2010–2019
Ira na Marama kei na Vulici ni Kosipeli e Vale
Okotova 2018


Ira na Marama kei na Vulici ni Kosipeli e Vale

Na iVakabula sa nomu ivakaraitaki uasivi ni nomu cakava na itavi bibi ena Nona tuvana me matata vakavinaka sara kina na vuli kosipeli ena itikotiko.

Kemuni na ganequ lomani, e ka talei na soqoni vata kei kemuni. Oqo e gauna marautaki ena Lotu i Jisu Karisito ni Yalododonu Edaidai. Sa sovaraka tiko mai na Turaga na kila-ka ena Nona Lotu me vaka a yalataka ni na cakava.

O nanuma tiko na Nona kaya: “A cava na kena dede me dukadukali tiko kina na wai ni uciwai sa kui? Ia na kaukauwa cava ena tarovi lomalagi? Raica sa sega ni rawa vua na tamata me dodoka yani na ligana malumalumu me tarova kina na kui sobu ni uciwai na Misuri ena kena sala tudei, se me tarova na kena wai me tuva cake tale, ia sa sega tale ga ni rawa vua me tarova vakakina na Kalou Kaukauwa, me kakua ni sovaraka na kilaka mai lomalagi ena uludra na Yalododonu Edaidai.”1

E tiki talega ni wasei mai ni kila-ka ni Turaga e sema ki na Nona sovaraka mai vagumatua na dina tawamudu ki na vakasama kei na yalodra na Nona tamata. Sa vakamatatataka kina o Koya ni o ira na luvena yalewa na Tamada Vakalomalagi sa nodra ilesilesi taumada na mana ni kena vagumatuataki. Dua na ivakadinadina ni cakamana oqo na Nona liutaka na Nona parofita bula me vakaliuca vakabibi na vakavulici ni kosipeli ena itikotiko kei na loma ni matavuvale.

O na taroga beka, “Era na yaco vakacava na marama yalodina mera gutaka mada na vukei ni Turaga me sovaraka na kila-ka vei ira na Nona Yalododonu?” E sauma kina na Turaga e “Na Matavuvale: Ai Vakaro ki Vuravura Raraba.” O nanuma tiko na vosa, ia o na raica beka na kena ibalebale vou ka kila ni Turaga sa kila oti tu na veisau totoka oqo, sa yaco tiko nikua. Ena ivakaro raraba, a lesi ira na marama mera ulu ni qasenivuli ni kosipeli ena matavuvale ena Nona kaya: “Sa nodra itavi taumada na tina me ra susugi ira cake na luvedra.”2 Oqo e oka kina na veisusugi ena dina ni kosipeli kei na kila-ka.

E tomani tale ena ivakaro: “Era sa vakacolati kina na tama kei na tina me ra veivukei vakatautauvata.”3 E rau sa tautauvata ena itavi, tautauvata ena igu me rau tubu vakayalo kei na rawati na kila-ka, ka rau sa duabau ena veivukei vakai rau. E rau sa tautauvata ena ivotavota vakalou mera rau bula cecere. Ia, rau na sega ni bula cecere vakai rau yadua.

Cava na vuna, vua e dua na luvena yalewa na Kalou e duabau ka tautauvata ena vakawati me nona ilesilesi taumada me veisusugi ena gacagaca bibi duadua mera ciqoma na tamata, o ya na kila na dina mai lomalagi? Au sa raica kina, oqo na ivakarau ni Turaga vakatekivu mai na gauna a buli kina na matavuvale e vuravura.

Me vakataka, o Ivi a ciqoma na kila-ka a gadreva o Atama me kania na vua ni vunikau ni kila-ka baleti rau me rau maroroya na vunau taucoko ni Kalou ka me rau bulia e dua na matavuvale. Au sega ni kila na vuna a yaco kina e liu vei Ivi, ia o Atama kei Ivi e rau duabau uasivi sara ena gauna a sovaraki kina vei Atama na kila-ka.

Dua tale na ivakaraitaki ni nona vakayagataka na Turaga na nodra isolisoli ni veisusugi na marama o ya na sala a vaqaqacotaki iratou kina na luvei Ilamani. E oso na noqu itilotilo niu wilika na itukutuku kau nanuma na vosa malua ivakadei nei tinaqu niu biubiu mai vale ki na veiqaravi vakamataivalu.

A vola kina o Ilamani:

“Era sa vakavulici vakavinaka mai vei ira na tinadra, ni kevaka era sega ni vakatitiqa, ena vakabulai ira na Kalou.

“Ia era sa tukuna lesu mai vei au na nodra vosa na tinadra, ka kaya: Keimami sa sega ni vakatitiqataka ni ra kila tu na tinai keimami.”4

Au sega ni kila taucoko na vuna e solia kina na Turaga na ilesilesi taumada ni veisusu ena matavuvale vei ira na marama yalodina, ia au vakadinata ni sa baleta na nomuni igu ni loloma. Ena taura na loloma cecere mo vakila cake na gagadre ni dua tale mai na nomu. Oqori na loloma uasivi i Karisito vua na tamata o na tubera. Na yalo ni loloma oqori e tadu mai vua e dua na tamata sa digitaki me veituberi ka sa tu vua na mana ni Veisorovaki i Jisu Karisito. Na ibole ni iSoqosoqo ni Veivukei, sa dau ivakaraitaki nei tinaqu, ka veivakauqeti vei au: “Sa Sega ni Mudu na Loloma.”

Ko ni sa luvena yalewa na Kalou, ka sa tu e lomamuni na gugumatua cecere mo ni kila na gagadre ni tamata ka lomani ira. Ena qai yaco kina, mo ni dau rogoca tikoga kina na vosa malua vinaka ni Yalo. Ena rawa ki na Yalo me dusimaka nomu vakasama, na ka o kaya, kei na ka o cakava mo tubera na tamata me sovaraka mai na Turaga na kila-ka, dina, kei na yaloqaqa vei ira.

Kemuni na marama ko ni rogoci au tiko ko ni sa tiko ena vanua talei ena nomuni ilakolako ni bula oqo. Eso era goneyalewa lalai era tiko ena soqoni raraba ni marama ena imatai ni gauna. Eso era goneyalewa sa vakavakarau tiko mera dauveituberi e gadreva na Kalou mera vakataka. Eso se qai vakamau vou se bera ni vakaluveni, eso na tina vou e dua se levu na isolisoli. Eso ko ni sa tinadra na itabagone kei na so tale sa laki kaulotu na luvemuni. Eso sa tiko na luvemuni era sa malumalumu na nodra vakabauta ka ra sa yawa sara mai vale. Eso e tiko duadua e sega na nomuni itokani yalodina. Eso e budra na gone.

Ia, se cava sara na kemuni ituvaki yadua, ko ni sa tiki—e tiki bibi—ni matavuvale ni Kalou kei na nomuni matavuvale, ena siga ni mataka, ena vuravura oqo, se ena vuravura ni yalo. Na ilesilesi ni Kalou vei iko o ya mo tubera e vuqa na Nona matavuvale ena nomu rawata ena nomu lomana ka vakabauta na Turaga o Jisu Karisito.

Na nomu ibolebole dina o ya mo kila o cei mo tubera, vakacava, kei na gauna cava. O gadreva na veivuke ni Turaga. E kila na yalodra na tamata, ka kila na gauna era sa vakarau kina mera ciqoma nomu veituberi. Nomu masu ena vakabauta sa idola mo rawa-ka. Sa rawa mo vakararavi ki na Nona veidusimaki.

A veivakayaloqaqataki: “Kerea na Tamada ena yacaqu ena vakabauta, kei na vakanuinui ni na soli vei kemudrau, ka na soli vei kemudrau na Yalo Tabu, ka sa vakatakila na veika kecega ka na ganita vei ira na luve ni tamata.”5

Me ikuri ni masu, na vulica vagumatua na ivolanikalou me na tiki ni nomu tubu qaqaco mo veituberi. Oqo na yalayala: “Dou kakua ni lomaocaocataka na ka mo dou kaya; ia mo dou kumuna cake ena nomudou vakasama e veigauna na vosa ni bula, ka na qai soli vei kemudou ena kena auwa na veika me tukuni me ganita na tamata yadua.”6

Mo qai taura e vuqa na gauna mo dau masu, vakasama titobu, ka vakananuma na veika vakayalo. Ena yaco na kila-ka baleta na dina me sovaraki vei iko ko na qai tubu ena kaukauwa mo veituberi ena nomu vuvale.

Ena yaco na gauna o na vakila ni nomu gumatua mo vulica me vinaka nomu veituberi ena berabera. Ena taura na vakabauta mo vosota tiko. Sa vakauta mai na iVakabula vei iko na veivakayaloqaqataki oqo:

“O koya mo dou kakua kina ni oca ena cakacaka vinaka, ni dou sa tura tiko na yavu ni dua na cakacaka cecere. Ia ena tubu mai ena veika lalai na veika cecere.

“Raica, sa gadreva na Turaga na yalo kei na vakasama sa vakarau tu; ia ko ira sa vakarau tu ka talairawarawa era na kania na veta ni vuata ena vanua ko Saioni ena veisiga mai muri.”7

Na nomuni tiko ena bogi nikua sa ivakadinadina ni sa lomamu mo ciqoma na veisureti ni Turaga mo veituberi. E dina oqo vei koya e gone duadua e tiko ena bogi nikua. O sa na kila o cei mo na tubera ena nomu matavuvale. Kevaka o masu ena yalodina sara, ena votu mai e dua na yaca se matana e dua. Kevaka o na masu mo kila na ka mo cakava se kaya, o na vakila na kena isau. Na gauna ga o talairawarawa kina, na nomu kaukauwa ni veituberi ena tubu. O na vakavakarau ki na siga mo na tuberi ira kina na luvemu vakai iko.

Era na masu na tina ni itabagone mera kila na sala mera tubera e dua na luvedra tagane se yalewa e dau dredre nodra tuberi. O na masu mo kila o cei e rawa ni veivakauqeti vakayalo e gadreva o luvemu ka na ciqoma. Na Kalou ena rogoca ka sauma na nodra masu vakaidina oqo na tina lomaleqa, ka na tala mai na veivuke.

Vakakina, vei budra na gone ena bogi nikua e yalorarawa ena vuku ni oca kei na dredre era vakavuna na luvena kei na makubuna. Ena rawa mo yaloqaqa ka dusimaki mai na veika era a sotava na matavuvale ena ivolanikalou.

Mai na gauna i Ivi kei Atama, ki na Tama o Isireli, ki na veimatavuvale yadua ena iVola i Momani, sa dua kina na lesoni ivakadei me baleta na ka me caka baleta na nodra rarawa na gone muacala: kua ni guce ena loloma.

Eda sa vakayaloqaqataki ena ivakaraitaki ni iVakabula ni sa vakabula na yalodra cidroi na luvena vakayalo na Tamada Vakalomalagi. Dina ga ni o ira kei keda eda vakamosi yalo, na liga ni iVakabula sa tuberi keda tikoga.8 A vosa ena 3 Nifai baleti ira na ganena kei na tuakana vakayalo, a guce kina o Koya me tuberi ira: “Oi kemuni … na mataqali i Isireli, au a nanuma vakavica meu vakasoqoni kemuni vata ka maroroi kemuni me vaka na toa yalewa sa vakasoqoni ira na luvena e ruku ni tabana, ka karoni kemuni.”9

Oi kemuni na marama ena ituvaki yadua ni bula oqo, ena ituvaki yadua ni matavuvale, ki na ivakarau kece ni bula, na iVakabula sa nomuni ivakaraitaki uasivi mo ni tiki cecere ni Nona cakacaka me vakaceceretaki na vulici ni kosipeli ena itikotiko kei na vuvale.

O ni na kauta na lomamuni sa dauloloma ki na kena veisau na itaviqaravi kei na itovo ena nomu matavuvale. Oqo ena kauta mai na tubu vakayalo e cecere. Ni ko masu vata ka masulaki ira nomu matavuvale, o na vakila na nomu loloma kei na loloma ni iVakabula vei ira. Sa na yaco me nomu tikoga vakalevu na isolisoli vakayalo oqo ni ko vakasaqara. Era na vakila nomu matavuvale ni ko masu ena vakabauta cecere.

Ni ra soqoni na matavuvale mera wilika e cake na ivolanikalou, o sa na wilika oti ka masulaka mo vakarautaki iko. O na kunea na gauna mo masuta na Yalo me vakararamataka na nomu vakasama. Ia, ni sa nomu gauna mo wiliwili, era na vakila na matavuvale ni ko lomana na Kalou kei na Nona vosa. Era na tuberi maivei Koya kei na Yalona.

Na veivakauqeti vata oqo ena tadu mai ni ra soqoni na matavuvale ni ko masu ka tuvanaka. Ena rawa ni taura na sasaga kei na gauna, ia ena mana. Au nanuma na lesoni a vakavulica o tinaqu niu a se gone. Au se vakasamataka rawa tiko na mape duiroka a cakava ena vanua a lakova voli na iApositolo Paula. Au vakasamataka na gauna kei na igu me cakava rawa kina o tinaqu. Ia siga edai au sa mai vakalougatataki ena nona loloma vei koya na iApositolo yalodina o ya.

Ko ni na kunea yadua na sala mo ni cau ki na sovaraki ni dina ki na nomuni matavuvale ena Lotu vakalesuimai ni Turaga. Oi kemuni yadua ko ni na masu, vuli, ka vakasama vakatitobu mo kila na cecere ni nomuni cau oya. Oqo ga au kila: oi kemuni yadua, sa cakacaka vata kei ira na luvena tagane na Kalou, me sa tiki cecere mana ni vuli kosipeli ka bulataka me maqusataki na kumuni o Isireli ka vakarautaki na matavuvale ni Kalou ki na lesu lagilagi mai ni Turaga o Jisu Karisito. Ena yaca tabu i Jisu Karisito, emeni.