Paminaw Kaniya aron sa Pagdala sa Uban nga Mas Mapaduol Kaniya

Ako [maka]Paminaw Kaniya pinaagi sa mga Hunahuna ug mga Pagbati

Ang “Paminaw Kaniya” mao ang duha ka pulong nga gigamit sa Dios nga Amahan sa pagpaila sa Iyang Bugtong nga Anak, si Jesukristo, ngadto ni Joseph Smith aron sa pagsugod sa mahimayaon nga Pagpahiuli sa ebanghelyo (Joseph Smith—Kasaysayan 1:17). Kining duha ka pulong madasigong makapaaghat kanako samtang mamalandong sa mga kasinatian sa akong kinabuhi. Nakahatag na ko og daghang pakigpulong, ug sa akong kasinatian ang inspirasyon alang niadtong mga pakigpulong moabot isip mga hunahuna nga misantop sa akong pangisip. Usahay usa kini ka pag-aghat sa pagtan-aw sa usa ka butang nga akong nabasahan sa mas sayo pa. Apan sa kasagaran, usa kini ka magsunod-sunod nga mga ideya nga akong mahulagway pinaagi sa pagsulti nga nahisulat kini sa pisara sa akong hunahuna. Wala ko makadungog og tingog, apan usahay akong makita ug mabati ang mga pulong.

Ako [maka]Paminaw Kaniya pinaagi sa Kusog nga mga Pag-aghat

Ako kanunayng mamalandong sa akong kasinatian 50 ka tuig na ang milabay samtang nagserbisyo isip usa ka magtatambag sa kapangulohan sa Chicago Illinois South Stake. Nakadawat ko og usa ka imbitasyon nga mahimong usa ka mamumulong sa gabii nga sakramento sa among yunit sa far west duol sa Aurora, Illinois. Mga usa ka oras ang biyahe niini gikan sa akong panimalay. Kon makadawat ko og usa ka imbitasyon sa pagpamulong nga walay gihatag nga hilisgotan, kasagaran makadawat ko og pagbati mahitungod sa unsay kinahanglan nakong isulti, apan niining partikular nga okasyon, wala koy nadawat nga pag-aghat.

Samtang hinay nga mipadayon ang adlaw sa Igpapahulay nga walay miabot nga pag-aghat, namalandong ko samtang nagmaneho. Naghunahuna ko, “Unsa kaha ang akong isulti sulod sa 45 minutos nga gidapit ko sa pagpamulong?” Nakabiyahe na ko og katunga padulong sa Aurora una pa nako nadawat ang pag-aghat. Nakahinumdom ko nga kusog kini, ug miabot kini nako sa ingon ka kusog nga pwersa nga nasayod ko nga mao kadto ang tubag sa akong mga pag-ampo. Ang pag-aghat nag-ingon “Pamulong kabahin sa imong mga kasinatian didto sa korte sa mga kaso nga kriminal sa Chicago.” Nianang panahona, ako nagtrabaho sa tibuok summer isip usa ka piskal sa Cook County Criminal Court aron makabaton og dugang nga kasinatian aron matabangan ko sa akong mga responsibilidad sa pagtudlo. Wala pa gayod ko mamulong mahitungod sa akong mga kasinatian diha sa korte sa mga kaso nga kriminal. Talagsa ra kaayo ko nga mamulong kabahin sa bisan unsa nga personal nga mga kasinatian diha sa akong mga pakigpulong, busa ang pag-aghat usa ka dakong surprisa.

Ako namulong mahitungod sa nagkalain-laing matang sa pagpangawat nga ang mga sad-an nga kabatan-onan gikasohan, lakip ang pagpangubit diha sa tindahan. Akong gipasabot kon unsa ka seryuso kining matang sa krimin ug unsa ang nahitabo niining mga batan-on sa dihang sila nasuta nga sad-an sa maong kalapasan. Human nga akong gitapos ang akong pakigpulong, usa ka inahan miduol kanako, nagpasalamat sa akong pakigpulong. Siya misulti nako nga siya adunay batan-on nga anak nga lalaki nga nalambigit sa pagpangubit diha sa tindahan. Siya ug ang iyang bana misulay sa pagmaymay kaniya sa kabug-at niana nga kalihokan, apan sila wala nakahimo og bisan unsang kalamboan. Kini nga inahan miingon, “Sa dihang nahibaloan nako nga ikaw ang mamulong karong gabhiuna, nasayod sa imong kaagi, nag-ampo ko sa Ginoo nga makasulti ka og butang nga makatabang sa among anak nga lalaki. Nahimo nimo,” miingon siya. “Siya naminaw kanimo sa paagi nga wala pa gayod siya makapaminaw kanamo, ug nagpasalamat ko sa imong pagpaminaw sa Espiritu sa Ginoo ug pagsunod niini, ug nagpasalamat ko sa unsay imong gisulti.”

Ako [maka]Paminaw Kaniya pinaagi sa Pagsunod sa Giya sa Espiritu

Samtang namalandong ko niana nga kasinatian sa Aurora Branch daghang katuigan na ang milabay, akong gikonektar kini ngadto sa daghang mga pakigpulong nga akong ihatag. Ako panagsa ra kaayo nga matahasan og piho nga hilisgotan, apan ang Ginoo maayo ngari kanako sa paghatag og mga pag-aghat kalabot sa mga hilisgotan nga kinahanglan nakong hisgotan. Tungod sa mga rason nga dili ko makasulti, ang akong sumbanan sa pagpangandam ug paghatag og pakigpulong mao ang pagtutok sa doktrina sa ebanghelyo ug dili sa akong kaugalingong personal nga mga kasinatian. Busa, kon ako makadawat og kusog nga pagbati sa pagpamulong mahitungod sa usa ka personal nga kasinatian, maminaw ko niana nga pag-aghat ug maningkamot sa pagpaminaw Kaniya ug pagsunod niini.

Adunay mga panahon nga ang usa o duha ka tawo diha sa kongregasyon nagkinahanglan gayod nga makadungog sa usa ka piho nga hilisgotan. Mao kadto ang akong kasinatian sa Aurora, Illinois, niana nga gabii, ug kini ang akong nasinati kanunay sukad nianang panahona. Paminaw Kaniya—paminaw ngadto sa mga pag-aghat sa Iyang Espiritu—ug imbis maghatag lang og usa ka pakigpulong nga sa kinatibuk-an makatabang ngadto sa dakong grupo, tingali maaghat ka sa pagtubag sa mga pag-ampo sa usa ka tawo alang sa piho nga pagdasig ug instruksyon kabahin sa partikular nga hilisgotan. Kon adunay mahitabo nga sama niana ngari kanako, ako mapuno sa pagpasalamat. Ang akong sumbanan mao ang pasalamat sa Ginoo ug pag-ampo nga ang gitinguha nga epekto mahitabo diha sa mga kasingkasing ug mga hunahuna niadtong kinsa nagkinahanglan nga makadungog niana nga mensahe.

Ako [maka]Paminaw Kaniya pinaagi sa mga Buhat ug Pagpangalagad sa Uban

Sa kasagaran kon kita mangayo sa Ginoo og tabang, kini dili moabot pinaagi sa pagbisita sama kang Joseph Smith o sama ni Apostol Pablo didto sa dalan padulong sa Damasco. Kasagaran sa mga tubag atong madawat pinaagi sa mga buhat sa uban. Ang Ginoo tingali moaghat sa usa ka tawo sa pagpangalagad, sa pagpadala og usa ka sulat, sa pagtawag sa telepono, o sa pagtanyag og usa ka sugyot sa matag karon ug unya. Mao kana ang tipikal nga paagi ang Ginoo motabang kanato. Matag tawo sa Ang Simbahan ni Jesukristo sa mga Santos sa Ulahing mga Adlaw kinsa adunay gasa sa Espiritu Santo adunay katungod nga maaghat sa Ginoo, dili igsapayan sa kahimtang o pagkabutang.

Ang atong mga kamot mao ang Iyang mga kamot kon kita maminaw Kaniya ug mobati nga motabang sa usa sa Iyang mga anak.

Kita [maka]Paminaw Kaniya sa Atong Kaugalingong mga Kahimtang

Sa dihang ang Ginoo midapit kanato sa “[pag]paminaw Kaniya,” Siya naghangyo sa matag usa kanato diha sa atong kaugalingong indibidwal nga kahimtang, uban sa atong kaugalingong pagsabot sa kultura ug sa atong kaugalingong mga abilidad sa pagsabot og usa ka mensahe. Sa usa ka tibuok kalibotan nga Simbahan sama sa atoa, adunay daghan kaayo nga nagkalain-laing mga kultura, mga pinulongan, mga simbolo, ug ubang pamaagi sa komunikasyon nga siguradong ang Ginoo mamulong kanato pinaagi sa mga pinulongan, mga simbolo, ug mga kahimtang nga indibidwal natong masabtan ug madunggan.

Kon kamo makadawat og usa ka pag-aghat, lihoka kini, bisan unsa pa kini ka dili kasagaran o bisan unsa pa ka kulang ang inyong bation sa pagsunod niini. Buhata kini. Adunay rason niini. Mahimong dili kamo masayod sa rason, apan ang mga panalangin moabot nganha kaninyo ug ngadto sa uban kon kamo maminaw Kaniya ug mosunod sa Iyang direksyon.