Na Liga ni iVakabula

Sa oti e rua na udolu vakacaca na yabaki, ea siro sobu mai na ulunivanua na iVakabula ni vakatavulica oti na vunau ni Kalougata kei na ivakavuvuli ni kosipeli tale eso. Ni lako tu, ea torovi Koya mai e dua na tamata tauvi vukavuka. Ea vakaraitaka na vakarokoroko kei na veidokai ni mai tekiduru e matai Karisito, ni vakasaqara na vakacegu mai na nona vakaleqai. Sa rawarawa na nona kerekere: “Na Turaga, kevaka ko ni sa vinakata, ko ni sa vakasavasavataki au rawa.”

A sa dodoka na ligana na iVakabula ka, tarai koya, ka kaya, “Au sa vinakata; mo savasava mai.”¹

Eda vulica kina ni vinakata na iVakabula me vakalougata keda. Eso na veivakalougatataki e rawa ni yaco vakasauri, eso e rawa ni taura na gauna balavu, ka so tale e rawa ni yaco ni oti na bula oqo, ia na veivakalougatataki ena yaco ga ena kena gauna.

Me vaka beka na vukavuka, eda rawa ni kunea na kaukauwa kei na vakacegu ena bula oqo mai na noda ciqoma na Nona lewa ka kila ni via vakalougatataki keda o Koya. E rawa ni da kunea na kaukauwa meda sotava na bolebole cava ga, me ulabaleta kina na mataqali veitemaki cava ga, ka meda kila ka vosota na veika eda sotava. E dina ga, ena gauna voraki duadua ni Nona bula, ea vakatitobutaki na kaukauwa me vosota kina na iVakabula ena Nona kaya vei Tamana, “Me yaco ga na nomu lewa.”²

Ea sega ni veivakaisini na nona kerekere na vukavuka se itovo kocokoco. Na nona vosa e vakaraitaka na lokumi ni itutuniyalo, kei na nanamaki cecere ia ka tu talega na gagadre dina ni na yaco ga na lewa ni iVakabula. Oqo e dua na ivakaraitaki ni vakarau ni bula e dodonu meda lako mai kina vei Karisito. E dodonu meda lako mai Vua ena yalodei ni gagadre ni iVakabula ena vei gauna e vinaka duadua vei keda ena bula vakayago kei na bula tawamudu. E tu Vua na rai tawamudu ka sega ni dau tu vei keda. E dodonu meda lako mai vei Karisito ena gagadre dina ka me gumatua kina na lewa nei Tamada ki na noda lewa, me vaka ga na Nona, ka na vakarautaki keda ki na bula tawamudu.³ E na vakarautaki keda na veika oqo ki na bula tawamudu.

Ena ka dredre sara me raitayaloyalotaki na rarawa ni yago kei na loma ka bika tu na vukavuka ka a lako mai vua na iVakabula. Na vukavuka e tauva na ua kei na kuli, ka vuna na ibulibulica ka sega ni taucoko kina. Me kuria, e yaco kina na beci levu ena itikotiko. E dua ka tauvi vukavuka ena biuti ira nona lomani ka laki tiko tani mai na lewenivanua. Ko ira na vukavuka era wiliki ni ra tawasavasava, vakayago ka vakayalo talega. Ena ka oqo, sa vakarota kina na lawa i Mosese me ra daramaka na vukavuka na isulu madra ka kacivaka “Au sega ni savasava!” ni ra lako tu.⁴ Ni ra tauvimate ka beci, era laki tu kina na vukavuka ena veivale lala se na ibulubulu.⁵ E sega ni dredre meda raitayaloyalotaka na vukavuka ka lako ki na iVakabula ea kavoro tu.

Ena so na gauna—ena dua se vuqa tale—eda rawa talega ni vakila na kavoro, mai na noda ivalavala ga se mai na nodra na tani, mai na ituvaki eda rawa se sega ni rawa ni lewa. Ena veigauna vakaoya, e rawa ni da biuta na noda lewa ki Ligana.

Ena vica na yabaki sa oti, o Zulma—na watiqu, o koya ka vinaka cake vei keirau, noqu ka talei—a ciqoma eso na itukutuku dredre ni vo toka ga e rua na macawa me vakamau kina e dua na luvei keirau. E tubu vua e dua na vuce ena nona kato ni weli, ka sa tete vakatotolo tiko. Ea tekivu vuce mai na matana, ka me sa na lakocuruma vakatotolo e dua na veisele bibi. Vuqa na veivakanananu e veiciciyaki e nona vakasama ka bika na lomana. E rawa beka ni vakavuleqa na vuce oqo? Ena vakabulabula vakacava na yagona? Ena paralase beka na matana? Ena vakacava beka na bibi ni mosi? Ena vakamawe tudei beka na matana? Ena lesu beka mai na vuce ni sa kau tani oti? Ena tiko rawa beka ena vakamau nei luvei keirau tagana? Ni davo tu ena rumu ni veisele, ea vakila na kavoro.

Ena gauna bibi dina oya, ea vosalo kina vua na Yalotabu ni dodonu me ciqoma na lewa nei Tamada. Ea qai lewa me kotora nona vakararavi vua na Kalou. Ea vakila vakaukauwa sara ni cava ga e macala, na Nona lewa ena vinaka duadua vua. Sega ni bera ga sa kui yani ki na moce ni veisele.

Emuri ea volavola vakaserekali e nona ivolaniveisiga: “E teveli nei dauniveisele au cuva ki Matamuni kau soro ki na Nomuni lewa. Au kila niu rawa ni gole yani vei Kemuni, niu kila tu e sega ni dua na ka ca e lako mai vei Kemuni.”

Ea kune kaukauwa kei na vakacegu okoya mai na nona sorova na nona lewa ki na nei Tamada. Ena siga oya, ea vakalougatataki koya vakalevu na Kalou.

Se vakacava mada na noda ituvaki, e rawa ni da yavalata na noda vakabauta meda lako mai vei Karisito ka kunea e dua na Kalou eda rawa ni ravita. Me vaka a vola e dua vei iratou na luvequ, o Gabriel:

E dua na Kalou eda nuitaka me vakaqaqataka na noda inuinui. E rawa ni da nuitaki Koya baleta ni lomani keda ka vinakata na veika vinaka duadua ena veituvaki kece.

Na vukavuka ea lako mai baleta na kaukauwa ni inuinui. Na vuravura e sega ni solia vua e dua na iwali, e sega mada ga na vakacegu. Eke, na liga malumu ni iVakabula e sa vaka me yamoca na yalona kece sara ga. E rawa walega ni da raitayaloyalotaka na vakila titobu ni vakavinavinaka e tu vua na vukavuka ena ligana na iVakabula, vakabibi ni rogoca na vosa “Au sa vinakata, mo savasava mai.”

E tukuna na italanoa ni a “savasava vakasauri na nona vukavuka.”⁷

Eda rawa talega ni vakila na liga loloma ni iVakabula, na liga ni veivakabulai. Na marau levu, na vakanuinui, kei na vakavinavinaka e curuma na yaloda ni da kila ni vinakata o Koya me vukea meda savasava! Ni da lako mai Vua, ena mai vueti keda na Kalou, se me vabulai keda se solia na kaukauwa meda sotava kina na ituvaki cava ga.

Se cava ga, na noda ciqoma na Nona lewa—ka sega ni noda ga—ena vukea meda kilamatata na noda ituvaki. E sega ni dua na ka ca e rawa ni lako mai vua na Kalou. E kila o Koya na ka e vinaka duadua vei keda. E dina beka ni sega ni kauta laivi kusarawa oKoya na noda icolacola. Ena so na gauna e rawa ni vakamamadataka na noda icolacola o Koya, me vaka e a cakava vei Alama kei ira na nona tamata.⁸ Ena yaco ga, me baleta na veiyalayalati, ni na laveti na icolacola,⁹ ena bula oqo se ena Tucaketale tabu.

Na gagadre lomadina me yaco ga na Nona lewa, kei na kilamatata ni ituvaki vakalou ni noda Dauveivueti, ena vukei keda meda vakatubura na mataqali vakabauta ka vakaraitaka na vukavuka me savai kina. Ko Jisu Karisito e dua na Kalou loloma, e dua na Kalou ni inuinui, na Kalou ni veivakabulai, e dua na Kalou e vinakata me vakalougatataki keda ka vukea meda savasava. Oya na ka e vinakata oKoya ni se bera ni lako mai ki vuravura oqo ni a soliwale oKoya me mai vueti keda ni da lutu ki na cakacala. Oya na ka e vinakata mai Kecisemani ni sotava na mosi tawakilai rawa vakatamata ena yaluma me saumi kina na isau ni ivalavala ca. Oya na ka e vinakata nikua ni vakamamasu oKoya e vukuda e mata i Tamada.¹⁰ Oya na vuna e voqa tiko ga kina na Domona: “Dou lako mai vei au, koi kemudou vakayadua ga sa oca, ka colata na icolacola bibi, ia kau na vakacegui kemudou.”¹¹

E rawa ni vakabulai keda ka laveti keda cake baleta e tu vua na kaukauwa me cakava vakakina. A sa colata o Koya na mosi ni yago kei na yalo ka me vakasinaiti kina na Lomana ena loloma veivueti me yaco mada me rawa ni vukei keda ena ka kece ga ka vakabulai keda ka laveti keda cake.¹² Na vosa i Aisea, ka a cavuta mai o Apinatai, e biu totoka ka veilauti eke:

“E dina sa colata ko koya na noda rarawa, ka sa kauta voli na rarawa ni lomada. …

“… Sa vakamavoataki ko Koya ena vuku ni noda talaidredre, ka sa drakusi ena vuku ni noda caka cala; sa tau vua na cudru ni noda vakacegu tale; ia ena we ni kena kuita eda sa vakabulai kina.”¹³

Na vakasama vata ga e vakavulica na serekali oqo:

Kevaka ko vakila ni dua na sala ko sega tu ni savasava kina, kevaka ko vakila na kavoro, yalovinaka mo kila ni ko rawa ni savai, e rawa ni ko vakavinakataki, baleta ni lomani iko. Vakararavitaka ni sega ni dua na ka ca ena lako mai Vua.

Baleta ni o Koya “sa lako sobu ki ra sara,”¹⁵ sa cakava o Koya me rawa ki na ka kecega sa voroki ena noda bula me semati, ka me rawa vakaoqo ni da veivinakati tale kei na Kalou. E veivakaduavatataki na veika kece mai Vua, na veika kece e vuravura kei lomalagi, ka vakaduavatataki ena nona dra ena kauveilati.”¹⁶

Meda qai lako mai vei Karisito ni da taura na ikalawa lavaki kece. Ni da vakayacora oya, me noda mada na itutuniyalo ka tukuna tiko: “Na Turaga, kevaka ko ni sa vinakata, ko ni sa vakasavasavataki au rawa.” Kevaka eda kitaka oqo, ena rawa ni da ciqoma na liga veivakabulai ni iVakavuvuli, ka sala muria na voqa talei ni Domona: “Au sa vinakata, mo savasava mai.”

Na iVakabula e sa dua na Kalou eda rawa ni vakararavi kina. Sai Koya na Karisito, sai Koya sa Lumuti, na Mesaia, sa ikoya kau vakadinadinataka na Yacana tabu, io ko Jisu Karisito, emeni.