Jebta 6
RiLeman ro rejim̧we rej kwaļo̧k naan n̄an riNipai ro renana—Armej rein jim̧or rej jeraam̧m̧an ilo iien aenōm̧m̧an im jeban—Lucifer, rijino in jero̧wiwi, ej kalim̧otak būruōn ro renana im riko̧o̧t in Kadiantōn ro ilo uror im jero̧wiwi—Riko̧o̧t ro rej bōk kien eo an riNipai ro. Iturinļo̧k 29–23 M.K.
1 Im ālikin men kein ke kajiljinon̄oul im ruo iiō in tōl an riekajet ro eaar bōjrak, aolep men kein raar waļo̧k im riLeman ro raar erom, eļapļo̧k m̧ōttanier, juon armej ejim̧we, jon̄an ke ajim̧we eo aer eaar leļo̧k jān eo an riNipai ro, kōnke pen im dim ilo tōmak eo.
2 Bwe lo, ekar lōn̄ iaan riNipai ro raar akijn̄en̄eļo̧k im jab ukeļo̧k im kanooj nana, jon̄an raar jab bōk naan eo an Anij im aolep kwaļo̧k naan im kanaan eo eaar itok ilubwiljier.
3 Mekarta, armej ro jān kabun̄ eo eaar wōr aer m̧ōņōņō eļap kōnke oktak eo an riLeman ro, aaet, kōnke kabun̄ eo an Anij, eo kar kajutake ilubwiljier. Im raar ajem̧jerā ippān doon, im raar m̧ōņōņō ippān doon, im eaar wōr aer lan̄lōn̄ eļap.
4 Im ālikin men kein elōn̄ iaan riLeman ro raar wanlaļļo̧k ilo āneen Zaraemla, im kar kabun̄bun̄ļo̧k n̄an armej in riNipai ro wāween kar aoktak eo aer, im kar kōketak er n̄an tōmak im ukeļo̧k.
5 Aaet, im elōn̄ raar kwaļo̧k naan kōn kajoor im maron̄ eļap otem ļap, n̄an bōk laļļo̧k er ilo m̧wilaļ ko in ettā bōro, n̄an aer ro rettā rikaļooran Anij im Lamb eo.
6 Im ālikin men kein elōn̄ iaan riLeman raar ilo̧k ilo āneo iōn̄; im barāinwōt Nipai im Liai raar ilo aāneo iōn̄, n̄an kwaļo̧k naan n̄an armej ro. Im āindein eaar jem̧ļo̧k kajiljinon̄oul im jilu iiō.
7 Im lo, eaar wōr aenōm̧m̧an ilo aolepān āneo, jon̄an riNipai ro raar ilo̧k ilo jabdewōt bukwōn in āneo raar kōņaan, men̄e ilubwiljin riNipai ro ak riLeman ro.
8 Im ālikin men kein riLeman ro raar barāinwōt ilo̧k jabdewōt ijo raar kōņaan, men̄e eaar ilubwiljin riLeman ro ak ilubwiljin riNipai; im āindein raar anemkwōj ilo etal-itok ko aer ippān doon, n̄an wiaik im n̄an wia kake, im n̄an bōk ļapļo̧k, ekkar n̄an aer kōņaan.
9 Im ālikin men kein rekar m̧weie otem m̧weie, jim̧or riLeman ro im riNipai ro; im eaar wōr aer gold eļap otem ļap, im silver, im aolep metal ko otemjeļo̧k reaorōk, jim̧or ilo āneo irōk im āneo iōn̄.
10 Kiiō āneo irōk kar etan Liai, im āneo iōn̄ kar etan aMulek, eo eaar ālikin ļeo nejin Zedekaia; bwe Irooj Eaar bōktok Mulek ilo āneo iōn̄, im Liai ilo āneo irōk.
11 Im lo, eaar wōr aolep wāween gold otemjeļo̧k ilo jim̧or bukwōn kein, im silver, im ore ko reaorōk otemjeļo̧k im ekar wōr barāinwōt rijerbal rekapeel, ro raar kōm̧m̧an jerbal in ore otemjeļo̧k im likliki; im āindein raar m̧weieļo̧k.
12 Im raar ekkat grain ekanooj lōn̄, jim̧or ilo iōn̄ im ilo rak; im raar jebar otem jebar, jim̧or ilo iōn̄ im ilo rak. Im raar wōrļo̧k im kanooj kajoor otem kajoor ilo āneo. Im raar tāāp elōn̄ bwijin mennin mour ko im mennin mour ko reļļap, aaet, im elōn̄ kau ko.
13 Lo kōrā ro aer raar jerbal im āj, im kar kōm̧m̧an aolep nuknuk otemjeļo̧k, jān linen eaidik iden im nuknuk otemjeļo̧k, n̄an kanuknuk aer keelwaan. Im āindein kajiljinon̄oul im emān iiō eaar mootļo̧k ilo aenōm̧m̧an.
14 Im ilo kajiljinon̄oul im ļalem iiō raar barāinwōt wōr aer m̧ōņōņō im aenōm̧m̧an eļap, aaet, eļap kwaļo̧k naan im elōn̄ kanaan kōn men eo enaaj itok. Im eaar eļļā kajiljinon̄oul im ļalem iiō eo.
15 Im ālikin men kein ilo kar jiljinon̄oul im jiljino iiō in iien tōl an riekajet ro, lo, aSizoram kar bōk an mour jān juon jab jeļā kake ke eaar jijet ioon jea in ekajet eo. Im ālikin men kein ilo ejja iiō eo wōt, ļeo nejin, eo kar jitōn̄ e jān armej ro bwe en bōk jikin, kar bōk an mour barāinwōt. Im āindein eaar jem̧ļo̧k kajiljinon̄oul im jiljino iiō.
16 Im ilo jino in kajiljinon̄oul im jiljilimjuon iiō armej ro eaar jino eddekļo̧k ilo bar nana otem nana.
17 Bwe lo, Irooj eaar kōjeraam̧m̧an er etto kōn m̧weie ko an laļ bwe ren kar jab lim̧otak n̄an illu, n̄an tariņae ko, ak n̄an kōto̧o̧rļo̧k bōtōktōk; kōn menin raar jino likūt burueer ioon m̧weie ko aer; aaet, raar jino kappukot n̄an bōk ļapļo̧k bwe ren maron̄ ļe lōn̄ļo̧k jān bar juon; kōn menin raar jino kōm̧m̧ani auror ko rettino, im n̄an ko̧o̧t im n̄an rakim, bwe ren maron̄ bōk ļapļo̧k.
18 Im kiiō lo, riuror ro im rirakim ro raar juon jar eo eaar ejaak jān Kiskumen im aKadiantōn. Im kiiō eaar lōn̄, em̧ool ilubwiljin riNipai ro, iaan jar eo an Kadiantōn. A lo, raar bwijlepļo̧k ilubwiljin m̧ōttan in riLeman ro renanaļo̧k. Im kar ņa etan riko̧o̧t im riuror ro an Kadiantōn.
19 Im eaar er ro raar bōk mour eo an riekajet eo eutiejtata Sizoram, im ļeo nejin, kar ilo jea in ekajet eo; im lo, kar jab lo er.
20 Im kiiō ālikin men kein ke riLeman ro raar lo bwe eaar wōr riko̧o̧t ilubwiljier raar kanooj būrom̧ōj otem būrom̧ōj; im raar kōjerbal wāween otemjej ilo aer kajoor n̄an ko̧kkure er ļo̧k jān mejān laļ.
21 A lo, Setan eaar kalim̧otak būruōn eļapļo̧k m̧ōttan riNipai ro, jon̄an raar kobaļo̧k ippān jarin riko̧o̧t ro, im kar deļo̧n̄ ilo bujen ko im kanejnej ko aer, bwe ren kar kōjparok im oņaake doon ilo jabdewōt jekjek ko reppen ren kar pād ie, bwe ren jab maron̄ en̄taan kōn uror ko aer, im rakim ko aer, im ko̧o̧t ko aer.
22 Im ālikin men kein eaar wōr kakōļļe ko aer, aaet, akakōļļe ko aer rettino, im naan ko aer rettino, im men in bwe ren maron̄ jenolo̧k juon jein im jatin eo eaar deļo̧n̄ļo̧k ilo bujen eo, bwe jabdewōt nana eo jein im jatin en kōm̧m̧an en jab kinejnej jān jeiūm̧ im jatin, ak jab jān eo ej pād ilo kumi eo an, eo ekar bōk bujen in.
23 Im āindein remaron̄ uror, im rakim, im ko̧o̧t, im kōm̧m̧ani mennin ļōn̄ ko im aolep nana otemjeļo̧k, im jekkar n̄an kien ko an laļ eo aer im barāinwōt kien ko an aer Anij.
24 Im jabdewōt iaan ro raar pād ilo kumi eo aer en kar kwaļo̧k n̄an laļ in kōn anana eo aer im mennin jōjō ko aer, en kar ekajet, jab ekkar n̄an kien ko an laļ eo aer, ak ekkar n̄an kien ko nana ko aer, ko kar liļo̧k n̄an er jān Kadiantōn im Kiskumen.
25 Kiiō lo, e kar akanejnej ittino im bujen kein ko Alma eaar jiron̄ ļeo nejin bwe en jab waļo̧k n̄an laļ in, n̄e raab wāween eo n̄an bōklaļļo̧k armej ro n̄an jorrāān.
26 Kiiō lo, akanejnej ittino ko im bujen ko raar jab itok n̄an Kadiantōn jān ļo̧o̧k ko kar liļo̧k n̄an Hilamōn; a lo, kar likūt er ilo būruōn Kadiantōn jān bejja eo wōt eaar kapo ro jined im jemād m̧oktata n̄an bōk m̧ōttan leen eo kōmo̧iki—
27 Aaet, ejja eo wōt eaar pepe ippān aKein, bwe eļan̄n̄e en kar bōk mour eo an ļeo jatin Ebel e jamin kar waļo̧k n̄an laļ. Im eaar ippān Kein im ro rikaļooran jān iien eo m̧aanļo̧k.
28 Im barāinwōt e ejja eo wōt eaar likūt ilo būruōn armej ro n̄an akalōk juon im̧ōn bar ebwe an utiej bwe ren maron̄ tōparļo̧k lan̄. Im ejja eo wōt eaar tōlļo̧k armej ro raar itok jān im̧ōn bar eo n̄an āniin; eo eaar kajeeded jerbal ko in marok im mennin jōjō ko iaolepān mejān āneo, m̧ae iien eaar iperļo̧k armej ro laļļo̧k n̄an blukkuun ko̧kkure, im n̄an hell ejjeļo̧k jem̧ļo̧kin.
29 Aaet, e ejja eo wōt eaar likūt ilo būruōn aKadiantōn n̄an bōkļo̧k wōt jerbal in marok, im in uror ittino, im eaar bōk m̧aantak jān jinoin armej em̧ool laļtak n̄an iien in.
30 Im lo, ej e eo ej arijeje in aolep jero̧wiwi. Im lo, e ej kawōnm̧aanļo̧k wōt jerbal ko in marok an im uror ittino, im ej lilaļļo̧k kōttōbalbal ko aer, im kanejnej ittino ko aer, im bujen ko aer, im karōk ko aer in kanooj nana, jān epepen n̄an epepen ekkar n̄an āinwōt bōk būruōn ro nejin armej.
31 Im kiiō lo, eaar bōk eļap kajoor ilo būruōn riNipai ro; aaet, jon̄an raar erom nana otem nana; aaet, eļapļo̧k m̧ōttan eo aer raar oktakļo̧k jān iaļ in jim̧we, im kar ajujuri ium̧win neer kien ko an Anij, im oktak n̄an iaļ ko aer make, im kar jekjek n̄an er make ekjab ko jān gold ko aer im silver ko aer.
32 Im ālikin men kein aolepān nana kein raar itok n̄an er ilo tōrean eo ej ajab lōn̄ iiō ko, jon̄an m̧ōttan eo eļap in eaar itok n̄an er ilo kajiljinon̄oul im jiljilimjuon iiō in iien tōl an riekajet ro ioon armej in Nipai.
33 Im raar eddekļo̧k ilo nana ko aer ilo kajiljinon̄oul im ruwalitōk iiō eo barāinwōt, n̄an būrom̧ōj im liaajlo̧ļ eļap an jim̧we.
34 Im āindein jej lo bwe riNipai ro raar jino idakunkunļo̧k ilo jab tōmak, im eddekļo̧k ilo jero̧wiwi im mennin jōjō ko, ke riLeman ro raar eddekļo̧k ilo jeļā otem jeļā kōn aer Anij; aaet, raar jino kōjparok naan in jiron̄ ko im kien ko An, im n̄an etetal ilo m̧ool im jejjet im̧aan mejān.
35 Im en̄in jej lo bwe Jetōb in Irooj eaar jino ajenlikļo̧k jān riNipai ro, kōnke jero̧wiwi eo aer im pen eo an burueer.
36 Im āindein jej lo bwe Irooj eaar jino lutōkleplep jetōb eo an ioon riLeman ro, kōnke pidodo im m̧ōņōņō eo aer n̄an tōmak ilo naan ko An.
37 Im ālikin men kein riLeman ro raar kakiduduiki jarin riko̧o̧t ro an Kadiantōn; im raar kwaļo̧k naan in Anij ilubwiljin m̧ōttan eo enanaļo̧k ilubwiljier, jon̄an jarin riko̧o̧t rein eaar kanooj jako jān ilubwiljin riLeman ro.
38 Im ālikin men kein ilo bar juon wāween, riNipai ro raar kalōkļo̧k er im rejetake er, jino jān m̧ōttan eo aer enanaļo̧k, m̧ae iien raar ajeededļo̧k iaolepān āneo āneen riNipai ro, im kar karreel m̧ōttan eo eļapļo̧k in ro rejim̧we m̧ae aer kar wanlaļļo̧k n̄an tōmak ilo jerbal ko aer im bōk m̧ōttan leen ko̧o̧t ko aer, im n̄an koba ippāer ilo uror ittino ko im kanejnej ittino ko aer.
39 Im āindein raar bōk aolep kajeikik kien eo, jon̄an raar jujuri ium̧win neer im den̄ļo̧ke im kōmetak im kaen̄taan im ukōtļo̧k likier n̄an arijeram̧ōl im riineem̧m̧an, im ro rettā rikaļooran Anij.
40 Im āindein jej lo bwe raar pād ilo jekjek eo ekanooj nana, im akaloļo̧k n̄an ko̧kkure indeeo.
41 Im ālikin men kein āindein eaar jem̧ļo̧k kajiljinon̄oul im ruwalitōk iiō in iien tōl an riekajet ro ioon armej in Nipai.