សេចក្ដីស្រឡាញ់ដ៏ធំចំពោះបុត្រាបុត្រីរបស់ព្រះវរបិតាយើង
សេចក្ដីស្រឡាញ់គឺជាឥរិយាបទចម្បង និងហេតុផលជម្រុញទៅគោលបំណងខាងវិញ្ញាណ ដែលត្រូវបានគ្រប់គ្រងដោយព្យាការីជាទីស្រឡាញ់របស់យើង ។
បងប្អូនប្រុសស្រីជាទីស្រឡាញ់របស់ខ្ញុំ នេះគឺជាគ្រាដ៏វិសេសវិសាល ហើយសំខាន់នៅក្នុងប្រវត្តិសាស្ត្រ ។ យើងមានពរដោយរស់នៅក្នុងគ្រាកាន់កាប់ត្រួតត្រាចុងក្រោយ ពីមុនការយាងមកជាលើកទីពីររបស់ព្រះអង្គសង្គ្រោះ ។ នៅជិតការចាប់ផ្ដើមនៃគ្រាកាន់កាប់ត្រួតត្រានេះក្នុងឆ្នាំ ១៨២៩ ជាឆ្នាំពីមុនសាសនាចក្រនេះត្រូវរៀបចំជាផ្លូវការ វិវរណៈដ៏ជាទីគាប់ចិត្តមួយត្រូវបានទទួល ដោយប្រកាសថា « កិច្ចការដ៏អស្ចារ្យមួយ » « ហៀបនឹងចេញមក » ហើយ ។ វិវរណៈនេះបានចែងថា អ្នកដែលមានបំណងប្រាថ្នាចង់បម្រើព្រះ មានគុណសម្បត្តិគ្រប់គ្រាន់សម្រាប់ការបម្រើបែបនេះតាមរយៈ « សេចក្ដីជំនឿ សេចក្ដីសង្ឃឹម សេចក្ដីសប្បុរស និងសេចក្ដីស្រឡាញ់ ដោយភ្នែកស្មោះត្រង់ទាំងស្រុងចំពោះសិរីល្អនៃព្រះ » ។១ សេចក្ដីសប្បុរសដែលជា « សេចក្ដីស្រឡាញ់ដ៏សុទ្ធសាធនៃព្រះគ្រីស្ទ »២រួមបញ្ចូលទាំង សេចក្ដីស្រឡាញ់ដ៏អស់កល្បរបស់ព្រះចំពោះបុត្រាបុត្រីរបស់ទ្រង់គ្រប់រូបផងដែរ ។៣
គោលបំណងរបស់ខ្ញុំនាព្រឹកនេះគឺដើម្បីគូសបញ្ជាក់ពីតួនាទីដ៏សំខាន់នៃសេចក្ដីស្រឡាញ់នោះនៅក្នុងកិច្ចការអ្នកផ្សព្វផ្សាយសាសនា កិច្ចការព្រះវិហារបរិសុទ្ធ និងពង្សប្រវត្តិ និងការបង្រៀនអំពីសាសនាក្នុងគ្រួសារនៅឯគេហដ្ឋាន ដោយមានការគាំទ្រពីសាសនាចក្រ ។ សេចក្ដីស្រឡាញ់របស់ព្រះអង្គសង្គ្រោះ និងសេចក្ដីស្រឡាញ់នៃបងប្អូនប្រុសស្រីរបស់យើង៤គឺជាឥរិយាបថ និងការលើកទឹកចិត្តដ៏សំខាន់សម្រាប់ការងារបម្រើ និងគោលបំណងខាងវិញ្ញាណ៥ដែលព្យាការីជាទីស្រឡាញ់របស់យើង គឺប្រធាន រ័សុល អិម ណិលសុន បានសុំឲ្យយើងធ្វើនៅក្នុងការកែតម្រូវដែលបានប្រកាសនាឆ្នាំ ២០១៨ ។
កិច្ចខិតខំរបស់អ្នកផ្សព្វផ្សាយសាសនាដើម្បីប្រមូលផ្ដុំអ៊ីស្រាអែលដែលខ្ចាត់ព្រាត់
ខ្ញុំមានបទពិសោធន៍ពីទំនាក់ទំនងរវាងកិច្ចការផ្សព្វផ្សាយសាសនា និងសេចក្ដីស្រឡាញ់ កាលពីខ្ញុំនៅក្មេង ។ កាលខ្ញុំមានអាយុ ១១ ឆ្នាំ ខ្ញុំបានទទួលពរលោកអយ្យកោមកពីលោកតារបស់ខ្ញុំដែលជាលោកអយ្យកោ ។៦ ផ្នែកមួយនៃពរជ័យនោះបានចែងថា « តាសូមផ្ដល់ពរជ័យឲ្យចៅមានសេចក្ដីស្រឡាញ់ដ៏ធំចំពោះបងប្អូនប្រុសស្រីរបស់ចៅ ដោយសារចៅត្រូវបានហៅឲ្យនាំយកដំណឹងល្អទៅកាន់ពិភពលោក… ដើម្បីនាំព្រលឹងទៅរកព្រះគ្រីស្ទ » ។៧
សូម្បីតែខ្ញុំនៅក្មេងក្ដី ក៏ខ្ញុំបានយល់ថា ការចែកចាយដំណឹងល្អគឺពឹងផ្អែកទៅលើសេចក្ដីស្រឡាញ់ដ៏ធំចំពោះបុត្រាបុត្រីគ្រប់រូបរបស់ព្រះវរបិតាសួគ៌យើងដែរ ។
ក្នុងនាមជាពួកអ្នកមានសិទ្ធិអំណាចទូទៅមួយរូបដែលបានចាត់ឲ្យចងក្រងសៀវភៅប្រកាសដំណឹងល្អរបស់យើងកាលពី ១៥ ឆ្នាំមុន យើងបានសន្និដ្ឋានថា ឥរិយាបថនៃសេចក្ដីស្រឡាញ់គឺជារឿងដ៏សំខាន់ចំពោះកិច្ចការផ្សព្វផ្សាយសាសនានៅក្នុងជំនាន់របស់យើង ក៏ដូចជានៅជំនាន់មុនៗដែរ ។ ជំពូកទី ៦ ស្ដីពីលក្ខណៈដូចជាព្រះគ្រីស្ទ រួមមាននូវ សេចក្ដីសប្បុរស និងសេចក្ដីស្រឡាញ់ គឺជាជំពូកដ៏ពេញនិយមបំផុតនៅក្នុងចំណោមពួកអ្នកផ្សព្វផ្សាយសាសនារហូតមក ។
ក្នុងនាមជាអ្នកតំណាងរបស់ព្រះអង្គសង្គ្រោះ ពួកអ្នកផ្សព្វផ្សាយសាសនាភាគច្រើនទទួលអារម្មណ៍ពីសេចក្ដីស្រឡាញ់នេះ ហើយនៅពេលពួកគេមានអារម្មណ៍នេះ នោះកិច្ចខិតខំរបស់ពួកគេទទួលបានពរ ។ នៅពេលសមាជិកមើលឃើញពីសេចក្ដីស្រឡាញ់នេះ ដែលជារឿងដ៏សំខាន់នៅក្នុងការជួយព្រះអម្ចាស់ឲ្យសម្រេចព្រះរាជបំណងរបស់ទ្រង់ នោះកិច្ចការរបស់ព្រះអម្ចាស់នឹងត្រូវបានសម្រេច ។
ខ្ញុំមានឯកសិទ្ធិដោយមានតួនាទីតូចមួយនៅក្នុងគំរូដ៏អស្ចារ្យមួយនៃសេចក្ដីស្រឡាញ់បែបនេះ ។ កាលខ្ញុំបម្រើជាប្រធានតំបន់កោះប៉ាស៊ីភិច ខ្ញុំបានទទួលការហៅទូរសព្ទមួយមកពីប្រធាន អ័រ វ៉េន សូត ។ កាលពីក្មេង លោកបានបម្រើបេសកកម្មនៅកោះសាម័រ ។ ក្រោយមក លោកបានត្រឡប់ទៅកោះសាម័រវិញក្នុងនាមជាប្រធានបេសកកម្ម ។៨ នៅពេលលោកបានទូរសព្ទមកខ្ញុំ លោកគឺជាប្រធានព្រះវិហារបរិសុទ្ធ អាពីយ៉ា សាម័រ ។ កាលលោកជាប្រធានបេសកកម្ម មានអ្នកផ្សព្វផ្សាយសាសនាក្មេងម្នាក់របស់លោកឈ្មោះ អែលឌើរ អូ វីនសិន ហាលិក ឥឡូវនេះគឺជាប្រធានតំបន់ប៉ាស៊ីភិច ។ ប្រធាន សូត មានសេចក្ដីស្រឡាញ់ និងការគោរពដ៏អស្ចារ្យចំពោះវិនសិន និងគ្រួសារហាលិកទាំងមូល ។ គ្រួសារនេះ ភាគច្រើនជាសមាជិកសាសនាចក្រ លើកលែងតែឪពុករបស់វិនសិន ឈ្មោះ អូតូ ហាលិក ដែលជាប្រធាននៃគ្រួសារនេះ ( កូនចៅកាត់អាល្លឺម៉ង់ និងសាម័រ ) ពុំមែនជាសមាជិក ។ ប្រធាន សូត បានដឹងថា ខ្ញុំនឹងចូលរួមក្នុងសន្និសីទស្តេកមួយ និងការប្រជុំផ្សេងទៀតក្នុងតំបន់សាម័រអាមេរិក ហើយលោកបានសួរថាតើខ្ញុំអាចពិចារណាស្នាក់នៅក្នុងផ្ទះរបស់អូតូ ហាលិក ក្នុងគោលបំណងចែកចាយដំណឹងល្អជាមួយនឹងគាត់បានដែរទេ ។
ខ្ញុំ និងភរិយារបស់ខ្ញុំ ម៉ារី បានស្នាក់នៅជាមួយនឹងអូតូ និងភរិយារបស់គាត់ ឈ្មោះ ដូរ៉ូធី ក្នុងផ្ទះដ៏ស្រស់ស្អាតរបស់ពួកគាត់ ។ ពេលបរិភោគអាហារពេលព្រឹក ខ្ញុំបានចែកចាយសារលិខិតដំណឹងល្អមួយ ហើយបានអញ្ជើញអូតូឲ្យជួបនឹងពួកអ្នកផ្សព្វផ្សាយសាសនា ។ គាត់មានសន្តានចិត្តល្អ ប៉ុន្តែបានបដិសេធការអញ្ជើញរបស់ខ្ញុំយ៉ាងម៉ឺងម៉ាត់ ។ គាត់បានពោលថា គាត់រីករាយដែលសមាជិកគ្រួសាររបស់គាត់ ភាគច្រើនគឺជាពួកបរិសុទ្ធថ្ងៃចុងក្រោយ ។ ប៉ុន្តែគាត់បានបញ្ជាក់យ៉ាងច្បាស់ថា ដូនតាមួយចំនួនរបស់ម្ដាយគាត់ដែលជាជនជាតិសាម័រជាពួកគ្រូគង្វាលខាងគ្រីស្ទសាសនាកាលពីដើមនៅក្នុងប្រទេសសាម័រ ហើយគាត់មានភក្ដីភាពជាខ្លាំងចំពោះទំនៀមទម្លាប់សាសនាគ្រីស្ទរបស់ពួកគេ ។៩ ប៉ុន្តែយើងនៅតែជាមិត្តល្អនឹងគ្នា ។
ក្រោយមក កាលប្រធាន ហ្គរដុន ប៊ី ហ៊ិងគ្លី រៀបចំឧទ្ទិសឆ្លងព្រះវិហារបរិសុទ្ធ ស៊ូវ៉ា ហ្វីជី លោកបានឲ្យលេខាផ្ទាល់ខ្លួនរបស់លោកគឺ បងប្រុស ដន អេជ ស្តេហេលី១០ទូរសព្ទមកខ្ញុំក្នុងប្រទេសនូវវែលសេឡង់ដើម្បីធ្វើការរៀបចំនានា ។ ប្រធាន ហ៊ីងគ្លី ចង់ហោះហើរពីប្រទេសហ្វីជីទៅកាន់សាម័រអាមេរិក ដើម្បីជួបនឹងពួកបរិសុទ្ធ ។ សណ្ឋាគារមួយចំនួនដែលបានប្រើក្នុងទស្សនកិច្ចកាលពីលើកមុនត្រូវបានផ្ដល់យោបល់ឲ្យ ។ ខ្ញុំបានសួរថា តើខ្ញុំអាចធ្វើការរៀបចំផ្សេងបានទេ ។ បងប្រុស ស្តេហេលី បានតបថា « លោកគឺជាប្រធានតំបន់ លោកអាចធ្វើបាន » ។
រំពេចនោះ ខ្ញុំបានទូរសព្ទទៅប្រធាន សូត ហើយបានប្រាប់លោកថា ប្រហែលជាយើងមានឱកាសម្ដងទៀតដើម្បីផ្ដល់ពរជ័យខាងវិញ្ញាណដល់មិត្តរបស់យើង អូតូ ហាលិក ។ ម្ដងនេះ អ្នកផ្សព្វផ្សាយសាសនានឹងជាប្រធាន ហ្គរដុន ប៊ី ហ៊ិងគ្លី ។ ខ្ញុំបានសួរថា តើវាសមរម្យទេបើសុំឲ្យគ្រួសារហាលិករៀបចំទទួលក្រុមដំណើររបស់ប្រធានហ៊ិងគ្លី ។១១ ប្រធាន និងស៊ិស្ទើរ ហ៊ិងគ្លី ព្រមទាំងកូនស្រីរបស់ពួកលោក ឈ្មោះ ជេន ហើយអែលឌើរ និងស៊ិស្ទើរ ជែហ្វ្រី អ័រ ហូឡិន ក៏ជាផ្នែកមួយក្នុងក្រុមដំណើរនោះផងដែរ ។ ដោយធ្វើការជាមួយនឹងគ្រួសារនោះ ប្រធាន សូត បានធ្វើការរៀបចំទាំងឡាយ ។១២
នៅពេលយើងចេញពីប្រទេសហ្វីជីទៅដល់ទីនោះបន្ទាប់ការឧទ្ទិសឆ្លងព្រះវិហារបរិសុទ្ធ យើងត្រូវបានទទួលស្វាគមន៍យ៉ាងកក់ក្ដៅ ។១៣ នាល្ងាចនោះយើងបាននិយាយទៅកាន់សមាជិកជនជាតិសាម័ររាប់ពាន់នាក់ រួចហើយបានធ្វើដំណើរទៅតំបន់របស់គ្រួសារហាលិក ។ លុះព្រឹកស្អែកឡើង នៅពេលយើងបានជុំគ្នាបរិភោគអាហារពេលព្រឹក ប្រធាន ហ៊ីងគ្លី និងអូតូ ហាលិក បានក្លាយជាមិត្តដ៏ល្អនឹងគ្នាទៅហើយ ។ ខ្ញុំបានចាប់អារម្មណ៍ថា ពួកលោកកំពុងមានការសន្ទនាដូចគ្នាដែលខ្ញុំធ្លាប់មានជាមួយនឹងអូតូកាលពីជាងមួយឆ្នាំមុនដែរ ។ នៅពេល អូតូ បានកោតសរសើរសាសនាចក្ររបស់យើង ប៉ុន្តែនៅប្រកាន់ជំហរយ៉ាងម៉ឺងម៉ាត់ចំពោះព្រះវិហាររបស់គាត់ នោះប្រធាន ហ៊ីងគ្លី បានដាក់ដៃលើស្មារបស់អូតូ ហើយមានប្រសាសន៍ថា « អូតូ ការណ៍នោះពុំទាន់ល្អគ្រប់គ្រាន់នៅឡើយទេ លោកគួរតែក្លាយជាសមាជិកម្នាក់ក្នុងសាសនាចក្រ ។ នេះគឺជាសាសនាចក្ររបស់ព្រះអម្ចាស់ » ។ អ្នកអាចឃើញថា ភាពរឹងរូសរបស់អូតូត្រូវបានរសាយបាត់ ដោយព្រមទទួលយកអ្វីដែលប្រធាន ហ៊ីងគ្លី បានមានប្រសាសន៍ ។
នេះគឺជាការចាប់ផ្ដើមនៃការបង្រៀនបន្ថែមទៀតរបស់អ្នកផ្សព្វផ្សាយសាសនា និងការបន្ទាបខ្លួនខាងវិញ្ញាណមួយដែលបានអនុញ្ញាតឲ្យ អូតូ ហាលិក ជ្រមុជទឹក ហើយបញ្ជាក់រយៈពេលជាងមួយឆ្នាំក្រោយមក ។ មួយឆ្នាំក្រោយមកទៀត គ្រួសារហាលិកបានផ្សារភ្ជាប់ជាគ្រួសារអស់កល្បជានិច្ចមួយនៅក្នុងព្រះវិហារបរិសុទ្ធ ។១៤
រឿងដែលប៉ះពាល់ដល់ដួងចិត្តខ្ញុំនៅក្នុងបទពិសោធន៍ដ៏អស្ចារ្យនេះគឺជាសេចក្ដីស្រឡាញ់ដ៏ធំដែលប្រធាន វ៉េន សូត មានចំពោះអ្នកផ្សព្វផ្សាយសាសនាពីមុនរបស់លោកគឺ អែលឌើរ វិនស៍ ហាលិក និងបំណងប្រាថ្នារបស់លោកចង់ឃើញគ្រួសារហាលិកទាំងមូលបានរួបរួមគ្នាជាគ្រួសារអស់កល្បជានិច្ចមួយ ។១៥
នៅពេលយើងខិតខំប្រមូលផ្ដុំអ៊ីស្រាអែល យើងចាំបាច់ត្រូវមានសេចក្ដីស្រឡាញ់បែបនេះ ហើយងាកចេញពីអារម្មណ៍នៃការគិតថា វាគ្រាន់តែជាការទទួលខុសត្រូវ១៦ ឬកំហុសចំពោះអារម្មណ៍នៃសេចក្ដីស្រឡាញ់ និងការចូលរួមក្នុងភាពជាដៃគូដ៏ទេវភាពនៃការចែកចាយសារលិខិត ការងារបម្រើ និងបេសកកម្មរបស់ព្រះអង្គសង្គ្រោះជាមួយនឹងពិភពលោកនេះ ។១៧
ក្នុងនាមជាសមាជិក យើងអាចបង្ហាញសេចក្ដីស្រឡាញ់របស់យើងចំពោះព្រះអង្គសង្គ្រោះ និងបងប្អូនប្រុសស្រីរបស់យើងជុំវិញពិភពលោកតាមរយៈការអញ្ជើញដ៏សាមញ្ញៗ ។ កាលវិភាគប្រជុំថ្មីសម្រាប់ថ្ងៃអាទិត្យតំណាងឲ្យឱកាសដ៏ល្អមួយដើម្បីសមាជិកអាចអញ្ជើញមិត្តភក្ដិ និងពួកសហការីដោយជោគជ័យ និងដោយក្ដីស្រឡាញ់ឲ្យពួកគេមកមើល ហើយទទួលអារម្មណ៍ពីបទពិសោធន៍មួយក្នុងសាសនាចក្រ ។១៨ ការប្រជុំសាក្រាម៉ង់ខាងវិញ្ញាណ ដោយសង្ឃឹមថាវាពិសិដ្ឋដូចអ្វីដែលអែលឌើរ ជេហ្វ្រី អ័រ ហូឡិន បានពិពណ៌នាម្សិលមិញ នឹងបន្ដដោយការប្រជុំរយៈពេល ៥០ នាទី ដែលផ្ដោតលើព្រះគម្ពីរសញ្ញាថ្មី និងព្រះអង្គសង្គ្រោះ ឬសុន្ទរកថាសន្និសីទដែលពាក់ព័ន្ធដែលផ្ដោតលើព្រះអង្គសង្គ្រោះ និងគោលលទ្ធិរបស់ទ្រង់ផងដែរ ។
បងប្អូនស្រីមួយចំនួនក្នុងសមាគមសង្គ្រោះបានងឿងឆ្ងល់ថា ហេតុអ្វីបានជាពួកគេមានការចាត់តាំងចំពោះ « ការប្រមូលផ្ដុំ » មួយរួមជាមួយនឹងសមាជិកកូរ៉ុមបព្វជិតភាព ។ មានហេតុផលសម្រាប់បញ្ហានេះ ហើយប្រធានណិលសុន បានថ្លែងពីការណ៍នេះនៅក្នុងសន្និសីទទូទៅកាលពីលើកមុន ។ លោកបានបញ្ចប់ថា « យើងមិនអាចប្រមូលផ្ដុំអ៊ីស្រាអែលដោយគ្មានបងប្អូនបាននោះទេ » ។១៩ លើសពីនេះទៀត នៅក្នុងជំនាន់របស់យើង យើងមានពរដោយសារប្រមាណជា ៣០ ភាគរយនៃពួកអ្នកផ្សព្វផ្សាយសាសនាពេញម៉ោងគឺជាស៊ិស្ទើរ ។ ការណ៍នេះផ្ដល់នូវការជម្រុញបន្ថែមសម្រាប់បងប្អូនស្រីក្នុងសមាគមសង្គ្រោះដើម្បីចែកចាយដំណឹងល្អដោយសេចក្ដីស្រឡាញ់ ។ អ្វីដែលត្រូវការចាំបាច់គឺជាការតាំងចិត្តដ៏គួរឲ្យស្រឡាញ់ មានចិត្តមេត្តាខាងវិញ្ញាណរបស់យើងម្នាក់ៗ—ជាបុរស ស្ត្រី យុវវ័យ និងកុមារ—ដើម្បីចែកចាយដំណឹងល្អរបស់ព្រះយេស៊ូវគ្រីស្ទ ។ ប្រសិនបើយើងបង្ហាញសេចក្ដីស្រឡាញ់ សន្តានចិត្តល្អ និងភាពរាបសា នោះមនុស្សជាច្រើននឹងទទួលយកការអញ្ជើញរបស់យើង ។ អ្នកដែលជ្រើសពុំទទួលយកការអញ្ជើញរបស់យើងនឹងនៅតែជាមិត្តរបស់យើង ។
កិច្ចខិតខំផ្នែកព្រះវិហារបរិសុទ្ធ និង ពង្សប្រវត្តិដើម្បីប្រមូលផ្ដុំអ៊ីស្រាអែល
សេចក្ដីស្រឡាញ់ក៏ស្ថិតនៅកណ្ដាលនៃកិច្ចខិតខំរបស់យើងផ្នែកព្រះវិហារបរិសុទ្ធ និងពង្សប្រវត្តិដើម្បីប្រមូលផ្ដុំអ៊ីស្រាអែលនៅផ្នែកម្ខាងទៀតនៃវាំងននដែរ ។ នៅពេលយើងរៀនពីការសាកល្បង និងការលំបាកដែលបុព្វការីជនរបស់យើងបានជួបប្រទះ នោះសេចក្ដីស្រឡាញ់ និងអំណរគុណរបស់យើងចំពោះពួកគាត់នឹងរីកធំឡើង ។ កិច្ចខិតខំរបស់យើងផ្នែកព្រះវិហារបរិសុទ្ធ និង ពង្សប្រវត្តិបានពង្រឹងយ៉ាងខ្លាំងដោយការកែតម្រូវថ្មីនៅក្នុងកាលវិភាគការប្រជុំថ្ងៃអាទិត្យ និងការរីកចម្រើនរបស់យុវវ័យនៅក្នុងថ្នាក់រៀន និងកូរ៉ុម ។ ការផ្លាស់ប្ដូរទាំងនេះផ្ដល់ការយកចិត្តទុកដាក់ជាមុន និងកាន់តែមានអនុភាពចំពោះការរៀនសូត្រអំពីបុព្វការីជនរបស់យើង និងការប្រមូលផ្ដុំអ៊ីស្រាអែលនៅផ្នែកម្ខាងទៀតនៃវាំងនន ។ ទាំងកិច្ចការព្រះវិហារបរិសុទ្ធ និងពង្សប្រវត្តិមានការរីកចម្រើនយ៉ាងខ្លាំង ។
អ៊ិនធើរណែតគឺជាឧបករណ៍មួយដ៏មានអនុភាព ឥឡូវនេះគេហដ្ឋានគឺជាមជ្ឈមណ្ឌលពង្សប្រវត្តិដ៏ចម្បងរបស់យើង ។ សមាជិកវ័យក្មេងរបស់យើងមានជំនាញយ៉ាងប៉ិនប្រសប់នៅក្នុងការស្រាវជ្រាវពង្សប្រវត្តិ ហើយត្រូវបានលើកទឹកចិត្តខាងវិញ្ញាណដើម្បីធ្វើពិធីបុណ្យជ្រមុជទឹកសម្រាប់បុព្វការីជនរបស់ពួកគេដែលពួកគេបានរៀនស្រឡាញ់ ហើយមានអំណរគុណនោះ ។ ចាប់តាំងពីការផ្លាស់ប្ដូរអនុញ្ញាតឲ្យកុមារអាយុ ១១ ឆ្នាំអាចធ្វើបុណ្យជ្រមុជទឹកដល់អ្នកស្លាប់ នោះប្រធានព្រះវិហារបរិសុទ្ធនៅទូទាំងពិភពលោកបានរាយការណ៍ថាការចូលរួមមានកំណើនយ៉ាងខ្លាំង ។ ប្រធានព្រះវិហារបរិសុទ្ធមួយរូបបានប្រាប់យើងថា « មានការកើនឡើងយ៉ាងខ្លាំងសម្រាប់អ្នកមកធ្វើពិធីបុណ្យជ្រមុជទឹក … ហើយលើសពីនេះទៀត កុមារអាយុ ១១ ឆ្នាំ នាំសមាជិកគ្រួសារជាច្រើននាក់មក ។ … សូម្បីតែពួកគេនៅ [ ក្មេង ] ក្ដី ក៏ពួកគេហាក់ដូចជាទទួលអារម្មណ៍នូវគារវភាព និងគោលបំណងសម្រាប់ពិធីបរិសុទ្ធដែលពួកគេកំពុងធ្វើដែរ ។ វាគឺជាការអស្ចារ្យដើម្បីមើលឃើញរឿងនេះ ! »២០
ខ្ញុំដឹងថា ថ្នាក់ដឹកនាំអង្គការបឋមសិក្សា និងយុវវ័យរបស់យើងកំពុង ហើយនឹងបន្តធ្វើឲ្យកិច្ចការព្រះវិហារបរិសុទ្ធ និងពង្សប្រវត្តិក្លាយជាកិច្ចខិតខំដ៏ធំមួយ ។ បងប្អូនប្រុសស្រីក្នុងសមាគមសង្គ្រោះ និងបព្វជិតភាពអាចជួយបំពេញការទទួលខុសត្រូវរបស់ខ្លួនផ្នែកព្រះវិហារបរិសុទ្ធ និងពង្សប្រវត្តិដោយសេចក្ដីស្រឡាញ់ ហើយក៏តាមរយៈការជួយ និងការបំផុសគំនិតកុមារ ព្រមទាំងយុវវ័យឲ្យប្រមូលផ្ដុំអ៊ីស្រាអែលនៅម្ខាងទៀតនៃវាំងននផងដែរ ។ នេះគឺជារឿងដ៏សំខាន់នៅក្នុងគេហដ្ឋាន និងនៅថ្ងៃឈប់សម្រាក ។ ខ្ញុំសូមសន្យាថា ការធ្វើពិធីបរិសុទ្ធដោយសេចក្ដីស្រឡាញ់សម្រាប់បុព្វការីជននឹងពង្រឹង ហើយការពារយុវវ័យ និងក្រុមគ្រួសាររបស់យើងនៅក្នុងពិភពលោកមួយដែលមានអំពើអាក្រក់កាន់តែកើនឡើង ។ ខ្ញុំក៏សូមថ្លែងទីបន្ទាល់ផ្ទាល់ខ្លួនផងដែរថា ប្រធាន រ័សុល អិម ណិលសុន បានទទួលវិវរណៈដ៏មានសារៈសំខាន់អស្ចារ្យទាក់ទងនឹងកិច្ចការព្រះវិហារបរិសុទ្ធ និងពង្សប្រវត្តិ ។
រៀបចំក្រុមគ្រួសារដ៏អស់កល្បជានិច្ច និងបុគ្គលម្នាក់ៗឲ្យរស់នៅជាមួយនឹងព្រះ
ការគូសបញ្ជាក់ថ្មីស្ដីពីការសិក្សា និងរស់នៅតាមដំណឹងល្អនៅឯគេហដ្ឋាន ព្រមទាំងធនធានដែលសាសនាចក្រផ្ដល់ឲ្យគឺជាឱកាសដ៏អស្ចារ្យមួយដើម្បីរៀបចំក្រុមគ្រួសារ និងបុគ្គលម្នាក់ៗដោយសេចក្ដីស្រឡាញ់ដើម្បីជួប ហើយរស់នៅជាមួយនឹងព្រះ ។២១
នៅពេលបុរសម្នាក់ និងស្ត្រីម្នាក់ត្រូវបានផ្សារភ្ជាប់នៅក្នុងព្រះវិហារបរិសុទ្ធ ពួកគេចូលទៅក្នុងរបៀបដ៏បរិសុទ្ធនៃអាពាហ៍ពិពាហ៍ក្នុងសេចក្ដីសញ្ញាថ្មី និងដ៏អស់កល្បជានិច្ច ជារបៀបនៃបព្វជិតភាព ។២២ ពួកគេរួមគ្នាទទួលយកពរជ័យ និងអំណាចបព្វជិតភាពដើម្បីដឹកនាំកិច្ចការក្នុងគ្រួសាររបស់ពួកគេ ។ ស្ត្រី និងបុរសមានតួនាទីដាច់ដោយឡែកពីគ្នាដូចដែលបានចែងនៅក្នុង « ក្រុមគ្រួសារ ៖ ការប្រកាសដល់ពិភពលោក »២៣ ប៉ុន្តែតម្លៃ និងសារៈសំខាន់នៃការទទួលខុសត្រូវរបស់ពួកគេគឺស្នើគ្នា ។២៤ ពួកគេមានអំណាចស្នើគ្នាដើម្បីទទួលវិវរណៈសម្រាប់គ្រួសាររបស់ពួកគេ ។ នៅពេលពួកគេធ្វើការរួមគ្នាដោយសេចក្ដីស្រឡាញ់ និងសេចក្ដីសុចរិត នោះការសម្រេចចិត្តរបស់ពួកគេត្រូវបានប្រទានពរពីសួគ៌ា ។
អ្នកដែលស្វែងរកចង់ដឹងពីព្រះទ័យរបស់ព្រះអម្ចាស់ក្នុងនាមបុគ្គលម្នាក់ៗ និងសម្រាប់ក្រុមគ្រួសាររបស់ពួកគេត្រូវតែខិតខំស្វែងរកសេចក្ដីសុចរិត ភាពស្លូតបូត សន្តានចិត្តល្អ និងសេចក្ដីស្រឡាញ់ ។ ភាពរាបសា និងសេចក្ដីស្រឡាញ់បង្ហាញពីបុគ្គលិកលក្ខណៈរបស់អ្នកដែលស្វែងរកព្រះទ័យរបស់ព្រះអម្ចាស់ ជាពិសេសសម្រាប់ក្រុមគ្រួសាររបស់ពួកគេ ។
ការធ្វើឲ្យខ្លួនឯងបានល្អឥតខ្ចោះ ការធ្វើឲ្យខ្លួនឯងមានគុណសម្បត្តិគ្រប់គ្រាន់សម្រាប់ពរជ័យនៃសេចក្ដីសញ្ញា និងការរៀបចំខ្លួនដើម្បីជួបព្រះគឺជាការទទួលខុសត្រូវរបស់បុគ្គលម្នាក់ៗ ។ យើងចាំបាច់ត្រូវមានភាពខ្លួនទីពឹងខ្លួន ហើយប្រព្រឹត្តអ្វីៗជាច្រើនដើម្បីធ្វើឲ្យគេហដ្ឋានរបស់យើងក្លាយជាទីជ្រកកោនពីព្យុះសង្ឃរាដែលហ៊ុមព័ទ្ធយើង២៥ និងជាទីបរិសុទ្ធនៃសេចក្ដីជំនឿ ។២៦ ឪពុកម្តាយមានការទទួលខុសត្រូវក្នុងការបង្រៀនដល់កូនៗរបស់ពួកគេដោយសេចក្ដីស្រឡាញ់ ។ គេហដ្ឋានដែលពេញដោយសេចក្ដីស្រឡាញ់គឺជាអំណរ ភាពរីករាយ និងជាស្ថានសួគ៌នៅលើផែនដី ។២៧
ទំនុកតម្កើងដែលម្ដាយរបស់ខ្ញុំចូលចិត្តគឺបទ « សេចក្តីស្រឡាញ់នៅក្នុងផ្ទះ » ។២៨ នៅពេលគាត់ឮឃ្លាដំបូង « មានលម្អនៅព័ទ្ធជុំវិញកាលស្រឡាញ់ក្នុងផ្ទះ » នោះវាបានប៉ះពាល់ដួងចិត្តគាត់ ហើយក៏ស្រក់ទឹកភ្នែក ។ ក្នុងនាមជាកូនចៅ យើងដឹងថា យើងបានរស់នៅក្នុងគេហដ្ឋានមួយបែបនេះ វាគឺជាអាទិភាពដ៏ខ្ពស់បំផុតមួយរបស់គាត់ ។២៩
បន្ថែមពីលើការលើកទឹកចិត្តឲ្យមានបរិយាកាសដ៏គួរឲ្យស្រឡាញ់មួយនៅក្នុងគេហដ្ឋាន ប្រធាន ណិលសុន បានផ្ដោតលើការកំណត់ការប្រើប្រាស់ប្រព័ន្ធផ្សព្វផ្សាយដែលបង្អាក់គោលបំណងចម្បងរបស់យើង ។៣០ ការកែសម្រួលមួយដែលនឹងផ្ដល់ជាប្រយោជន៍ស្ទើរតែដល់គ្រប់គ្រួសារគឺ ត្រូវធ្វើឲ្យអ៊ិនធើរណែត ប្រព័ន្ធផ្សព្វផ្សាយសង្គម និងទូរទស្សន៍ក្លាយជាអ្នកបម្រើ ជំនួសឲ្យការរំខាន កាន់តែអាក្រក់ជាងនេះទៀត គឺជាចៅហ្វាយ ។ វាជាសង្គ្រាមសម្រាប់ព្រលឹងទាំងអស់ ជាពិសេសកូនៗ ដែលជារឿយៗនៅក្នុងគេហដ្ឋាន ។ ក្នុងនាមជាឪពុកម្ដាយ យើងចាំបាច់ត្រូវប្រាកដថា មាតិកាប្រព័ន្ធផ្សព្វផ្សាយគឺល្អ សមរម្យតាមអាយុ ហើយស្របតាមបរិយាកាសគួរឲ្យស្រឡាញ់ដែលយើងកំពុងព្យាយាមបង្កើត ។
ការបង្រៀននៅក្នុងគេហដ្ឋានរបស់យើងចាំបាច់ត្រូវមានភាពច្បាស់លាស់ ហើយលើកទឹកចិត្ត៣១ ប៉ុន្តែក៏ត្រូវមានខាងវិញ្ញាណ ភាពរីករាយ និងពេញដោយសេចក្ដីស្រឡាញ់ផងដែរ ។
ខ្ញុំសូមសន្យាថា នៅពេលយើងផ្ដោតលើសេចក្ដីស្រឡាញ់របស់យើងចំពោះព្រះអង្គសង្គ្រោះ និងដង្វាយធួនរបស់ទ្រង់ ធ្វើឲ្យទ្រង់ជាផ្នែកដ៏សំខាន់នៃកិច្ចខិតខំរបស់យើងដើម្បីប្រមូលផ្ដុំអ៊ីស្រាអែលទាំងសងខាងនៃវាំងនន ធ្វើការងារបម្រើដល់មនុស្សដទៃ ហើយរៀបចំបុគ្គលម្នាក់ៗដើម្បីជួបព្រះ នោះឥទ្ធិពលនៃមារសត្រូវនឹងរលាយបាត់ ហើយអំណរ ភាពរីករាយ និងសេចក្ដីសុខសាន្តនឹងធ្វើឲ្យគេហដ្ឋានរបស់យើងបានបរិសុទ្ធដោយសេចក្ដីស្រឡាញ់ដូចជាព្រះគ្រីស្ទ ។៣២ ខ្ញុំសូមថ្លែងទីបន្ទាលពីការសន្យាខាងគោលលទ្ធិទាំងនេះ ហើយថ្លែងសាក្សីដ៏មុតមាំអំពីព្រះយេស៊ូវគ្រីស្ទ និងពលិកម្មដ៏ធួនរបស់ទ្រង់ដើម្បីជាប្រយោជន៍ដល់យើង នៅក្នុងព្រះនាមនៃព្រះយេស៊ូវគ្រីស្ទ អាម៉ែន ៕