Vakatovolei, Vakadinadinataki, ka Vakavinakataki

Kemuni na taciqu kei na ganequ, au marautaka meu vosa vei kemuni nikua. Sa noqu vakanuinui meu solia na veivakayaloqaqataki ena gauna e vaka me dredre ka veilecayaki kina na bula. Ki vei kemuni eso, sai koya sara ga oqo na gauna ko ya. Ke sega, na gauna vaka oya ena yaco mai.

Oya e sega ni rai me veivakayalolailaitaki. E ka dina—ia e vinaka—baleta nai naki ni Kalou ena buli ni vuravura oqo. Nai naki o ya me a soli vei ira na Luvena na madigi mera vakadinadinataki ira nira rawa ni lomasoli me digitaka na dodonu ena gauna e dredre kina. Ni vakayacori vakakina, ena veisau na nodra i vakarau ka na rawa mera vakataki Koya vakalevu cake. A kila o Koya ni o ya ena gadrevi kina na vakabauti Koya dei.

E vuqa na ka au kila a lako mai na noqu matavuvale. Niu a se qai yabaki walu voli, e a kerei au kei taciqu na tinaqu yalomatua me keirau cavu co ca vata kei koya ena neitou i teitei vakavuvale e daku ni vale. E a rairai rawarawa sara na itavi oya, ia o keitou vakaitikotiko e New Jersey. E dau tau kina vakawasoma na uca. Na qele e damu dregadregata. Na co ca era a tubu totolo sara mai vei ira na kakana draudrau.

Au nanuma na noqu rarawa nira kamusu e ligaqu na co ca, ka mau vinaka tu ga ena qele dregadregata na wakadra. Ko tinaqu kei taciqu erau sa yawa sara ki liu ena nodrau cavucavu. Na kaukauwa ga ni noqu sasaga, na berabera ni noqu toso ki liu.

“Na ka oqo e sa rui dredre!” Au a kailavaka yani.

A sega ni vakaraitaka o tinaqu nona kila na ka au vakila, ia a dredre ga ka kaya, “Io, Hal, sa dina sara, e dredre. E dodonu me vakakina. Na bula e vanua ni vakatovolei.”

Ena gauna o ya, au a kila kina ni nona vosa e ka dina ka na dina tikoga ena noqu veitabayabaki ki muri.

Na vu ni nona dredre ena yalo ni loloma o tinaqu a qai makare vei au ena vica vata na yabaki ki muri, ena noqu wilika na Nodrau i naki ni bulia na vuravura oqo na Tamada Vakalomalagi kei na Luvena Lomani, kei na soli ni madigi ni bula vakayago vei ira na luvena vakayalo:

“Io meda vakatovolei ira mada kina, meda raica se ra na muria se sega na veika kece sa vakarota vei ira na Turaga na nodra Kalou;

“Raica ko ira era sa maroroya na nodra itutu taumada, ena vakaikuritaki vei ira; ia ko ira sa sega ni maroroya na nodra itutu taumada, era na sega ni rawata na lagilagi ena matanitu era sa taukena ko ira era sa maroroya na nodra itutu taumada; ia ko ira sa maroroya na nodra ikarua ni itutu, era na rawata na lagilagi e vakaikuritaki e uludra me sega ni mudu ka sega ni mudu.” ¹

O iko kei au edaru a ciqoma na veisureti o ya me vakatovolei ka vakadinadinataka ni daru na digitaka me cakava na vei ivakaro ni Kalou ena gauna edaru sa na biubiu kina mai nai serau i Tamada Vakalomalagi.

E dina ni a tiko na veisureti loloma vaka o ya maivua na Tamada Vakalomalagi, o Lusefa e a vakayarayarataka e dua nai katolu ni luvena vakayalo me muri koya ka biliga nai tuvatuva nei Tamada me baleta na noda tubu kei na marau tawamudu. Ena vuku ni vukitani nei Setani, e a vakasavi tani kei ira na muri koya. Nikua e tovolea tiko me vakavuna mera vukitani e vuqa maivua na Kalou ena bula vakayago.

Vei keda ka ciqoma na ituvatuva, eda a vakayacora ena vuku ni noda vakabauti Jisu Karisito ni a lomasoli me mai noda iVakabula ka Dauveivueti. Eda a vakabauta beka ena gauna o ya se malumalumu vakayago cava ga ena yaco vei keda, se cava ga na kaukauwa ni meca ena valuti keda, na kaukauwa ni veika vinaka ena ulabaleti ira kece sara.

Na Tamada Vakalomalagi kei Jisu Karisito e rau kilai iko ka lomani iko. Erau vinakati iko mo lesu tale yani vei Rau ka yaco me vakataki Rau. Na nomu qaqa e Nodrau talega. O a vakila na loloma o ya ni vakadeitaka vei iko na YaloTabu ni o wilika se rogoca na vei vosa oqo: “Ia raica, oqo na noqu cakacaka kei na noqu lagilagi—meu vakavuna na tawamate rawa kei na bula tawamudu ni tamata.” ²

Na Kalou e tiko vua na kaukauwa me vakarawarawataka na noda sala. E a vakani ira na luve i Isireli ena mana ena nodra ilakolako ki na vanua yalataki. Na Turaga ena nona veiqaravi ena bula vakayago, a vakabulai ira na tauvimate, vakaturi ira na mate, ka vakamaravutaka na waitui. Ni oti na Nona Tucake tale e a dolava “na valeniveivesu vei ira na vesuki.” ³

Ia na Parofita ko Josefa Simici, e dua vei ira na Nona parofita cecere, e a vakararawataki e vale ni veivesu ka a vakavulici ena lesoni yaga ka da gadreva ena vakatovolei ni noda vakabauta ka dau talevi keda: “Ia kevaka ko na biu ki na qara, se ra tauri iko na daulaba, se tau vei iko na itotogi mate; kevaka ko sa biu ki na wasaliwa titobu; kevaka era sa nakita na biau lelevu me ra bikai iko; kevaka sa yaco me kemu meca na cagi kaukauwa; kevaka sa kumukumuni vata na o loaloa ni lomalagi, ka ra cokovata na vei vu ni ka me latia na nomu sala; ka me kena ilutua, kevaka ena dalaga na gusui eli me tilomi iko, mo kila tiko na luvequ, ni veika kece oqori ko na yalomatua kina, ka vinaka cake.” ⁴

Ko na rairai lomatarotaro beka ena vuna e vakatara kina e dua na Kalou dauloloma ka kaukauwa, me rui dredre na veivakatovolei ni bula vakayago. E baleta ni kila o Koya ni dodonu meda tubu ena savasava kei na kaukauwa vakayalo me rawa nida bula vakavuvale e nona i serau me tawamudu. Me rawati o ya, sa solia vei keda na Tamada Vakalomalagi e dua na iVakabula kei na kaukauwa meda digitaka vakai keda ena vakabauta, meda muria na Nona ivakaro ka veivutuni ka lako mai Vua.

Na ituvatuva ni marau nei Tamada e kena i usutu bibi na noda yaco sara me vakataka na Luvena Lomani, ko Jisu Karisito. Ena veika kece sara, e noda idusidusi vinaka duadua na ivakaraitaki ni iVakabula. E a sega ni vakuwai mai na kena gadrevi me vakadinadinataki Koya. E a vosota ena vukudra kece sara na luvena na Tamada Vakalomalagi, ka sauma na i sau ni noda i valavala ca kece. A vakila na nodra rarawa o ira kece era sa bula oti vakayago kei ira era na qai lako mai.

Ke o lomatarotarotaka na i levu ni mosi o rawa ni vosota, nanumi Koya. A colata na nomu rarawa me rawa ni kila o Koya na sala me laveti iko cake kina. Ena sega beka ni kauta tani nai colacola, ia ena solia vei iko o Koya na kaukauwa, veivakacegui, kei na inuinui. O Koya e kila na sala. O Koya sa gunuva oti na bilo wiwi. O Koya a colata na nodra rarawa na tamata kecega.

Ko susugi ka vakacegui tiko mai vua edua na iVakabula dauloloma, ka kila na sala me vukei iko kina ena veivakatovolei cava ga o sota kaya. O Alama e vakavulica:

“Ia ena lako yani ko koya, ena vakila na mosi kei na veivakararawataki kei na veivakatovolei kecega; ia sa yaco na veika oqo me vakayacori kina na vosa sa tukuni ni na colata ko Koya na nodra mosi kei na nodra tauvimate na nona tamata.

“Ia ena mate ko koya, me tasereka kina na ivau ni mate sa vauci ira tu na nona tamata; ia sa ciqoma ko koya na nodra malumalumu, me vakasinaiti na lomana ena loloma cecere, me vaka na veika vakayago, me rawa kina ni vakila me vaka na veika vakayago na sala me vukei ira kina na nona tamata me vaka na nodra veimalumalumu.” ⁵

E dua na sala ena vukei iko kina ko Koya sai koya me sureti iko mo daunanumi Koya tikoga ka lako mai Vua. Sa vakayaloqaqataki keda o Koya:

“Dou lako mai vei au, koi kemudou vakaaduaga sa oca, ka colata na icolacola bibi, ia kau na vakacegui kemudou.

“Vakataqara vei kemudou na noqui vua, ka vuli vei au, niu sa yalomalua ka yalomalumalumu: dou na kunea kina na vakacegu ni yalomudou.” ⁶

Na sala meda lako kina ki Vua sai koya meda kana magiti ena Nona vosa, ka cakacakataka na vakabauta ki na veivutuni, ka digitaka me papitaiso ka vadeitaki mai vei ira Nona italai vakadonui, ka qai maroroya na nomu veiyalayalti kei na Kalou. E na tala mai o Koya na Yalo Tabu me nomu itokani, dau ni veivakacegui, ka dauniveituberi.

Ni o bula kilikili kaya na isolisoli ni Yalo Tabu, na Turaga ena tuberi iko ki na idrodro kevaka mada ga o sega ni kila na ka mo cakava. Vei au, sa dau vakavuqa me vakaraitaka vei au nai kalawa ka tarava meu taura. Vakavudua sa dau solia o Koya eso na kila ka baleta na veika tawakilai, ia na vei kila ka oqori e dau tuberi au ena ka meu digitaka meu cakava ena bula ni veisiga.

E kaya na Turaga:

“Dou na sega ni raica rawa e matamudou vakayago, ena gauna oqo, na ituvatuva ni nomudou Kalou me yaco ena gauna mai muri, io kei na lagilagi ena muria mai … e vuqa na veika rarawa.

“Ni sa oti na veika rarawa, ena yaco na veivakalougataki.” ⁷

Na veivakalougatataki levu ena yaco mai sai koya na veisau ni noda itovo, ena noda vakadinadinataki keda ena noda yalodina ki na noda veiyalayalati nida vakatovolei. Ena noda digitaka me maroroya na noda veiyalayalati, ena cakacaka yaco kina vei keda na kaukauwa i Jisu Karisito kei na veivakalougatataki ni Nona Veisorovaki. E rawa ni vakamalumalumutaki na yaloda meda dau loloma, veivosoti, ka dau sureti ira na tani mera lako vua na iVakabula. Ena tubu noda yalonuidei vua na Turaga. Ena vakalailaitaki na noda taqaya.

E dina ni yaco mai na veivakalougatataki oqori ena vuku ni veika rarawa, ena noda yalomatua eda na sega ni vakasaqara kina na veika rarawa. Ena bula vakayago, ena tiko e levu sara na madigi meda na vakadinadinataki keda kina, meda rawata ka sotava na veivakatovolei dredre ka kaukauwa me vayagacori keda vakalevu cake meda vakataka na iVakabula kei na Tamada Vakalomalagi.

Me kena ikuri, meda kauwaitaka na nodra rarawa na tani ka tovolea me veivuke. Ena via dredre toka oya ni o keda vakai keda eda sotava tiko na veivakatovolei dredre. Ia eda na kunea nida colata na nodra i colacola na tani, vakalailai mada ga, e vakaukauwataki na dakuda ka vakila edua na rarama ena loma ni butobuto.

Sa noda iVakaraitaki uasivi ena veika oqo na Turaga. Ena kauveilatai e Kolikoca, ni oti na nona lako curuma na mosi levu ka dodonu me sa mate kina ke a sega ni Luve ni Kalou ka Vakatuburi, a rai yani vei ira na vakararawataki Koya ka kaya vei Tamana, “Kakua ni cudruvi ira nira sa sega ni kila na ka era sa kitaka.” ⁸ Ni colata tiko na nodra rarawa na tamata kecega, a raici Joni mai na kauveilatai kei Tinana lomabibi ka veiqaravi vua ena nona rarawa:

“Ni sa qai raici rau ko Jisu, na tinana kei na tisaipeli ka tu voleka, ko koya sa lomana ko koya, sa kaya vei tinana, Yalewa, raica na luvemu!

“Sa qai kaya vua na tisaipeli, Raici tinamu! Ia mai na tiki ni siga ko ya sa kauti koya na tisaipeli ko ya ki nona vale.” ⁹

Ena Nona ivalavala ena siga vakatabui oya, a solia wale na Nona bula ena vukuda yadudua, sega walega ni solia na veivuke ena bula oqo ia na bula tawamudu ena gauna se bera mai.

Au sa raici ira na tamata me ra rawata na veika lelevu ena vuku ni nodra vakadinadinataka na nodra yalodina ena loma ni veika dredre. E tiko nikua ena Lotu e vuqa sara na ivakaraitaki. Era vakayalomalumalutaki na tamata ena vuku ni veika dredre era sotava. Ena nodra gugumatua kei na sasaga ena yalodina, era sa yaco me vakataka vakalevu cake na iVakabula kei na Tamada Vakalomalagi.

Au a vulica e dua tale na lesoni mai vua na tinaqu. Ena gauna a se goneyalewa kina, a tauvi koya na mate ni i tagitagi ka voleka ni mate sara kina. E muri a takavi koya na mate ni suitu kei na nave ni yago. A mate gone o tamana, eratou sa qai veivuke ko tinaqu kei ira na ganena me qaravi tinadratou.

Ena nona bula taucoko, a vakila o koya na revurevu ni dredre ni tauvimate. Ena i otioti ni 10 na yabaki ni nona bula, a gadrevi me vakayacori vua e levu na veisele vakavuniwai. Ena veika kece a sotava, a vakadinadinataka na nona yalodina vua na Turaga, dina ga ni sa davo tu ga. Na itaba ga ka rube toka e lalaga ni nona rumu ni moce e kena na iVakabula. Na iotioti ni nona ka me tukuna vei au oqo: “Hal, sa vaka o batabata. Sa dodonu mo qarauni iko vinaka tiko.”

O Peresitedi Spencer W. Kimball a tauca nai otioti ni vosa ena nona veibulu. Ni oti na nona cavuta na veika eso baleta na nona vakatovolei kei na yalodina, a qai kaya vakaoqo: “Eso vei kemuni ena vakataroga se cava e sotava kina o Mildred e levu na ka dredre ena dua na gauna balavu. Au na tukuna vei kemuni na vuna. E baleta ni a vinakata na Turaga me vakavinakataki koya tale vakalailai.”

Au vakaraitaka na noqu vakavinavinaka vei ira na lewenilotu yalodina ni Lotu i Jisu Karisito ka ra colata na icolacola ena vakabauta dei, ka vukei ira na tani mera colata na nodra, ena nona vakasaqara na Turaga me vakavinakataki ira vakalailai tale. Au vakaraitaka talega na noqu loloma kei na qoroqoro vei ira na veiqaravi kei na iliuliu e vuravura raraba, ka ra qaravi ira na tani, dina ga nira sotava tiko kei na nodra vuvale na veivakavinakataki vaka o ya.

Au vakadinadinataka ni da luvena e dua na Tamada Vakalomalagi, e lomani keda. Au vakila na loloma nei Peresitedi Russell M. Nelson vei keda kece sara. Sai koya na parofita ni Turaga e vuravura nikua. Au vakadinadinataka oqo ena yaca tabu ni Turaga o Jisu Karisito, emeni.