1 ’E i teienei, i muri a’era, ’ua nā reira a’era te ari’i Beniamina i te parau atu i tōna ra mau ta’ata, ’e ’ua tono atu ra ’oia i te ve’a i rotopū ia rātou ’ia uiui i tōna ra mau ta’ata, ’ia ’ite ’oia ē, ’ua ti’aturi ānei rātou i te mau parau tāna i parau atu ia rātou.

2 ’E ’ua pi’i mai ra rātou ato’a ma te reo hō’ē, i te nā-’ō-ra’a mai ē : ’Ē, ’ua ti’aturi mātou i te mau parau ato’a tā ’oe i parau mai ia mātou ; ’e ’ua ’ite ho’i mātou ē, e parau mau te reira, nā roto i te Vārua o te Fatu Manahope ’o tei fa’atupu i te hō’ē tauira’a rahi i roto ia mātou, ’oia ho’i i roto i tō mātou ’ā’au, i ’ore ai mātou i hina’aro fa’ahou ai i te rave i te ’ino, ’ia rave tāmau noa rā i te maita’i.

3 ’E tei ia mātou ato’a iho te mau ’ite rahi i te mau mea e tupu a muri atu, nā roto i te maita’i fāito ’ore o te Atua ’e te mau fa’a’itera’a a tōna Vārua ; ’āhiri e mea maita’i, e ti’a ia mātou ’ia tohu i te mau mea ato’a ra.

4 ’E nō tō mātou fa’aro’o i te mau mea ato’a tā tō mātou ari’i i parau mai ia mātou ra i tae ai mātou i teie nei ’ite rahi ; ’e nā roto i te reira tē ’oa’oa nei mātou ma te ’oa’oa iti rahi.

5 ’E ’ua hina’aro mātou ’ia fafau i te hō’ē fafaura’a i te Atua nō te ha’apa’o i tōna hina’aro, ’e ’ia ha’apa’o ho’i i tāna mau fa’auera’a i roto i te mau mea ato’a tāna e fa’aue mai ia mātou, i te toe’a o tō mātou pu’e mahana, ’ia ’ore mātou e fa’atae mai i ni’a ia mātou iho i taua māuiui hope ’ore ra, mai tā te melahi i parau mai ra, ’e ’ia ’ore mātou ’ia inu i tō roto i te ’āu’a nō te riri ’ū’ana o te Atua.

6 ’E i teienei, ’o te mau parau teie tā te ari’i Beniamina i hina’aro ia rātou ; ’e nō reira ’ua nā ’ō atu ’oia ia rātou : ’Ua parau mai ’outou i te mau parau tā’u i hina’aro ; ’e te fafaura’a tā ’outou i fafau ra, e fafaura’a parauti’a ïa.

7 ’E i teienei, nō te fafaura’a tā ’outou i fafau mai, e parauhia ai ’outou e mau tamari’i nā te Mesia, ’oia ho’i tāna mau tamari’i tamāroa ’e tāna mau tamāhine ; inaha ho’i, i teie mahana ’ua fānau-vārua-hia ’outou e ana ; nō te mea tē nā ’ō mai ra ’outou ē ’ua fa’ahuru-’ē-hia tō ’outou ’ā’au nā roto i te fa’aro’o i tōna ra i’oa ; nō reira ’ua fānauhia ’outou e ana ’e ’ua riro ’outou ’ei mau tamari’i tamāroa ’e ’ei mau tamari’i tamāhine nāna.

8 ’E nō teie i’oa i fa’ati’amāhia ai ’outou, ’e ’aita atu ho’i e i’oa i fa’a’itehia e fa’ati’amāhia ai ’outou. ’Aita atu ho’i e i’oa i fa’a’itehia e tae mai ai te fa’aorara’a ; nō reira, ’ua hina’aro vau ’ia rave ’outou i te i’oa o te Mesia i ni’a ia ’outou, ’outou ato’a ho’i ’o tei fafau i te fafaura’a i te Atua ē e ha’apa’o maita’i ’outou ē tae noa atu i te hope’a o tō ’outou orara’a.

9 ’E a muri a’era, ’o tē nā reira ra e ’itea ïa ’oia i te rima ’atau o te Atua, e ’ite ho’i ’oia i te i’oa i pi’ihia ai ’oia ; e pi’ihia ho’i ’oia i te i’oa o te Mesia.

10 ’E i teienei, a muri a’era ’o ’oia ’o tē ’ore e rave i te i’oa o te Mesia i ni’a iāna, ’ia pi’ihia ïa ’oia i te hō’ē i’oa ’ē atu e ti’a ai ; nō reira, e ’ite ïa ’oia iāna iho i te rima ’aui o te Atua.

11 ’E ’ua hina’aro vau ’ia ha’amana’o ato’a ’outou ē, ’o te i’oa teie tā’u i parau ē, e hōro’a vau ia ’outou, ’e e ’ore roa atu te reira e paraihia, maori rā nā roto i te ’ōfatira’a i te ture ; nō reira, ’a ara ’ia ’ore ’outou ’ia ’ōfati i te ture, ’e ’ia ’ore ho’i te i’oa ’ia paraihia i tō ’outou ra ’ā’au.

12 Tē parau atu nei au ia ’outou ē, ’ua hina’aro vau ’ia ha’amana’o ’outou ē ’ia tāmau i te i’oa i pāpa’i-mau-hia i roto i tō ’outou ra ’ā’au, ’ia ’ore ’outou ’ia ’itea i te rima ’aui o te Atua ; ’ia fa’aro’o rā ’outou ’e ’ia ’ite ho’i i te reo e pi’ihia ai ’outou, ’e ’oia ato’a i te i’oa o tāna e pi’i ia ’outou.

13 ’E nāhea ho’i te hō’ē ta’ata e ’ite ai i te fatu ’o tāna i ’ore i tāvini, ’e tei riro ’ei ta’ata ’ē iāna, ’e tei te ātea ’ē te mau mana’o ’e te mau ’ōpuara’a o tōna ra ’ā’au ?

14 ’E i teienei, e rave ānei te hō’ē ta’ata i te ’āsini a tōna ra ta’ata tupu, ’e e tāpe’a i te reira ? Tē parau atu nei au ia ’outou na ē, ’aita roa ; ’e ’aita ato’a ho’i ’oia e fa’ati’a ’ia ’amu ’oia i rotopū i tāna mau nana, e tīahi rā ’oia iāna, ’e e ti’avaru iāna i rāpae. Tē parau atu nei au ia ’outou, e nā reira-ato’a-hia ho’i ïa i rotopū ia ’outou, ’ia ’ore ’outou e ’ite i te i’oa i pi’ihia ai ’outou ra.

15 Nō reira, ’ua hina’aro vau ’ia itoito ’outou ma te ’āueue ’ore, i te rave rahi ma te tāmau noa i te mau ’ohipa maita’i, ’ia tā’ati te Mesia, te Fatu te Atua Manahope, ’ia ti’a ia ’outou ’ia arata’ihia i te ra’i, ’e ’ia fāri’i ’outou i te fa’aorara’a mure ’ore e te ora mure ’ore, nā roto i te pa’ari, ’e te mana, ’e te parauti’a, ’e te aroha nōna ’o tei hāmani i te mau mea ato’a i te ra’i ra ’e i te fenua ato’a nei, ’oia te Atua i ni’a i te mau mea ato’a ra. ’Āmene.