1 ’A fa’aro’o mai na ’o ’outou e te mau peresibutero nō tā’u ’ēkālesia, ’o tei ha’aputuputu tāhō’ē mai ia ’outou iho i tō’u nei i’oa, ’oia ’o Iesu Mesia te Tamaiti a te Atua ora, te Fa’aora o te ao nei, nō te mea ’ua ti’aturi ’outou i tō’u nei i’oa ’e ’ua ha’apa’o ho’i i tā’u nei mau fa’auera’a.

2 Tē parau fa’ahou atu nei au ia ’outou na, ’a ha’apa’o mai ’e ’a fa’aro’o mai ’e ’a auraro ho’i i te ture tā’u e hōro’a atu ia ’outou na.

3 Nō te mea ’oia mau, tē parau atu nei au, i ha’aputuputu na ho’i ’outou ia ’outou iho i te vāhi hō’ē mai te au i te fa’auera’a tā’u i fa’aue atu ia ’outou na, ’e ’ua tāhō’ē ho’i ’outou nō ni’a i teie mea hō’ē nei, ’e ’ua ani atu ho’i i te Metua nā roto i tō’u nei i’oa, ’e e nā reira ho’i ’outou i te fāri’i mai.

4 Inaha, ’oia mau tē parau atu nei au ia ’outou na ē, tē hōro’a atu nei au i teie fa’auera’a mātāmua ia ’outou, ’ia haere atu ’outou nā roto i tō’u nei i’oa, ’o ’outou tāta’itahi, ’eiaha rā tō’u nā tāvini ra ’o Iosepha Semita, tamaiti, ’e Sidney Rigdon.

5 ’E tē hōro’a atu nei au i te hō’ē fa’auera’a ia rāua ’ia haere atu rāua nō te hō’ē tau poto noa, ’e e fa’a’itehia mai nā roto i te mana o te Vārua te taime e ti’a ai ia rāua ’ia ho’i mai.

6 ’E ’ia haere tāta’ipiti atu ’outou nā roto i te mana o tō’u nei Vārua, i te poro-haere-ra’a i tā’u nei ’evanelia nā roto i tō’u nei i’oa, i te fa’ateiteira’a i tō ’outou mau reo mai te ’oto o te pū ra, i te fa’a’itera’a atu i tā’u parau mai tā te mau melahi a te Atua ra.

7 ’E e haere ho’i ’outou ma te bāpetizo i te pape, i te nā-’ō-ra’a atu ē : ’A tātarahapa ’outou, ’a tātarahapa ’outou, tē fātata mai nei ho’i te bāsileia o te ao ra.

8 ’E mai teie nei vāhi atu ’outou i te haere i te mau vāhi i te tō’o’a o te rā ra ; ’e mai te mea e ’ite ’outou ia rātou ’o tē fāri’i mai ia ’outou na, e fa’atupu rahi ïa ’outou i tā’u nei ’ēkālesia i te mau vāhi ato’a—

9 Ē tae noa atu i te taime e fa’a’itehia mai ai ia ’outou nā ni’a mai, i te taime e fa’aineinehia ai te ’oire ra ’o Ierusalema ’Āpī, ’ia ti’a ia ’outou ’ia ha’aputuputuhia mai ’ei hō’ē, ’ia riro ’outou ’ei mau ta’ata nō’u nei, ’e e riro ho’i au ’ei Atua nō ’outou na.

10 ’E teie fa’ahou ā, tē parau atu nei au ia ’outou na, ’ia rave noa tō’u tāvini ra ’o Edward Partridge i te ’ohipa i roto i te tōro’a ’o tā’u i fa’ata’a nōna ra. ’E a muri a’era, mai te mea e hara ’oia ra, e fa’ata’ahia ïa te tahi ’ei mono nōna ra. ’Oia mau ïa. ’Āmene.

11 ’E tē parau fa’ahou atu nei au ia ’outou na ē, ’eiaha roa te hō’ē ta’ata ’ia haere atu e poro haere i tā’u nei ’evanelia, ’e ’aore rā ’ia fa’atupu rahi i tā’u nei ’ēkālesia, maori rā ’ia fa’atōro’ahia ’oia e te hō’ē ’o tei mau i te ha’amanara’a, ’e ’ua ’itehia ho’i e tō te ’ēkālesia ē e ha’amanara’a tōna ’e ’ua fa’atōro’a-ti’a-hia ho’i ’oia e te mau upo’o fa’atere nō te ’ēkālesia.

12 ’E teie fa’ahou ā, ’ia ha’api’i te mau peresibutero, te mau tahu’a, ’e te mau ha’api’i ho’i nō teie nei ’ēkālesia i te mau parau tumu nō tā’u nei ’evanelia, ’o tei fa’a’itehia i roto i te Bibilia ’e Te Buka a Moromona, ’e tei roto ho’i i te reira te ’īra’a o te ’evanelia.

13 ’E ’ia ha’apa’o rātou i te mau fafaura’a ’e te mau arata’ira’a a te ’ēkālesia ’e ’ia pe’e ho’i i te reira, ’e ’o teie ho’i tā rātou ra mau ha’api’ira’a, mai te au i tā te Vārua arata’ira’a ia rātou.

14 ’E e hōro’ahia atu te Vārua ia ’outou nā roto i te pure fa’aro’o ; ’e mai te mea ’aita ’outou e fāri’i i te Vārua, ’eiaha roa ïa ’outou e ha’api’i atu.

15 ’E e nā reira ’outou i te rave i teie nei mau mea ato’a mai te au i tā’u i fa’aue atu ia ’outou nō ni’a i tā ’outou ha’api’ira’a, ē tae noa atu i te taime e hōro’ahia atu ai te ’īra’a nō tā’u mau pāpa’ira’a mo’a.

16 ’E ’ia fa’ateitei mai ’outou i tō ’outou mau reo i ni’a nā roto i te Fa’aa’o, e a’o atu ïa ’outou ’e e tohu ho’i mai tei au iā’u nei ;

17 Inaha ho’i, ’ua ’ite te Fa’aa’o i te mau mea ato’a, ’e tē fa’a’ite pāpū mai ra ho’i i te parau nō te Metua ’e nō te Tamaiti.

18 ’E i teienei, inaha, tē parau atu nei au i tō te ’ēkālesia. ’Eiaha ’oe e taparahi i te ta’ata ; ’e ’o ’oia ’o tē taparahi i te ta’ata ra, e ’ore roa tāna hara e fa’a’orehia i teie nei ao, ’e ’aore ho’i i te ao a muri atu.

19 ’E teie fa’ahou, tē parau atu nei au ē, ’eiaha ’oe e taparahi i te ta’ata ; ’o ’oia rā ’o tē taparahi i te ta’ata ra, e pohe ïa ’oia.

20 ’Eiaha ’oe e ’eiā ; ’e ’o ’oia ’o tē ’eiā ’e ’aore e tātarahapa, e hurihia ïa i rāpae.

21 ’Eiaha ’oe e ha’avare ; ’o ’oia ’o tē ha’avare ’e ’aore e tātarahapa, e hurihia ’oia i rāpae.

22 E here ’oe i tā ’oe vahine fa’aipoipo ma tō ’ā’au ato’a, ’e e ’ati atu ho’i iāna ’e ’eiaha i te hō’ē ’ē atu.

23 ’E ’o ’oia ’o tē hi’o atu i te hō’ē vahine ma te fa’ahina’aro iāna ra, ’ua fa’aru’e ïa ’oia i te fa’aro’o, ’e e ta’a ’ē atu ho’i te Vārua iāna ; ’e mai te mea ē ’aita ’oia e tātarahapa, e hurihia ’oia i rāpae.

24 ’Eiaha ’oe e faaturi ; ’e ’o ’oia ’o tē fa’aturi e ’aore e tātarahapa, e hurihia ’oia i rāpae.

25 ’O ’oia rā ’o tē fa’aturi ’e ’ua tātarahapa ma tōna ’ā’au ato’a, ’e ’ua fa’aru’e roa ’oia i te reira, ’e ’aore ho’i i rave fa’ahou i te reira, e fa’a’ore ïa ’oe i tāna hara ;

26 Terā rā mai te mea e rave fa’ahou ’oia i te reira, ’aore ïa tāna hara e fa’a’orehia, e hurihia rā ’oia i rāpae.

27 ’Eiaha ’oe e parau fa’a’ino i tō ’oe ta’ata tupu, ’eiaha ho’i e hāmani ’ino iāna.

28 ’Ua ’ite ho’i ’oe i tā’u mau ture nō ni’a i teie nei mau mea ’o tei fa’a’itehia i roto i tā’u mau pāpa’ira’a mo’a ; ’o ’oia ’o tē rave i te hara ’e ’aore e tātarahapa, e hurihia ’oia i rāpae.

29 Mai te mea ē ’ua here ’oe iā’u nei, e tāvini ïa ’oe iā’u ’e e ha’apa’o ho’i i tā’u mau fa’auera’a ato’a.

30 ’E inaha, ’a ha’amana’o ’oe i te feiā veve, ’e ’a ha’amo’a i te tahi tufa’a nō tā ’oe mau tao’a ’ei tauturu nō rātou, nā roto i te hō’ē fafaura’a ’e te hō’ē parau mana ’o tē ’ore roa e ti’a ’ia ’ōfatihia.

31 ’E mai te mea e hōro’a atu ’outou i te hō’ē tufa’a nō tā ’outou tao’a i te feiā veve ra, tē nā reira ra ïa ’outou iā’u nei ; ’e e tu’uhia atu te reira i mua i te ’episekōpo nō tā’u nei ’ēkālesia ’e i tōna nā tauturu ho’i, nā peresibutero to’opiti, ’e ’aore rā nā tahu’a rahi, ’o tāna e mā’iti ’e ’aore rā ’o tāna i mā’iti na ’e i fa’ata’a ho’i nō taua ’ōpuara’a ra.

32 ’E a muri a’era, i muri iho i te tu’ura’ahia atu taua mau mea ra i mua i te ’episekōpo nō tā’u nei ’ēkālesia, ’e i muri iho i tōna fāri’ira’a i teie mau ’itera’a pāpū nō ni’a i te ha’amo’ara’a i te mau faufa’a a tā’u nei ’ēkālesia, e ’ore roa te reira e ti’a ’ia rave-’ē-hia atu mai roto atu i te ’ēkālesia, ’ia au i tā’u mau fa’auera’a, e fa’arirohia te ta’ata tāta’itahi i mua iā’u nei ’ei ti’a’au nō tāna iho faufa’a, ’e ’aore rā nō te mea ’o tāna i fāri’i nā roto i te ha’amo’ara’a, i tei au nōna iho ’e nō tōna iho ’utuāfare.

33 ’E teie fa’ahou ā, mai te mea ē tē vai ra te mau faufa’a i roto i te rima o te ’ēkālesia, ’e ’aore rā i tō te tahi mau melo nō te ’ēkālesia, ’o tei hau a’e i tei hina’arohia nō tō rātou orara’a, i muri a’e i te ha’amo’ara’a mātāmua ra, ’o tei riro ’ei toe’a ’ia ha’amo’ahia i te ’episekōpo ra, e tāpe’ahia te reira nō te hōro’a atu i te feiā i ’ere, i terā taime ’e i terā taime, ’ia noa’a i te ta’ata tāta’itahi ’o tei ’ere, i tei au nōna ’e ’ia fāri’i mai te au i tōna mau hina’aro.

34 Nō reira, e tāpe’ahia te toe’a o te mau faufa’a i roto i tā’u fare vaira’a tao’a, nō te ’ōpere atu nā te feiā veve ’e te feiā i ’ere, mai te au i tei fa’ata’ahia e te ’āpo’ora’a teitei nō te ’ēkālesia, ’e te ’episekōpo ’e tāna ra ’āpo’ora’a ;

35 ’E nō te ho’ora’a mai ho’i i te mau fenua ’ei maita’i nō tō te ’ēkālesia ato’a ra, ’e nō te patura’a i te mau fare ha’amorira’a, ’e nō te fa’ati’ara’a mai ho’i i te Ierusalema ’Āpī ra ’o tē heheuhia mai a muri atu ra—

36 ’Ia ha’aputuputuhia mai tō’u ra mau ta’ata i mā’itihia ’ei hō’ē i taua mahana ra ’ia haere atu vau i tō’u ra hiero. ’E tē rave nei au i te reira nō te fa’aorara’a i tō’u nei mau ta’ata.

37 ’E a muri a’era, ’o ’oia ’o tei rave i te hara ’e ’aore ho’i i tātarahapa, e hurihia ’oia i rāpae i te ’ēkālesia, ’e e ’ore roa ’oia e fāri’i fa’ahou i tāna i ha’amo’a nō te feiā veve ’e te feiā nava’i ’ore nō tā’u nei ’ēkālesia, ’oia ho’i, iā’u nei—

38 ’O ’outou ho’i i nā reira i te hō’ē taea’e iti ha’iha’i roa, ’ua nā reira mai ïa ’outou iā’u nei.

39 I te mea ho’i ē a muri a’era, e tupu mau ā te mau mea ato’a tā’u i parau nā roto i te vaha o tā’u ra mau peropheta ; nō te mea e ha’amo’a vau i te tahi tufa’a nō te mau faufa’a a te mau ’Ētene ’o tē fāri’i mai i tā’u nei ’evanelia nā te feiā veve o tō’u mau ta’ata nō te ’utuāfare o ’Īserā’ela.

40 ’E teie fa’ahou ā, ’eiaha ’outou ’ia te’ote’o i roto i tō ’outou ’ā’au ; ’eiaha ho’i ’ia fa’a’una’una rahi roa i tō ’outou mau ’ahu, ’ia riro rā te nehenehe o te reira ’ei nehenehe nō te ’ohipa a tō ’outou iho mau rima ;

41 ’E ’ia rave-mā-hia te mau mea ato’a i mua iā’u nei.

42 ’Eiaha ’outou e fa’atau noa ; nō te mea e ’ore roa ’oia ’o tē fa’aea ’ohipa ’ore noa e ’amu i te faraoa ’e e ’ore ho’i e ’ō’omo i te ’ahu o te feiā rave ’ohipa ra.

43 ’E te feiā ato’a ’o tē pohe i te ma’i i rotopū ia ’outou na, ’e ’o tē ’ere i te fa’aro’o ’ia fa’aorahia, ’āre’a rā ’o tē ti’aturi, e fa’a’amuhia rātou ma te marū ato’a, i te mau rā’au ri’i ’aihere ’e te mā’a marū, ’e ’eiaha ho’i te reira ’ia ravehia e te rima o te ’enemi ra.

44 ’E e anihia te mau peresibutero nō te ’ēkālesia, to’opiti ’e ’aore rā ’ia rahi atu ā, ’ia pure nō rātou ’e ’ia tu’u atu ho’i i tō rātou ra pu’e rima i ni’a iho ia rātou ra nā roto i tō’u nei i’oa ; ’e mai te mea e pohe rātou ra e pohe ïa rātou i roto iā’u nei ; ’e mai te mea e ora rātou ra e ora ïa rātou i roto iā’u nei.

45 ’Ia ora noa ’outou i pīha’i iho i te tahi ’e te tahi ma te here, ’e ’ia ’oto ho’i ’outou nō rātou ’o tei pohe, ’e ’ia rahi atu ā te ’otora’a nō rātou ’o tei ’ere i te ti’aturira’a nō te ti’afa’ahoura’a hanahana.

46 ’E a muri a’era, ’o rātou ’o tē pohe i roto iā’u nei, e ’ore roa ïa rātou e ’ite i te pohe, e riro ho’i ïa te reira ’ei mea au ia rātou ra.

47 ’E ’o rātou ’o tē ’ore e pohe i roto iā’u nei, e ’ati ho’i tō rātou, nō te mea e riro tō rātou pohe ’ei mea mamae.

48 ’E teie fa’ahou ā, a muri a’era, te ta’ata e fa’aro’o tōna iā’u nei ’ia fa’aorahia, ’e ’aore i fa’ata’ahia nō te pohe ra, e fa’aorahia ïa.

49 ’O ’oia e fa’aro’o tōna ’ia ’ite mata, e ’ite ïa.

50 ’O ’oia e fa’aro’o tōna ’ia fa’aro’o, e fa’aro’o ïa.

51 Te ta’ata piri’o’i e fa’aro’o tōna ia ’ōu’a, e ’ōu’a ïa.

52 ’E ’o rātou ho’i ’aore tō rātou e fa’aro’o ’ia rave i teie nei mau mea, ’āre’a rā ’ua ti’aturi iā’u nei, e mana ïa tō rātou ’ia riro ’ei mau tamari’i tamāroa nā’u nei ; ’e mai te mea ’aita rātou e ’ōfati i tā’u nei mau ture, e fa’a’oroma’i ïa ’outou i tō rātou ra mau paruparu.

53 ’Ia ti’a noa ’outou i te vāhi nō tō ’outou na ti’a’aura’a.

54 ’Eiaha ’outou e rave i te ’ahu o tō ’outou taea’e ; e ’aufau ’outou nō te mea tā ’outou i fāri’i nō ’ō mai i tō ’outou ra taea’e.

55 ’E ’ia hau a’e tei noa’a ia ’outou i tei au nō te pāturu ia ’outou iho, e hōro’a atu ïa ’outou i te reira i roto i tā’u fare vaira’a tao’a, ’ia ravehia ho’i te mau mea ato’a mai te au i tā’u i parau ra.

56 E ani mai ’outou, ’e e hōro’ahia atu tā’u nei mau pāpa’ira’a mo’a mai tā’u i fa’ata’a, ’e e fa’ahereherehia te reira ’ia ’ore ’ia fifi ;

57 ’E e mea ti’a ’ia tāpe’a noa ’outou i te parau nō ni’a i taua mau mea ra, ’e ’eiaha ho’i ’ia ha’api’i atu i te reira ē tae noa atu i te taime e fāri’i ai ’outou i te tā’āto’ara’a.

58 ’E tē hōro’a atu nei au i te hō’ē fa’auera’a ia ’outou ’ia ha’api’i atu i te reira i te mau ta’ata ato’a ; nō te mea e ha’api’ihia atu te reira i te mau nūna’a ato’a, te mau ’ōpū ato’a, te mau reo ato’a, ’e te mau ta’ata ato’a ho’i.

59 E rave ’outou i te mau mea tā ’outou i fāri’i, ’o tei hōro’ahia atu ia ’outou i roto i tā’u nei mau pāpa’ira’a mo’a ’ei ture, ’ia riro te reira ’ei ture nō te fa’aterera’a i tā’u nei ’ēkālesia ;

60 ’E ’o ’oia ’o tē ha’apa’o mai te au i teie nei mau mea, e fa’aorahia ïa, ’e ’o ’oia ’o tē ’ore e ha’apa’o i te reira, e fa’ahapahia ïa mai te mea e nā reira noa ’oia.

61 Mai te mea e ani mai ’outou, e fāri’i ïa ’outou i te heheura’a nā ni’a i te heheura’a, te ’ite nā ni’a i te ’ite, ’ia noa’a ia ’outou te ’ite i te mau parau ’aro ’e te mau mea hau ho’i—i te mau mea ’o tē fa’atupu mai i te ’oa’oa, ’e te mau mea ’o tē fa’atupu mai i te ora mure ’ore.

62 E ani mai ’outou, ’e e heheuhia mai ïa ia ’outou i te taime i ha’apa’ohia e au ra i te vāhi e patuhia ai te Ierusalema ’Āpī ra.

63 ’E inaha, a muri a’era e tonohia atu tō’u mau tāvini i te hiti’a o te rā ’e i te tō’o’a o te rā, i te pae apato’erau ’e i te pae apato’a ho’i.

64 ’E i teienei ā ho’i, ’ia ha’api’i ’oia ’o tē haere i te hiti’a o te rā, ia rātou ’o tē fa’afāriuhia mai ’ia horo i te tō’o’a o te rā, ’e ’ia nā-reira-hia ho’i nō te mau mea ’o tē tupu i ni’a i te ao nei, ’e nō te mau ’āmuira’a huna ho’i.

65 Inaha, e mea ti’a ia ’oe ’ia ha’apa’o i teie mau mea ato’a, ’e e rahi roa tā ’oe utu’a maita’i i reira ; nō te mea ’ua hōro’ahia atu ia ’outou ’ia ’ite i te mau parau ’aro nō te bāsileia, ’aita rā i hōro’ahia atu i tō te ao nei ’ia ’ite i te reira.

66 ’Ia ha’apa’o ’outou i te mau ture tā ’outou i fāri’i na ’e ’a ha’apa’o maita’i noa.

67 ’E i muri mai e fāri’i ’outou i te mau fafaura’a nō te ’ēkālesia, ’o tē nava’i nō te fa’atumu ia ’outou i’ō nei ’e i te Ierusalema ’Āpī ra.

68 Nō reira, ’o ’oia ’o tē ’ere i te pa’ari, ’ia ani mai ’oia iā’u, ’e nā’u e hōro’a atu iāna ma te pāto’i ’ore.

69 ’A poupou i tō ’outou ’ā’au ’e ’a ’oa’oa, nō te mea ’ua hōro’ahia ia ’outou na te bāsileia, ’oia ho’i, te mau tāviri nō te ’ēkālesia. ’Oia ïa. ’Āmene.

70 E noa’a i te mau tahu’a ’e te mau ha’api’i tā rātou ti’a’aura’a, mai tā te mau melo ato’a.

71 ’E mea ti’a i te ’utuāfare o nā peresibutero ’e ’aore rā o nā tahu’a rahi ’o tei fa’ata’ahia nō te tauturu i te ’episekōpo, ’ei tauturu i te mau mea ato’a ra, ’ia tauturuhia nā roto i te faufa’a ’o tei ha’amo’ahia i te ’episekōpo ra, ’ei maita’i nō te feiā veve, ’e nō te tahi atu ā mau ’ohipa, mai te au i tei fa’a’itehia i mua nei ;

72 ’E ’aore rā e fāri’i rāua i te ’aufaura’a ti’a nō tā rāua mau ’ohipa ato’a, te hō’ē ti’a’aura’a ānei ’e ’aore rā te tahi atu ā huru, mai te au i tei mana’ohia ’e ’aore rā i tei fa’aotihia e nā tauturu ’e e te ’episekōpo ho’i.

73 ’E te ’episekōpo ato’a, e fāri’i ’oia i te pāturura’a e au nāna, ’e ’aore rā i te hō’ē ’aufaura’a ti’a nō tāna mau ’ohipa ato’a i roto i te ’ēkālesia.

74 Inaha, ’oia mau tē parau atu nei au ia ’outou na, te mau ta’ata ato’a i rotopū ia ’outou na ’o tei ha’apae i tō rātou mau hoa fa’aipoipo nō te hara poroneia, ’oia ho’i, mai te mea e fa’a’ite pāpū mai rātou i mua ia ’outou, nā roto i te ’ā’au ha’eha’a ato’a ē e parau mau te reira, ’eiaha roa ïa ’outou e huri atu ia rātou i rāpae ia ’outou na ;

75 Terā rā, mai te mea e ’ite ’outou ē ’ua vaiiho te tahi mau ta’ata i tō rātou hoa fa’aipoipo nō te hara fa’aturi, ’e ’o rātou iho ho’i tei hapa, ’e tē ora noa ra tō rātou ra hoa fa’aipoipo, e hurihia atu ïa rātou i rāpae mai rotopū atu ia ’outou na.

76 ’E teie fa’ahou ā, tē parau atu nei au ia ’outou na, ’ia ara maita’i ’outou ’e ’ia ha’apa’o maita’i ho’i, ma te uiui māite ho’i, ’ia ’ore roa ’outou ’ia fāri’i i te reira huru ta’ata i rotopū ia ’outou na mai te mea ’ua fa’aipoipohia rātou ra ;

77 ’E mai te mea ē ’aita rātou i fa’aipoipohia, ’ia tātarahapa ïa rātou i tā rātou ra mau hara ato’a, ’e mai te mea ’aita, ’eiaha roa ïa ’outou e fāri’i ia rātou.

78 ’E teie fa’ahou ā, ’ia ha’apa’o te mau ta’ata ato’a nō teie nei ’ēkālesia a te Mesia i te mau fa’auera’a ’e te mau fafaura’a ho’i nō te ’ēkālesia.

79 ’E a muri a’era, mai te mea e taparahi te tahi mau ta’ata i rotopū ia ’outou na i te ta’ata, e tu’uhia atu ïa rātou ’ia ha’avāhia mai te au i te mau ture o te fenua ; nō te mea ’a ha’amana’o na ē ’aore tāna hara e ha’amatarahia ; ’e ’ia ha’apāpūhia te reira mai te au i te mau ture o te fenua.

80 ’E mai te mea e rave te hō’ē tāne ’e ’aore rā te hō’ē vahine i te hara fa’aturi, ’ia ha’avāhia ’oia, te tāne ’e ’aore rā te vahine, i mua i nā peresibutero to’opiti nō te ’ēkālesia, ’e ’aore rā ’ia rahi atu ā, ’e ’ia ha’apāpūhia te mau parau ato’a ’ei fa’ahapara’a iāna e nā ’ite to’opiti nō te ’ēkālesia iho, ’eiaha nō te ’enemi ; ’e ’ia rahi a’e i te piti o tē ’ite ra, e mea maita’i a’e ïa.

81 E fa’ahapahia rā ’oia te tāne ’e ’aore rā te vahine, nā roto i te vaha o nā ’ite to’opiti ; ’e e tu’u atu te mau peresibutero i te reira ’ohipa i mua i tō te ’ēkālesia, ’e e ’āfa’i tō te ’ēkālesia i tō rātou mau rima i ni’a ’ei fa’ahapara’a iāna, te tāne ’e ’aore rā te vahine, ’ia ha’avāhia rāua mai te au i te ture a te Atua.

82 ’E mai te mea e ti’a ’ia nā-reira-hia, ’ia tae ato’a mai te ’episekōpo i reira e ti’a ai.

83 ’E e nā reira noa ’outou i te ha’apa’o i te reira mau huru ’ohipa ato’a ’o tē tae mai i mua ia ’outou na.

84 ’E mai te mea e ’eiā haru te hō’ē tāne ’e ’aore rā te hō’ē vahine i te tao’a a vetahi ’ē ra, e tu’uhia atu ’oia i mua i te ture o te fenua.

85 ’E mai te mea e eiā te hō’ē tāne ’e ’aore rā te hō’ē vahine, e tu’uhia atu ’oia i mua i te ture o te fenua.

86 ’E mai te mea e ha’avare te hō’ē tāne ’e ’aore rā te hō’ē vahine, e tu’uhia atu ’oia i te ture o te fenua.

87 ’E mai te mea e rave te hō’ē tāne ’e ’aore rā te hō’ē vahine i te hō’ē ’ohipa ’ino noa atu te huru, e tu’uhia atu ’oia i te ture, ’oia te ture a te Atua ra.

88 ’E mai te mea e fa’ahapa mai tō taea’e ’e ’aore rā tō tuahine ia ’oe na, e ’āfa’i ïa ’oe iāna i te hō’ē vāhi ’ei reira ’ōrua ana’e ; ’e mai te mea e fā’i mai ’oia, ’ia hau ïa ’ōrua i reira.

89 ’E ’ia ’ore ’oia ’ia fā’i mai ra, e tu’u atu ïa ’oe iāna i mua i te ’ēkālesia, ’eiaha i te mau melo, i te mau peresibutero rā. ’E e ravehia te reira i roto i te hō’ē putuputura’a ’e ’eiaha i mua i tō te ao nei.

90 ’E mai te mea e fa’ahapa tō taea’e ’e ’aore rā tuahine i te ta’ata e rave rahi ra, ’ia fa’’ahapahia ’oia i mua i te ta’ata e rave rahi ra.

91 ’E mai te mea e fa’ahapa mai te hō’ē i te vāhi ta’ata ra, ’ia fa’ahapahia atu ïa ’oia i te vāhi ta’ata, ’ia ha’amā ’oia. ’E ’ia ’ore ’oia ’ia fā’i mai ra, e tu’uhia atu ’oia i mua i te ture a te Atua ra.

92 Mai te mea e fa’ahapa te hō’ē i te vāhi mo’emo’e ra, e fa’ahapahia ’oia, te tāne ’e ’aore rā te vahine, i te vāhi mo’emo’e, ’ia ti’a iāna, te tāne ’e ’aore rā te vahine, ’ia fā’i mai i te vāhi mo’emo’e i mua iāna, i te tāne ’e ’aore rā i te vahine, tāna, tā te tāne ’e ’aore rā tā te vahine, i fa’a’ino ra, ’e i te Atua ho’i, ’ia ’ore tō te ’ēkālesia ’ia parau fa’a’ino iāna, te tāne ’e ’aore rā te vahine.

93 ’E e nā reira ’outou i te fa’atere i te mau mea ato’a ra.