“Aoaoga i le Atamai i Aoaoga Faavae,” Aoaoga o Mataupu Aoaoina o le Seminare (2022)
“Aoaoga i le Atamai i Aoaoga Faavae,” Aoaoga o Mataupu Aoaoina a le Seminare
Ata
tamaiti aoga o loo suesue
Aoaoga i le Atamai o Aoaoga Faavae
Faatomuaga i le Atamai i Aoaoga Faavae
I le 2016, na folasia mai ai e Peresitene M. Russell Ballard o le Korama a Aposetolo e Toasefululua le faamoemoega taua o le atamai i aoaoga faavae i olaga o le autalavou i aso nei ma le matafaioi taua o loo ia te oe o se faiaoga seminare i le faatinoina:
Ata
Peresitene M. Russell Ballard
Sa na o se augatupulaga talu ai sa tapulaa moni ai i o tatou tagata talavou le mauaina o faamatalaga e uiga i lo tatou talafaasolopito, aoaoga faavae, ma faatinoga i anomea na lolomiina e le Ekalesia. E toaitiiti ni tamaiti aoga sa feagai ma nisi malamalamaaga. O le toatele, o a tatou tagata talavou sa ola i se olaga sa puipuia.
O a tatou mataupu aoaoina i lena taimi, e ui ina sa lelei, ae sa le’i saunia ai tamaiti aoga mo lenei vaitaimi—o se vaitaimi e toetoe lava a maua faafuasei mea uma e uiga i le Ekalesia mai soo se tulaga e mafai ai. I le asō, o mea ua latou vaaia i a latou masini feaveai atonu e luitauina ai le faatuatua pei foi ona faamalosia ai le faatuatua. …
I le iloa ai o nei luitau, na faamaonia talu ai nei e le Fono Faatonu o Aoga a le Ekalesia se fuafuaga taulamua i le seminare ua ta’ua o le Taulotoina o Aoaoga Faavae. … O lenei ta’imua o le a taulai atu i le fausia ma le faamalosia o le faatuatua o a tatou tamaiti aoga ia Iesu Keriso ma faamausali i latou i le gafatia faateleina e ola ma faaaoga le talalelei i o latou olaga. Faaaogaina o tusitusiga paia ma upu a perofeta, o le a latou aoao ai pe faapefea ona faatino ma le faatuatua ia Keriso e maua ai le malamalama faaleagaga ma le malamalamaaga e uiga i Lana talalelei. Ma o le a latou maua avanoa e aoao ai le auala e faaaoga ai aoaoga faavae a Keriso ma mataupu faavae o le talalelei i fesili ma luitau latou te faalogo ma vaaia i aso taitasi i o latou tupulaga ma luga o faasalalauga faaagafesootai.
O lenei taulamua ua musuia ma o le a faatino i le taimi sao. O le a i ai se aafiaga matagofie i luga o o tatou tagata talavou. Peitai, o le manuia o le Atamai i Aoaoga Faavae, ma isi polokalama uma o suesuega i le OAE, o le a faalagolago i le tulaga taua ia te outou. (M. Russell Ballard, “O Avanoa ma Tiutetauave a Faiaoga o le OAE i le Seneturi 21” [o se faasauga ma se Pulega Aoao, Fep. 26, 2016], broadcasts.ChurchofJesusChrist.org)
O le a se mea e tulaga ese mai ia te oe e uiga i le saunoaga a Peresitene Ballard?
Aisea e te manatu ai e manaomia e le autalavou i aso nei ona saunia i se auala ese nai lo augatupulaga ua mavae e faamalosia ai lo latou faatuatua ia Iesu Keriso?
Atamai i Aoaoga Faavae i le Mataupu aoaoina
I le tusi lesona a le faiaoga, o aafiaga e aoao ai o le atamai i aoaoga faavae ua aofia ai i vaiaso taitasi e fesoasoani ai i tamaiti aoga ia ausia taunuuga o le atamai i aoaoga faavae. O nei taunuuga e aofia ai le fesoasoani i tamaiti aoga
aoao ma faaaoga mataupu faavae paia mo le mauaina o le malamalama faaleagaga ma
ia atamai i fuaitau faaleaoaoga faavae ma aoaoga faavae o le talalelei a Iesu Keriso o loo latou aoao atu.
E ala i le taulotoina o fuaitau filifilia ma le aoaoga faavae o le talalelei a Iesu Keriso latou te aoao atu, o le a mafai ai e tamaiti aoga ona
iloa ma malamalama i aoaoga faavae o loo aoao atu i fuaitau o mau o le atamai i aoaoga faavae;
faamatala manino le aoaoga faavae i le faaaogaina o fuaitau o mau e fesootai i le atamai i aoaoga faavae;
faaaoga le aoaoga faavae o le talalelei a Iesu Keriso ma mataupu faavae o le mauaina o le malamalama faaleagaga i a latou filifiliga o aso taitasi ma a latou tali i faafitauli ma fesili tau i aoaoga faavae, faaletagata lava ia, faaagafesootai, ma talafaasolopito; ma ia
manatua ma maua ia fuaitau o le atamai i aoaoga faavae ma tauloto o latou fasifuaitau autu o mau.
“Mauaina o Lesona o le Malamalama” Faaleagaga
E mafai ona e folasia atu i tagata aoga ia mataupu faavae o le mauaina o le malamalama faaleagaga e ala i le aoao atu o le “Mauaina o le Malamalama Faaleagaga” vaega 1, 2, ma le 3. Ia mautinoa e aoao atu nei lesona taitasi pe a faia le seminare i le taimi e lata i le amataga o le tausaga aoga. O nei lesona ua tuuina atu ai mataupu faavae autu lea o le a fausia ai i luga isi lesona o le atamai i aoaoga faavae. O le mauaina o lesona o le malamalama faaleagaga e tatau ona aoaoina i tausaga uma o le seminare. O vaega taitasi e folasia atu ai i tamaiti aoga se tasi o mataupu faavae o le mauaina o le malamalama faaleagaga.
Vaega 1: Faatino i le Faatuatua
Vaega 2: Iloilo fesili ma atugaluga i se vaaiga e faavavau
Vaega 3: Saili le malamalama atili e ala i punaoa ua filifilia mai le lagi
Lesona o Fuaitau o le Atamai i Aoaoga Faavae
E lua ni lesona e fesootai ma fuaitau taitasi o le atamai i aoaoga faavae, o se lesona faatatau o le talaaga ma le lesona o le atamai i aoaoga faavae. O taunuuga o le atamai i aoaoga faavae e talanoaina faatasi i nei lesona e lua.
I le lesona faatatau o le talaaga, o le fuaitau o le atamai i aoaoga faavae ua folasia atu i le faatatauga o le poloka mau. E tatau i tamaiti aoga ona lava se taimi e suesue ai le aoaoga faavae o loo aoao mai e le fuaitau ina ia latou iloa ma malamalama i ai. E fesoasoani lenei mea e saunia ai tagata aoga e faamalamalama ma faaaoga le aoaoga faavae i le lesona lenei o le fuaitau o le atamai i aoaoga faavae.
I le lesona o le fuaitau o le atamai i aoaoga faavae, o le a maua ai e tamaiti aoga se avanoa e faamatala ai le aoaoga faavae e faaaoga ai le fuaitau o le atamai i aoaoga faavae ma amata ai ona tauloto le mau faasino ma le fuaitau autu o mau. E mafai foi ona e fautuaina tamaiti aoga e tauloto le fuaitau atoa. O le fesoasoani i tamaiti aoga e faamatala le aoaoga faavae ma tauloto le mau faasino ma le fasifuaitau autu o mau o ni taunuuga taua o le atamai i aoaoga faavae. O nei gaoioiga e aoao ai e le manaomia ona faaalu ai le tele o le taimi, ae e taua le faamuamua.
O le vaega o le “Faataitai le faaaogaina” e tatau ona faaalu ai le tele o le taimi i le lesona o le fuaitau o le atamai i aoaoga faavae. O vaega taitasi o le faataitai e amata i se avanoa mo tagata aoga e toe iloilo ai mataupu faavae o le mauaina o le malamalama faaleagaga. E tatau i tamaiti aoga ona iloiloina e le aunoa nei mataupu faavae ina ia mautu lo latou mautinoa e faaaoga ai. Ia faaeteete ia aua nei manatu faapea ona ua iloa lelei e se tasi pe toalua o tamaiti aoga ia mataupu faavae ona faapea lea ua iloa lelei ai e au tamaiti aoga uma.
A uma ona iloiloina mataupu faavae o le mauaina o le malamalama faaleagaga, o le a tuuina atu loa i tamaiti aoga se tulaga faataitai e faapupula mai ai se fesili po o se tulaga e mafai ona fesoasoani ai se malamalamaaga sa’o i aoaoga faavae moni. E mafai e tagata aoga ona faataitai le faaaogaina o le aoaoga faavae ua aoaoina i le fuaitau o le atamai i aoaoga faavae ma mataupu faavae o le mauaina o le malamalama faaleagaga e tali atu ai i le fesili po o le tulaga.
E mafai ona e fetuunaia tulaga ma fesili fautuaina po o isi gaoioiga e aoao ai pe a manaomia ina ia ausia lelei ai manaoga o tamaiti aoga. Ia mautinoa o soo se fetuunaiga lava e tuuina atu ai i tagata aoga ni avanoa e faataitai ai le faaaogaina o le aoaoga faavae ma mataupu faavae o le mauaina o le malamalama faaleagaga i se tulaga moni talafeagai.
O le a e matauina foi i le faaiuga o lesona taitasi o le atamai i aoaoga faavae se iloiloga fautuaina e fai i le vasega i ni nai aso mulimuli ane. O nei gaoioiga toeiloilo ua mamanuina e fesoasoani ai i tamaiti aoga e tauloto le mau faasino ma le fuaitau autu o mau mo fuaitau taitasi o le atamai i aoaoga faavae.
Toeiloilo le Atamai i Aoaoga Faavae
O nisi o poloka mau faalevaiaso i le fuasaoasaoa i le Sau, Mulimuli Mai ia te A’u e le aofia ai se fuaitau o le atamai i aoaoga faavae. Ina ia mafai ona tuuina atu i tamaiti aoga se aafiaga faalevaiaso i le atamai i aoaoga faavae, o le tusi lesona a le faiaoga, tusi lesona a le tagata aoga, ma le mataupu aoaoina o le seminare i le initoneti e aofia ai se iloiloga o le atamai i aoaoga faavae o se tasi o lesona e lima i nei vaiaso. O nei lesona ua mamanuina e fesoasoani ai i tagata aoga e tauloto mau faasino ma fuaitau autu o mau, malamalama i le aoaoga faavae, ma faaaoga le aoaoga faavae.
Afai e i ai se lesona o le fuaitau o le atamai i aoaoga faavae na misi pe o le a misia e tamaiti aoga ona o se malologa i le faasologa o a latou aoga, e tatau ona e aoao atu nei lesona o fuaitau o le atamai i aoaoga faavae e sui ai se iloiloga o le atamai i aoaoga faavae. O le lesona o le faatatauga e fesootai ma le lesona o le atamai i aoaoga faavae o le a manaomia foi ona fesiitai e sui ai se isi lesona i le aluga o le vaiaso. Tagai i le taiala o le saoasaoa i le lotoifale ua saunia e lau taitai faamaopoopo po o le taitai o le polokalama e vaai pe o afea e tatau ona e aoao atu ai lesona o le atamai i aoaoga faavae lea e misi e tamaiti aoga ona o le faasologa o a latou aoga.
Tomai e Aoao Atu ai ma le Mataalia le Atamai i Aoaoga Faavae
O aoaoga nei e aoao atu ai tomai e mafai ona fesoasoani i tamaiti aoga e ausia ai le atamai i aoaoga faavae. O aoaoga taitasi (1) ua faailoa mai ai ma faamatalaina ai le tomai, (2) tuuina atu ai se faataitaiga ma se faataitaiga mo le auala e faaaoga ai le tomai, (3) e aofia ai se avanoa e manatunatu ai e ala i le iloiloina o le tomai, ma le (4) tuuina atu se valaaulia e faaaofia ai le tomai i lau aoaoga.
Faamatala le mafuaaga mo se gaoioiga o le atamai i aoaoga faavae.
Faamatalatala:
O le faasoaina atu o se mafuaaga mo le faia o se gaoioiga o le atamai i aoaoga faavae e mafai ona faaosofia ai tamaiti aoga e auai i le gaoioiga. E mafai foi ona faatagaina le Agaga Paia e aoao i latou e uiga i le taua o le gaoioiga. A uma ona e ta’u mai mea o le a fai e le vasega, faasoa mai se mafuaaga se tasi pe lua foi pe aisea ua e faia ai le gaoioiga ina ia mafai ai e tamaiti aoga ona malamalama i le taua o le faia.
Ituaiga:
“Vasega, mo nai minute o le a sosoo ai o le a tatou faamatala atu ai le aoaoga faavae ua tatou aoaoina mai le Luka 2:10–12 o Iesu Keriso o le Faaola o le lalolagi. O se tasi o mafuaaga o loo tatou faia ai lenei mea o le fesoasoani lea ia i tatou ia mafai ona tali atu ma le mautinoa pe a fesili mai se tasi tatou te iloa pe aisea e taua ai Iesu Keriso ia i tatou.”
Faataitai:
Faamaea le uunaiga lenei.
“Lelei, vasega Sei o tatou faia se gaoioiga o le a fesoasoani ia i tatou e tauloto ai le faasinoga o le atamai i aoaoga faavae i le fasifuaitau autu. O se tasi o mafuaaga o loo tatou galulue ai e tauloto lenei mea o le …”
“Mo nai minute e sosoo ai, o le a tatou iloiloina ai mataupu faavae o le mauaina o le malamalama faaleagaga. O le iloaina o nei mataupu faavae e mafai ona fesoasoani ia i tatou …”
“O le a tatou faataitaia le faaaogaina o mataupu faavae e tolu o le mauaina o le malamalama faaleagaga. O le faaaogaina o nei mataupu faavae e mafai ona …”
Auiliili:
O le a se mea ua e aoaoina a o e faataitai ona faamalamalama atu mafuaaga mo le faia o se gaoioiga o le atamai i aoaoga faavae?
Tuufaatasi:
A o e saunia gaoioiga taitasi o le atamai i aoaoga faavae, tusi i lalo ia le itiiti ifo ma le tasi se mafuaaga o le a taua ai i tamaiti aoga.
Valaaulia tamaiti aoga e toe faamanatu ia mataupu faavae o le mauaina o le malamalama faaleagaga.
Faamatalatala:
A o e iloiloina e le aunoa ia mataupu faavae o le mauaina o le malamalama faaleagaga i lau vasega, e mafai e le Agaga Paia ona fesoasoani i tagata aoga ia manatua ma faaaoga i taimi e manaomia ai. E mafai ona e valaaulia tagata aoga e toe faamanatu nei mataupu faavae ae e te lei faasoaina atu le tulaga faataitai pe a o latou galulue i tulaga faataitai. O nei valaaulia e aofia ai se avanoa mo tamaiti aoga e iloilo ai ia le itiiti ifo ma le tasi se mataupu faavae, faatonuga po o le a le umi e tatau ona latou iloiloina ai le mataupu faavae, ma se avanoa mo i latou e faasoa mai ai mea sa latou aoaoina. O le faia o lenei mea, o le a sili atu ai ona mafai e tamaiti aoga ona faaaoga mataupu faavae o se vaega o le polokalama faataitai.
Ituaiga:
A o tatou iloiloina i aso nei ia mataupu faavae o le mauaina o le malamalama faaleagaga mai le Pepa Autu o le Atamai i Aoaoga Faavae ( 2018), o le a tatou vaevaeina i ni vaega taitoatolu. O le a iloiloina e vaega taitasi se mataupu faavae e ese mai ai.
Faaaoga le tolu i le fa minute e faitau ai ma sauni e faasoa atu i lau vaega se auala se tasi e mafai ai e lau mataupu faavae ona fesoasoani i se tasi o loo feagai ma se fesili po o se tulaga faigata.
Faataitai:
Tusi i lalo se valaaulia mo tamaiti aoga taitasi e iloilo se mataupu faavae se tasi o le mauaina o le malamalama faaleagaga.
Faataitai ona tuuina atu lau valaaulia i se paaga, tagata o le aiga, po o se uo.
Auiliili:
A o e faataitaia, o le a se mea ua e aoaoina e uiga i le taua o le tuuina atu o se valaaulia manino ma le loto i ai e iloilo ai mataupu faavae o le mauaina o le malamalama faaleagaga?
Tuufaatasi:
Tusi i lalo se fuafuaga e valaaulia ai pea lava pea tagata aoga e toe faamanatu ia mataupu faavae o le mauaina o le malamalama faaleagaga.
Fai fesili e fesoasoani ai i tagata aoga e faaleo mai pe mafai faapefea e mataupu faavae e tolu o le mauaina o le malamalama faaleagaga ona fesoasoani i se tasi o loo feagai ma se fesili po o se tulaga faigata.
Faamatalatala:
A uma ona iloilo e tagata aoga ia mataupu faavae o le mauaina o le malamalama faaleagaga ma faitau le tulaga faataitai, fai atu ia i latou ni fesili e valaaulia ai i latou e faamatala mai po o a mataupu faavae e mafai ona fesoasoani i le tulaga faataitai. O lau fesili e tatau ona:
Ia tatala-faaiuga.
Fesoasoani i tagata aoga e faaaoga mataupu faavae uma e tolu o le mauaina o le malamalama faaleagaga.
Tuu atu i tamaiti aoga e faamatala mai o latou manatu ma lagona.
A o saili tamaiti aoga e tali nei fesili, o le a sili atu ona latou saunia e fetaiai ma fesili ma tulaga i o latou olaga ma le faatuatua.
Ituaiga:
Manatua ua uma ona toeiloiloina e tamaiti aoga ia mataupu faavae o le mauaina o le malamalama faaleagaga ma suesueina le tulaga faataitai.
O le fea mataupu faavae o le mauaina o le malamalama faaleagaga o le a fesoasoani ia te oe i lenei vaaiga faataitai, ma aisea?
E mafai faapefea e lena mataupu faavae ona fesoasoani ia te oe pe a e feagai ma se fesili e pei o lea o loo i lenei tulaga?
Aisea e te manatu ai o le a aoga lenei mataupu faavae?
E mafai faapefea ona fesoasoani se mataupu faavae ese o le mauaina o le malamalama faaleagaga i lenei tulaga faataitai?
Faataitai:
Manatua ua uma ona toeiloiloina e tamaiti aoga ia mataupu faavae o le mauaina o le malamalama faaleagaga ma suesueina le tulaga faataitai.
Faamaea le gaoioiga lenei i se isi tagata e toatasi. O oe o le faiaoga, ae o le isi tagata o lau tamaitiiti aoga. Ua faatoa uma lava ona faitau ma mafaufau loloto lau tamaitiiti aoga i le tulaga lea. Fai atu i le tamaitiiti aoga ia fesili o loo i le faataitaiga ma tuu atu ia te ia e tali mai.
O se tasi o au uo e le lotu sa vaaia se soa o faifeautalai o talanoa i ni tagata i le paka. Sa fesili atu lau uo ia te oe, “Aisea e o ai faifeautalai mai le tou ekalesia ma tala’i e uiga ia Iesu? E pei o la tou te taumafai e fosi lo outou talitonuga i isi tagata. Aisea e le mafai ai e outou ona tuua ai pea latou ia e fiafia i le mea la e i ai latou?”
Faaalu le lima minute ma tusi i lalo nisi fesili e mafai ona e fai atu e fesoasoani ai i tamaiti aoga e tau mai pe mafai faapefea e mataupu faavae e tolu o le mauaina o le malamalama faaleagaga ona fesoasoani ia i latou ma isi i ni fesili po o ni tulaga faigata.
Auiliili:
O le a se mea e mafai ona tupu i olaga o tamaiti aoga a o latou faaleo atu pe mafai faapefea e mataupu faavae o le mauaina o le malamalama faaleagaga ona fesoasoani ia i latou ma isi pe a feagai ma se fesili po o se tulaga faigata?
Tuufaatasi:
O le a se mea e mafai ona e faia e fesoasoani ai i tamaiti aoga e faaleo mai pe mafai faapefea e mataupu faavae o le mauaina o le malamalama faaleagaga ona fesoasoani ia i latou ma isi pe a feagai ma se fesili po o se tulaga faigata?
Faaiuga
Vaai faalemafaufau i le auala o le a mafai ai e au tamaiti aoga ona talanoaina fesili po o atugaluga pe a mavae tausaga e fa o le faatinoina o le atamai i aoaoga faavae. I le amataga, o le a manaomia e tamaiti aoga se fesoasoani ma se lagolago sili atu mai ia te oe o se faiaoga e faaaoga ai mataupu faavae o le mauaina o le malamalama faaleagaga ma le aoaoga faavae i tulaga moni o le olaga. Peitai, a o faaauau pea ona e faatinoina le atamai i aoaoga faavae i lau vasega ma tuu atu i tamaiti aoga ni avanoa masani e faataitai ai, faaaoga mataupu faavae o le mauaina o le malamalama faaleagaga ma o le aoaoga faavae o le a avea ma se mea e masani faalenatura ona faia e tamaiti aoga. O se tasi lea o auala e mafai ona e fesoasoani ai i au tamaiti aoga e fausia ma le mausali o latou faavae i luga o le papa o Iesu Keriso ma Lana aoaoga faavae. Faamolemole ia faia mea uma e te mafaia e fesoasoani ai i au tamaiti aoga ia ausia taunuuga o le atamai i aoaoga faavae.
Mataupu e Suesue
O Le Aafiaga o Hana i le Atamai i Aoaoga Faavae ma le Auala na Faamanuiaina ai Lona Olaga
O Hana o se teineitiiti aoga seminare tausaga muamua. I se tasi o lesona muamua o le tausaga, sa faailoa atu ai ia te ia le atamai i aoaoga faavae ma mataupu faavae o le mauaina o le malamalama faaleagaga. I lena afiafi na fesili atu ai le tina o Hana ia te ia, “O le a se mea na e aoaoina i le seminare i le aso?” Sa tali atu Hana, “Sa matou talanoa e uiga i le atamai i aoaoga faavae.” Ona fesili atu lea o lona tina, “O le a le atamai i aoaoga faavae?”
“Ou te le o mautinoa lelei. O le a matou aoaoina ni mau patino. Sa matou talanoa e uiga i auala e aoao ai upumoni faaleagaga, ae e le mafai ona ou faamatalaina pe faapefea.”
I le taimi o le uluai lesona o le fuaitau o le atamai i aoaoga faavae, sa faaalu ai e le vasega a Hana sina taimi e toe iloilo ai mataupu faavae o le mauaina o le malamalama faaleagaga. Ina ua fai atu lona faiaoga i le vasega e aotele mai nei mataupu faavae, sa lei mautinoa e Hana pe mafai ona ia faia. Sa faafetai o ia ina ua volenitia se tasi o lana vasega ma tuuina atu se aotelega lelei o mataupu faavae o le mauaina o le malamalama faaleagaga. Sa lagona e Hana o le aotelega a lana uo i le vasega na faateleina ai lona malamalama.
I le faaiuga o le semesa sa faia ai e Hana le iloiloga o le atamai i aoaoga faavae. Sa talosagaina o ia e aotele ia mataupu faavae o le mauaina o le malamalama faaleagaga ma faasoa atu se taimi na ia faaaogaina ai i lona olaga. Sa ia lagona le toafimalie i le tuuina atu o se aotelega; peitai, sa le mafai ona ia mafaufau i se taimi na ia faaaogaina ai. O le mea moni, sa ia iloa ia mea ae sa ia lagonaina sa ia manaomia nisi faataitaiga ina ia mafai ai ona faaaoga i lona lava olaga.
Sa faaauau pea ona suesue Hana i le atamai i aoaoga faavae i vaiaso taitasi i le seminare. Sa fiafia o ia i lesona ma fiafia e galue i tulaga eseese na fesoasoani ia te ia e faataitai ai le faaaogaina o mataupu faavae o le mauaina o le malamalama faaleagaga. Sa faateleina lona mautinoa i lona tomai e iloa ma faamalamalama ia mau faasino a o ia taulotoina mau o le atamai i aoaoga faavae ma fuaitau autu o mau. Ma le isi, sa ia lagonaina se faamautinoaga mālū sa fiafia lona Tama oi le Lagi i ana taumafaiga ia maua le atamai i aoaoga faavae. Sa ia lagonaina se manao e tausisia ma faaalu sina taimi e ia lava i fafo atu o le taulotoina o fuaitau o le seminare faatasi ai ma le polokalama o le Atamai i Aoaoga Faavae.
I lona tausaga lona lua i le seminare na amata ai ona malamalama atili Hana i mataupu faavae o le mauaina o le malamalama faaleagaga. Sa ia lagonaina le toafimalie e galue ai e ala i tulaga faataitai o le faaaogaina ae sa lei mautinoa lelei e ia e mafai ona ia galueaiina na o ia. Sa faafetai o ia i le i ai o le fesoasoani a lona faiaoga ma tagata o lana vasega. Sa faaauau ona ia tauloto mau faasino ma fuaitau autu o mau. Sa amata ona ia lagonaina le sili atu ona mautinoa i le faamatalaina o le aoaoga faavae o loo aoaoina i fuaitau. Ina ua talanoaina na fuaitau i suesuega faaleaiga o le talalelei po o le lotu, sa lagona e Hana le mautinoa e saofaga atu i talatalanoaga ma lagonaina le alofa o le Alii a o ia faia.
A o suesue Hana i le atamai i aoaoga faavae i lona tausaga lona tolu i le seminare, sa ia vaaia se faatelega tele i lona tomai e faataitai ai mataupu faavae o le mauaina o le malamalama faaleagaga. Ina ua tuuina mai e se uo se fesili e uiga i le Ekalesia, sa faatino e Hana le faatuatua e ala i le faalagolago i mea sa ia iloa ma saili mo nisi faamatalaga e faaaoga ai punaoa mamana ua filifilia. Sa le i toafimalie atoatoa o ia i le toe faatulagaina o fesili ma atugaluga eseese e vaai atu ai ia i latou mai se vaaiga e faavavau. Sa manino ia te ia e na te manaomia nisi faataitaiga i lenei vaega.
Sa matuai fiafia lava Hana i lesona o le atamai i aoaoga faavae i lona tausaga faaiu i le seminare. Sa ia lagonaina e pei sa mafai ona ia fesoasoani i tagata o lana vasega e faataitai le faaaogaina o mataupu faavae o le mauaina o le malamalama faaleagaga. Sa ia manatua le faigata ia te ia i le taimi muamua, ma sa naunau o ia e fesoasoani i tamaiti o lana vasega e faataitai ma tuputupu ae. Sa ia lagonaina foi le faateleina o le mautinoa i le faamatalaina o le aoaoga faavae ma sa fiafia e mafai ona ia utuvai mai le tele o fuaitau eseese o mau mai lona manatuaina. O lona tomai e toe faatulaga ai faafitauli ma vaai atu ia i latou mai se vaaiga e faavavau ua faaleleia.
Ina ua mavae le faauuga sa feagai Hana ma se tofotofoga faamaoni o le faatuatua. O se tasi sa ia alofa i ai ma faatuatuaina na luitauina lona faatuatua ia Iesu Keriso ma Lana Ekalesia toefuataiina. I le taimi muamua, sa faateia Hana i faamatalaga sa tuuina atu ia te ia. Peitai, a o ia mafaufau ma le agaga tatalo i le mataupu, sa ia lagonaina le aumaia e le Agaga o lona mafanafana a o ia manatuaina mea sa ia aoaoina mai le atamai i aoaoga faavae i le seminare. Sa mafai ona ia galue i le faatuatua, vaai i mataupu mai se vaaiga e faavavau, ma saili le malamalama atili e faaaoga ai punaoa paia ua filifilia. O le tele o fuaitau o mau sa ia taulotoina na oo mai i lona mafaufau. Ina ua mavae le tele o suesuega ma tatalo, sa ia lagonaina le filemu ma le toafimalie i le malamalama, tali, ma le molimau faateleina sa ia mauaina.
Sa faafetai Hana mo lona aafiaga i le atamai i aoaoga faavae i le seminare. Sa fesoasoani ia te ia e maua ai le mautinoa e mafai ona ia galue ma faatoilalo soo se osofaiga o lona faatuatua i le lumanai.
O a ni auala e te manatu e tutusa ai aafiaga o au tamaiti aoga ma aafiaga o Hana?
O le a se mea e mafai ona e aoao mai lenei faataitaiga e mafai ona fesoasoani ia te oe a o e aoao atu le atamai i aoaoga faavae i au tamaiti aoga?