aō ko rej liļo̧k kōn kwe.

12 Aaet, renaaj jeļā ilo ejjeļo̧k pere bwe men kein rem̧ool, bwe jān lan̄ Inaaj kwaļo̧ki n̄an er.

13 Inaaj leļo̧k n̄an er kajoor bwe ren maron̄ lo im mejek men kein ilo lukkuun jekjekier;

14 Im n̄an bar ^aejjeļo̧k Inaaj kōtļo̧k kajoor in, n̄an bōk ejja naan in kam̧ool in ilubwiljin epepen in, ilo jino in wanlōn̄tak in wōnm̧aantak in ^bkabun̄ eo Aō jān āne jem̧aden—alikkar āinwōt ^callōn̄, e ļae āinwōt al, im kōlōļn̄o̧n̄n̄o̧n̄ āinwōt jarin tariņae ewōr aer flag.

15 Im naan in kam̧ool eo an jilu ^arikam̧ool Inaaj jilkinļo̧k im̧aan naan eo Aō.

16 Im lo, jabdewōt eo ej ^atōmak ioon naan ko Aō, er Inaaj ^bloļo̧k er kōn ^calikkar ko an ^dJetōb eo Aō; im renaaj ^eļotak jān Eō, em̧ool jān dān im jān Jetōb eo—

17 Im kwōj aikuj kōttar bar jidik iien, bwe kwo jan̄in kar ^aekkapit—

18 Im naan in kam̧ool eo aer enaaj barāinwōt wōnm̧aanļo̧k āinwōt ^aliaakeļo̧k eo n̄an epepen in eļan̄n̄e rej kapen burueer ņae er;

19 Bwe ^aden̄den̄ in kōlo̧urō enaaj ilo̧k ilubwiljin ro rej pād ilaļ, im naaj wōnm̧aanļo̧k wōt im lutōkleplep jān iien n̄an iien, eļan̄n̄e rej jab ^bukeļo̧k, m̧ae laļ ej ^cejjeļo̧k kobban, im ro rej jokwe ie rej ko̧kkureļo̧k er im kanooj jako jān meram in Aō ^ditok.

20 Lo, Ij ba n̄an eok men kein, em̧ool āinwōt Aō barāinwōt kar ^aba n̄an armej ro kōn ko̧kkure eo an Jerusalem; im Aō ^bnaan naaj kam̧oole ilo iien in āinwōt kar kōm̧m̧ane m̧oktaļo̧k im kam̧ool e.

21 Im kiiō Ij jiron̄ eok, rikarejera Josep, n̄an ukeļo̧k im etetal jim̧weļo̧k Im̧aō, im n̄an jab bar reel n̄an karreelel ko an armej;

22 Im bwe kwōn pen ilo ^akōjparok kien ko ko im Iaar jiron̄ eok kaki; im eļan̄n̄e kwōj kōm̧m̧ane men in, lo Ij lewōj n̄an eok mour indeeo, em̧ool men̄e naaj ^bm̧ane eok.

23 Im kiiō, bar juon alen, Ij kōnono n̄an eok, rikarejera Josep, kōn ^aļein ekōņaan kam̧ool eo—

24 Lo, Ij ba n̄an e, e ej lelōn̄ļo̧k e make im ejjab bwe an kōttāik e make Im̧aō; ak eļan̄n̄e enaaj badikdik ettā Im̧aō, im kōttāik e make ilo jar ekajoor im tōmak, ilo lukkuun m̧ool in būruōn, innām Inaaj leļo̧k n̄an e an ^alo men ko ekōņaan loi.

25 Innām enaaj ba n̄an armej in epepen in: Lo, em̧ōj aō loi men ko Irooj ar kwaļo̧ki n̄an Josep Smith, Jun., im ^aijeļā ilo ejjeļo̧k pere ke rem̧ool, bwe iaar loi, bwe em̧ōj kwaļo̧ki n̄an eō jān kajoor an Anij im jab an armej.

26 Im N̄a Irooj ij jiron̄ e, rikarejera Martin Harris, bwe en jab kōnono eļapļo̧k n̄an er kōn men kein, ijello̧kun n̄e enaaj ba: Iaar loi, im em̧ōj kwaļo̧ki n̄an eō jān kajoor eo an Anij; im er kein naan ko enaaj ba.

27 A eļan̄n̄e enaaj kaarmejjete men in enaaj rupe bujen eo eaar kanejnej kake Ippa m̧okta, im lo, em̧ōj liaakeļo̧k e.

28 Im kiiō, ijello̧kun wōt n̄e ej kōttāik e make im kwaļo̧k n̄an Eō men ko eaar kōm̧m̧ani ko rebōd, im kōm̧m̧an bujen Ippa bwe enaaj kōjparok kien ko Aō, im kwaļo̧k tōmak ilo N̄a, lo, Ij ba n̄an e, enaaj ejjeļo̧k an errem̧aanļo̧k rot kein, bwe Ij jamin kōtļo̧k n̄an e n̄an loi men ko im Iaar kōnono kaki.

29 Im eļan̄n̄e jekjek eo in, Ij jiron̄ eok, rikarejera Josep, bwe kwōn ba n̄an e, bwe en jab kōm̧m̧an eļapļo̧k, ak kainepataik Eō ļo̧k wōt ikijjien men in.

30 Im eļan̄n̄e jekjek eo in, lo, Ij ba n̄an eok Josep, n̄e em̧ōj am ukōte bar jet alen ko kwo naaj bōjrak ium̧win jidik iien, em̧ool m̧ae iien eo Ij bar jiron̄ eok; innām kwo maron̄ bar ukok.

31 Im ijello̧kun n̄e kwōj kōm̧m̧ane men in, lo, enaaj ejjeļo̧k am mennin leļo̧k, im Inaaj bōk men ko Iaar lōke eok kaki.

32 Im kiiō, kōnke Ij reilo̧k im lo kōppao in kōttar n̄an ko̧kkure eok, aaet, Ij reilo̧k im lo bwe eļan̄n̄e rikarejera Martin Harris ejjab kōttāik e make im bōk kam̧ool eo jān Peiū, bwe enaaj wōtlo̧k ilo bōd;

33 Im elōn̄ rej kōppao ilo kōttar n̄an ^ako̧kkureļo̧k eok jān mejān laļ; im kōn un in, bwe raan ko am ren maron̄ aetokļo̧k, Iaar liwōj n̄an eok kien kein.

34 Aaet, kōn un in Iaar ba: Bōjrak, im jutak wōt m̧ae Aō jiron̄ eok, im Inaaj ^aņa mellan ko im kaki kwo maron̄ kōttōprak men eo Iaar jiron̄ eok.

35 Im eļan̄n̄e kwōj ^atiljek ilo kōjparok kien ko Aō, naaj ^bkotak eok ilo raan eo āliktata. Amen.