Joseph ug Emma Smith sa Nauvoo

Ang Nauvoo nagrepresentar sa kataposang propetikanhong pagpangalagad ni Joseph Smith. Sa lima lamang ka tuig, gitudlo ni Joseph ang importanteng mga kamatuoran mahitungod sa kinaiyahan sa Dios, ang kapalaran sa Simbahan, ug ang saad sa mahangtorong mga pamilya. Iyang gipaila ang mga ordinansa sa templo ug miorganisar sa buhat sa templo sa ngalan sa mga katigulangan nga patay na. Iyang gipatuman ang mga yawe sa pagkapari pinaagi sa pag-establisar sa Female Relief Society sa Nauvoo. Ug iyang giseguro nga ang mga yawe sa pagpangulo magpadayon nga adunay mga propeta ug mga apostol bisan human sa iyang kamatayon. Sa tibuok nilang kinabuhi nga panag-uban sa Nauvoo, ang iyang asawa nga si Emma, miserbisyo isip kauban ni Joseph sa pagpangulo ug pagtudlo sa uban, lakip na sa ilang mga anak diha sa panimalay.

Sukad niadtong 1840, ang pamilyang Smith, ug dayon ang Community of Christ, mipreserbar sa handomanan nila ni Joseph ug Emma pinaagi sa pagtukod pag-usab sa pula nga tisa nga tindahan ni Joseph ug pag-atiman sa balay sa umahan sa pamilya, sa Balay nga Mansyon, sa Balay sa Nauvoo, ug sa sementeryo sa pamilya. Ang ilang maampingon ug mahalaron nga pagkapiniyalan ubos sa daghang mga katuigan kabahin sa kabilin niining sagradong mga dapit.

Sila si Joseph ug Emma Smith ug ang ilang upat ka batang mga anak mibalhin ngadto sa gamay, duha ka andana nga balay nga troso sa likoan sa Mississippi nianang Mayo 1839. Ang ilang pag-abot nagtimaan sa kataposan sa panahon sa kagubot alang sa ilang pamilya. Si Emma ug ang mga bata milayas sa ilang balay sa Far West, Missouri, sa sayong bahin sa tingtugnaw. Dayon nianang Abril, si Joseph ug ang iyang kaubang mga piniriso gikan sa Liberty, Missouri, miiskapo gikan sa ilang mga gwardiya ug mitabok sa sapa paingon ngadto sa Illinois. Human sa mga semanang nagpuyo isip mga mikagiw nga walay kaugalingong panimalay, ang pamilya tingale naglantaw niini nga pagbalhin. Sulod sa mosunod nga lima ka tuig, ang pamilya nakasinati og mga sakit, pagkamatay sa minahal, pagkiha, ug mga kalisod sa pinansiyal. Bisan pa man, uban sa hugot nga pagtuo kang Jesukristo ug sa tabang gikan sa ubang mga Santos sa Ulahing mga Adlaw, ang propeta ug ang iyang pamilya nakatagamtam og pipila ka kalinaw ug kahamugaway. Gisumpayan nila ang ilang troso nga balay ug mitukod og usa ka tindahan ug usa ka hotel sa duol. Kini nga mga bilding nahimong mga dapit sa pagpadayag ug instruksiyon.

Nianang Enero 1841, ang Ginoo misugo sa Mga Santos sa Ulahing mga Adlaw nga magtukod og balay sa Ginoo—ang Nauvoo Temple. Siya usab misugo kanila sa pagtukod sa “balay sak-anan,” nga ang mga langyaw moduol ug makakaplag og “kahimsog ug kaseguroan,” ug higayon nga “mamalandong sa pulong sa Ginoo, ug [sa] tukoranan nga bato nga akong gitudlo alang sa Zion.” Ang maong balay sak-anan ginganlan og Balay sa Nauvoo, ug sama sa templo, magdala usab kini sa ngalan sa Ginoo. Dako kadtong buluhaton, ug sa kataposan, ang mga Santos sa Ulahing mga Adlaw wala makahuman sa proyekto sa wala pa kabiya ang kadaghanan nila sa Illinois. Sugod sa 1860, si Lewis Bidamon migamit sa bato ug bika gikan sa Balay sa Nauvoo aron makahimo og tipik sa katumanan sa pulong sa Ginoo pinaagi sa pag-abli sa Daplin sa Sapa nga Mansyon ug sa mga kwadra sa Bidamon.

Mga bulan lang human sa pagpahigayon sa tukoranang bato sa Balay sa Nauvoo, si Joseph Smith miabli og dakong tindahan, nga adunay duha ka andana nga hinimo sa pula nga bika. Sa ibabaw sa tindahan mao ang personal nga opisina ni Joseph Smith ug usa ka dakong pundokanan nga lawak. Nianang ibabaw nga opisina, si Joseph misulat og mga artikulo sa pamantalaan agig tubag ngadto ni John Wentworth, usa ka editor sa pamantalaan sa Chicago. Ang maong sulat naglakip sa 13 ka Artikulo sa Hugot nga Pagtuo ug sa usa ka gamhanang pamahayag sa kapalaran sa Simbahan nga karon nailhan nga Ang Sumbanan sa Kamatuoran.

Niadtong Marso 17, 1842, si Joseph Smith mipundok uban sa iyang asawa, si Emma, ug sa grupo sa uban pang mga 20 ka mga lalaki ug mga babaye diha sa lawak ibabaw sa tindahan. Kini nga panagtigom nag-organisa sa Female Relief Society sa Nauvoo, uban ni Emma Smith isip presidente. Ang tindahan naghatag og usa ka dapit alang sa pipila pa ka mga panagtigom sa Relief Society sulod sa misunod nga duha ka tuig.

Samtang sila naghulat nga makompleto ang Balay sa Nauvoo, mihukom si Joseph Smith nga magtukod og mas gamay nga hotel atbang sa dalan. Tungod sa kaabunda sa kahoy gikan sa sapa, daling nagpadayon ang trabaho. Ang pamilyang Smith mibalhin ngadto sa bag-ong bilding nianang Agosto 1843. Mga semana human niana, ang Hotel nga Balay nga Mansyon miabli alang sa patigayon.

Ang mga tuig sa 1842 ug 1843 mao ang panahon sa daghang pagkat-on mahitungod sa mga ordinansa sa pagtuga ug pagselyo nga karon gipahigayon sa mga templo sa tibuok kalibotan. Si Joseph ug Emma Smith naselyo diha sa ibabawng lawak sa tindahan nianang Mayo 1843. Nianang Septiyembre, si Emma nakadawat usab sa pagtuga. Mitudlo siya sa ubang mga kababayen-an kon unsaon sa pagpangalagad sa ordinansa sa higayon nga makompleto na ang NauvooTemple. Samtang ang mga lider nagtapok sa Balay nga Mansyon, ang balay nahimong usa ka dapit sa mainampoong pagtudlo ug inspirasyon.

Sa pagkamatay ni Joseph Smith ug sa iyang igsoon nga si Hyrum diha sa Carthage, ang Balay nga Mansyon nakabaton og laing tahas. Didto ang patayng lawas sa duha ka igsoon gipahiluna aron ipakita sa publiko, ug gibanabana nga 10,000 ka tawo ang miabot aron sa paghatag og respeto sa dili pa ang lubong. Karon ang mga patayng lawas ni Emma, Joseph, ug sa ubang mga sakop sa pamilya anaa sa Sementeryo sa Pamilyang Smith.