Na Kaukauwa ni Veivakabulai ni Veisorovaki

Mai na tekivu ni yabaki qo, eda sa sotava e vuqa na veika sega ni namaki. Na yali ni bula kei na ivurevure ni lavo ena vuku ni mate dewa ka sa tara vakabibi na itikotiko raraba kei na matanitu.

Na uneune, kama, kei na waluvu ena veiyasai vuravura, ka vakakina na veileqa tale eso ni draki, ka sa vakavuna mera yalolailai na tamata, yaluma, ka yalo raramusu, ka vakananuma tiko kevaka na tautauvata tale na nodra bula.

Me’u tukuna mada e dua na italanoa baleta na raramusu.

Ni ratou se lalai na neirau gone, eratou lewa ni ratou vinakata me ratou tauri lesoni ni piano. Na watiqu, o Rudy, kei au a vinakata me keirau vakarautaka vei iratou na luvei keirau na madigi qo, ia a sega na neitou piano. Keitou sega ni rawa ni volia e dua na piano vou, sa mani tekevu vaqara o Rudy e dua sa vakayagataki oti.

Na Siganisucu ni yabaki oya, a vakidacalataki keitou o koya ena dua na piano, ena veiyabaki ka tarava, eratou vulica na luvei keirau me ra vakatagitaka.

Ni sa tubu cake na luvei keirau tagane ka biuta na vale, na piano makawa oya sa sokomuni duka ka keirau mani volitaka. Sa sivi e vica na yabaki, ka keirau sa maroroya eso na ilavo. Dua na siga sa kaya o Rudy, “Au nanuma sa kena gauna me kau mai e dua na piano vou.”

Au taroga, “Na cava o via kauta mai kina e dua na piano vou, ni sega ni dua vei kedaru e rawa ni vakatagitaka?”

Qai kaya o koya, “Isa, ia e rawa ni dua na nodaru piano ka vakatagitaki i koya vakai koya! Ni ko vakayagataka e dua na iPad, sa na rawa ni parokaramutaki na piano me vakatagitaka sivia ni 4,000 na sere, oka kina na serenilotu, na matasere ni Tabernacle, kei na sere taucoko ni Lalai, kei na vuqa tale eso.”

O Rudy e dua na dauvolivolitaki.

Keirau mani volia e dua na piano vou ka totoka, vica na siga tarava, e rua na tamata lelevu, kaukauwa a kauta yani ki vale.

Au vakaraitaka sara vei rau na vanua me biu kina kau vagalala sara mai.

Sa bau dua dina na baby grand bibi, ka dodonu me curuma yani na katuba, rau a luvata tani na yavana ka vakababataka na piano ena dela ni qiqi ka rau a kauta voli mai.

E dabe toka na neitou vale ena dua na baba lailai, ka ni rarawa ena siga o ya e tau na uca cevata, e vakavuna me suasua ka soso. Sa rawa beka ni da raica na vanua sa mua tiko kina na ka oqo?

Ena nodrau tosoya cake yani na turaga na piano ena baba lailai, e sisi yani, ka’u rogoca sara na vadugu levu. A lutu tani mai na qiqi na piano ka tau sara vakaukauwa ena qele ka sa biuta tu e dua na maka levu ena neitou lomanibai.

Au kaya, “Oilei, noqu itoko. E sega ni dua na ka e leqa vei kemudrau?”

E vinaka sara ni sega ni dua vei rau e mavoa.

Sa widri na matadrau ni rau sa veiraici, ka qai raici au ka kaya, “Ni vosoti keirau sara. Keirau na kauta lesu tale ki na sitoa ka na qai qiriti iko mai o neitou manidia.”

Gauna lekaleka ga sa veitalanoa sara o Rudy kei na manidia me vakarautaki tale e dua na piano vou. E dau yalovinaka o Rudy ka veivosoti talega, ka tukuna vua na manidia ni sa donu kevaka me ratou vakavinakataki ga na vanua e ca ka kauta lesu mai na piano vata ga oya, ia na manidia e vinakata me kau mai e dua na ka vou.

A sauma lesu yani o Rudy, ka kaya, “E sega soti sara ni vakaleqai vakalevu. Vakavinakataka ka kauta mai ike.”

A kaya na manidia, “Sa kamusu na kau, ni sa kamusu na kau, ena sega ni tautauvata tale na kena rorogo. Ena dua na nomu piano vou.”

Kemuni na taciqu kei na ganequ, eda sega beka ni vaka na piano oqo, kamusu vakalailai, kaca, ka vakacacani, eda vakila ni da na sega ni tautavata tale? Ia, ni da lako mai vei Jisu Karisito ena noda vakaraitaka ni da vakabauti Koya, veivutuni, ka vakayacora ka maroroya na veiyalayalati, na veika e vakacacani—se cava ga e vakavuna—ena rawa ni vakavinakataki.Ni da lako mai vei Jisu Karisito ena noda vakaraitaka ni da vakabauti Koya, veivutuni, ka vakayacora ka maroroya na veiyalayalati, na veika e vakacacani—se cava ga e vakavuna—ena rawa ni vakavinakataki. Na iwalewale oqo, e sureta na kaukauwa ni veivakabulai ni noda iVakabula ki na noda bula, e sega walega ni vakalesuya vei keda na ituvaki ni bula eda tu kina e liu, ia e vakavinakataki keda vakalevu cake. Au kila ena vuku ni noda iVakabula, o Jisu Karisito, eda rawa kece ni vakavinakataki, vakataucokotaki, ka rawata na noda inaki, me vaka e dua na piano vou.

A vakavulica o Peresitedi Russell M. Nelson: “Ni sa lako mai vei keda na veivakatovolei ca sara, sa kena gauna meda vakatitiobu noda vakabauta na Kalou, cakacaka vakaukauwa, ka qaravi ira na tani. Ena qai vakabula o Koya na yaloda sa raramusumusu. Ena vakatikora o Koya vei keda yadua na sautu kei na tiko vakacegu. Na isolisoli cecere oqori ena sega ni vakacacani, sega sara mada ga ena mate.” ¹

E kaya o Jisu:

“Dou lako mai vei au, koi kemudou vakayadua sa oca, ka colata na icolacola bibi, ia kau na vakacegui kemudou.

“Vakataqara vei kemudou na noqu ivua, ka vuli vei au; ni’u sa yalomalua ka yalomalumalumu: dou na kunea kina na vakacegu ni yalomudou.

“Ni sa rawarawa na noqu ivua, ka mamada na noqu icolacola” (Maciu 11:28–30).

Noda lako Vua me vakabula na raramusu, e gadrevi meda vakabauti Jisu Karisito. “Na vakabauti Jisu Karisito e kena ibalebale mo vakararavi vakatabakidua Vua—vakanuinui ki na Nona kaukauwa cecere … kei na loloma. E okati kina mo vakabauta na Nona ivakavuvuli. E kena ibalebale ni dina ga e da sega sara ni kila na veika kece, o Koya e kila kece. Me vaka ni sa mai sotava oti o Koya na noda mosi, veivakararawataki, kei na malumalumu, sa kila tu ko Koya na sala me vukei keda kina me da lako sivita na noda dredre ni veisiga.” ²

Ni da lako mai Vua, “e rawa ni da vakasinaiti ena reki, sautu, kei na vakacegu. “Na ka kece sara e [dredre ka veibolei] ena bula sa rawa me vakadodonutaki ena Veisorovaki i Jisu Karisito.” ³ A vakasalataki keda meda, “Drau vakararavi tiko mai vei au ena vakasama kece; kakua ni vakatitiqa, ka kakua ni rere” (Vunau kei na Veiyalayalati 6:36).

Ena iVola i Momani ena gauna o Alama kei na nona tamata era sa voleka kina ni vakaleqai ena icolacola era vakacolati kina, era vakamamasu na tamata mera vukei. E sega ni kauta laivi na Kalou na nodra icolacola; ia e yalataka vei ira o Koya:

“Ia au na vakamamadataka na icolacola dou sa vakacolati kina, mo dou kakua ni vakila e dakumudou, ena nomudou tiko vakabobula; ia au na kitaka oqo mo dou kena ivakadinadina ka lako yani mo dou kila, ni ko Au na Turaga na Kalou, au sa dau sikovi ira na noqu tamata ena nodra vakararawataki.

“Ia sa yaco me vakamamadataki na icolacola kece sa vakataqari vei Alama kei ira na wekana; io, a sa vakaukauwataki ira na Turaga me rawarawa vei ira na nodra icolacola ka ra soli ira ena yalomarau kei na yalovosota ki na nona lewa na Turaga” (Mosaia 24:14–15).

Na nona rawata na iVakabula me vakabulai keda ka vakamamadataka na icolacola, a vakavulica o Elder Tad R. Callister:

E dua na veivakalougatataki ni Veisorovaki ni rawa ni da ciqoma na kaukauwa ni veivukei ni iVakabula. E vosa vakawasoma o Aisea me baleta na veivakayarayarataki malumu, veivakabulai ni Turaga. Vakadinadinataka o koya na iVakabula e ‘na bai vei ira na dravudravua ni ra sa rarawa, nai vakaruru mai na cava, nai vakaruru mai na katakata’ (Aisea 25:4). Vei ira era vutugu, vakarota o Aisea ni tu vua na kaukauwa na iVakabula me ‘vakacegui ira kecega era sa tagi’ (Aisea 61:2), ka ‘tavoya na wai ni mata mai na matadra na tamata kecega’ (Aisea 25:8; raica talega na Nai iVakatakila 7:17); ‘me vakabula na yalo i koya sa yalomalumalumu’ (Aisea 57:15); ka ‘vakabulai ira sa ramusu na yalodra’ (Aisea 61:1; raica talega na Luke 4:18; Same 147:3). Sa rui rabailevu na kaukauwa ni nona veivukei ni rawa ni veisautaka na, ‘isala vakaiukuuku mei sosomi ni dravusa, kei na waiwai ni reki mei sosomi ni tagi, kei na isulu ni vakavinavinaka mei sosomi ni lomabibi’ (Aisea 61:3).

“Isa, na inuinui e tubu ena vei iyalayala oqori! … Na Yalona e veivakabulai; e veivakasavasavataki; e veivakacegui; e solia na bula vou ki na yaluma ni yaloda. E tiko kina na kaukauwa me veisautaka na veika kece e rairai sabalia ka voravora ka sega na yaga ena bula ki na dua na ka e totoka ka lagilagi. E tiko Vua na kaukauwa me veisautaka na dravusa ni bula vakayago ki na totoka ni bula tawamudu.” ⁴

Au vakadinadinataka ni o Jisu Karisito na noda iVakabula dauloloma, noda Dauveivueti, na Dauniveivakabulai, ka itokani yalodina. Kevaka eda vuki Vua, ena vakabulai keda ka vakataucokotaki keda talega. Au vakadinadinataka ni oqo na Nona Lotu ka sa vakavakarau tiko o Koya me lesu tale mai ki na vuravura oqo me mai veiliutaki ena kaukauwa kei na lagilagi. Ena yaca i Jisu Karisito, emeni.