1 Im kiiō ālikin men kein ke em̧ōj an Jisōs wanlōn̄ļo̧k n̄an lan̄, jarlepju eo eaar jeplōklōk, im aolep em̧m̧aan eaar bōk kōrā eo pāleen im ro nejin im kar ro̧o̧l n̄an m̧weo im̧ōn make.

2 Im eaar bun̄bun̄ļo̧k ipeļaakin ijoko ilubwiljin armej ro m̧ōkaj, m̧okta jān ke eaar marok, ke jarlepju eo eaar lo Jisōs, im bwe Eaar jipan̄ er, im bwe Enaaj barāinwōt kwaļo̧k E ilju n̄an jarlepju eo.

3 Aaet, im em̧ool aolepān bon̄ōn eo eaar bun̄bun̄ļo̧k ipeļaakin ijoko kōn Jisōs; im jon̄an wōt eo raar jilkinļo̧k n̄an armej ro bwe oraer raar lōn̄, aaet, oran eo eļap otem ļap, raar kanooj jerbal otem jerbal aolepān bon̄ōn eo, bwe ren maron̄ pād ilo raan eo ilju ijo Jisōs en kar kwaļo̧ke n̄an jarlepju eo.

4 Im ālikin men kein ilo raan eo ilju, ke jarlepju eo eaar kukļo̧k ippān doon, lo, Nipai im ļeo jatin eaar kōjerkak jān ro remej, eo etan eaar Timote, im barāinwōt ļeo nejin, eo etan eaar Jonas, im barāinwōt Matonai, im Matonaia, ļeo jein im jatin, im Kumen, im Kumenonai, im Jeremaia, im Simnōn, im Jonas, im Zedekaia, im Aiseia—kiiō erkein kar āt ko etan rikaļoor ro Jisōs eaar kāālet—im ālikin men kein raar wōnm̧aanļo̧k im jutak ilo ioļapļap in jarlepju eo.

5 Im lo, jarlepju eo eaar kanooj ļap jon̄an raar kōm̧m̧an bwe ren ajej ilo jon̄oulruo ānbwin ko.

6 Im ro jon̄oulruo raar katakin jarlepju eo; im lo, raar kōm̧m̧an bwe jarlepju eo en bukwelōlō laļļo̧k ioon mejān laļ, im ren jar n̄an Jemān ilo etan Jisōs.

7 Im rikaļoor ro raar jar n̄an Jemān barāinwōt ilo etan Jisōs. Im ālikin men kein raar jutak im jipan̄ armej ro.

8 Im ke raar jipan̄ kōn ejja naan ko wōt Jisōs eaar kōnono—ejjeļo̧k irļo̧k jān naan ko Jisōs eaar kōnono—lo, raar bar bukwelōlō im jar n̄an Jemān ilo etan Jisōs.

9 Im raar jar kōn men eo raar kanooj kōņaan; im raar kōņaan bwe ^aJetōb Kwōjarjar ren leļo̧k n̄an er.

10 Im ke raar āindein im jar raar wanlaļļo̧k n̄an parijet in dān, im jarlepju eo eaar ļoor er.

11 Im ālikin men kein Nipai eaar wanlaļļo̧k ^ailo dān eo im kar peptaiji er.

12 Im eaar waļo̧k jān dān eo im jino peptaij. Im eaar peptaiji aolep ro Jisōs eaar kāālet.

13 Im ālikin men kein ke ar m̧ōj aer aolep ^apeptaij im kar atoļo̧k jān dān eo, Jetōb Kwōjarjar eaar wōtlo̧k ioer, im raar obrak kōn ^bJetōb Kwōjarjar im kōn kijeek.

14 Im lo, kar ^ajepooļe er aolep āinwōt n̄e eaar kōn kijeek; im eaar wanlaļtak jān lan̄, im jarlepju eo eaar kam̧ool e, im kar jeje; im enjeļ raņ raar wanlaļtak jān lan̄ im jipan̄ er.

15 Im ālikin men kein ke enjeļ raņ raar jipan̄ ļo̧k rikaļoor ro, lo, Jisōs eaar itok im jutak ioļapļap im jipan̄ er.

16 Im ālikin men kein Eaar kōnono n̄an jarlepju eo, im jiron̄ er bwe ren bukwelōlō laļļo̧k bar juon alen ioon laļ, im barāinwōt bwe ro rikaļooran ren bukwelōlō ioon laļ.

17 Im ālikin men kein ke raar aolep bukwelōlō laļļo̧k ioon laļ, Eaar jiron̄ ro rikaļooran bwe ren jar.

18 Im lo, raar jino jar; im raar jar n̄an Jisōs, im kūr E aer Irooj im aer Anij.

19 Im ālikin men kein Jisōs eaar ilo̧k jān ioļapļapier, im ilo̧k jidikļo̧k jān er im bun̄badik make n̄an bwidej, im Eba:

20 Jema, Ij kam̧m̧oolol Eok bwe kwaar leļo̧k Jetōb Kwōjarjar n̄an rein ro Iaar kāālet; im ej kōn aer tōmak ilo N̄a bwe in kar kāālet er jān laļ.

21 Jema, Ij jar bwe Kwōn leļo̧k Jetōb Kwōjarjar n̄an aolepān ro renaaj tōmak ilo naan ko aer.

22 Jema, kwaar leļo̧k n̄an er Jetōb Kwōjarjar kōnke rej tōmak ilo N̄a; im Kwōj lo bwe rej tōmak ilo N̄a kōnke Kwōj ron̄jake er, im rej jar n̄an Eō; im rej jar n̄an Eō kōnke N̄aij pād ippāer.

23 Im kiiō Jema, Ij jar n̄an Eok kōn er, im barāinwōt kōn aolep ro renaaj tōmak ioon naan ko aer, bwe ren maron̄ tōmak ilo N̄a, bwe In maron̄ pād ilo er ^aāinwōt Kwe, Jema, kwōj ilo N̄a, bwe jen maron̄ ^bjuon.

24 Im ālikin men kein ke em̧ōj an Jisōs kar jar āinwōt in n̄an Jemān, Eaar itok n̄an rikaļoor ro, im lo, raar wōnm̧aanļo̧k wōt, kōn ejjeļo̧k bōjrak, n̄an jar n̄an E; im raar jab ^akōjerbal elōn̄ naan, bwe kar leļo̧k n̄an er ta ren ^bjar, im rekar obrak kōn ikdeelel.

25 Im ālikin men kein Jisōs eaar kōjeraam̧m̧an er ke raar jar n̄an E; im paotokin Eaar ettōn̄dikdik ioer, im meram in ^aPaotokin eaar meram ioer, im lo raar ^bmouj āinwōt paotok eo im barāinwōt nuknuk ko an Jisōs; im lo mouj in eaar eļļā jān aolep mouj, aaet, em̧ool eaar ejjeļo̧k ioon laļ eaar kanooj mouj āinwōt mouj in.

26 Im Jisōs Eaar ba n̄an er: Kom̧in jar wōt; mekarta raar jab bōjrak jān jar.

27 Im Eaar bar ro̧o̧l jān er, im ilo̧k jidik jān er im bun̄badik n̄an laļ; im Eaar bar jar n̄an Jemān, im ba:

28 Jema, Ij kam̧m̧oolol Eok bwe kwaar ^akarreoik ro Iaar kāālet, kōnke aer tōmak, im Ij jar kōn er, im barāinwōt kōn ro renaaj lōke naan ko aer, bwe er ren maron̄ karreo ilo N̄a, kōn tōmak ilo naan ko aer, em̧ool āinwōt rej karreo ilo N̄a.

29 Jema, Ij jar jab kōn laļ, a kōn ro Kwaar letok n̄an Eō ^ajān laļ, kōnke aer tōmak, bwe ren maron̄ karreo ilo N̄a, bwe In maron̄ pād ilo er āinwōt Kwe, Jema, kwōj ilo N̄a, bwe jān maron̄ juon, bwe In maron̄ aiboojoj ilo er.

30 Im ke Jisōs em̧ōj an kōnono naan kein Eaar bar itok n̄an rikaļoor ro; im lo raar jar wōt, im jab bōjrak, n̄an E; im Eaar ettōn̄dikdik ioer bar juon alen; im lo raar ^amouj, em̧ool āinwōt Jisōs.

31 Im ālikin men kein Eaar ilo̧k ilo̧k bar jidik jān er im kar jar n̄an Jemān;

32 Im lo ejjab maron̄ kōnono naan ko Eaar jar, im jab maron̄ ^ajeje jān armej naan ko Eaar jar.

33 Im jarlepju eo eaar ron̄ im kar jeje; im burueer raar peļļo̧k im raar meļeļe ilo burueer naan ko Eaar jar.

34 Mekarta, ekanooj ļap im kabwilōn̄lōn̄ kar naan ko Eaar jar bwe rekar jab maron̄ jeje, im jab kar maron̄ ^akōnono jān armej.

35 Im ālikin men kein ke Jisōs Eaar kōm̧m̧an jem̧ļo̧k in jar eo Eaar bar itok n̄an rikaļoor ro, im ba n̄an er: Ekanooj ļap ^atōmak in Iaar jan̄in kar lo ilubwiljin aolep riJu ro; kōn menin Iaar jab maron̄ kwaļo̧k n̄an er mennin bwilōn̄ ko reļļap, kōnke aer ^bjab tōmak.

36 Em̧ool Ij ba n̄an kom̧, ejjeļo̧k juon iaer eaar lo men kein reļļap āinwōt kom̧ ar lo; im barāinwōt raar jab ron̄ men ko reļļap āinwōt kom̧ ar ron̄.