1 Pea ʻikai ia ko ia pē, ka naʻe pehē mai ʻa e folofola ʻa e ʻEikí kiate au: Toʻo kiate koe ha takainga lahi, pea tohi ki ai ʻaki ha peni ʻa e tangatá, ʻo kau kia ^aMaha-sala-hase-pase.

2 Pea naʻá ku toʻo kiate au ha kau ^afakamoʻoni falalaʻanga ke tohi, ko ʻŪlaia ko e taulaʻeikí, mo Sakalia ko e foha ʻo Sepelikaiá.

3 Pea naʻá ku ʻalu ki he ^apalōfita fefiné; pea naʻe tuʻituʻia ia, ʻo ne fanauʻi ha tama. Pea naʻe toki folofola ʻe he ʻEikí kiate au: Ui hono hingoá ko Maha-sala-hase-pase.

4 He vakai, ʻe ^ateʻeki motuʻa feʻunga ʻa e ^btamasiʻí ke ne pehē, Ko ʻeku tamai, mo ʻeku faʻē, ka kuo ʻave atu ʻa e ngaahi koloa ʻo Tāmasikusí mo e ngaahi ^ckoloa vete ʻo Samēliá mei he ʻao ʻo e tuʻi ʻo ʻAsiliá.

5 Naʻe folofola foki ʻa e ʻEikí kiate au, ʻo pehē:

6 Ko e meʻa ʻi he liʻaki ʻe he kakaí ni ʻa e ngaahi vai tafetafe mālie ʻo ^aSailoá, pea nau fiefia ʻia ^bLēsini mo e foha ʻo Lemaliá;

7 Ko ia ai, vakai, ʻoku ʻomi ʻe he ʻEikí kiate ^akinautolu ʻa e ngaahi vai ʻo e vaitafe, ʻoku mālohi pea lahi, ʻio, ʻa e tuʻi ʻo ʻAsiliá mo e kotoa ʻo hono nāunaú; pea te ne fono hake ʻi hono ngaahi tafenga vai kotoa pē, pea fā ʻi hono ngaahi kauvai kotoa pē.

8 Pea te ne ^afou atu ʻi Siuta; te ne fā pea mafola, te ne aʻu hake ki he kiá; pea ko e fālahi ʻo hono kapakaú ʻe fakafonu ʻa e maokupu ʻo ho fonuá, ʻE ^bʻĪmanuela.

9 Mou ^akau fakataha, ʻa kimoutolu ʻa e kakai, pea ʻe laiki ʻa kimoutolu ke momo-iiki; pea fanongo mai, ʻa kimoutolu ʻi he ngaahi fonua mamaʻo kotoa pē; teuteuʻi ʻa kimoutolu, pea ʻe fakamomoiiki ʻa kimoutolu; teuteu ʻa kimoutolu ki he tau, pea ʻe fakamomoiiki ʻa kimoutolu.

10 Alea fakataha, pea ʻe ʻikai hano ʻaonga kiate kimoutolu; alea fakataha, pea ʻe ʻikai fakahoko ia; ^ahe ʻoku ʻiate kitautolu ʻa e ʻOtuá.

11 He naʻe folofola peheni ʻe he ʻEikí kiate au ʻi ha fakatokanga mamafa, mo ne enginakiʻi au ke ʻoua naʻá ku ʻalu ʻi he hala ʻo e kakai ko ʻení, ʻo ne folofola:

12 ʻOua naʻá ke pehē, ko ha ^akautaha, kiate kinautolu kotoa pē ʻa ia ʻe pehē ki ai ʻe he kakaí ni, ko ha kautaha; pe manavahē ki he meʻa ʻoku nau manavahē ki aí, pea ʻoua te ke ilifia.

13 ʻApasia ki he ʻEiki ʻo e Ngaahi Kau Taú, pea tuku ke ne hoko ko ho ^amanavahēʻangá, pea tuku ke ne hoko ko ho ilifiaʻangá.

14 Pea ʻe hoko ia ko ha ^ahūfangaʻanga kiate koe; kā ko ha ^bmaka ke tūkiaʻanga, mo ha maka ke humu ai ʻa e ongo fale ʻo ʻIsilelí, koeʻuhi ke hoko ko ha tauhele mo ha tauheleʻanga ki he kakai ʻo Selūsalemá.

15 Pea ko e tokolahi ʻo kinautolu te nau ^atūkia ʻo tō, pea laiki, pea tauheleʻi, pea maʻu ʻi he tauhelé.

16 Nonoʻo fakataha ʻa e fakamoʻoní, fakamaʻu ʻa e ^afonó ʻi heʻeku kau ākongá.

17 Pea te u tatali ki he ʻEikí, ʻa ia ʻokú ne ^afufuuʻi ʻa hono fofongá mei he fale ʻo Sēkopé, pea te u kumi kiate ia.

18 Vakai, ko au mo e fānau ʻa ia kuo foaki kiate au ʻe he ʻEikí ke hoko ko ha ngaahi ^afakaʻilonga pea mo ha ngaahi meʻa fakaofo ʻi ʻIsileli mei he ʻEiki ʻo e Ngaahi Kau Taú, ʻa ia ʻoku ʻafio ʻi he Moʻunga ko Saioné.

19 Pea ʻo ka nau ka pehē atu kiate kimoutolu: Alea mo kinautolu ʻa ia ʻoku maʻu ha ngaahi ^alaumālie ʻulí, pea ki ha kau ^btaula faʻahikehe ʻa ia ʻoku mapu ʻo hangē ha manupuná mo femuhumuhuʻi—ʻikai ʻoku ^ctotonu ke fekumi ʻe ha kakai ki honau ʻOtuá, ʻa e ʻOtua ko ia ʻo e meʻa moʻui kotoa pē, kapau ʻoku nau fie fanongo ^dmei he maté?

20 Fakatatau ʻenau ngaahi leá ki he fonó pea ki he fakamoʻoní; pea kapau ʻoku ʻikai te ^anau lea ʻo fakatatau mo e folofolá ni, ʻoku tupu ia ʻi he ʻikai ha maama ʻiate kinautolu.

21 Pea te ^anau ʻalu atu ʻi he fonuá ʻi he mamahi mo e fiekaia; pea ʻe hoko ʻo pehē ʻo ka nau ka fiekaia, te nau ʻita lahi ʻaupito, pea lea kovi ki honau tuʻí mo honau ʻOtuá, pea sio ki ʻolunga.

22 Pea te nau sio ki he fonuá pea vakai ki he mamahi pē, mo e fakapoʻuli, mo e fakamamahi lahi, pea ʻe kapusi fakamālohi ʻa kinautolu ki he fakapoʻulí.