1 Im kiiō lo, ālikin men kein aolep armej in āneo raar ron̄ ennaan kein, im kar kam̧ool e. Im ālikin ekkōnono kein eaar wōr lur ilo āneo ilo tōrean in elōn̄ awa ko;

2 Bwe ekanooj ļap kar bwilōn̄ eo an armej ro jon̄an raar bōjrak liaajlo̧ļ im lim̧ō kōn jako eo an ro nukwier ro kar m̧ane er; kōn menin eaar wōr lur ilo aolepān āneo ilo tōrean eo elōn̄ awa.

3 Im ālikin men kein eaar bar itok ainikien eo n̄an armej ro, im aolep armej raar ron̄, im kar kam̧ool e, im ba:

4 O kom̧ armej ro in ^ajikin kwelo̧k kein reļļap ko raar bun̄, ro rej bwij in Jekab, aaet, ro rej jān m̧weo im̧ōn Israel, ewi jon̄an ekkutkut in Aō kar kakwelo̧ktok kom̧ āinwōt juon lo̧lo̧ ej kakwelo̧ktok jojo ko nejin ium̧win pā ko pein, im kar ^bnaajdik kom̧.

5 Im bar juon alen, ^aewi lōn̄ in Aō kar kakwelo̧ktok kom̧ āinwōt juon lo̧lo̧ ej kakwelo̧ktok jojo ko nejin ium̧win pā ko pein, aaet, O kom̧ armej in m̧weo im̧ōn Israel, ro raar bun̄; aaet, O kom̧ armej in m̧weo im̧ōn Israel, kom̧ ro rej pād ilo Jerusalem, āinwōt kom̧ ro raar bun̄; aaet, ewi lōn̄ in Aō kar kakwelo̧ktok kom̧ āinwōt lo̧lo̧ eo ej kakwelo̧ktok jojo ko nejin, im kom̧ kar jab kōņaan.

6 O kom̧ m̧weo im̧ōn Israel ro Iaar ^adāpij er, ewi lōn̄ in Aō naaj kakwelo̧ktok kom̧ āinwōt lo̧lo̧ ej kakwelo̧ktok jojo ko nejin ium̧win pein, eļan̄n̄e kom̧ naaj ukeļo̧k im ^bro̧o̧l tok n̄an Eō kōn aolep tūm̧laļ in ^cbūruōmi.

7 A eļan̄n̄e jaab, O m̧weo im̧ōn Israel, jikin jokwe ko ami renaaj erom jikin jokwe ko ami renaaj ejjeļo̧k kobbaer m̧ae iien an kūrm̧ool ^abujen eo n̄an ro jemāmi.

8 Im kiiō ālikin men kein ālikin an armej ro kar ron̄ naan kein, lo, raar bar jino jan̄ im lim̧ō kōnke jako eo an ro nukwier im ro jeraer.

9 Im ālikin men kein āindein kar jilu raan ko raar eļļā. Im eaar ilo jibbon̄, im ^amarok jilōn̄lōn̄ eaar jakoļo̧k jān mejān āneo, im laļ eaar bōjrak an m̧akūtkūt, im dekā eaar bōjrak aer tipdikdik, im n̄irļo̧k ko renana raar bōjrak, im aolep ainikien ko rekijon̄ raar jem̧ļo̧k.

10 Im laļ eaar bar eddāp ippān doon, bwe eaar jutak; im būrom̧ōj eo, im jan̄ eo, im liaajlo̧ļ eo an armej ro kar dāpij er bwe ren mour eaar jem̧ļo̧k; im aer liaajlo̧ļ eaar oktak n̄an m̧ōņōņō, im aer lim̧ō ko n̄an nebar im kam̧m̧oolol n̄an Irooj Jisōs Kraist, aer Ripinmuur.

11 Im āindein n̄an tōre in jeje ko rekwōjarjar raar ^akūrm̧ool ko kar kōnono jān rikanaan ro.

12 Im eaar armej ro ^aeļapļo̧k aer jim̧we me kar mour, im eaar er ro raar bōk rikanaan ro im jab kade er; im eaar er ro raar jab kōto̧o̧rļo̧k bōtōktōkin ro rekwōjarjar, ro kar dāpij er—

13 Im kar dāpij er im raar jab rum̧ļo̧k im kallib ilo bwidej; im maļon̄ ilo m̧wilaļ ko in lo̧meto; im raar jab bwil kōn kijeek, im kar jab wōtlo̧k ioer im jiped er n̄an mej; im kar jab bōkļo̧k er ilo aire eo; im rekar jab m̧ōjņo̧ jān nijōk in marok jilōn̄lōn̄ eo.

14 Im kiiō, jabdewōt eo kōnono jān jeje, e en meļeļe, e eo ewōr ippān jeje ko rekwōjarjar, e en ^alin̄ōri, im lo im lali eļan̄n̄e aolep mej kein im ko̧kkure kein jān kijeek, im jān aire ko, im jān ^bpeļļo̧k in laļ n̄an bōk er, im aolep men kein rejjab n̄an kakūrm̧ool in kanaan ko an elōn̄ iaan rikanaan ro rekwōjarjar.

15 Lo, ij ba n̄an kom̧, Aaet, elōn̄ raar kam̧ool kōn men kein ilo itok eo an Kraist, im kar ^am̧an er kōnke raar kam̧ool kōn men kein.

16 Aaet, rikanaan ^aZinōs eaar kam̧ool kōn men kein, im barāinwōt Zenōk eaar kōnono kōn men kein, kōnke raar kam̧ool eļaptata kōn kōj, ro rej m̧ōttan ineer.

17 Lo, jemād Jekab eaar barāinwōt kam̧ool kōn juon m̧ōttan ineen Josep. Im lo, jej jab ke juon ^am̧ōttan in ineen Josep? Im men kein ko rej kam̧ool kōn kōj, rejjab kar jeje ke ioon brass pileij ko jemād Liai eaar būktok jān Jerusalem?

18 Im ālikin men kein ilo jem̧ļo̧k in jiln̄uul im emān iiō eo, lo, inaaj kwaļo̧k n̄an kom̧ bwe armej in Nipai ro kar dāpij er, im barāinwōt ro kar kūr er riLeman, ro kar dāpij er, eaar wōr mennin jouj kwaļo̧k n̄an er, im eļap jeraam̧m̧an ko lutōkleplep ioon bōraer, jon̄an ejjab to ālikin ^awanlōn̄ļo̧k eo an Kraist ilo lan̄ em̧ool Eaar kwaļo̧ke make n̄an er—

19 ^aKwaļo̧k ānbwinnin n̄an er, im jipan̄ er; im juon bwebwenato in jerbal eo An, naaj lewōj tokālik ijin. Kōn menin n̄an iien in Ij kōm̧m̧an jem̧ļo̧k in ennaan kein aō.