O Le Mau a Molimau e Toatolu

Ina ia iloa e atunuu uma, ituaiga, gagana, ma nuu, e oo atu i ai lenei tusi: O i matou, e ala i le alofa tunoa o le Atua le Tamā, ma lo tatou Alii o Iesu Keriso, sa matou vaai ai i papatusi ua i ai lenei talafaamaumau, o le talafaamaumau lea o le nuu o Nifae, ma sa Lamanā foi, o o latou uso, ma le nuu foi o Iareto, o e na o mai mai le olo lea ua ta’ua. Ua matou iloa foi sa faaliliuina i le meaalofa ma le mana o le Atua, auā na tautino mai e lona siufofoga ia te i matou; o le mea lea ua matou iloa ai ma le mautinoa ua moni le galuega. Matou te molimau atu foi sa matou vaai i togitogiga ua i ai i luga o papatusi; sa faaali mai foi ia mea ia te i matou i le mana o le Atua, ae lē o se tagata. Matou te tautino atu foi i upu faamaoni, sa afio ifo se agelu a le Atua mai le lagi, sa ia aumaia foi ma faataatia i luma o o matou mata, sa matou vaai ma iloa ai papatusi, ma togitogiga ua i ai; ua matou iloa foi o le alofa tunoa o le Atua le Tamā, ma lo matou Alii o Iesu Keriso, ua matou vaai ma molimau atu ai ua moni ia mea. Ua ofoofogia foi i la matou vaai. Ae ui i lea, sa poloaiina i matou e le siufofoga o le Alii e tatau ona matou molimauina; o le mea lea, ina ia matou usiusitai i poloaiga a le Atua, ua matou molimau atu ai i ia mea. Ma ua matou iloa foi afai matou te faamaoni ia Keriso, o le a mamā o matou ofu mai le toto o tagata uma, ma o le a lē pōnā foi i luma o le nofoa faamasino o Keriso, o le a mau foi faatasi ma ia e faavavau i le lagi. Ma ia i ai pea le mamalu i le Tamā, ma le Alo, ma le Agaga Paia, o le Atua e tasi. Amene.