Ko e Lova ʻa Selí

ʻĪmisi

Product Shot from August 2015 Liahona

“ʻE, Seli!” Naʻe sio hake ʻa Seli mei he nonoʻo hono sū lele motuʻá ʻoku taʻataʻalo ange ʻa Losa mei he laini lová. Ne ui mai ʻa Losa, “Haʻu.” “Te tau lakasi ʻetau taimi lelei tahá he ʻahó ni!”

Ne mamali hake pē ʻa Seli. Ko e lea maʻu ia ʻa Losa he fakamālohisino kotoa.

Naʻe ʻi ai ha meʻa ʻe ua ne saiʻia ai ʻa Seli ʻi heʻene ʻapiako lotoloto foʻoú. Ko e ʻuluakí, ko ʻene kau he timi lelé. ʻI he taimi naʻá ne lele aí, naʻá ne ongoʻi maʻamaʻa ʻi loto, ʻo hangē ʻoku ʻikai ha faʻahinga meʻa ke tokanga ki aí.

Ko e meʻa hono ua naʻá ne saiʻia aí ko e ʻikai ha taha te ne ʻilo kuo vetemali ʻene ongomātuʻá.

Ne nonoʻo fakaʻosi ʻe Seli e tepi hono suú pea mavahe atu leva ke kau fakataha mo e tamaiki fefine kehe ʻi he timi lele fuká. ʻOiauē! Naʻá ne mata mamahi he mauʻu hono louhiʻi vaʻé ʻi hono muiʻi suú. ʻE founga fēfē nai haʻane talaange ki heʻene tangataʻeikí ʻokú ne toe fie maʻu ha sū foʻou?

Hili e lová, naʻe fakafiefiaʻi ʻe Seli, Losa, Peki, mo Tiana ʻenau taimi foʻou lelei taha he lele fuká. “Ne u talaatu te tau lavaʻi ia he ʻahó ni!” Ko Losa mai ia.

Ne kata pē ʻa Seli. Naʻá ne ʻoange e peitoní ki heʻenau faiakó peá ne punou hifo ke vete ʻa e tepi hono suú.

“Tō atu, tamaiki” Ko Misi Kolotimani mai ia. “ʻOku mou fāitaha lelei ʻaupito. Manatuʻi ke totongi hoʻomou totongi lelé ʻapongipongi.”

Naʻe ʻikai toe malimali ʻa Seli. Naʻe mātuʻaki ngalo ʻaupito ia ʻiate ia!

ʻI heʻene foki he pasí ki ʻapí, ko e meʻa pē ne fakakaukau ki ai ʻa Selí ko hono suú mo e totongi lelé. Naʻe ʻikai te ne loto ke toe fakahohaʻasi ʻene fineʻeikí ʻaki ha toe meʻa. Pea ko e taimi fakamuimui taha naʻá ne tā ai ʻo kole paʻanga ki he Tangataʻeikí, hangē naʻá ne ʻitá. Kimuí ni maí, ne hangē ʻe ʻikai pē ha taha ia te ne fie tokoni ange kiate ia ʻi he meʻa ʻokú ne fie maʻú.

ʻI he taimi naʻá ne aʻu ai ki ʻapí, naʻe hangatonu ʻa Seli ki hono lokí. ʻI he kai efiafí, ne talanoa mo fakakakata hono ngaahi tokouá mo e ngaahi tuongaʻáné, ka naʻá ne teketekeʻi pē ʻene meʻakaí heʻene peletí.

Hili e kai efiafí ne tokoni ʻa e fineʻeikí kia Seli ʻi hono fakamaʻa e tēpilé. Ne pehē ange ʻe he fineʻeikí, “ʻOku ou fakataha mo Pīsope Paaka he pooni. Te ke fie haʻu ke maʻu ha tāpuaki lakanga fakataulaʻeiki?”

Ne kamo atu ʻa Seli. Naʻá ne manatuʻi ʻa e ngaahi tāpuaki ne faʻa tuku ange ʻe he Tangataʻeikí he taimi naʻá ne faʻa hohaʻa pe puke aí.

ʻI ha taimi siʻi mei ai, ʻi hono foaki age ʻe Pīsope Paaka ha tāpuaki kiate ia, ne ongoʻi ʻe Seli ha nonga ʻi hono lotó. Naʻá ne pehē ʻi heʻene tāpuakí, “Seli, neongo ʻoku ʻikai ʻi ʻapi hoʻo tangataʻeikí ke tokoniʻi koe he taimí ni,” “Ka ʻoku ʻi ai maʻu pē hoʻo Tamai Hēvaní. ʻOku ou tāpuakiʻi koe ke ke lava ʻo talanoa ki Ai ʻo hangē pē haʻo talanoa ki hoʻo tangataʻeikí, pea ʻe tokoni atu maʻu pē ʻa e Tamai Hēvaní.”

Naʻe ongoʻi maʻamaʻa ange ʻa Seli ʻi ha taimi fuoloa ʻeni. Naʻá ne maʻu ha ongo māfana naʻá ne talaange kiate ia ʻoku moʻoni ʻa e ngaahi lea ʻa e pīsopé. ʻOku ʻofeina ia ʻe he Tamai hēvaní pea te Ne fanongo kiate ia. ʻI Heʻene tokoní, mahalo pē te ne lava ʻo maʻu ai e loto-toʻa ke talanoa ki heʻene ongomātuʻá.

ʻI heʻena foki ki ʻapí, naʻá ne talaange ki heʻene Faʻeé fekauʻaki mo e suú pea mo e totongi lelé. Naʻá ne tūʻulutui he pō ko iá ʻo kole ki he Tamai Hēvaní ke tokoniʻi ia ke ne maʻu e loto-toʻa ke talanoa ki heʻene tangataʻeikí. Naʻá ne toe lotua ia ʻi heʻene heka he pasí ki he akó he pongipongi hono hokó. ʻI he aʻu ki he taimi naʻá ne foki ai ki ʻapi mei he akó, naʻá ne ongoʻi loto-toʻa feʻunga ke tā ki heʻene tamaí. Naʻe ʻikai te ne ongo ʻita pe kātaki siʻisiʻi ʻi he taimi naʻá ne talaange ai ʻa e meʻa naʻá ne fie maʻú. Kuo tali ʻene ngaahi lotú.

Hili ha ngaahi uike siʻi mei ai, ne nonoʻo ʻe Seli e tepi hono sū lele foʻoú peá ne lele atu ke kau fakataha mo Losa mo e tamaiki fefine kehé. Ko ha ongo fakafiefia ke ʻiloʻi ʻokú ne maʻu ha timi lelei ke poupouʻi ia. Naʻe ʻikai ke fie maʻu ke ne tuenoa ʻi heʻene lová.