1 Mai te au i tā’u i fa’a’ite atu ia ’outou i roto i tā’u rata hou vau i fa’aru’e ai i tō’u vāhi, e pāpa’i atu ïa vau ia ’outou na i terā taime ’e i terā taime ’e e hōro’a atu vau ia ’outou i te hō’ē parau fa’a’ite nō ni’a i te mau parau tumu e rave rahi, i teienei e ha’amata fa’ahou ā vau i te parau tumu nō ni’a i te bāpetizora’a nō te feiā i pohe, nō te mea ’ua vai noa te reira parau tumu i roto i tō’u ferurira’a, ’e ’ua pūai a’e te ha’apāpūra’a o te reira i roto i tō’u mau mana’o, mai te taime ’a tāpapa-noa-hia ai au e tō’u mau ’enemi.

2 ’Ua pāpa’i au i te tahi mau parau iti nō te heheura’a ia ’outou nō ni’a i te hō’ē pāpa’i parau. E mau mana’o ri’i atu ā tō’u nō ni’a i teie nei ’ohipa, ’o tā’u e fa’a’ite pāpū atu i teienei. ’Oia ho’i, ’ua fa’a’itehia na i roto i tā’u rata nā mua a’enei ē ’ia fa’ata’ahia te hō’ē pāpa’i parau e ti’a ai, nō te ’ite mata atu, ’e nō te fa’aro’o ato’a atu i tōna iho tari’a, ’ia ti’a iāna ’ia pāpa’i i te pāpa’a parau nō te parau mau i mua i te Fatu.

3 I teienei, nō ni’a i teie nei ’ohipa, e riro ïa ’ei mea fifi roa i te pāpa’i parau hō’ē ’ia tae atu nō te ha’apa’o i te ’ohipa i te mau taime ato’a, ’e ’ia rave i te mau ’ohipa ato’a. Nō te fa’a’ore i teie fifi, e mea maita’i ïa ’ia fa’ata’ahia te hō’ē pāpa’i parau i roto i te pāroita tāta’itahi nō te ’oire, ’o tei ’ite maita’i i te ’ohipa nō te pāpa’i i te mau minuti ; ’e ’ia ha’apa’o maita’i ’oia i te pāpa’ira’a i te mau ’ohipa ato’a, ma te fa’a’ite i roto i tāna pāpa’a parau ē ’ua ’ite tōna nā mata, ’e ’ua fa’aro’o ho’i tōna iho nā tari’a, i te fa’a’itera’a mai i te tai’o mahana, ’e te mau i’oa, ’e te mau mea ato’a, ’e te tuatāpapara’a tā’āto’a o te ’ohipa ; i te fa’a’itera’a ato’a i te i’oa o nā pu’e ta’ata to’otoru ’o tei tae mai, mai te mea e ta’ata tō reira, ’o tē ti’a ’ia fa’a’ite pāpū i taua ’ohipa ra mai te mea e tītauhia rātou ’ia nā reira, ’ia ha’apāpūhia te mau parau ato’a nā roto i te vaha o nā ’ite to’opiti ’e ’aore rā to’otoru.

4 ’Ei reira, ’ia fa’ata’ahia te hō’ē pāpa’i parau rahi nō te ’ēkālesia tā’āto’a, ’e ’ia hōro’ahia atu teie mau pāpa’a parau ’ē atu iāna, ma te parau fa’a’ite i ni’a a’e i tō rātou iho tārimara’a, i te fa’a’ite-pāpū-ra’a ē, e parau mau roa te mau pāpa’a parau tā rātou i pāpa’i. ’Ei reira e ti’a ai i te pāpa’i parau rahi nō te ’ēkālesia tā’āto’a ’ia pāpa’i i taua pāpa’a parau ra i roto i te buka rahi nō te ’ēkālesia tā’āto’a, ’e te mau parau fa’a’ite ’e te i’oa o te mau ’ite, ’e tāna iho parau fa’a’ite ē tē ti’aturi nei ’oia ē, e parau mau te mau parau fa’a’ite ’e te mau pāpa’a parau i ni’a, nō tōna ’ite i te huru ’e te fa’ata’ara’a ho’i o taua mau ta’ata ra nā te ’ēkālesia. ’E ’ia oti teie mau mea i te pāpa’ihia i roto i te buka rahi nō te ’ēkālesia tā’āto’a, e riro ïa te reira pāpa’a parau ’ei mea mo’a, ’e e fa’arirohia ïa i te ’ōro’a ’ei mea pāpū maita’i mai te mea ra ē, ’ua ’ite mata ’oia ’e ’ua fa’aro’o tōna iho tari’a, ’e ’ua pāpa’i ho’i i te pāpa’a parau nō te reira i roto i te buka rahi nō te ’ēkālesia tā’āto’a.

5 E mana’o paha ’outou e mea ’eta’eta roa teie huru ha’apa’ora’a i te mau mea ato’a ; terā rā, e fa’a’ite atu vau ia ’outou ē nō te ha’apa’o ïa te reira i te hina’aro o te Atua, nā roto i te ha’apa’ora’a i te ’ōro’a ’e te fa’aineinera’a tā te Fatu i fa’ata’a ’e i fa’aineine hou roa te fa’atumura’a o te ao nei, nō te fa’aorara’a o te feiā i pohe ’o tē pohe ma te ’ite ’ore i te ’evanelia.

6 ’E teie fa’ahou ā, tē hina’aro nei au ia ’outou ’ia ha’amana’o ē, tē feruri ra ho’i Ioane te Heheu Parau i teie iho ’ohipa nō te feiā i pohe, ’a parau mai ai ’oia, mai te au i tā ’outou e ’ite ē tei pāpa’ihia i roto i te Apokalupo 20:12—E ’ite atu ra ho’i au i tei pohe ra, ’o te ta’ata ri’i, ’e te feiā rarahi, i te ti’ara’a i mua i te Atua ra ; ’e heua ihora nā buka ra : ’e heua ihora ho’i te tahi buka, ’oia te buka ora ra : ’e ha’avāhia ihora taua feiā i pohe ra i te mau parau i pāpa’ihia i roto i taua nā buka ra, i tā rātou ra mau ’ohipa.

7 E ’ite ’outou i roto i teie parau i fa’ahitihia ē ’ua tātarahia te mau buka ; ’e ’ua tātarahia te tahi atu ā buka, ’o te buka ïa nō te ora ; terā rā ’ua ha’avāhia te feiā i pohe nā roto i te mau mea i pāpa’ihia i roto i te mau buka, mai te au i tā rātou mau ’ohipa ; nō reira, ’o te mau buka i parauhia ra, e mea pāpū roa ’o te mau buka ïa tei roto i te reira te pāpa’a parau nō tā rātou mau ’ohipa, ’e ’o te mau pāpa’a parau ïa i ha’apa’ohia i ni’a i te fenua nei. ’E te buka i parauhia te buka nō te ora, ’o te pāpa’a parau ïa ’o tei ha’apa’ohia i te ao ra ; ’ua ti’a mau ho’i te parau tumu i te mau ha’api’ira’a tumu ’o tei fa’auehia atu ia ’outou i roto i te heheura’a i roto i te rata tā’u i pāpa’i atu ia ’outou hou vau i fa’aru’e atu ai i tō’u vahi—’oia ho’i, nā roto i tā ’outou mau pāpa’ira’a, e pāpa’i-ato’a-hia te pāpa’a parau i te ao ra.

8 I teienei, te huru nō teie nei ’ōro’a tei roto ïa i te mana nō te autahu’ara’a, nā roto i te heheura’a a Iesu Mesia, tei fa’ati’a mai ’e ’o tā ’outou e ha’amau i ni’a i te fenua nei e ha’amau-ato’a-hia ïa i te ao ra, ’e ’o tā ’outou e ha’amatara i ni’a i te fenua nei, e ha’amatara-ato’a-hia ïa i te ao ra. ’E ’aore rā, nā roto i te tahi atu mau parau, nō te tahi atu huru ferurira’a nō te ’īritira’a, ’o tā ’outou e pāpa’i i ni’a i te fenua nei, e pāpa’ihia ïa i te ao ra, ’e ’o tā ’outou e ’ore e pāpa’i i ni’a i te fenua nei, e ’ore ato’a ïa e pāpa’ihia i te ao ra ; nō te mea nō roto mai i te mau buka tō ’outou feiā i pohe ra e ha’avāhia ai, ’ia au i tā rātou iho ’ohipa, mai te mea ra ē nā rātou iho i rave i tō rātou iho mau ’ōro’a ’a ora noa ai rātou i ni’a i te fenua nei, ’e ’aore rā nā roto i te rāve’a a tō rātou iho mau ta’ata ha’apa’o, mai te au i te ’ōro’a tā te Atua i fa’aineine ’ei fa’aorara’a nō rātou, hou te fa’atumura’a o te ao nei, mai te au ho’i i te mau pāpa’a parau tā rātou i ha’apa’o nō tō rātou feiā i pohe ra.

9 E feruri paha te tahi mau ta’ata ē e ha’api’ira’a tumu taiā ’ore mau tā tātou e parau nei—’oia ho’i, nō ni’a i te hō’ē mana ’o tē pāpa’i nei ’e ’aore rā ’o tē ha’amau nei i ni’a i te fenua nei ’e ’o tē ha’amau nei i te ao ra. Noa atu i te reira, i roto i te mau tau ato’a nō te ao nei, i te mau tau ato’a tā te Fatu i hōro’a mai i te tau tu’ura’a nō te autahu’ara’a i te hō’ē ta’ata nā roto i te heheura’a mau, ’e ’aore rā i te tahi pupu ta’ata, ’ua hōro’a-ato’a-hia mai teie nei mana. Nō reira, te mau mea ato’a tā taua mau ta’ata ra i rave nā roto i te ha’amanara’a, i roto i te i’oa nō te Fatu, ’e ’ua rave ho’i i te reira ma te parau mau ’e te ti’a, ’e ’ua ha’apa’o i te pāpa’a parau ti’a ’e te parau mau nō taua ’ohipa ra, ’ua riro ho’i ïa te reira ’ei ture i ni’a i te fenua nei ’e i te ao ra, ’e ’aore roa e ti’a ’ia fa’a’orehia atu, mai te au i te mau fa’auera’a mana a Iehova rahi. E parau mau roa teie nei parau. ’O vai tē ti’a ’ia fa’aro’o mai i te reira ?

10 ’E teie fa’ahou ā, nō ni’a i te mau mea i nā mua a’enei, ’a hi’o i te Mataio 16:18, l9 : E parau ato’a atu vau ia ’oe, ’O Petero ’oe, ’e ’ei ni’a iho i teie nei papa e patu ai au i tā’u ’ēkālesia ; ’e e ’ore roa ïa e noa’a i te ’ūputa o hade. ’E e hōro’a atu ho’i au i te mau tāviri o te bāsileia o te ao ra ia ’oe, ’e tā ’oe e ha’amau i raro nei, e ha’amau-ato’a-hia ïa i te ao ; ’e tā ’oe e tu’u i raro nei, e tu’u-ato’a-hia ïa i te ao.

11 I teienei te parau ’aro faufa’a rahi nō te ’ohipa tā’āto’a, ’e te faufa’a mau nō te ha’api’ira’a tā’āto’a i mua ia tātou nei, ’o tē fāri’ira’a ïa i te mau mana nō te Autahu’ara’a Mo’a. Nō te ta’ata tei hōro’ahia atu iāna teie nei mau tāviri ’aore ïa e fifi ’ia fāri’i mai i te ’ite nō ni’a i te fa’aorara’a i te mau tamari’i a te ta’ata nei, nō te feiā i pohe ’e nō te mau ta’ata ato’a ho’i e ora noa nei.

12 Tei roto i teie mea te hanahana ’e te tura, ’e te tāhuti ’ore ’e te ora mure ’ore ho’i—Te ’ōro’a nō te bāpetizora’a i te pape, ’ia utuhihia ho’i i roto i te reira ’ei fa’aaura’a i te huru nō tei pohe ra, ’ia au ho’i te hō’ē parau tumu i te tahi ’ē atu ; ’ia utuhihia i roto i te pape ’e ’ia haere mai i rāpae i te pape ’ua au ïa i te huru nō te ti’afa’ahoura’a mai o tei pohe ra i te haerera’a mai i rāpae i tō rātou ra mau mēnema ; nō reira, ’ua ravehia teie nei ’ōro’a ’ia riro ’ei fa’aaura’a i te ’ōro’a nō te bāpetizora’a nō tei pohe ra, nō te mea ’ua au ïa i te huru nō tei pohe ra.

13 Nō reira, ’ua ha’amauhia te vāhi bāpetizora’a ’ei fa’ahōho’a ra’a nō te mēnema, ’e ’ua fa’auehia ’ia tu’uhia atu te reira i roto i te hō’ē vāhi i raro a’e i te vāhi tā te mau ta’ata ora e ha’aputuputu mai, nō te fa’a’ite i te feiā e ora nei ’e te feiā i pohe ato’a na, ’e nō te fa’a’ite ato’a ē, tē vai nei te hōho’a nō te mau mea ato’a, ’e e au te tahi i te tahi—e au ho’i te mau mea nō te fenua nei i te mau mea i te ao ra, mai te au i tā Paulo i fa’a’ite mai, Korinetia I, 15:46, 47, ’e te 48 :

14 ’Aita rā i nā mua te tino vārua ra, ’o te tino ta’ata rā ; ’e muri a’era ’o te tino vārua ïa. E repo te ta’ata mātāmua, nō te fenua ; ’āre’a te piti o te ta’ata, ’o te Fatu ïa nō te ra’i mai. ’O tō te repo nei, mai tō te repo ato’a ra rātou : ’o tō te ra’i ra, mai tō te ra’i ato’a ra rātou. ’E mai te mau pāpa’a parau i ni’a i te fenua nei nō tō ’outou feiā i pohe ra, ’o tei pāpa’i-ti’a-hia ra, mai te reira ato’a ïa te mau pāpa’a parau i te ra’i ra. Nō reira, ’o teie ho’i ïa te mana nō te tā’atira’a ’e te ha’amaura’a, ’e i te hō’ē huru ferurira’a nō te parau, ’o te mau tāviri ïa nō te bāsileia, tei roto ho’i i te reira mau mea te tāviri nō te ’ite.

15 ’E i teienei, e au mau taea’e here e au mau tuahine here rahi, tē ha’apāpū atu nei au ia ’outou ē, e mau ha’api’ira’a tumu teie nō ni’a i te feiā i pohe ’e te feiā ato’a e ora nei ’o tē ’ore roa e ti’a ’ia ha’apa’o-’ore-hia, nō ni’a i tō tātou fa’aorara’a. Nō te mea ē ’ua tītauhia tō rātou fa’aorara’a nō tō tātou ato’a fa’aorara’a, mai te au i tā Paulo i parau mai nō ni’a i te mau metua—e ’ore e noa’a te maita’i rahi roa ia rātou ’ia ’ore tātou nei, e ’ore ato’a tātou e maita’i roa ’ia ’ore tō tātou feiā i pohe ra.

16 ’E i teienei, nō ni’a i te bāpetizora’a nō te feiā i pohe ra, e hōro’a atu vau ia ’outou i te tahi atu ā parau i fa’ahitihia e Paulo, Korinetia I, 15:29 : ’aore rā, e aha ihora te feiā i bāpetizohia nō te feiā i pohe ra, ’ia ’ore roa te feiā i pohe ra ’ia ti’afa’ahou ? E aha ihora rātou i bāpetizohia ai nō tei pohe ra ?

17 ’E teie fa’ahou ā, nō te ’āpitira’a atu i teie parau i fa’ahitihia, e hōro’a atu vau ia ’outou i te hō’ē parau i fa’ahitihia e te hō’ē o te mau peropheta, ’o tei māna’ona’o noa nō ni’a i te fa’aho’ira’a mai o te autahu’ara’a, ’e te mau hanahana ’o tē heheuhia mai i te mau mahana hope’a nei, ’e i fa’atanohia atu ho’i ma te pāpū roa i ni’a i te parau hanahana roa a’e i te mau parau ato’a nō te ’evanelia mure ’ore, ’oia ho’i te bāpetizora’a nō te feiā i pohe, nō te mea tē nā ’ō ra Malaki i roto i te pene hope’a, ’e te ’īrava pae ’e te ono : Inaha, e tono atu vau i te peropheta ra ia Eliaha ia ’outou na, hou te taera’a mai o te mahana rahi ’e te mata’u o Iehova : ’Ia fa’afāriu ’oia i te ’ā’au o te mau metua i te mau tamari’i, ’e te ’ā’au o te mau tamari’i i tō rātou mau metua, ’o te haere mai ho’i au e tā’iri i te fenua nei i te ’anatemara’a.

18 ’Ua nehenehe paha iā’u ’ia hōro’a atu i te hō’ē ’īritira’a māramarama a’e i teie, terā rā ’ua nava’i te māramarama nō te reira i teienei nō te fa’a’ite i te mea tā’u i hina’aro ’ia vaiiho-noa-hia mai te reira i teienei. ’Ua nava’i ïa ’ia ’ite ē e ’anatemahia te fenua nei maori rā ’ia vai noa mai te hō’ē ’ave fifi tū’atira’a mai te reira te huru i rōpū i te mau metua ’e te mau tamari’i, nō ni’a i te tahi tumu parau ’e ’aore rā i te tahi ’ē atu ra—’e inaha e aha ïa taua tumu parau ra ? ’O te bāpetizora’a ïa nō te feiā i pohe. Nō te mea ’ia ’ore rātou, e ’ore roa e ti’a ia tātou ia ha’amaita’i-roa-hia ; e ’ore ato’a ho’i rātou e ha’amaita’i-roa-hia ’ia ’ore tātou nei. E ’ore roa ho’i e ti’a ia rātou ’e ’aore rā ia tātou nei ’ia ha’amaita’i-roa-hia ’ia ’ore rātou ’o tei pohe ato’a atu i roto i te ’evanelia ; nō te mea ’ua tītauhia ïa nō te ha’amatara’a o te tau tu’ura’a ’evanelia nō te ’īra’a o te mau tau ato’a ’e tē ha’amata nei te reira tau tu’ura’a ’evanelia i teienei, ’ia fa’atupuhia te tāhō’ē-maita’i-roa-ra’a o te mau tau tu’ura’a ’evanelia, ’e te mau tāviri, ’e te mau mana, ’e te mau hanahana, ’e ’ia heheuhia mai ho’i, mai te mau mahana nō Adamu ē tae roa mai i teie ’anotau nei. ’E e ’ere ho’i teie ana’e, ’o taua mau mea ato’a rā ’o tei ’ore ā i heheuhia mai mai te fa’atumura’ahia mai ā o te ao nei, ’ua huna-’ē-hia rā i te feiā pa’ari ’e te ’ite ra, e heheuhia mai ïa i te mau tamari’i ri’i ’e te mau ’aiū i roto i teie, ’oia te tau tu’ura’a ’evanelia nō te ’īra’a o te mau tau.

19 I teienei, e aha tā tātou e fa’aro’o nei i roto i te ’evanelia tā tātou i fāri’i ? Te hō’ē reo nō te ’oa’oa ! Te hō’ē reo nō te aroha mai te ra’i mai ; ’e te hō’ē reo nō te parau mau nō roto mai i te fenua nei ; te mau parau ’āpī ’oa’oa nō te feiā i pohe ra ; te hō’ē reo ’oa’oa nō te feiā e ora nei ’e nō tei pohe ho’i ; te mau parau ’āpī ’oa’oa nō te poupou rahi. ’Auē te nehenehe o te mau ’āvae i ni’a i te mau mou’a nō rātou ’o tei hōpoi mai i te mau parau ’āpī ’oa’oa nō te mau mea maita’i, ’e ’o tei parau mai ia Ziona ē : Inaha, tē fa’atere ari’i nei tō ’outou Atua ! Mai te hupe i Karemela, mai te reira ato’a te ’ite nō te Atua i te ma’irira’a mai i ni’a ia rātou ra !

20 ’E teie fa’ahou ā, e aha tā tātou e fa’aro’o nei ? ’O te mau parau ’āpī ’oa’oa ïa nō Kumora mai ! ’O Moroni, ’o te hō’ē melahi nō te ra’i mai, i te fa’a’itera’a mai i te fa’atupura’a i tā te mau peropheta—te buka ’o tē heheuhia mai. Te reo o te Fatu i roto i te mēdēbara nō Fayette, i te mata’eina’a nō Seneca ra, i te fa’a’itera’a mai ē e fa’a’ite nā ’ite to’otoru i te parau nō te buka ! Te reo nō Mihaela i te pae pape nō Susquehanna ra, i te ’itera’a mai i te diabolo ’a fā mai ai ’oia mai te hō’ē melahi nō te māramarama ra ! Te reo o Petero, Iakobo, ’e Ioane i roto i te mēdēbara i rōpū i te ārea nō Harmony, i te mata’eina’a nō Susquehanna, ’e Colesville, i te mata’eina’a Broome, i te pae ’ānāvai nō Susquehanna, i te fa’a’itera’a mai ē tē mau ra rātou i te mau tāviri nō te bāsileia, ’e nō te tau tu’ura’a ’evanelia nō te ’īra’a o te mau tau ra !

21 ’E teie fa’ahou ā, te reo o te Atua i roto i te piha nō te ta’ata pa’ari ra ’o Whitmer metua, i Fayette, i te mata’eina’a nō Seneca, ’e i te tahi atu ā mau taime, ’e i te tahi mau vāhi ho’i nā roto i te mau haerera’a ato’a ’e te mau ’ati nō teie Te ’Ēkālesia a Iesu Mesia i te Feiā Mo’a i te mau Mahana Hope’a nei ! ’E te reo o Mihaela, te melahi rahi ; te reo o Gabariela, ’e tō Raphaela, ’e tō te tahi atu ā mau melahi mai ia Mihaela, ’oia ho’i ’o Adamu, ē tae noa mai i teie nei ’anotau, ’o rātou ato’a i te fa’a’itera’a mai i tō rātou iho tau tu’ura’a ’evanelia, tō rātou mau ti’ara’a, tā rātou mau tāviri, tō rātou mau tura, tō rātou ti’ara’a teitei ’e te hanahana, ’e te mana nō tō rātou autahu’ara’a ; i te fa’a’itera’a mai i te rēni parau i ni’a i te rēni parau, te a’o nā ni’a iho i te a’o ; te tahi vāhi iti i’ō nei, ’e te tahi vāhi iti i ’ō atu ; i te fa’a’itera’a mai i te parau tāmāhanahana nā roto i te fa’a’itera’a mai i te mau mea ’o tē tae mai ra, i te ha’apāpūra’a mai i tō tātou ti’aturira’a !

22 E au mau taea’e ē, e ’ere ānei i te mea ti’a ia tātou ’ia haere ā i roto i te hō’ē ’ohipa rahi roa mai teie te huru ? ’A haere i mua ’e ’eiaha e haere i muri. ’A rohi, e au mau taea’e ē ; ’a haere ā, ’a haere ā ē tae roa i te upō’ōti’ara’a ! ’Ia ’oa’oa tō ’outou ’ā’au, ’e ’ia ’oa’oa rahi roa. ’Ia tupu mai te reo hīmene o te fenua nei. ’Ia parau mai te feiā i pohe ra i te mau hīmene nō te ’āruera’a mure ’ore i te Ari’i ra ’o Imanuela, ’o tei fa’atōro’a mai, hou te ao nei i vai mai ai, i taua mau mea ra ’o tē fa’ati’a mai ia tātou ’ia fa’aora mai ia rātou mai roto mai i tō rātou fare tāpe’ara’a ; ’e ’ia fa’ati’amāhia ïa te feiā mau ’āuri ra.

23 ’Ia tuō mai ho’i te mau mou’a nō te ’oa’oa, ’e ’outou e te mau peho ’a pi’i mai ma te reo pūai ; ’e ’outou e te mau miti ’e te mau fenua marō ’a fa’a’ite mai i te mau mea māere nō tō ’outou Ari’i mure ’ore ! ’E ’outou e te mau ’ānāvai, ’e te mau tahera’a pape, ’e te mau atavai, ’a tahe noa mai i raro ma te ’oa’oa. ’Ia ’ārue te mau uru rā’au ’e te mau tumu rā’au nō te ’āua i te Fatu ; ’e ’outou e te mau mato pa’ari ’a ta’i nō te ’oa’oa ! ’E ’ia hīmene ’āmui mai te mahana, te ’āva’e, ’e te mau feti’a po’ipo’i, ’e ’ia tuō mai te mau tamari’i tamāroa ato’a a te Atua nō te ’oa’oa rahi ! ’E ’ia fa’a’ite noa mai te mau mea mure ’ore ato’a i hāmanihia i tōna ra i’oa ē a muri ē a muri noa atu ! ’E tē parau fa’ahou atu nei au ē, ’auē ho’i ïa te hanahana rahi o te reo tā tātou e fa’aro’o nei nō te ra’i mai, i te porora’a mai i roto i tō tātou mau tari’a, te hanahana, ’e te fa’aorara’a, ’e te tura, ’e te tāhuti ore, ’e te ora mure ’ore ; te mau bāsileia, te mau hau hui ari’i, ’e te mau mana !

24 Inaha, ’ua fātata mai te mahana rahi o te Fatu ; ’e ’o vai tē ti’a ’ia fa’a’oroma’i i te mahana nō tōna taera’a mai, ’e ’o vai tē ti’a ’ia ti’a noa mai ’ia fā mai ’oia ? ’Ua au ho’i ’oia i te auahi a te ta’ata tāmā ra, ’e mai te pu’a tāmāra’a ; ’e e pārahi ’oia mai te ta’ata tāmā ’e te ta’ata tāmā ’ārio, ’e e tāmā ’oia i te mau tamaiti a Levi, ’e e tāmā ho’i ia rātou mai te ’auro ’e te ’ārio, ’ia ti’a ia rātou ’ia pūpū atu i te ō i te Fatu nā roto i te parauti’a. Nō reira, ’ia pūpū atu tātou, ’oia te ’ēkālesia ’e te mau ta’ata, ’e te feiā mo’a i te mau mahana hope’a nei, i te ō i te Fatu nā roto i te parauti’a ; ’e ’ia pūpū atu tātou i roto i tōna hiero mo’a, ’ia oti te reira, te hō’ē buka tei roto i te reira te mau pāpa’a parau nō tō tātou feiā i pohe ra, ’o tē ti’a ’ia fāri’i-tā’āto’a-hia.

25 E au mau taea’e ē, e rave rahi tā’u mau mea e hina’aro nei i te parau atu ia ’outou nō ni’a i teie nei tumu parau ; terā rā e fa’aoti au i te parau i teienei, ’e e parau fa’ahou atu vau nō ni’a i taua tumu parau ra i te tahi ’ē atu taime. E riro noa vau nei ’ei tāvini ha’eha’a nō ’outou ’e ’ei hoa ’āueue ’ore i teienei ’e i te mau taime ato’a.