1 ^aKam̧m̧oolol ej n̄an etam̧, O Irooj Anij in Israel, eo ej kōjparok ^bbujen im kwaļo̧k tūriam̧o n̄an ro rikarejeram̧ im rej etetal jim̧we Im̧aam, kōn aolepān burueer—

2 Kwaar eo Kwaar jiron̄ ro rikarejeram̧ n̄an ^akalōk m̧wiin n̄an Etam̧ ilo jikin in [Kirtland].

3 Im kiiō Kwōj lo, O Irooj, bwe ro rikarejeram̧ raar kōm̧m̧an ekkar n̄an kien eo Am.

4 Im kiiō kōmij kajjitōk Ippam̧, Jemām Ekwōjarjar, ilo etan Jisōs Kraist, eo Nejūm̧ jān ubōm̧, im eo ilo Etan wōt lo̧mo̧o̧r emaron̄ ilo̧k n̄an ro nejin armej raņ, kōmij kajjitōk Ippam̧, O Irooj, n̄an bōk ^am̧wiin, ^bjerbal mejādik an pā ko peim, ro karejeram̧, eo kar jiron̄ kōm n̄an kalōke.

5 Bwe Kwo jeļā bwe kōm ar kōm̧m̧ane jerbal in delm̧ae eļap en̄taan; im jān jeram̧ōl eo am kōm ar liļo̧k men ko mweiōm n̄an kalōk juon ^aem̧ n̄an Etam̧, bwe Nejin Armej en maron̄ wōr juon jikin n̄an kwaļo̧k E n̄an armej ro doon.

6 Im āinwōt am kar ba ilo juon ^arevelesōn, eo kar letok n̄an kōm, ān̄inn̄in kōm ro jeram̧, im ba—Kūr kwelo̧k ekwōjarjar eo ami, āinwōt Iaar jiron̄ kom̧;

7 Im āinwōt aolep ejjeļo̧k aer tōmak, kom̧in kappukot ilo laļn̄ijn̄ij im katakin doon naaj ko in mālōtlōt; aaet, kom̧in kappukot jān bok ko rem̧m̧antata naan ko in mālōtlōt, kappukot jeļā em̧ool jān ekkatak im barāinwōt jān tōmak;

8 Ko̧koņ kom̧; kōpooj mennin aikuj dikdik otemjeļo̧k, im kajutak juon em̧, em̧ool juon im̧ōn jar, juon im̧ōn jitlo̧k, juon im̧ōn tōmak, juon im̧ōn ekkatak, juon im̧ōn aiboojoj, juon im̧ōn koņ, juon im̧ōn Anij;

9 Bwe deļo̧n̄tok ko ami ren maron̄ ilo etan Irooj, bwe diwōjļo̧k ko ami ren maron̄ ilo etan Irooj, bwe aolep iakiakwe ko ami ren maron̄ ilo etan Irooj, kōn pā ko relōn̄jak n̄an eo Eutiejtata—

10 Im kiiō, Jemām Ekwōjarjar, kōmij kajjitōk Ippam̧ n̄an jipan̄ kōm, armej ro Am̧, kōn Am̧ jouj, ilo kūri kwelo̧k ekwōjarjar in am, bwe en maron̄ kōm̧m̧an n̄an utiej eo Am̧ im n̄an Am̧ bōk e ijo ilan̄;

11 Im ilo jekjek eo im maron̄ lo kōm ro retōllo̧ke, ilo m̧aan Mejam̧, n̄an bōke kūrm̧ool eo an ^akallim̧ur ko Kwaar kōm̧m̧ani n̄an kōm, armej ro Am̧, ilo revelesōn ko kar litok n̄an kōm;

12 Bwe Am̧ ^aaiboojoj en maron̄ wanlaļtak ioon armej ro Am̧, im ioon m̧wiin Im̧ōm, eo kōmij kiiō ajewaj n̄an Eok, bwe en maron̄ jenolo̧k im makeļo̧k n̄an an ekwōjarjar, im bwe ekwōjarjar eo Am̧ en maron̄ pād wōt ilo m̧wiin;

13 Im bwe aolep armej ro renaaj deļo̧n̄ ilo im̧aan kōjām eo an m̧wiin im̧ōn Irooj ren maron̄ en̄jake kajoor eo Am̧, im en̄jake aikuj eo n̄an kile bwe Kwaar kokwōjarjar e, im bwe ej Im̧ōm m̧wiin, juon jikin ekwōjarjar eo Am̧.

14 Im Kwōn kōtļo̧k, Jemām Ekwōjarjar, bwe aolep ro renaaj kabun̄-jar ilo m̧wiin ren maron̄ katakin er naan ko in mālōtlōt jān bok ko rem̧m̧antata, im bwe ren maron̄ kappukot jeļā em̧ool jān ekkatak, im barāinwōt jān tōmak, āinwōt Kwaar ba;

15 Im bwe ren maron̄ eddekļo̧k ilo Kwe, im bōk tarlep in Jetōb Kwōjarjar, im ren ko̧koņ er ekkar n̄an kien ko Am̧, im ren pojak n̄an bōk aolep mennin aikuj otemjeļo̧k;

16 Im bwe m̧wiin ej juon im̧ōn jar, juon im̧ōn jitlo̧k, juon im̧ōn tōmak, juon im̧ōn aiboojoj im im̧ōn Anij, em̧ool Im̧ōm;

17 Bwe aolep deļo̧n̄tok ko an armej ro Am̧, ilo m̧wiin, ren maron̄ ilo etan Irooj;

18 Bwe aolep diwōjļo̧k ko aer jān im̧wiin ren maron̄ ilo etan Irooj;

19 Im bwe aolep iakiakwe ko aer ren maron̄ ilo etan Irooj, kōn pā ko rekwōjarjar, kotaki n̄an eo Eutiejtata;

20 Im bwe en ejjeļo̧k men ^aettoon naaj kōmālim n̄an an itok ilo m̧wiin Im̧ōm n̄an kattoone;

21 Im n̄e armej ro Am̧ rebōd, jabdewōt iaer, ren maron̄ m̧ōkaj im ukeļo̧k im ro̧o̧lwaj n̄an Eok, im lo jouj ilo iturin Mejam̧, im bar jepļaak n̄an kōjeraam̧m̧an ko me Kwaar kapit n̄an lutōkleplepļo̧k ioon ro renaaj ^akautiej Eok ilo m̧wiin Im̧ōm.

22 Im kōmij kajjitōk Ippam̧, Jemām Ekwōjarjar, bwe rein karejeram̧ ren maron̄ ilo̧k jān m̧wiin Im̧ōm pālpel kōn kajoor eo Am̧, im bwe Etam̧ en maron̄ pād ioer, im Am̧ aiboojoj en jepooļe er, im ^aenjeļ ro Am̧ en wōr aer eddo ioer;

23 Im jān jikin in ren maron̄ bōk men ko reļļap otem eļap im naan ko reaiboojoj, ilo m̧ool, n̄an ^ajem̧ļo̧k ko an laļ, bwe ren maron̄ jeļā bwe jerbal in ej Am̧, im bwe Kwaar erļo̧keļo̧k Peim, n̄an kakūrm̧ool men eo Kwaar kōnono kake jān lo̧n̄iin rikanaan ro, kōn raan ko āliktata.

24 Kōmij kajjitōk Ippam̧, Jemām Ekwōjarjar, n̄an katōt armej ro renaaj kabun̄-jar, im ilo kautiej dāpij juon āt im jutak em̧m̧an ilo m̧wiin Im̧ōm, n̄an aolep epepen ko im n̄an indeeo;

25 Bwe ejjeļo̧k kein tariņae ^aejaake ņae er enaaj tōprak; bwe e eo ej kūbwij juon ^bron̄ n̄an er enaaj wōtlo̧kļo̧k make ilo ejja ron̄ in wōt;

26 Im ejjeļo̧k kōttōbalbal in nana enaaj wōr an kajoor n̄an jebarlōn̄tak im ^aanjo̧ ioon armej ro Am̧ ro ioer ^bEtam̧ naaj likūti ilo m̧wiin;

27 Im eļan̄n̄e jabdewōt armej renaaj jutaklōn̄tak ņae armej rein, bwe illu eo Am̧ en urur ņae er;

28 Im eļan̄n̄e renaaj den̄ļo̧ke armej rein Kwōn kab den̄ļo̧ke er; Kwōn kab ire n̄an armej ro Am̧ āinwōt Kwaar kōm̧m̧ane ilo raan in pata, bwe ren maron̄ rōļo̧k jān pā ko pein aolep rikōjdat ro aer.

29 Kōmij kajjitōk Ippam̧, Jemām Ekwōjarjar, n̄an pukwōj, im kabwilōn̄, im bōktok n̄an jook im pok, aolep ro rekar kajeedediļo̧k ennaan ko reriab ijoko rettoļo̧k, iaolepān laļ, ņae rikarejeram̧ ak ro rikarejeram̧, eļan̄n̄e reban ukeļo̧k, n̄e gospel eo ejjeļo̧k jem̧ļo̧kin naaj kabun̄bun̄ļo̧k ilo lo̧jiln̄ier;

30 Im bwe aolep jerbal ko aer ren maron̄ ejjeļo̧k tokjāer, im ren pookiļo̧k er jān ^awōt dekā, im jān ekajet ko me Kwōnaaj jilkinļo̧k ioer ilo Am̧ illu, bwe en maron̄ wōr juon jem̧ļo̧k n̄an ^briab ko im ba ņae ko ņae armej ro Am.

31 Bwe Kwo jeļā, O Irooj, bwe ro rikarejeram̧ ar ejjeļo̧k ruweer Im̧aam ilo kam̧ool kōn Etam̧, eo kake rekar en̄taan kōn men kein.

32 Kōn menin kōmij owar Im̧aam kōn juon dipiioōn im likiion rōļo̧k jān ium̧win ^aine in.

33 Kwōn mejaļļe ļo̧k, O Irooj, mejaļļe ļo̧k jān kōnwaan ro rikarejeram̧, jān kajoor eo Am̧, bwe ren maron̄ jutaklōn̄ļo̧k ilubwiljin epepen in im kōm̧m̧ane jerbal in Am̧.

34 O Jeova, kwōn tūriam̧okake armej rein, im āinwōt aolep armej rej ^ajero̧wiwi, jeorļo̧k bōd ko an armej rein Am̧, im ren bukwiļo̧k indeeo.

35 Kōtļo̧k bwe ^aekkapit eo an minister ro Am̧ en sili ioer kōn kajoor eo jān ijo ilan̄.

36 Kōtļo̧k bwe en kūrm̧ool ioer, āinwōt ioon ro ilo raan in Pentekost eo; kōtļo̧k mennin letok eo kōn ^alo ko bwe en lutōkleplep ioon armej rein Am̧, em̧ool lo ko ^brekōk āinwōt urur, im ukok eo aer.

37 Im m̧wiin Im̧ōm en obrak, āinwōt kōto eo ekajoor em̧akroro, kōn ^aaiboojoj eo Am̧.

38 Kōkōņak ro rikarejeram̧ kōn ^akam̧ool eo an bujen eo, bwe n̄e rej diwōjļo̧k im kwaļo̧k naan eo Am̧ ren maron̄ ^bsili kien eo, im kōpooj būruōn ro rekwōjarjar Am̧ n̄an aolep bujen ko Kwo nan̄in jilkintok, ilo libabne eo Am̧, ioon ro rej pād ioon ^claļ, kōnke bōd ko aer, bwe armej ro Am̧ ren maron̄ jab jenlik ilo raan in apan̄ eo.

39 Im jabdewōt jikin kwelo̧k ro karejeram̧ renaaj deļo̧n̄, im armej ro ilo jikin kwelo̧k eo rej bōk naan in kam̧ool eo aer, aenōm̧m̧an eo Am̧ im lo̧mo̧o̧ren eo Am̧ ren pād ioon jikin kwelo̧k en; bwe ren maron̄ aintok jān jikin kwelo̧k eo ro rejim̧we, bwe ren maron̄ itok n̄an ^aZaion, ak n̄an stake ko an, jikin ko Kwaar jitōn̄i, kōn al in lan̄lōn̄ ejjeļo̧k jem̧ļo̧kin;

40 Im m̧ae an men in tōprak, ekajet ko Am̧ ren jab wōtlo̧k ioon jikin kwelo̧k en.

41 Im jabdewōt jikin kwelo̧k ro karejeram̧ renaaj deļo̧n̄, im armej in jikin kwelo̧k en rej jab bōk naan in kam̧ool eo an ro karejeram̧, im ro karejeram̧ rej kakkōl er n̄an lo̧mo̧o̧ren er make jān epepen ankeke in, en pād ioon jikin kwelo̧k en ekkar n̄an men eo Kwaar kōnono jān lo̧n̄iin rikanaan ro Am̧.

42 A Kwōn lo̧mo̧o̧ren, O Jeova, kōmij akweļap n̄an Eok, ro karejeram̧ jān peier, im karreoik er jān bōtōktōkier.

43 O Irooj, kōmij jab m̧ōņōņō ilo ko̧kkure eo an armej rein am; ^ajetōb ko aer rekanooj aorōk Im̧aam̧.

44 A naan eo Am̧ eaikuj kūrm̧ool. Jipan̄ ro karejeram̧ n̄an ba, kōn ^ajouj eo Am̧ rie er: Ankilam̧ en kōm̧m̧an, O Irooj, im jab ankilam.

45 Kōm jeļā bwe Kwaar ekkōnono jān lo̧n̄iin rikanaan ro Am̧ kōn men ko rekanooj nana kōn ro rinana, ilo ^araan ko āliktata—bwe Kwo naaj lutōkleplep ļo̧k ekajet ko Am̧, ejjeļo̧k jon̄an;

46 Kōn menin, O Irooj, kōjo̧o̧r armej ro Am̧ jān kan̄iājo an ro rinana; kōmaron̄ ro karejeram̧ n̄an sil in kien eo, im lukwōje naan in kam̧ool eo, bwe ren maron̄ pojak ņae raan in kattil eo.

47 Kōmij kajjitōk Ippam̧, Jemām Ekwōjarjar, n̄an keememej ro em̧ōj lukwarkwareļo̧k er jān ro rej pād ilo Jackson Kounty, Missouri, jān āneen jolōt ko aer, im bwilo̧keļo̧k, O Irooj, ineen kaen̄tanaan in em̧ōj likūt ioer.

48 Kwo jeļā, O Irooj, bwe rekar kanooj kebiōp im en̄taan jān armej rinana; im būruem ^arejiōbļo̧k kōn būrom̧ōj kōnke eddo ko aer rekanooj nana.

49 O Irooj, ^aewi toun Am̧ naaj kōtļo̧k armej rein n̄an ineeke en̄taan in, im ikkūr ko an ro ejjeļo̧k ruweer aer n̄an wanlōn̄waj ilo Lo̧jiln̄ūm̧, im ^bbōtōktōkier rej wanlōn̄tak ilo naan in kam̧ool Im̧aam, im jab kōm̧m̧ane juon naan in kam̧ool ealikkar ikijjier?

50 Kwōn ^atūriam̧o, O Irooj, ioon jarin renana, ro rekar lukwarkwareļo̧k armej ro Am̧, bwe ren maron̄ bōjrak jān ko̧kkure, bwe ren maron̄ ukeļo̧k jān jero̧wiwi ko aer eļan̄n̄e ukeļo̧k maron̄ in loe;

51 A eļan̄n̄e reban, kwaļo̧ke Peim, O Irooj, im ^alo̧mo̧o̧ren men eo me Kwaar jitōn̄e Zaion n̄an armej ro Am̧.

52 Im eļan̄n̄e e ban āindein, bwe kōttōpar eo an armej ro Am̧ en jab likjab Im̧aam̧ Am̧ illu en urur, im Am̧ libabne en wōtlo̧k ioer, bwe ren maron̄ kanooj jako, jim̧or okar im ra, jān ium̧win lan̄;

53 A toun wōt aer naaj ukeļo̧k, Kwōn jouj im tūriam̧o, im kajeorļo̧k Am̧ illu n̄e Kwōj kalimjekļo̧k mejān eo Ekkapitum̧.

54 Kwōn tūriam̧o, O Irooj, ioon aolep laļ ko in laļ in; kwōn tūriam̧o ioon ripepe ro an āniin āneem; bwe pedped ko, ko me rekar jojomar kaki ilo utiej im rajimjim, etan, ^aJemān Āe eo an āniin āneem, jān ro jemām, ej jutak indeeo.

55 Keememej kiin̄ ro, bwidak ro, rirajimjim ro, im ro reļļap in laļ, im aolep armej, ilo jarlepju in rijar ko, aolep ro rijeram̧ōl, riaikuj ro, im rien̄taan ro in laļ in;

56 Bwe burueer ren maron̄ meoeo n̄e ro karejeram̧ renaaj ilo̧k jān m̧wiin Im̧ōm, O Jeova, n̄an kwaļo̧k kam̧ool kōn Etam̧; bwe kalijekļo̧k ko aer ren maron̄ jako im̧aan ^am̧ool eo, im armej ro Am̧ ren maron̄ bōk jouj imejān aolep;

57 Bwe aolep jem̧ļo̧k ko an laļ ren maron̄ jeļā bwe kōm, ro karejeram̧, ar ^aron̄ Ainikiōm, im bwe Kwaar jilkinļo̧k kōm;

58 Bwe jān aolep rein, ro karejeram̧, m̧aan ro nejin Jekab, ren maron̄ aintok jān ro rejim̧we n̄an kalōk juon jikin kwelo̧k ekwōjarjar n̄an Etam̧, āinwōt Kwaar jiron̄ kōm.

59 Kōmij kajjitōk Ippam̧ n̄an jitōn̄ n̄an Zaion bar ^astake ko jet ijello̧kun in eo Kwaar kajutake, bwe ^bae tok eo an armej ro Am̧ en wōnm̧aanļo̧k ilo eļap kajoor im wōj, bwe jerbal eo Am̧ en maron̄ jab ^clikjab ilo weeppān.

60 Kiiō naan kein, O Irooj, kōm ar ekkōnono Im̧aam̧, kōn revelesōn ko im kien ko me Kwaar litok n̄an kōm, ro rej kwaļo̧k kadkadim ippān ro ^ariAelōn̄ ko.

61 A Kwo jeļā bwe ewōr Am̧ iakwe eļap n̄an ro nejin Jekab, ro rekar ejjeplōklōk ioon toļ ko kōn juon iien eaetok, ilo raan eo ekōdo̧do im marok.

62 Kōmij kōn menin kajjitōk Ippam̧ n̄an tūriam̧o ioon ro nejin Jekab, bwe ^aJerusalem, jān wōt awa in, ren maron̄ jino wiaiki;

63 Im ine eo ineen kōm̧akoko en maron̄ jino bwilo̧kļo̧k jān m̧weo im̧ōn ^aDevid;

64 Im ro nejin ^aJuda ren maron̄ jino ro̧o̧lļo̧k n̄an ^bāne ko Kwaar liļo̧k n̄an Ebream, eo jemāer.

65 Im kōm̧m̧an bwe ^am̧ōttan ko an Jekab, ro kar kalia im kōmetak er kōnke bōd ko aer, ren ^boktak jān tam̧m̧we eo eawiia im lāj tok n̄an tarlep in gospel eo ejjeļo̧k jem̧ļo̧kin;

66 Bwe ren maron̄ likūt ilaļ kein tariņae ko aer in kōto̧o̧rļo̧k bōtōktōk, im kabbōjrak jum̧ae ko aer.

67 Im aolep m̧ōttan ko an ^aIsrael rekar ejjeplōklōk, ro kar lukwarkware er n̄an jem̧ļo̧k ko in laļ, ren itok n̄an juon jeļā kōn m̧ool eo, tōmak ilo Messaia eo, im bar wiaiki er jān kebiōp, im m̧ōņōņō Im̧aam̧.

68 O Irooj, keememej eo karejeram̧, Josep Smith, Jun., im aolep metak ko im en̄taan ko an—ekōjkan an kar ^akōm̧m̧an bujen ippān ^bJeova, im kanejnej n̄an Kwe, O Anij Ekajoor an Jekab—im kien ko Kwaar liļo̧k n̄an e, im bwe ewōr an m̧ool ilo kijejeto n̄an kōm̧m̧an Ankilam̧.

69 Kwōn tūriam̧o, O Irooj, ioon kōrā eo pāleen im ro nejin, bwe ren maron̄ mour ilo im̧aan Mejam̧, im lo jokane jān pein kōjparok eo Peiūm.

70 Kwōn tūriam̧o ioon aolep ro ^anukwier repaake er, bwe kalijekļo̧k ko aer ren maron̄ bwilo̧k im kinōōriļo̧k āinwōt kōn juon ibwijleplep; bwe ren maron̄ oktaktok im bōk lo̧mo̧o̧r ippān Israel, im jeļā bwe Kwe kwōj Anij.

71 Keememej, O Irooj, president ro, em̧ool aolep president ro an kabun̄ in Am̧, bwe Peiūm anbwijmaron̄ en maron̄ kotak er, ippān aolep baam̧le ko aer, im ro nukwier repaake er, bwe āt ko etaer ren maron̄ mour wōt im pād ilo ememej eo ejjeļo̧k jem̧ļo̧kin jān epepen n̄an epepen.

72 Keememej aolep kabun̄ in Am̧, O Irooj, ippān aolep baam̧le ko aer, im aolep ro nukwier repaake er, ippān aolep ro rinan̄inmej im ro reban, ippān aolep ro rijeram̧ōl im ettā in laļ; bwe ^aaelōn̄ eo, eo Kwaar kajutake kōn ejjeļo̧k pā, en maron̄ erom juon toļ eļap im kobrak aolepān laļ;

73 Bwe kabun̄ eo Am̧ en maron̄ diwōjtok n̄an āne jem̧aden im marok, im erromaakļo̧k āinwōt ^aallōn̄ erreo, ealikkar āinwōt al, im kanooj nana āinwōt jarin tariņae eo ippān elōn̄ flag ko;

74 Im en kōpālpel āinwōt juon kōrā pālele n̄an raan eo n̄e Kwo naaj jojān kalbubu in lan̄ ko, im kōm̧m̧an bwe toļ ko ren ^aōnlaļļo̧k ilo Im̧aam̧, im ^bkom̧laļ ko n̄an utiejļo̧k, bwe jikin ko rekurbalōklōk ren pikier wōt juon; bwe Am̧ aiboojoj en kobrak laļ;

75 Bwe n̄e jilel eo enaaj jan̄ n̄an ro remej, kōm naaj ^aweaaklōn̄ļo̧k ilo kōdo̧ n̄an iioon Eok, bwe kōmin maron̄ indeeo pād ippān Irooj;

76 Bwe men ko ballim ren maron̄ erreo, bwe kōmin maron̄ kōņak ^aliboror ko in weeppān, ippān raan wōjke palm ko ipeim, im ^bkūrawūn ko in aiboojoj ioon bōram, im m̧adm̧ōde ^clan̄lōn̄ indeeo kōn aolep ^den̄taan ko am.

77 O Irooj Anij Ekajoor Bōtata, ron̄jake kōm ilo akweļap kein am, im uwaake kōm jān lan̄, ijo Jikūm̧ ekwōjarjar, ijo Kwōj jijet ioon tūroon, kōn ^aaiboojoj, utiej, kajoor, rajimjim, maron̄, tōln̄an, m̧ool, jim̧we, ekajet, tūriam̧o, im jeban jamin bwine, jān indeeo n̄an indeeo.

78 O ron̄jake, O ron̄jake, O ron̄jake kōm, O Irooj! Im uwaaki akweļap kein, im bōk aje in an m̧wiin n̄an Eok, jerbal in peim, eo me kōm ar kalōk e n̄an Etam̧;

79 Im barāinwōt kabun̄ in, n̄an likūti ioon Etam̧. Im jipan̄ kōm jān kajoor in Jetōb eo Am̧, bwe kōmin maron̄ kobaik ainikiōm ippān ro remeram, ^aenjeļ ro rejjatōltōl ipeļaakin tūroon eo Am̧, ippān kwaļo̧k ko in nebar, im al Hosana n̄an Anij im ^bLamb eo!

80 Im kōtļo̧k bwe rein, ro ekkapitum̧, ren ^anuknuk kōn lo̧mo̧o̧r, im ro rekwōjarjar Am̧ ren lam̧ōj eļļaaj kōn lan̄lōn̄. Amen, im Amen.