iVola Vakarau ni Lalai kei na Gauna ni Veiwasei
iDusidusi ni Gauna ni Veiwasei kei na Nodra Vakaitavi na Gone ena Soqoni ni Sakaramede

iDusidusi ni Gauna ni Veiwasei kei na Nodra Vakaitavi na Gone ena Soqoni ni Sakaramede

Kemuni na Mataveiliutaki ni Lalai kei na iLiuliu ni Sere,

Ena yabaki oqo ena noda na veivakalougatataki tabu kei na madigi me da vukei ira yadua na gone ena Lalai me ra vakila ni ra luve ni Kalou. Eda nuitaka me ra na vulica na gonelalai na dina bibi oqo ena nodra vakila na nona lomani ira na Tamada Vakalomalagi. Ni o vakatavulica ena yalomasumasu na ivunau mai na veilesoni ni gauna ni veiwasei oqo, e rawa ni o vukei ira na gonelalai me ra kila na kedra ivakatakilakila dina vakalou, inaki ni nodra bula, kei na veika era rawa ni rawata. E rawa ni o vukei ira me ra vakalevutaka cake na nodra vakabauti Jisu Karisito kei na nodra ivakadinadina me baleta na nona ituvatuva na Tamada Vakalomalagi ena vukudra. Ka na rawa ni o solia vei ira na vakanuinui me baleta na nodra veisiga ni mataka ka vaqaqacotaka na nodra gagadre me ra toka dei ena sala lesu vei Tamada Vakalomalagi.

Vakasaqara na veivuke ni Yalotabu ena nomu vakarautaka, vakatavulica, ka vakadinadinataka na dina eso oqo. Ena vakalougatataki na veimatavuvale ena nomuni sasaga ena yalodina. Keitou lomani kemuni ka vakadewataka na neitou vakavinavinaka me baleta na veiqaravi yalodina o ni solia tiko me ra maroroi ka taqomaki kina na noda gone talei.

Na Mataveiliutaki Raraba ni Lalai

iDusidusi ni Gauna ni Veiwasei

iDusidusi Vakosipeli

Vakayagataka ena veimacawa na ivolalailai oqo ni ko vakarau vakatavulica e dua na lesoni 15 na miniti ena gauna ni veiwasei. Sa rawa mo kuria na veilesoni ni macawa ena so tale na ivola vakadonui ni Lotu, me vakataka na Friend se na Liaona. Na idusidusi eso oqo ena vukei iko mo tuvana ka wasea na lesoni.

Lomani Ira o Vakatavulica Vakaraitaka ni ko lomani ira na gone ena nomu kila na yacadra ka kila na veika era dau taleitaka, na nodra taledi kei na nodra gagadre.

Vakatavulica na iVunau ena Yalotabu. Ni ko vakarautaka na lesoni, masu mo dusimaki ka saga mo vaqaqacotaka na nomu ivakadinadina ni ivakavuvuli ko na vakatavulica. Oqori ena vukea mo veivakatavulici ena Yalotabu.

Sureta na Vuli-ka. E vakarautaki na ivolalailai oqo me vukei iko sega walega ni kila na cava mo vakatavulica ia na iwalewale talega ni veivakatavulici kei na sureti ni vuli-ka. Ena laulau sara na nomu vakatavulica na ivunau ni ko vakayacora na tolu na ka oqo ena veilesoni yadua:

  1. Kila na ivunau. Vakamacalataka vakamatata na ivunau era na vulica tiko na gone. Vakasamataka na sala eso mo vakayacora kina vakavosa ka vakakina ena iyaloyalo. (Na kena ivakaraitaki, raica na lesoni ni ka-va ni macawa ni vula o Feperueri kei na ikatolu ni macawa ni Julai.)

  2. Vakauqeta na kila ka. Raica me titobu na nodra kila ka na gone ena ivunau ena iwalewale eso ni veivakatavulici me ra na vuli kina, me vakataka na lagalagasere, drama, kei na wili volanikalou.

  3. Vakauqeta na kena vakayagataki. Vakarautaka na madigi me ra bulataka kina na gone na ivunau. Vakasamataka na sala e rawa ni ra vakaraitaka kina na nodra nanuma ena ivunau se navuci na inaki e veisemati kaya.

E vakarautaki ena ivolalailai oqo na lesoni taucoko ni so na macawa ena loma ni yabaki. Na veivakasama, era oka talega ki na veimacawa tale eso, ia e sega ni veilesoni taucoko. Vakuria ena veivakasama oqori eso na nomu. Sa rawa me soli vakasama vei iko na nomu wilika na lesoni tale eso ena ivolalailai oqo. Ni yaco mai na ikalima ni Sigatabu, vakayagataka na gauna oqo mo railesuva na lesoni eso sa oti. Ena dusimaki iko na Yalotabu ni ko tuvanaka ka vakarautaka na itaviqaravi eso ni veilesoni.

Cakacaka vata kei na iliuliu ni sere ni ko vakarautaka na nomu lesoni. Ni lagati na sere ena vukea na kena vaqaqacotaki na ivunau o vakatavulica tiko. Sa rawa talega ena so na gauna, mo sureti ira na qasenivuli kei na lewe ni nodra kalasi me ra vukei iko ena so na idusidusi vakosipeli.

Eso na lesoni e vakaturi kina me ra na sureti mai na vulagi dokai me ra mai vakaitavi ena Lalai. Me na veivakadonui mada na nomu bisopi se peresitedi ni tabana ni bera ni ra sureti mai o ira na vulagi me ra mai vakaitavi.

E semati tiko ena lesoni eso na iwalewale ni veivakatavulici ena vukei iko me vakavinakataki na nomu veivakatavulici. Ena oka tiko ena lesoni na iyaloyalo eso ka na vukei iko mo raica na ituvaki yadua ni itaviqaravi. E dina ga ni ka bibi na kena vakatorocaketaki na maqosa ni veivakatavulici, ia na nomu vakavakarau vakayalo kei na nomu ivakadinadina ga ena sureta mai na Yalotabu me mai vakadeitaka na ivunau oqori ki na lomadra na gone.

Gauna ni Lagalagasere

Na ivakatagi ena Lalai e dodonu me vakavurea e dua na draki ni vakarokoroko, vakatavulica na kosipeli, ka vukei ira na gonelalai me ra vakila na veivakauqeti ni Yalo Tabu kei na marau e kauta mai na lagalagasere. Sa dodonu me na vagolei vakatabakidua e 20 na miniti ena gauna ni veiwasei ki na lagasere kei na vakatavulici ni ivakatagi. Oqo ena vakadeitaka ni veirauti na gauna mo vakatavulica kina na ivakatagi vovou ka vukei ira na gone me ra taleitaka na lagasere.

Na ivolalailai oqo e okati kina e dua na nodra sere na gone me ra vulica ena yabaki oqo (raica na tabana e 28). E okati talega kina e dua na wase e vakatokai “Na iVakarau ni Vakayagataki iVakatagi ena Lalai” (raica na tabana e 26–27) kei na ikuri ni vakasama ni kena vakatavulici na sere eso vei ira na gone (raica na tabana e 3, 11, 17).

iDusidusi me Baleta na Vakaitavi ena Soqoni ni Sakaramede

Ena nona veidusimaki na bisopi se peresitedi ni tabana, na nodra vakaitavi na gone ena soqoni ni sakaramede me na dau vakayacori ena ikava ni vulatolu ni dua na yabaki. Ena tekivu ni yabaki mo bose kei na daunivakasala ni matabisopi se mataveiliutaki ni tabana e nona ilesilesi na Lalai me tuvalaki kina na veika me vakayacori. Mo qai kerea na nona veivakadonui ni sa tuvalaki taucoko na veika me caka.

Tuva me ra na vakaitavi ena parokaramu na gone ka me vakayavutaki ena ulutaga vakavula ni gauna ni veiwasei. Mo dau vola toka ena loma ni yabaki taucoko, na nodra vosa kei na veika era sa cakava na gone me rawa ni vakayagataki ena gauna ni nodra vakaitavi ena soqoni ni sakaramede. Ni ko tuvanaka tiko me ra wasea na gone na veika era sa vulica me baleta na ulutaga ni yabaki oqo, vakasamataka na sala eso e rawa ni ra vukei ira kina na ivavakoso me ra vakanamata ki na ivunau ni kosipeli era vakatavulica tiko. Me na qai tinia e dua vei iratou na matabisopi na soqoni ena dua na itukutuku lekaleka.

Ni ko sa vakarautaka na itavi me qaravi, mo nanuma tiko na idusidusi oqo:

  • Me kakua ni vakawaleni na gauna ni kalasi se matavuvale ena vakatovotovo eso.

  • E sega ni vakatarai na veika vakaiyaloyalo, isulu ni drama, kei na veika vakaitukutuku ena soqoni ni sakaramede.

iVakatakilakila
vakaitavi ena soqoni ni sakaramede

Na iVurevure Eso e Vakayagataki ena iVolalailai Oqo

Oqo na ivakaleka era vakayagataki tiko ena ivolalailai oqo:

NVL Nodra iVolanisere na Lalai

VYViVola ni Yaloyalo Vakosipeli

E vuqa na lesoni era vakatututaka me vakayagataki na iyaloyalo. E rawa ni o raica na iyaloyalo ena iVola ni iYaloyalo Vakosipeli, iVolavakarau pakete itaba ni Lalai, kei na veimekesini ni Lotu kei na initaneti ena images.lds.org.

Lewenivuli ni 2018

Lewenivuli Raraba

iSususu: Dou Raici Ira na Nomudou Lalai; Matanisiga: Lalai 1; DND 4–7: Lalai 2; iSausau Vou 8–11: Lalai 6

Lewenivuli Taumada

Matanisiga: Lalai 1; DND 4–7: Lalai 2; iSausau Vou 8–11: Lalai 5