1 Ut kik’ulman naq laa’in, aj Nefi, chirix raatinankil li Qaawa’, kinsutq’i sa’ xmuheb’aal t’ikr lin yuwa’.

2 Ut kik’ulman naq a’an kinraatina, ut kixye: K’e reetal, xinmatk’i jun li ^amatk’, sa’ li kinixtaqla wi’ li Qaawa’ naq laa’at ut eb’ laa was texsutq’iiq Jerusalen.

3 Xb’aan naq k’e reetal, rik’in laj Laban wan li resileb’ laj Judio chi tz’iib’anb’il, jo’ ajwi’ jun ^aresilal lix xe’toonil lin najter yuwa’, ut tz’iib’anb’ileb’ chiruheb’ perel ch’iich’ bronce.

4 Jo’kan ut, li Qaawa’ kinixtaqla naq laa’at ut eb’ laa was texxik sa’ li rochoch laj Laban, ut teesik’ chaq li tz’iib’anb’il esil, ut teek’am chaq arin sa’ li yamyookil ch’och’.

5 Ut anajwan, k’e reetal naq eb’ laa was neke’wech’in, neke’xye naq ch’a’aj li k’a’ru ninpatz’eb’ re; a’b’anan k’e reetal naq moko laa’in ta xinpatz’ok reheb’; a’an b’an jun xtaqlahom li Qaawa’.

6 Jo’kan ut, ayu laa’at, at walal, ut usilanb’ilaqat xb’aan li Qaawa’, xb’aan naq ^aink’a’ xatwech’in.

7 Ut kik’ulman naq laa’in, aj Nefi, kinye re lin yuwa’: ^aTinxik ut tinb’aanu li k’a’aq re ru xtaqla li Qaawa’, xb’aan naq ninnaw naq li Qaawa’ maajun ^btaqlahom naxk’e reheb’ li ralal xk’ajoleb’ li winq, chi ink’a’ ta ^ctixk’uub’ jun li b’e choq’ reheb’ re naq te’xb’aanu li k’a’ru naxtaqlaheb’ wi’.

8 Ut naq kirab’i lin yuwa’ li aatin a’in kik’ulman naq kisaho’ xch’ool chi numtajenaq, xb’aan naq kixnaw naq osob’tesinb’ilin chaq xb’aan li Qaawa’.

9 Ut laa’in, aj Nefi, ut eb’ li was kiqachap qab’e chiru li yamyookil ch’och’, rik’in qamuheb’aal t’ikr, re tootaqe’q sa’ li ch’och’ Jerusalen.

10 Ut naq ak xootaqe’ sa’ li ch’och’ Jerusalen, kik’ulman naq laa’in ut eb’ li was kiqak’uub’ qana’leb’ chiqib’il qib’.

11 Ut ^akiqab’uuli qix—ani qe laa’o tox’okaq sa’ rochoch laj Laban. Ut kik’ulman naq kitz’aqon laj Laman; ut kox’okaq laj Laman sa’ rochoch laj Laban, ut ki’aatinak rik’in naq chunchu sa’ li rochoch.

12 Ut kixpatz’ re laj Laban li tz’iib’anb’il esil li wan chiruheb’ li perel ch’iich’ bronce, wan wi’ ^aresilal lix xe’toonil lin yuwa’.

13 Ut k’ehomaq reetal, kik’ulman naq kijosq’o’ laj Laban, ut kiralinasi chaq chiru; ut ink’a’ kiraj naq tixk’am li esil tz’iib’anb’il. Jo’kan naq kixye re: K’e reetal, laa’at aj elq’, ut laa’in tatinkamsi.

14 A’b’anan laj Laman ki’eelelik chaq chiru, ut kixye li k’a’aq re ru kixb’aanu chaq laj Laban, qe laa’o. Ut ki’ok chi raho’k qach’ool chi numtajenaq, ut eb’ li was okeb’ raj re chi sutq’iik rik’in lin yuwa’ sa’ li yamyookil ch’och’.

15 A’b’anan k’ehomaq reetal, laa’in kinye reheb’ naq: Jo’ naq yo’yo li Qaawa’, ut jo’ naq yo’yooko laa’o, ink’a’ tookub’eeq rik’in li qayuwa’ sa’ li yamyookil ch’och’ toj reetal naq taqachoy xb’aanunkil li k’a’ru kooxtaqla wi’ li Qaawa’.

16 Jo’kan ut, tiikaqo chixpaab’ankil lix taqlahom li Qaawa’; jo’kan naq kub’eeqo sa’ xch’och’il li ^areechanihom li qayuwa’, xb’aan naq k’ehomaq reetal naq kixkanab’ lix oor ut lix plaat, ut k’iila paay chi b’ihomal. Ut chixjunil a’in kixb’aanu sa’ xk’ab’a’ lix ^btaqlahom li Qaawa’.

17 Xb’aan naq kixnaw naq Jerusalen tento ^ataasache’q, xb’aan lix maa’usilaleb’ li tenamit.

18 Xb’aan naq k’ehomaq reetal, ^axe’xtz’eqtaana li raatineb’ li profeet. Jo’kan ut, wi ta taakanaaq lin yuwa’ chi wank sa’ li ch’och’ chirix naq ^btaqlanb’il chi eelelik chaq sa’ li ch’och’, k’ehomaq reetal, a’an ajwi’ taa’oso’q raj. Jo’kan naq ki’ajman naq taa’eeleliq chaq sa’ li ch’och’.

19 Ut k’ehomaq reetal, a’an xchaab’ilal xna’leb’ li Dios naq taqeechani li ^aesil a’in li tz’iib’anb’il, re naq taqak’uula choq’ reheb’ li qalal qak’ajol li raatinob’aaleb’ li qayuwa’;

20 Ut jo’kan ajwi’ re naq ^ataqak’uula choq’ reheb’ li aatin yeeb’il chaq xb’aan xtz’uumaleb’ re chixjunil li santil profeet, li kiq’axtesiik chaq reheb’ xb’aan lix Musiq’ ut lix wankil li Dios chalen chaq naq kitikla li ruchich’och’, toj sa’ li kutan ajwi’ a’in li wanko wi’.

21 Ut kik’ulman naq chi jo’ka’in li aatin kinq’unb’esiheb’ wi’ xch’ool li was, re naq tiikaqeb’ chixpaab’ankileb’ lix taqlahom li Dios.

22 Ut kik’ulman naq kookub’e sa’ xch’och’il li qeechanihom, ut kiqach’utub’ li ^aqa-oor, ut li qaplaat, ut li k’a’ re ru qe terto xtz’aq.

23 Ut chirix naq kiqach’utub’ li k’a’aq re ru a’in, kootaqe’ wi’chik sa’ rochoch laj Laban.

24 Ut kik’ulman naq koo’ok rik’in laj Laban, ut kiqatz’aama chiru naq tixk’e qe li tz’iib’anb’il esil li wan chi tz’iib’anb’il chiruheb’ li ^aperel ch’iich’ bronce, ut choq’ reeqaj a’an laa’o taqak’e re a’an li qa-oor, ut li qaplaat, ut chixjunil li k’a’aq re ru qe terto xtz’aq.

25 Ut naq kiril laj Laban li k’a’ru qe, ut naq q’axal naab’al, kik’ulman naq ^akixrahi ru, jo’kan naq kooralinasi chaq, ut kixtaqlaheb’ chaq lix moos chiqakamsinkil, re naq a’an taareechani li k’a’ re ru qe.

26 Ut kik’ulman naq koo’eelelik chiruheb’ lix moos laj Laban, ut ki’aajelo’ chiqu xkanab’ankil li k’a’aq re ru qe, ut kit’ane’ sa’ ruq’ laj Laban.

27 Ut kik’ulman naq koo’eelelik sa’ li yamyookil ch’och’, ut eb’ lix moos laj Laban ink’a’ koohe’xtaw, ut kiqamuq qib’ sa’ xtehelal jun pek.

28 Ut kik’ulman naq laj Laman kijosq’o’ wik’in, ut rik’in inyuwa’ ajwi’, ut jo’kan ajwi’ laj Lemuel, xb’aan naq a’an kixk’e xch’ool chirab’inkil li raatin laj Laman. Jo’kan naq laj Laman ut laj Lemuel ke’xye k’iila ^akawil aatin qe laa’o li riitz’ineb’, ut koohe’xsak’ rik’in jun li che’.

29 Ut naq yookeb’ chiqasak’b’al rik’in jun li che’, k’ehomaq reetal, kik’ulman naq kichal jun lix ^aanjel li Qaawa’ ut kixaqli chiruheb’, ut kiraatinaheb’, ut kixye: K’a’ut naq nekesak’ lee riitz’in rik’in jun che’? Ma ink’a’ tab’i’ nekenaw naq li Qaawa’ kixsik’ ru choq’ aj ^btaqlanel sa’ eeb’een laa’ex, ut a’in sa’ xk’ab’a’ lee maa’usilal? K’ehomaq reetal, textaqe’q wi’chik Jerusalen, ut li Qaawa’ tixq’axtesi laj Laban sa’ eeruq’.

30 Ut chirix naq kooraatina chaq li ^aanjel, xko’o.

31 Ut chirix naq li anjel ak xko’o, laj Laman ut laj Lemuel ke’ok wi’chik chi ^awech’ink, ut ke’xye: Chan ru taaruuq naq li Qaawa’ tixq’axtesi laj Laban sa’ quq’? K’ehomaq reetal, a’an jun winq kaw xmetz’ew, ut naru naxtaqla lajeeb’ roxk’aal, relik chi yaal, naru ajwi’ naxkamsi lajeeb’ roxk’aal; k’a’ut naq ink’a’ tooxkamsi laa’o?