Faatomuaga i Mau Tauloto Faaleaoaoga Faavae

Tusi Autu o Mau Tauloto Faaleaoaoga Faavae , 2016


I le Tusi a Mamona, na aoao e le perofeta o Helamana ona atalii “o luga lava o le papa o lo tatou Togiola, o le Keriso lea, le Alo o le Atua, e ao ina oulua atinae ai lo oulua faavae” (Helamana 5:12). O le fausiaina o se faavae i luga o Iesu Keriso—lea e aofia ai le malamalama, talitonu, ma le ola e tusa ai ma Lana aoaoga—o le a faalolotoina lo tatou liua ma le tautinoga i le avea ai ma Ona soo, puipuia i tatou mai aafiaga o le fili, ma fesoasoani ia i tatou ia faamanuiaina ai olaga o isi.

O se tasi o ala tatou te ausia ai lenei mea o le suesue lea i tusitusiga paia i le faasologa sao i le vasega. O le isi ala tatou te fausia ai lo tatou faavae i luga o Iesu Keriso ma Lana Aoaoga Faavae e ala i se taumafaiga e taua o le Mau Tauloto Faaleaoaoga Faavae.

O le Mau Tauloto Faaleaoaoga Faavae e taulai atu i taunuuga e lua:

  1. 1.

    Aoaoina ma le faaaogaina o mataupu faavae mamana mo le mauaina o le malamalama faaleagaga

    Ua faaalia mai e le Tama Faalelagi mataupu faavae mo le mauaina o le malamalama faaleagaga. O nei mataupu faavae e aofia ai le faatinoina o le faatuatua, iloiloina o manatu ma fesili ma se vaaiga faavavau, ma le sailia o se malamalama sili atu e ala i punaoa mamana ua filifilia. Tatou te atiina ae le taulotoina faaleaoaoga faavae ao tatou faataitai le faaaogaina o nei mataupu faavae ma aoao e sailia tali i fesili faaleaoaoga faavae ma talafaasolopito i se ala lena e valaaulia ai le Agaga Paia e faamalosia lo tatou faatuatua ia Iesu Keriso ma Lana aoaoga faavae.

  2. 2.

    Taulotoina o le aoaoga faavae o le talalelei a Iesu Keriso ma fuaitau o mau lea e aoaoina ai lena aoaoga faavae

    O lenei taunuuga o Mau Tauloto Faaleaoaoga Faavae e ausiaina e:

    1. a.

      Atiina ae o se malamalama e loloto atu o autu taitasi nei ma fuaitai autu o le aoaoga faavae ua faailoa e autu taitasi:

      • O Le Aiga Atua

      • O le fuafuaga o le faaolataga

      • O Le Togiola a Iesu Keriso

      • O Le Toefuataiga

      • Perofeta ma faaaliga

      • Perisitua ma ki o le perisitua

      • Sauniga ma feagaiga

      • Faaipoipoga ma aiga

      • Poloaiga

    2. e.

      Iloaina pe faapefea ona aoaoina fuaitau o aoaoga faavae i mau tauloto faaleaoaoga faavae ma mafai ona manatua ma sue nei fuaitau.

    3. i.

      Faamatalaina manino o fuaitau taitasi o le aoaoga faavae, e faaaoga ai mau tauloto faaleaoaoga faavae e fesootai.

    4. o.

      Faaaogaina o mea tatou te aoaoina ia tatou filifiliga i aso taitasi ma a tatou tali i fesili i faafitauli faaleaoaoga faavae, faaleagafesootai, ma talafaasolopito.