Ko e ʻUluaki Tohi ʻa Nīfaí

Ko ʻene Pulé mo e Ngāue Fakafaifekaú

Ko ha fakamatala kia Līhai mo hono uaifi ko Selaiá, pea mo hono ngaahi foha ʻe toko fā, naʻe ui (ʻo kamata mei he lahí) ko Leimana, mo Lēmiuela, mo Samu, pea mo Nīfai. ʻOku fakatokanga ʻa e ʻEikí kia Līhai ke hiki mei he fonua ko Selūsalemá, koeʻuhi ko ʻene kikite ki he kakaí ʻo kau ki heʻenau angahalá, pea ʻoku nau feinga ke tāmateʻi ia. ʻOkú ne fononga ʻi ha ʻaho ʻe tolu ki he feituʻu maomaonganoá mo hono fāmilí. ʻOku ʻave ʻe Nīfai ʻa hono ngaahi tokouá, ʻo nau foki ki he fonua ko Selūsalemá ke ʻomai ʻa e lekooti ʻo e kau Siú. Ko e fakamatala ʻo ʻenau ngaahi faingataʻaʻiá. ʻOku nau mali mo e ngaahi ʻofefine ʻo ʻIsimelí. ʻOku nau ʻave honau ngaahi fāmilí ʻo nau ō ki he feituʻu maomaonganoá. Ko honau ngaahi faingataʻaʻiá mo e ngaahi mamahi ʻi he feituʻu maomaonganoá. Ko e hala ʻo ʻenau ngaahi fonongá. Ko ʻenau aʻu ki he ngaahi fuʻu vai lahí. ʻOku angatuʻu ʻa e ngaahi tokoua ʻo Nīfaí kiate ia. ʻOkú ne valokiʻi ʻa kinautolu, peá ne foʻu ha vaka. ʻOku nau ui ʻa e potu ko iá ko Mahu. ʻOku nau folau atu ʻi he fuʻu vai lahí ki he fonua ʻo e talaʻofá, mo e ngaahi fakamatala kehe. ʻOku fakatatau ʻeni ki he fakamatala ʻa Nīfaí; pe ko hono fakalea ʻe tahá, ko au, Nīfai naʻá ku hiki ʻa e lekooti ko ʻení.

Vahe 1

ʻOku kamata ʻe Nīfai ʻa e lekooti ʻo hono kakaí—ʻOku mamata ʻa Līhai ʻi ha meʻa-hā-mai ki ha pou afi peá ne lau mei ha tohi ʻo e kikite—ʻOkú ne fakafetaʻi ki he ʻOtuá, mo ne tomuʻa fakahā ʻa e hāʻele mai ʻa e Mīsaiá, mo ne kikiteʻi hono fakaʻauha ʻo Selūsalemá—ʻOku fakatangaʻi ia ʻe he kau Siú. Taʻu 600 K.M. nai.

1 Ko au, ^aNīfai, ko e meʻa ʻi he fanauʻi au ʻi he ^bongo mātuʻa ^clelei, ko ia naʻe ^dakonekina ai au ʻi he ʻilo kotoa ʻa ʻeku tamaí; pea ko e meʻa ʻi heʻeku sio ki he ngaahi ^efaingataʻaʻia lahi lolotonga ʻa hoku ngaahi ʻahó, ka neongo iá, kuo ʻofeina lahi au ʻe he ʻEikí ʻi hoku ngaahi ʻahó kotoa pē; ʻio, ko e meʻa ʻi heʻeku maʻu ha ʻilo lahi ki he angalelei pea mo e ngaahi ^fmeʻa lilo ʻa e ʻOtuá, ko ia ʻoku ou hiki ai ha ^glekooti ʻo ʻeku ngaahi ngāué ʻi hoku ngaahi ʻahó.

2 ʻIo, ʻoku ou hiki ha lekooti ʻi he ^alea ʻa ʻeku tamaí, ʻa ia ʻoku kau ai ʻa e ʻilo ʻa e kau Siú pea mo e lea ʻa e kau ʻIsipité.

3 Pea ʻoku ou ʻiloʻi ʻoku ^amoʻoni ʻa e lekooti ʻoku ou hikí; pea ʻoku ou hiki ia ʻaki hoku nima pē ʻoʻokú; pea ʻoku ou hiki ia ʻo fakatatau ki heʻeku ʻiló.

4 He naʻe hoko ʻo pehē ʻi he kamataʻanga ʻo e ^aʻuluaki taʻu ʻo e pule ʻa ^bSetikia, ko e tuʻi ʻo Siutá, (ko ʻeku tamai, ko Līhaí, kuo nofo ia ʻi ^cSelūsalema ʻi hono ngaahi ʻaho kotoa pē); pea ʻi he taʻu pē ko iá naʻe haʻu ha kau ^dpalōfita tokolahi, ʻo kikite ki he kakaí kuo pau ke nau fakatomala, ka ʻikai ʻe fakaʻauha ʻa e fuʻu kolo ko ^eSelūsalemá.

5 Ko ia naʻe hoko ʻo pehē lolotonga ʻa e ʻalu atu ʻa ʻeku tamai, ko ^aLīhaí, naʻá ne lotu ki he ʻEikí, ʻio, ʻaki hono ^blotó kotoa, koeʻuhi ko hono kakaí.

6 Pea naʻe hoko ʻo pehē, lolotonga ʻene lotu ki he ʻEikí, naʻe haʻu ha ^apou afi ʻo nofo ʻi ha maka ʻi muʻa ʻiate ia; peá ne mamata mo fanongo ki ha ngaahi meʻa lahi; pea koeʻuhi ko e ngaahi meʻa naʻá ne mamata mo fanongo ki aí naʻá ne manavahē mo tetetete lahi ʻaupito.

7 Pea naʻe hoko ʻo pehē naʻá ne foki ki hono fale ʻoʻona ʻi Selūsalemá; ʻo ne tō hifo ki hono mohengá, kuo ^afakavaivaiʻi ia ʻe he Laumālié pea mo e ngaahi meʻa kuó ne mamata ki aí.

8 Pea lolotonga hono fakavaivaiʻi pehē ia ʻe he Laumālié, naʻe ʻave ia ʻi ha ^ameʻa-hā-mai, ʻo aʻu ki heʻene mamata ai ki hono fakaava mai ʻo e ngaahi ^blangí, pea naʻá ne pehē naʻá ne mamata ki he ʻOtuá ʻoku ʻafio ʻi hono ʻafioʻangá, kuo takatakai ʻiate ia ʻa e haʻohaʻonga ʻo e kau ʻāngelo taʻefaʻalaua ʻoku nau tuʻu ʻo hangē ʻoku nau hiva mo fakafetaʻi ki honau ʻOtuá.

9 Pea naʻe hoko ʻo pehē naʻá ne mamata ki ha Tokotaha ʻoku ʻalu hifo mei he loto langí, ʻo ne vakai naʻe mahulu ange ʻa hono ^angingilá ʻi he laʻā ʻi he hoʻatā mālie.

10 Pea naʻá ne mamata foki ki ha toko ^ahongofulu mā ua kehe ʻoku muimui ʻiate ia, pea naʻe lahi hake ʻa honau ngingilá ʻi he ngaahi fetuʻu ʻi he ʻataá.

11 Pea naʻa nau ō hifo ʻo ʻalu atu ʻi he funga ʻo e māmaní; pea naʻe haʻu ʻa e ʻuluakí ʻo tuʻu ʻi muʻa ʻi heʻeku tamaí; ʻo ne ʻoange kiate ia ha ^atohi, ʻo fekau kiate ia ke ne lau.

12 Pea naʻe hoko ʻo pehē ʻi he lolotonga ʻene laú, naʻe fakafonu ʻaki ia ʻa e ^aLaumālie ʻo e ʻEikí.

13 Peá ne lau, ʻo pehē: ʻE malaʻia, ʻe malaʻia, ʻa Selūsalema, he kuó u mamata ki hoʻo ngaahi ^afakalieliá! ʻIo, naʻe lau ʻe heʻeku tamaí ha ngaahi meʻa lahi naʻe kau ki ^bSelūsalema—ʻoku totonu ke fakaʻauha ia, pea mo hono kakai ʻoku nofo aí; ʻe tō ʻa e tokolahi ʻi he heletā; pea ʻe ^cʻave pōpula ʻa e tokolahi ki Pāpilone.

14 Pea naʻe hoko ʻo pehē ʻi he ʻosi hono lau mo mamata ʻa ʻeku tamaí ki ha ngaahi meʻa maʻongoʻonga mo fakaofo lahi, naʻá ne kalanga ʻaki ha ngaahi meʻa lahi ki he ʻEikí; ʻo hangē ko e: ʻOku maʻongoʻonga mo fakaofo ʻa hoʻo ngaahi ngāué, ʻE ʻEiki ko e ʻOtua Māfimafí! ʻOku māʻolunga ho ʻafioʻangá ʻi he ngaahi langí, pea ʻoku tōfuhia ʻa e kakai kotoa pē ʻo māmaní ʻi ho māfimafí, mo hoʻo angaleleí, mo hoʻo ʻaloʻofá; pea, koeʻuhi ʻokú ke ʻaloʻofa, ʻe ʻikai te ke tuku ʻa kinautolu ʻoku ^ahaʻu kiate koé ke ʻauha.

15 Pea naʻe pehē ʻa e lea ʻa ʻeku tamaí ʻi heʻene fakafetaʻi ki hono ʻOtuá; he naʻe nēkeneka ʻa hono laumālié, pea naʻe fonu mo hono lotó kotoa, koeʻuhi ko e ngaahi meʻa kuó ne mamata ki aí, ʻio, ʻa ia kuo fakahā ʻe he ʻEikí kiate iá.

16 Pea ko ʻeni, ko au, Nīfai, ʻoku ʻikai te u fai ha fakamatala kakato ki he ngaahi meʻa kuo tohi ʻe heʻeku tamaí, he kuó ne tohi ha ngaahi meʻa lahi naʻá ne mamata ki ai ʻi ha ngaahi meʻa-hā-mai mo ha ngaahi misi; pea kuó ne tohi foki mo ha ngaahi meʻa lahi naʻá ne ^akikiteʻi mo lea ʻaki ki heʻene fānaú, ʻa ia ʻe ʻikai te u fai ha fakamatala kakato ki ai.

17 Ka te u hiki pē ha fakamatala ʻo ʻeku ngaahi ngāue ʻi hoku ngaahi ʻahó. Vakai, ʻoku ou fai hano hiki ^afakanounou ʻo e ^blekooti ʻa ʻeku tamaí, ʻi ha ngaahi peleti kuó u ngaohi ʻaki hoku nima pē ʻoʻokú; ko ia, ʻo ka hili ʻeku hiki fakanounou ʻa e lekooti ʻa ʻeku tamaí te u toki fai ha fakamatala ki heʻeku moʻui ʻaʻakú.

18 Ko ia, ko hoku lotó ke mou ʻiloʻi ʻi he hili hono fakahā mai ʻe he ʻEikí ha ngaahi meʻa fakaofo lahi pehē fau ki heʻeku tamai, ko Līhaí, ʻio, ʻo kau ki he ^afakaʻauha ʻo Selūsalemá, vakai naʻá ne ʻalu atu ʻi he lotolotonga ʻo e kakaí, ʻo kamata ke ^bkikite mo fakahā kiate kinautolu ʻo kau ki he ngaahi meʻa kuó ne fakatou mamata mo fanongo ki aí.

19 Pea naʻe hoko ʻo pehē naʻe ^amanukiʻi ia ʻe he kau Siú koeʻuhi ko e ngaahi meʻa naʻá ne fakamoʻoniʻi ʻo kau kiate kinautolú; he naʻá ne fakamoʻoniʻi totonu ʻa ʻenau fai angahalá mo ʻenau ngaahi anga-fakalieliá; pea naʻá ne fakamoʻoniʻi ʻoku fakahā ʻo mahinongofua ʻe he ngaahi meʻa naʻá ne mamata mo fanongo aí, kae ʻumaʻā foki ʻa e ngaahi meʻa naʻá ne lau ʻi he tohí ʻe hāʻele mai ha ^bMīsaia, kae ʻumaʻā foki hono huhuʻi ʻo e māmaní.

20 Pea ʻi he fanongo ʻa e kau Siú ki he ngaahi meʻa ní naʻa nau ʻita kiate ia; ʻio, ʻo hangē ki he kau palōfita ʻi muʻá, ʻa ia naʻa nau ^akapusi ki tuʻa, mo tolomakaʻi, mo tāmateʻí; pea naʻa nau feinga foki ke toʻo mo ʻene moʻuí. Kae vakai, ko au, Nīfai, te u fakahā kiate kimoutolu ʻoku ʻi he kakai kotoa pē kuo fili ʻe he ʻEikí ʻa ʻene ngaahi ^bʻaloʻofa ongongofuá, koeʻuhi ko ʻenau tuí, ke fakaiviʻi ʻa kinautolu ʻo aʻu ki heʻenau maʻu ʻa e mālohi ʻo e fakahaofí.